Inuusuttut aperipput:

„Qanoq ilillunga aningaasat naammaattusaarsinnaavakka?“

„ILLIT aningaasat qanoq isigaagit? Atuinnartarpigit, sipaartarpigit, imaluunniit allaat aningaasatigut tigumatuuit? Inuusuttorpassuit pigisatik atortarpaat tamatumalu saniatigut aningaasat eqqarsaatigineq ajorlugit — angajoqqaamik pisariaqartitaminnik tunniussisarnerat sungiutiinnarsimagamikku.

Angajoqqaalli inuuneq naallugu meeqqaminnut isumannaarsuutaasinnaanngillat. Naalli immaqa atuanngiffinni suliffeqaraluarlutit amerlasuunillu kaasarfimmiussaqartaraluarlutit, taamaattoq aningaasaatitit asuliinnaq atortariaqanngilatit. Bibelimi ima mianersoqquneqarpugut: „Pisuussutimmi imaaliallannerinnakkut peerutereersimassapput, sulunittutut ilillutik nattoralittut qullarsareersimassapput [tingereersimassapput].“ (Ussatit 23:5) Qanoq ilillutit aningaasaativit ’tinginissaat’, tassa nungunnissaat, pinaveersimatissinnaaviuk? Siullermik aningaasat suunersut paasisariaqarpat.

Sooq aningaasat pinngitsoorneqarsinnaanngillat?

Aningaasat tassaapput taarseraatit sunniuteqarluartut. Qinerlerfissiami Encyclopædia Britannica-mi allassimavoq ’aningaasat tassaasut uninngatineqaannaratik atorneqartuartuusutuat’. Aammattaaq radio, imaluunniit nalilik, atorneqartuartuuvoq. Kisianni akigiuminarpallaanngilaq. Assersuutigalugu, takorlooriaruk radio illit pigisat iffiaq qaqortumut akiginiassagaluarukku. Radio iffiaq qaqortumit naleqarneroqaaq, iffiortulli radio atorfissaqartilluinnanngikkuniuk iffiaq qaqortumik taarserumanavianngilaa. Taamaappallu radio pigisat naleqanngitsutut oqaatigineqarsinnaassaaq! Akerlianilli, aningaasat nunarsuarmi tamanngajammi akiliutissatut akuerisaapput.a Nioqqutissanut kiffartuunneqarnermullu aningaasat taartigiissutigiuminartuupput.

Taamaattumik Salomonip oqaasii Nalunaajaasup oqaasii 7:12-imi [NV] allassimasut silatuupput: „Aningaasat sernissuutaapput.“ Aap, aningaasaateqaraanni inuunermi pisariaqartitat ilorrisimaarutillu amerlasuut pisiarineqarsinnaapput. Soorlu Salomon nangilluni allassimasoq: „Qassimiuaarneq nuannaalersitsisarpoq viinnilu qiimmassaataasarluni. Aningaasallu taamaaliorsinnaalersittarpaatsit.“ — Nalunaajaasup oqaasii 10:19.

Aningaasanilli pissarsinissaq ajornaatsuinnaaneq ajorpoq. Inersimasut ikinnerpaartaat killeqanngitsumik pissaqarput; angajoqqaavittaaq aningaasat ilinnut tunniuttakkatik pissarsiariniarlugit qularnanngitsumik suleruloortariaqarput. Salomon ima aperivoq: „Inuummi suleruloornini . . .suallaatigissanerpai?“ (Nalunaajaasup oqaasii 2:22) Immaqalu angajooqqavit suliffitsik nuannaarivallaanngilaat, immaqalu akissarsiaqarpallaaratik. Tassami angajoqqaat amerlasuut ullaamiit unnummut sulisarput — imminnut meeqqaminnullu pisariaqavissuinnaat piniarlugit.

Taamaattumik aningaasat taamaattussaannartut isigisariaqanngillat, ataqqinnittumilli isigisariaqarput silatuumillu atorlugit. Aningaasat atugassat naatsorsuusiussallugit pitsaanerussaaq.

Naatsorsuusiornerup iluaqutaassusia

Naatsorsuusiorneq tassaavoq aningaasanik isertitanik atugassanillu pilersaarusiorneq. Atuagassiami ’Teen-imi 1985-imi majimi allassimavoq: „Aningaasanut tunngasunik aqutsisinnaalissagaanni atorluarsinnaasumillu naatsorsuusiorsinnaalissagaanni siullermik paasiniartariaqarpoq aningaasat atorsimasat sumut atorneqarsimanersut.“ Tassa siullermik aningaasartuutissatut ilimagisatit tamaasa tulleriiaarlugit allattortariaqarpatit — angallanermut, atisanut, eqqiluisaarnermut, sukisaarsaatinut ilaallu ilanngullugit. Taavalu assersuutigalugu qaammammi ataatsimi aningaasartuutitit naatsorsortariaqarpatit. Taava qanoq amerlatigisut atussanerlugit ileqqaassanerlugillu piviusorsiortumik pilersaarusiorsinnaalissaatit.

Taamaalioreeruit, allakkat puussaat aningaasartuutinut assigiinngitsunut atugassatut allagarsersinnaavatit. Assersuutigalugu, ataaseq „angallanneq“-mik allagarsersinnaavat, allalu ileqqaassutissannut pisiarerusutannut allagarserlugu, assersuutigalugu „kiat nutaaq“-mik imaluunniit „ilulleq nutaaq“-mik. Taava akissarsiguit kaasarfimmiussarsiguilluunniit aningaasartuutissatut ilimagisatit naapertorlugit allakkat puussaannut agguarlugit iliorassavatit. Aningaasartuutissallu assigiinngitsut akililerukkit, allakkat puussaannit aningaasat tiguinnarsinnaavatit.

Aningaasatigut naatsorsuusiorsimavit maleruarsinnaanngisannik? Inuppassuit misilissimavaat. Arnaq inuusuttoq Leah-mik atilik oqaluttuarpoq: „Arlaleriaqalunga naatsorsuusiortarsimagaluarpunga, maleruarpallaarnaguli.“ Misiutiginngilaali: „Naatsorsuusiara malinniarsarigaangakku aningaasanik amerlanerusunik ileqqaartarpunga. Pisariaqartinngisakkalu pisiarisanngilakka.“ Tassa imminut naalakkersinnaaneq pisariaqarpoq. Aalajangiiniarit eqqortillugulu! Aningaasaatitit atulussinnartarukkit imminut nangarsimaarsinnaanissannik kisinnak Jehova qinnuigisaruk. — Lúkarse 11:13.

Soqutiginarpoq apustili Paulusip kristumiut Korinthimiittut naatsorsuusiornissaannik siunnersorsimammagit. ’Sapaatip akunnerisa ulluisa siulliani kinaluunniit ilarsi immini iluanaarnini missiliorlugu toqqorsilluni ilisisarili,’ allassimavoq. (1 Korintumiut 16:1, 2) Toqqortat taava kristumiut ajorsartut iluaqutissaannik aningaasaateqarfimmut tunniunneqartarput. Qularnanngitsumik kristumiut Korinthimiittut imminnut naalakkersinnaasariaqarput Paulusip siunnersuutaa maleruarniarlugu, tamanilli naleqartumik pilluaqquneqangaarput.

Qularnanngitsumik naatsorsuusiamik maleruaanissat iluaqutigissavat. Angut inuusuttoq Avianimik atilik oqarpoq: „Ussatit 21:5-imi eqqartorneqartutut issimavunga: Akisarsiffissap tullia sioqqullugu tuaviorpallaartarpunga ’ajunaarutissiinnarlunga’. Aningaasatigut naatsorsuusiortalerama akisussaassutsimik misigisimanerulerpunga.“

Akiligassarsinaveersaarit

„Maanna pisigit, kingorna akilerlugu!“ pisiniarfinnit amerlasuunit taama kajumissaaruteqarpoq. Akiligassarsineq ajunngissinnaavoq — mianersorilli. Isumaliorluaqqaarnani kingorna akilerumaakkanik pisigaanni, ’inussiaataalernarpoq’, soorlu angut inuusuttoq Kelvinimik atilik oqarsimasoq. — Naleqqiuguk Ussatit 22:7.

Inuusuttut ilaat akiligassarsisinnaaneq pissutigalugu pisariaqartinngisaminnik akissaqartinngisaminnillu ajornanngitsuaqqamik pissarsisarput. Qaammatillu tamaasa akiligassat akilertanngikkaanni, erniaqartarput. Akiligassat akilersornerat sivisunerujartortillugu akitsoriartortarput. Taamaattumik pilerigisamut katersineq toqqaannartumillu akiliineq akikinnerusarpoq.

„Toqqortukkat akisarsiatut ipput“

Arnaq inuusuttoq Phyllisimik atilik oqarpoq: „Tassangaannartumik ajornartooriataartoqarsinnaavoq aningaasanillu saniatigut pisariaqartitsisoqaleriataarsinnaavoq.“ (Naleqqiuguk Nalunaajaasup oqaasii 9:11.) Assersuutigalugu, napparsimalersinnaavutit sulineq ajulerlutit, angajoqqaatilluunniit aningaasatigut ajornartorsiuteqalersinnaapput taamaalillutillu kaasarfimmiussissinnaajunnaarlutit. Taamaattumik silatusaarnerussaaq aningaasat toqqortassat naatsorsuusiamut ilaappata. Taava aningaasatigut ajornartorsiorsiulissagaluaruit ilinnut artornannginnerussaaq.

Soorunami aningaasat toqqortukkatit aningaasanik nakkaatitsivimmut imaluunniit kamippaat puukuannut toqqortorsinnaavatit. Jesusilli aningaaserivimmi aningaasanik erniortitsilluni toqqortuinissaq eqqartorpaa. (Matîuse 25:27) Angajoqqaatit aperisinnaavatit aningaaserivimmi kontoqalernissat pitsaassannginnersoq. Aningaasarpassuarnik ilisisariaqanngilatit — pingaarnerpaavorli aningaaserivimmi aalajangersimasumik akuttunngitsumik aningaasanik toqqorsisarnissat.

Taavali ilaquttatit piitsuuppata nunamilu aningaasatigut kinguarsimasumi inuusuttut namminerisaminnik aningaasaateqakulanngiffigisaanni najugaqarlusi? Taamaakkaluarpalluunniit ilaquttatit isumalluutissaqassapput, pisariaqavissuniinnaagaluaq. Ilaquttavilli isumalluutissaat ’ajornanngitsumik pissarsiatut atupallagassatullu’ isigigukkit, taava nammineq ilaquttavillu soqutigisasi assortorpatit. Qularnanngitsumik angajoqqaavit tamaviaarlutik pissarsiaannut qujasuitsoorusunngilatit. — Ussatit 29:21.

Taamaattumik aningaasanut akisussaassuseqarpaluttumik isiginnittaaseqalerniarniarit, aamma naak aningaasanik namminerisannik ikittuinnarnik peqaraluarlutit — peqanngilluinnaraluarlutilluunniit. Assersuutigalugu, nerisassat assigisaallu maangaannartinnaveersaarsinnaavatit. (Takuuk Juánase 6:12, 13.) Aamma pigisat akisuut taarserneqaruminaatsut paarilluakkit, soorlu isarussat atuarfimmilu atuakkat. Angajoqqaavit taamaaliornerit pingaartissavaat.

Ussatit 11:28-mi allassimavoq: „Pisuussutiminnik toqqammaveqartut orlusussaapput, iluartulli assigaat piluttat siaartut.“ Aningaasat ikiortigalugit inuunermi pisariaqartitat pissarsiarineqarsinnaapput, kristumiulli pisuunngornissani ilungersorluni anguniartariaqanngilaa. Soorlu angutip inuusuttup Matthewimik atillip oqaatigigaa: „Aningaasat naleqquttumik inissaqarput, pingaarnerpaajunngillalli.“ Aap, aningaasat atortussiaannaapput, aap, ’sernissuutissiaannaapput’. (Nalunaajaasup oqaasii 7:12) Aningaasaativit silatuumik eqqarsaqqaarlutillu atornissaat ilinniaruk. (gD 22/12 88)

[Quppernerup ataani ilanngussaq]

[Qupp. 14-mi issuagaq]

„Naatsorsuusiara malinniarsarigaangakku aningaasanik amerlanerusunik ileqqaartarpunga. Pisariaqartinngisakkalu pisiarisanngilakka.“

[Qupp. 15-mi assiliartaq]

Meeqqat akisussaassutsimik misigisaqartut aningaasaatimik ilaat toqqortittarpaat