Bibelimik atuaqqissaaqateqalernissaq soqutigiuk
1 Bibelimik atuaqqissaaqateqalernissaq Jehovap Nalunaajaasuisut sulinitsinnut ilaavoq. (Mat. 28:19, 20) Illit tamatuminnga ilungersuutiginninnikkut Guutimut suleqataajumavit? (1 Kor. 3:9) Qilammi nunamilu tamarmi kinaassusiliup annerpaap ilisarilernissaanik inunnik allanik ikiuineq immikkut pisinnaatitaaffiuvoq annertooq.
2 Ajornartorsiutit ullumikkut silarsuarmi sukkasuumik allanngornernut pisartunut attuumassuteqartut pissutigalugit, inuppassuit eqqortuliorusuttut sooq tamakku pinerannut akissutissarserusulersimapput. Apeqqutissaat Jehovap qangali akisimavai. Inuit peqqusersuitsut Guutip oqaasii ilikkaraangamikkik tupallersarneqartarput. Taamaattumik Bibelimik atuaqqissaaqateqalernissamut periarfissat tamaasa eqqumaffigisariaqarpavut. — Uss. 3:27.
PERIARFISSAT EQQUMAFFIGIKKIT
3 Illit qanigisannik imaluunniit ilisarisimasannik uppinngitsumik atuaqqisaaqateqalersinnaanissat eqqarsaatigisimaviuk? Ilisarisimagakkit ilisimalluassavat oqaluussiffiginissaat qaqugukkut pitsaanerussasoq. Eqqarsaatigisaruk apeqqummik imaluunniit oqaaseqaammik naleqqulluartumik sallusuissummik soqutiginnilissutigisinnaasaannik saqqummiussiffiginissaat qaqugukkut pitsaanerussasoq. Soqutiginnilernerata kingunerisinnaasarpaa oqaloqatigiinneq pissarsiffiulluarnartoq atuaqqissaaqatigiilernermik nassataqartoq.
4 Aappap uppertup pissuserissaarnera amerlasuutigut aappap uppinngitsup sallusuissummiilerneranik kinguneqartarpoq. (1 Pîtr. 3:1, 2) Aappat ilaquttallu uppinngitsut ilagiinni ilisarisimaneqarnertik ataqqineqarnertillu pingaartittarpaat. Inuttut soqutigigukkit immaqa arriitsumik inussiarnersumik attaveqarfigilersinnaassavatit. Immaqalu ilaqutariinni uppertortaasoq suleqatigalugu uppinngitsumik atuaqqissaaqateqalersinnaassaatit.
5 Illumiit illumut angalaraangatta pulaaqqaarnermi atuaqqissaaqateqalerniarsinnaavugut. Qanoq ililluta? Pulaarfigisaq atuakkat ilaanni sammineqartumut tunngasumik apeqqutissaqarpat, oqaluussisartut ilaasa atuagaq pineqartoq takutiinnartarpaat misissueqatigilerlugulu. Pulaarfigisap atuagaq tuniniakkat atuarumappagu, iseqquppatilluunniit, ingerlaqqiinnarsinnaavutit immaqalu qanoq ililluni atuakkap aaqqissuussaalluartumik misissorneqarsinnaaneranik takutillugu. Pulaarnerup siulliup sivisussusissaata aalajangerniarnerani siuneqassutsit atortaruk. Kingusinnerusukkut aggeqqinnissaq imaluunnit ullu-alla oqaloqatigiinnerup nanginnissaa ilaatigut ajunnginnerusarpoq. Pulaaqqinninni oqaloqatigiinneq nangissinnaavat, imaluunniit apeqqut pulaaqqaarnerup naalernerani apeqqutigineqartoq sammeqqissinnaavat.
NALAATSORNIKKUT OQALUUSSINERMI
6 Atuaqqissaaqateqalernissaq eqqarsaatigalugu nalaatsornikkut oqaluussineq pissarsiffigilluarnarsinnaavoq. Ulluinnarni inuppassuit immaqa atuaqqissaaqatigineqarusuttut attaveqarfigisarpavut. Sunniuteqarluarnerusumik aallarneeriaatsinik siunnersuutit misiligarluarneqarsimasut ’Ræsonnerebog’-imiittut atorsinnaavavut. Allami najugaqaraluartumilluunniit aammalu illit nammineq atuaqqissaaqatigisinnaanngisaraluannik atuaqqissaaqatigineqarnissamik neqeroorfiginnittarit.
7 Nalaatsornikkut oqaluussiffigisinnaasatit eqqumaffigikkit, piareersimasarillu naqitigaaqqanik atuagassianilluunniit tusarnaartup sallusuissummik soqutiginnilissutigisinnaasaanik nassataqartarlutit. (Nal. oq. 11:1) Soqutiginnilersoq illoqarfimmit allameersuuppat najugaqarfia piumasinnaavat, paasissutissallu pisariaqartut ilanngullugit illoqarfimmi najugaani ilagiinnut nassiullugu, oqaluussisartunit allanit pulaarneqarsinnaaqqullugu.
8 Bibelimik atuaqqissaaqateqarnermik suliaq tassaanngilaq ikittuinnaat suliassaat. Ilagiinniittut tamarmik peqataasinnaapput. Ajoqersuganngortitsinissap kristumiutut pisussaaffitsinnut ilaanera eqqaamagutsigu, kajumississaagut tamaviaarluta Bibelimik atuaqqissaaqateqalerniarnissatsinnut. (kmD 9/90 Vær opmærksom på at oprette bibelstudier)