Jehova naajartortitsisoq tunaariuk
1 „Ilagiinnik nutaanik pilersitseqataanerup nuannissusia aatsaat misigaara. Ukiut marluk sinnerlugit tamaviaartariaqarsimavugut Jehovalu ’naajartortitsisoq’ kipisuitsumik qinnuigisariaqartarsimallugu tunaarisariaqarsimallugulu.“ Pioneeri ilumooqqissaartoq Jehovap naajartortitsisuuneranik tatiginninnermik ilikkarsimasoq taama allassimavoq. (1 Kor. 3:5-9) Inunnik anersaakkut soqutigisalinnik ujarlernitsinni Guutip tapersersuinera pisariaqartipparput kiffartornerput inerititaqarsinnaassappat. — Uss. 3:5, 6.
2 Amerliartorneqassappat isumassuisoqartariaqarpoq: Sallusuissutip naatsiiassartai ineriartussappata paarineqartariaqarput. Ulloq ataaseq marlulluunniit pulaaqqaarnerup kingorna pulaaqqikkaanni kinguneqarluartarpoq. Qiimallutillu inussiarnerit. Pulaakkat qasukkartiguk. Oqaluppallaaqinak. Pulaakkannut ilisaritigit inuttullu soqutigigit takutiguk.
3 Aggustimi septembarimilu atuagaatitta ilaat nutaanngitsut neqeroorutigissavavut, siunnersuutillu Naalagaaffimmut Kiffartorneq-mi juulimoortumi eqqartorneqartut atorsinnaavavut. Aammali naapissimasatsinni soqutiginninneq malittarisariaqarparput. Taamaaliorsinnaavugut pulaaqqiilluta Biibilimillu atuaqqissaaqateqarnissaq neqeroorutigalugu. (Mat. 28:19, 20) Atuagassiaaraq Guutip sumik piumaffigaatigut? atuaqqissaaqatigiissutissatut atorneqarsinnaavoq. Immaqa siunnersuutit sisamat tulliuttut arlaat atorsinnaavatit.
4 Silarsuarmi pissutsinik isumakuluuteqartoq oqaloqatigisimagukku oqaloqatigiinneq nangissinnaavat ima oqarlutit:
◼ „Isumaqarpunga ileqqussatigut ajortunngorluinnarneq uattulli isumakuluutigigit. Nakuuserneq, avinnerit, meeqqanik atornerluinneq, salluneq tillinnerlu pillugit annilaarnartunik tusarlerneqartarpugut. Isumaqarpit Guutip qanoq inuunersugut soqutiginngikkaa? [Pulaagaq akili.] Guutip inuit maleruagassaannik tunisimavai, tamakkualu maleruarnissaat artornanngilaq.“ Juánasip agdlagai sujugdlît 5:3 atuaruk. Atuagassiaaraq Guutip sumik piumaffigaatigut? takutiguk. Ilinniagassaq 10 qupperuk immikkoortorlu siulleq atuarlugu. Immikkoortuni 2-6-ini oqaatsit uingasut erseqqissakkit pulaagarlu aperalugu iliuutsit suut innuttaaqatigiinnut ajoqutaanerpaasorinerai. Immikkoortoq akissutaanut naleqqulluartoq atuaruk, periarfissaqaruillu allassimaffik ataaseq marlulluunniit atuarlugit. Naggataatigut immikkoortoq 7 atuaruk oqaloqatigiinnissilu nanginnissaanut isumaqatigiissuteqarit.
5 Ilaqutariittut inuunermik pingaartitsisunik oqaloqateqarsimaguit ima oqarsinnaavutit:
◼ „Guuteqarnera naatsorsuutigigutsigu isumaqarpit ulluinnarni inuunitsinni ikiussagaatigut, assersuutigalugu ilaqutariilluartutut inuunermut atatillugu?“ Pulaagaq akili. Guutip sumik piumaffigaatigut? takutiguk. Ilinniagassaq 8 qupperuk, nassuiarlugulu ilaqutaasut ilaasortaannut tamanut Biibilimeersunik najoqqutassiaqartoq. Atuagassiaaraq Biibililu atorlugit pissarsinarnerpaamik qanoq atorneqarsinnaanersut takutikkumallugu neqeroorutigiuk. Atuagassiaaqqami qupperneq 2-mi siunnersuutit maleruakkit. Ilinniagassap sinnera samminiarlugu, imaluunniit naasimagussiuk ilinniagassaq alla pulaakkap qinigaa samminiarlugu, pulaaqqinniarlugu isumaqatigiissuteqarit.
6 Biibilimik atuaqqissaaqatigiinnissaq toqqaannartumik ima neqeroorutigineqarsinnaavoq. Atuagassiaaraq takutiguk oqarlutillu:
◼ „Atugassiaaraq una Biibilimi ajoqersuutit tunngaviunerusut pillugit pikkorissaatinik imaqarpoq. Quppernerni tamani inuit ukiuni hundredelikkuutaani apeqqutigisartagaasa akissutaat nassaarisinnaavatit. Assersuutigalugu: Guutip nunarsuaq sumik siunertaqarfigaa?“ Ilinniagassaq 5 qupperuk ilinniagassallu aallaqqaataani apeqqutit atuakkit. Pulaagaq aperiuk apeqqut suna soqutigineruneraa, tamatumunngalu tunngatillugu immikkoortut tulluartut atuakkit allassimaffiillu quppertarlugit. Nassuiaruk apeqqutit allattaaq taama piuminartigisumik nalerisimaarnartumik akineqarsinnaasut. Apeqqut alla samminiarlugu pulaaqqiinissat neqeroorutigiuk.
7 Immaqa Biibilimik atuaqqissaaqateqartarnissamik neqeroorummik pisariinnerusumik atugaqarusupputit. Ima oqarsinnaavutit:
◼ „Nalunngiliuk minuttialuinnaat atorlugit apeqqut pingaartoq Biibilimut tunngasoq akineqarsinnaasoq? Assersuutigalugu . . .“ Taava apeqqut atuagassiaaqqap aallaqqaataani eqqaaneqartut ilaat pulaakkap soqutigisinnaasaa eqqaajuk. Naalagaaffimmut Kiffartorneq-mi marsi 1997-imoortumi, qupperneq 4-mi, allaaserisami „Pulaaqqiisinnaanissannut nakimaassuseq ineriartortiguk“-mi immikkoortuni 14-imi 15-imilu apeqqutigineqarsinnaasunik siunnersuuteqarpoq.
8 Pulaaqqiisarnermi Biibilimillu atuaqqissaaqateqartarnermi unamminiarnartumik nuannaarluta tigusinerput ’Guutimut suleqataanermut’ ilaavoq. (1 Kor. 3:9) Soqutiginninneq naammattuugarput aallussilluarluta ineriartortinniarsarigaangatsigu Jehovallu naajartortitsinissaa tatigalugu, nalerisimaarneq piviusoq suliassani allani anguneqarsinnaanngitsoq misigiumaarparput.