Kikkut tusarliussatsinnut tusaajumassappat?
1 Assersuutitut oqaatigissagaanni inuit paasissutissanik imaaginnavissunik pilersorneqarnermik ipitinneqalerput, amerlanerit tutsuiginartuunatik allaallumi tammarsaataallutik. Tamatuma nassatarisaanik inuit sualuppallaamik pilersorneqartutut misigisimapput, Guutillu naalagaaffia pillugu tusagassamik inuit tusarnaartinniarnissaat uatsinni ajornakusoorluni. Guutip oqaasiinut tusarnaarunik qanoq ajunngitsigisumik sunnerneqarsinnaallutik paasisimanngilaat. — Lúkarse 11:28.
2 Nuannaarutigaarput nunarsuup ilarujussuani titusindilippassuit tusagassamut tusaajumammata angerlarsimaffimmilu atuaqqissaaqatiginninnissamik neqerooruterput ilassisimammassuk. Angalaartarfinnili allani taama qisuariarluartoqartiginngilaq. Pulaakkagut amerlasuut kinguneqarluanngitsoortarput, tamatumalu eqqarsalersissinnaavaatigut kikkut tusarliussatsinnut tusaajumassanersut.
3 Nikallunnginnissarput eqqumaffigiuartariaqarparput. Paulus nassuiaavoq: ’Kinaluunniimmi Jehovap aqqanik torlorfiginnittoq annakkumaarpoq.’ Qanorli ilillutik . . . tusaamanngisartik torlorfigissavaat? Qanorlu ilillutik oqaluussisoqanngippat tusassappat? . . . Soorlu allassimasoq: ’Eqqissinermik nalunaarummik ajunngitsumik oqaluutiginnittut isigaasa ila sakimminassusii.’ (Rûm. 10:13-15) Naalagaaffiup inerittussaanik aallussilluarluta siaruarterigutta Guutip ajunngitsumik isumallit uummataanni inerittussaq taanna sorlanitsissavaa ineritsillugulu. — 1 Kor. 3:6.
4 Akuttunngitsumik pulaaqqiineq — angusaqarluarnissamut matuersaat: Isumaqaraanni angalaartarfinni amerlavallaanngitsut tusarliussatsinnut tusaajumasut taava soqutiginninnermik ersersitsisut tamaasa malittaralugit aallunnerusariaqarpagut, inuit atuagassianik pisimappata pisimanngippataluunniit. Inerittussanik siaruarterigutta naluarput sukkut puttutissanersoq naassanersorlu. (Nal. oq. 11:6) Biibilimiit takutitaqarniarluta piareersarluarsimagutta immaqa taava pulaakkatta uummataanik killiisinnaavugut naak sivikitsuinnarmilluunniit pulaaraluarutsigit. Naqitaaqqamik atuagassianilluunniit nutaanik tunisinnaavarput. Kingorna Biibili qanoq atuaqqissaartarnerlutigu takutinnissaanut immaqa periarfissarsisinnaavugut. Ilungersornerput Jehovap qanoq pilluaqqugaa misigalugu nuannaarutaassaqaaq. — Tuss. 126:5, 6.
5 Arnap soqutiginninnermik ersersitsisup naqitaaraq pisimavaa. Qaammatit marluk aatsaat qaangiummata oqaluussisartup angerlarsimaffiani naapeqqippaa, taannali arnaq oqaloqatigineqarnissaminut ulapippallaarsimavoq. Arnaq naqitaaqqamik tamatuminngarpiaq allamik nutaamik peqqippoq. Angerlarsimaffiani naapinniartuaraluarlugu aatsaat qaammatit pingasut qaangiummata angerlarsimaffiani oqaluussisartup naapeqqippaa, napparsimasoq. Sapaatip-akunnera ataaseq qaangiummat oqaluussisartup pulaaqqippaa naqitaararlu sivikitsumik oqaloqatigiissutigaat. Sapaatit-akunnera tulliuttoq arnaq Naalagaaffiup tusarliussaanut soqutiginnivilluni ersersitsivoq. Inuunermini allanngortoqarmat anersaakkut pisariaqartitsilluni paasilersimavaa. Atuaqqissaaqatigiinneq aallartinneqarpoq, kingorna sapaatit-akunneri tamaasa kajumilluarluni atuaqqissaartalerpoq.
6 Naatikkusutagut suugaluarunilluunniit assigiipput naasuugaluarpata, naatitaagaluarpata imaluunniit Naalagaaffimmik tusarliussamik soqutiginnittuugaluarpata — tamarmik paaqqutarineqartariaqarput. Piffissaq, nukiit, isumassuerusunneq tunniutiinnannginnissamillu aalajangernissaq pisariaqarput. Ukioq kingulleq 330.000-t kuisipput. Naalagaaffiup inerittussai uummataanni sorlanissimapput. Oqaluussiuarutta qularutigissanngilarput amerlasuut tusarliussatsinnut tusaajumassasut. — Naleqqiuguk Galâsiamiut agdlagkat 6:9.