Kajumilluta sassarpugut
1 Tussiaasiortoq David Jehovap innuttai pillugit siulittuutaasumik oqarpoq „kajumillutik sassarumaarput“, tassa imaappoq ilaat nammineq piumassutsiminnik sassarumaartut. (Tuss. 110:3) Tamanna nunarsuaq tamakkerlugu qatanngutigiissutut peqatigiinnit eqquutitinneqarpoq. Ukiuni kiffartuussiffiusuni tallimani kingullerni tamani Jehovap innuttaasa nalunaaquttap akunneri 1 milliard sinnerlugit Naalagaaffimmik nutaarsiassap nuannersup siaruarterneranut atorsimavaat. Oqaluussinerup ajoqersuganngortitsinerullu saniatigut allatiguttaaq ’kajumilluni sassartoqarsinnaavoq’ allanullu ikiuulluni.
2 Kajumissuserput qanoq takutissagipput: Ilagiit iluanni ataatsimiinnermut biilinit ingerlatinneqarnissamik atorfissaqartitsisoqarpa? Neqeroorfigisinnaavigit? Napparsimasoqarpa innarluuteqartoqarpaluunniit imaluunniit napparsimmavimmiittoqarpa? Tamakkununnga nammineq iliuuseqarlutit pulaarsinnaassavigit imaluunniit arlaannik ikiorlugit? Aamma imaassinnaavoq arlaannik, immaqa ilaqutariit tamarmiusut, qiimmassarneqarnissaminnik atorfissaqartitsisut. Ilaqutariittut atuaqqissaaqatigiinnissi ilaannut taakkua qaaqqunissaat eqqarsaatigisimaviuk? Pionerip oqaluussisartulluunniit allap oqaluussiartoqartigineqarnissaminik atorfissaqartitsisinnaavoq. Soormi oqaluussiartoqatigiumallugit neqeroorfigigukkit? Tamakku nammineq piumassutsitsinnik uppeqatitta ajunngitsuliorfigisinnaanerisa ilaannaraat. — Gal. 6:10.
3 Qatanngutit angutit Jehovap peqatigiissortaani atorneqarusunnertik takutissinnaavaat utoqqaanertanut ilagiinnilu kiffartortunut piumasarisaasut maleruarniarlugit sulissutiginerisigut. (1 Tim. 3:2-10, 12, 13; Tít. 1:5-9) Amerliartortilluta qatanngutit angutit piukkunnartut amerlanerusut kajumillutik oqaluussinermi siuttuusut, ajoqersuisut ilagiinnilu paarsisutut suliaqartut atorfissaqartinneqarput. — 1 Tim. 3:1.
4 Jehovamut kiffartuussinitsinni immaqa ilaat ilaannikkut ikiorti-pioneriusarsinnaapput. Silatusaartumik piffissamik pilersaarusiornermi allannguinikkut allaat immaqa aalajangersimasumik ikiorti-pioneerinngortoqarsinnaavoq imaluunniit allaat pioneerinngortoqarsinnaalluni. Pissutsit atukkatta pisinnaatippaa pisariaqartitsiffiunerusumut nuussinnaaneq? Betelimi kiffartuussinissamut imminut neqeroorutigisinnaavugut taamaalillutalu silarsuaq tamakkerlugu suliamut siuarsaaqataalluta? Aammattaaq silarsuaq tamakkerlugu sanaartugassanut annertuunut — naalagaaffilersaartarfissanut, ataatsimeersuartarfissanut immikkoortortaqarfissanullu kajumillutik sulisussanik pisariaqartitsisoqarpoq. Suliassat pingaaruteqartut tamakku pisariaqaleraagata kajumillutik sassartut pingaartinneqarluartarput pilluaqqusaangaartarlutillu. — Lúk. 6:38.
5 Piffissami pissaganartumi inuuvugut. Jehovap anersaani ikiortigalugu innuttani kajumittut aqqutigalugit annertuumik suliaqarpoq. Peqatigiissortani aqqutigalugu Naalagaaffiup suliassaanut peqataanerunissatsinnut Jehovap qaaqqugaagatsigut imminut aperisariaqarpugut: ’Suli kajumillunga sassartarpunga?’ Taavaa qinunikkut uummatitta inissisimanera pissutsillu atukkavut misissortariaqarpavut. Guutimut tunniusimanitta kiffartuussinissami illernartumi pisinnaasarput tamaat iliuuseqartissavaatigut, Jehovap uummataanik nuannaangaartitsisumik. — Sef. 3:17.