Napasuliaq Alapernaarsuiffik Iteritsi!-lu atorluartakkit
1 Napasuliaq Alapernaarsuiffik Iteritsi!-lu ullumikkut inuit atuarsinnaasaannit allanit tamanit pitsaanerpaallutillu naleqarnerpaapput. Sooq? Anersaakkut ilumoortut atuagassiat imarisaat naassaanngitsumut taakkununnga iluaqutaasinnaagamik. Inuppassuilli anersakkut pisariaqartitsinertik tamakkiisumik paasisimaneq ajorpaat, imaluunniit sumi pisariaqartitatik pissarsiarissanerlugit nalusarpaat. Apustili Paulusitut inuit isaat anersaakkut ittumik ammassallugit immikkut pisinnaatitaaffigaarpugut. — Mat. 5:3; ap. sul. 26:18.
2 Isumalluartuusarit piareersarluartarlutillu: Qularnanngitsumik angalaarfigisartakkanni savatut ittoqarpoq sallusuissummik ilassinikkusuttunik. Immaqa ilaat inussiarnersumik atuagassianik atuarnissaannut kajumissaagassaannaapput. Taamaattumik isumalluarlutit nakimaallutillu Napasuliaq Alapernaarsuiffik Iteritsi!-lu neqeroorutigisakkit. Atuagassianik nassartarit periarfissatigullu tulluartutigut tamatigut neqeroorutigisakkit, aamma atuagassiat allat atoraangakkit.
3 Atuagassianik amerlanerusunik qanoq illilluta agguaassisinnaavugut? Siullermik atuagassiat nammineerluta pingaartittariaqarpavut. Atuagassiat neqeroorutigisavut atuaqqissarsimasariaqarpagut, taamaalilluta angorniornerulluta nakimaannerullutalu saqqummiussinnaassavagut. Atuagassiat atuaraangakkit tamanna eqqarsaatigisaruk. Ilanngutassiat sorliit oqaluussininni atorsinnaanerlugit eqqarsaatigisaruk. Imminut aperisarit: ’Ilanngutassiaq una ingammik kikkunnut naleqquppa? Illumi ningiuusunut, inuusuttunut immaqaluunniit niuertunut naleqquppa? Inuusuttunik atuartunik, aappariinnik avatangiisimilluunniit isumakuluuteqartunik soqutiginnilersitsisinnaava?’ Atuarsimagutsigit ilanngutassiallu soqutiginartut nuannarigutsigit neqeroorutigilluarsinnaanerussavavut.
4 Normut nutaannginnerit atorluartakkit: Eqqaamajuk Napasuliaq Alapernaarsuiffik aamma Iteritsi! ulloq saqqummerfiat apeqqutaanani tamarmik naleqarmata. Atuagassiani paasissutissat nutaajujunnaaraluarlutik pingaannginnerulinngillat, ajoquteqanngippatalu neqeroorutiginissaat tunuarsimaarfigissanngilarput. Atuagassiat nutaanngitsut katersuinnaraluarutsigit atussanagillu ersersissavarput iluaqutaalluartut taakkua pingaartinnagit. Normuni tamani ilumoortunik inunnik soqutiginnilersitsisinnaasunik anersaakkullu pisariaqartitsinerinik matusisinnaasunik imaqarput. Atuagassiat nutaanngitsut toqquinnarnagit puiuinnarnagillu, imarisaannik eqqaamanninniarneq soqutiginnittunullu tunniunnissaat ajunnginnerussanngila?
5 Aallaqaammut anersaakkut ittunik soqutiginninngitsuugaluit amerlasuut Iteritsi!-p ikiorsimavai, anersaakkut pisariaqartitaqarnerannik paasitillugit. Napasuliaq Alapernaarsuiffik Jehovap innuttaasa anersaakkut nerisassaqarnerannut aqqutaavoq pingaarnerpaaq. Atuagassiat imminut ataqatigiilluarput, nutaarsiassamillu nuannersumik oqaluussinermi pingaaruteqarluarput.
6 Periarfissatigut tamatigut atuagassianik agguaassisarutta, qularutigissanngilarput savatut ittut anersaakkut pisariaqartitatik pisassagaat. Isumalluartuusarta, piareersarluartarluta, oqaluusseqataalluartarlutalu. Nutaarsiassamik nuannersumik oqaluussisartutut Napasuliaq Alapernaarsuiffik Iteritsi!-lu akulikitsumik atorluartariaqarpavut. (kmD 7/93 Gør god brug af . . .)