Biibilimik atuaqqissaaqateqalerniarnissaq: Jehova qinnuigiuk siulersuinissaanik
1 Nuannertaqaaq inuit sallusuissutip aqqutaanut ikiorsinnaallugit. Paulusip ima ersersissimavaa: ’Kinamiuna neriuutissarput tipaatsuutissarpulluunnit niaqorutigisarpulluunnit usorsitsaatigisaq? Ilississaaq taamaannginnerpisi . . .? Ilissimi ataqqinaatigalusilu tipaatsuutigaasi.’ (1 Tás. 2:19, 20) Jehovap piumasaraa inuit peqqusersuitsut isumannaatsumut pinissaat. Tatigilluinnarsinnaavarput allanik aamma atuaqqissaaqateqalernissatsinnik ikioqqulluta qinnutivut tusassagai. — 1 Juá. 5:14
2 Atuaqqissaaqateqalerumalluta immikkut inuttut qinnutigeqattaartuakkavut takutippaat suliatta siunertaa paasisimagipput Jehovamillu inngilinillu atorneqarnissarput kissaatigigipput. (Hes. 33:7-9, 14, 16; sar. 14:6, 7) Kipisuitsumik qinujuarutta sulissutigalugillu malillugit tatigisinnaavarput Jehovap peqqusersuitsut uummataat ammarluinnassagai ’sallusuissummi ikkussukkat naajartortissinnaaqqullugit’. — ap. sul. 16:14; 1 Kor. 3:6.
3 Nakkutilliisoq angalasartoq oqaluttuarpoq: „Oqaluussisartoq arnaq eqiasuissutsimigut piumassutsimigullu ilisimaneqartoq pingasunngornikkut ullaap tungaani katersuuteqataavoq. Jehova akuttunngitsumik qinnuigiuartarsimavaa ikioqqulluni atuaqqissaaqateqalernissaminik. Katersuutsitsinermi qinunermi atuaqqissaaqateqalerniarnissaq eqqaaneqarpoq. Ataatsimoortunilu angalaaqatigisassat naammanngimmata kaammattorneqarsimavoq kisimiilluni angalaarnissaanik. Pulaakkami siulliit ilaanni arnaq oqarpoq: ’Guutimut qinoqqammerpunga Jehovap Nalunaajaasui maannaqqullugit. Iserniarit.’ Sapaatip akunnerata ingerlanerani arnaq marloriarlugu pulaarneqarpoq, atuakkanik marlunnik Biibilimillu pivoq atuaqqissaaqatigineqartalernissaalu aallartillugu.“
4 Inuit naapertuilluartut qinnutaannut Jehova qisuariartarpoq. Pavunga pisarput ’Guutip saani eqqaaneqarlutik’. (ap. sul. 10:4) Qanga Jehovap angutit soorlu Filip, Ananias Peterilu atortarsimavai kiffaatikkusunnerat pissutigalugu, qasusuillutik qinujuarnermikkut qilammiillu kaammattuutinut malinnikkusussuseqaramik. (ap. sul. 8:10) Taamaattumik tunuarsimaaqinak qinnuigissallugu suli annerusumik peqataanissannik kiffartuuteqarnermi tamatumannga pilluaqqusaagaarsimasumi. (kmD 95/5 Bibelstudiearbejdet)