Inuusuttut aperipput

Sooruna tamatigut inuusuttut allat nuannisartartut?

„Nuannisarniaannarpugut, oqitsuunngilarli,“ Jason 15-inik ukiulik anersaamivoq.

INGAMMIK inuusuttut nuannisarusuttarnerat pissusissamisoorpoq. Inuusuttut amerlanersaannut nuannisarneq nerinertulli sininnertullu pingaartigaaq. Ikinngutit tusagassiuutillu aqqutigalugit inuusuttut sunngiffimmi sammisassanik assigiinngitsunik tamaviaarullugu aallussinissaminnut sunnerneqartarput. Misissuinerup takutippaa inuusuttuaqqat akornanni ikinngummut pulaarnermut, TV-mik isiginnaarnermut, filmertarfiliarnermut, festernermut qitinnermullu unnuk atussallugu nuannarineqartorujussuusoq. Amerlasuut aamma atuarneq, pinnguaateqarneq, timersorneq nipilersuutinillu tusarnaarneq nuannaraat.

Inersimasut paasiuminaatsippaat sooq inuusuttut ilaat, soorlu Jason, nuannisarnermik amikkitsisutut misigisartut, uffa nuannersorpassuarnik sammisaqaraluartoq. Inuusuttulli kristumiut ilaat taama misigipput. Casey, Jehovap nalunaajaasuisa ilaat, oqarpoq: „Atuarfimmi ikinngutit tamarmik festeraangata ataatsimooraangatalu, avataaniilluinnartutut misiginartarpoq.“ Tamannali ingasattajaarnerunngila?

Biibilip nuannisarneq inerteqqutigaa? Naaggarluinnaq. Biibilip Jehova ’Guuti pilluartoq’-mik taavaa. (1 Timûtiuse 1:11) Taamaattumik tupaallannanngilaq kunngi Salomon ima oqarsimammat: „Suut tamarmik aalajangersimasumik piffissaligaapput: qiaffissaqarpoq illarfissaqarlunilu, kappialaffissaqarpoq qittaserfissaqarlunilu.“ (Nalunaajaasup oqaasii 3:1, 4) Hebriiarit oqaasiat ’illarpoq’-mik uani nutserneqarsimasoq, oqaatsillu naggueqatigisai aamma ima nutserneqarsimapput: ’pississaarpoq’, ’pinnguaatigaa’, ’aliikkutaraa’ aamma ’qittapput’. — 2 Samuel 6:21; Job 40:24; Eqqartuussisut 16:25; 2 Moses 32:6; 1 Moses 26:8.

Biibilip nalaani Guutip innuttaasa aliikkusersuutit peqqinnartut, soorlu nipilersuutinik nipilersorneq, erinarsorneq, qitinneq, oqaloqatigiinneq assigiinngitsunillu pinnguaqatigiinneq, nuannisaatigisarsimavaat. Piffissani immikkut ittuni festertarsimapput. (Jeremia 7:34; 16:9; 25:30; Lúkarse 15:25) Jesus ilaatigut katittorsiortunut ilaasimavoq. — Juánase 2:1-10.

Taamaattumik ullumikkut kristumiut inuusuttut aliikkusersuutinut peqqinnartunut peqataasinnaapput. Biibilimi allassimavoq: „Inuusutsillutit qiimasaarniarit, uummativit nuannarisai malillugit iliortarit; nuannaarniarit inuusunnerpit ulluini.“ Salomonilli mianersoqqussutissaqartippaa: „Eqqaamassavalli qanoq iliorninni tamani Guuti akisussaaffigissagakku.“ (Nalunaajaasup oqaasii 11:9) Aap, qinersininnut Guuti akisussaaffigaat. Taamaattumik aliikkusersuutinik qinersininni ’mianersoqqissaartariaqarputit saqilluarniarlutit, ilisimaatsutut pinnak ilisimatuutulli’. (Evfisumiut 5:15, 16) Sooq tamanna pisariaqarpa? Aliikkusersuutinut atatillugu inuusuttorpassuit ilisimaatsumik qinersisarmata.

Nuannisarneq ingasaanneqaleraangat

Biibilip nalaani Israelikkut ilaasa nuannaarsarnertik killilersinnaasarsimanngilaat, unnuaq naallugu perorsarsimarpalunngitsutut festertarsimallutik. Pruffiiti Esajas oqarsimavoq: „Eqqanaq taakku ullaarnganit imigassarsiortartut, unnuarsuarmullu viinnisornermit sinngorullersartut. Sianaarlutik kukkilattariarsorlutillu nalliuttorsiortarput, qilaatersorlutik qarlortarlutillu viinnisorlutillu.“ Nereqatigiinneq, nipilersukkanik tusarnaarneq qitinnerlu kukkunerunngillat. Esajasili imerujoorumatuut taakku pillugit ima oqarpoq: „[Jehovap] suliai takunngilaat.“ — Jesaja 5:11, 12.

Aamma ullumikkut inuusuttut nuannisarniartut akornanni Guutip eqqarsaatigineqarneq ajornera nalinginnaavoq. Inuusuttut ilaasa Guutip najoqqutassiai piaaralutik unioqqutittarpaat katissimanatillu kinguaassiutitigut atoqatigiittarlutik, aserorterisarlutik, ikiaroornartutortarlutik allatigulluunniit soqqusaatsuliortarlutik „nuannaarniassagamik“. Ilaannikkut inuusuttut ileqqorlukkumaneq ajorput, ingasaassinaveersaarnissarli puiortarlugu. (Ussatit 23:20; 1 Timûtiuse 3:11) Nuannaarsarniarlutik katerisimaaraangamik nuannersussarsiornerminni ingasaasseqqajaasarput. — Naleqqiuguk 1 Korintumiut 10:6-8.

Qanittukkut Iteritsi!-p inuusuttut ilaat aperai: „Ullumikkut silamiut festerneranni susoqartarpa?“ Inuusuttuaraq niviarsiaraq akivoq: „Ikiaroornartutortarput aalakoortarlutillu.“ Andrew atuarfimmi nukappiaqqat ilaat festeriartuaannartut pillugit oqaluttuarpoq: „Qanoq imersimatiginertik usorsitsaarutigiuaannarpaat.“ Jason sapiiserluni ima oqarpoq: „Silamiut festerneranni ajortunik pisoqartuaannangajappoq.“ ’Imerajunneq’ imaluunniit ’perorsarsimarpalunngitsutut festerneq’ Biibilimi assuarineqarmat, inuusuttut Guutimik mianerinnittut katerisimaarnerit taamaattut ingalassimasariaqarpaat. — Galâsiamiut 5:21.

Aliikkusersuutit ajoqutaanngitsuusorisat aamma ersinngitsunik navianaateqarsinnaapput. Assersuutigalugu ullumikkut filmini nuannarineqarnerpaani atisaqanngitsunik merianngunaannartumillu nakuusertunik filmiliortoqartarpoq. Erinarsuutit nuannarineqartut kinguaassiuutitigut atoqatigiinnermut tunngasunik taallaqarajupput. Rockimik tusarnaartitsinerit ikiaroornartunik atornerluinermik, nillianernik nakuusernernillu, ilisarnaateqarajupput.a

Angajoqqaat naameeraangata

Kristumiutut paasisariaqarpat ilutivit nuannarisaat tamaasa iliuuserisinnaanagit. Jesus oqarpoq ajoqersukkani ’silarsuup ilaginngikkai’. Tamanna isumaqarpoq inunnit allanit allaanerusut. (Juánase 15:1) Guutimik mianerinnittunik angajoqqaaqaruit taakkua tamanna eqqumaffigeqqissaassavaat. Angajoqqaavit sernissorniarpaatsit, taamaattumik inuusuttut allat iliuuserisinnaasaasa ilaannik ilaannikkut nangartarsinnaavaatsit itigartivillutilluunniit. Tamannalu akueriuminaassinnaavoq. „Tamatta nuannaarusuttarpugut,“ inuusuttuaraq niviarsiaraq erseqqissaavoq. „Angajoqqaavut inuusuttuunerminni nuannisartarsimassapput, ilaannikkulli misiginartarpoq soorlu parnaarunniaraatigut.“

Angajoqqaat siunnersuutaat malikkuminartuaannangillat, naak tunngaviusutigut amerlasuut isumaqatigisaraluarlugit. Angut inuusuttoq timersortartoq Jaredimik taasinnaasarput, oqarpoq: „Atuarfimmi basketballertartunut ilaarusuppunga. Amerlasuut ilaanissannut kimigiiserfigisimavaannga, pissanganarpaloqaarlu. Angajoqqaakkali oqaloqatigaakka.“ Jaredip angajoqqaavisa ’ikinngutit ajortut’ ilagisarnerisa ulorianaataannik uparuuppaat, eqqaasillugulu piffissaq qanoq annertutigisoq atortariaqassagaa. (1 Korintumiut 15:33) „Taava inaarutaasumik aalajangerneqarpoq,“ Jared aliasulluni oqarpoq. Angajoqqaami siunnersuutaat malippaa, atuarfimmili basketballertunut ilanngutinnginnini aliasuutigaa.

’Nuannersorpassuarnut ilaanngitsoortarpunga!’

Immaqa aamma illit nikallortarputit atuaqatitit nuannisarsimanerminnik ussorsitsaaleraangata. ’Sooruna tamatigut inuusuttut allat nuannisartartut?’ immaqa taama aperivutit. Aap, annaasaqartutut misigineq qanoq akiorneqarsinnaava?

Tussiaat 73-ip atuarnera Biibilimillu allattup Asafip nalaataanik eqqarsaatiginninneq iluaqutigisinnaavat. Versini 2-mi aamma 3-mi ima nassuerpoq: „Naakkiuteqqajaasimavunga, isikkakka quaaqqajaasimapput. Narrutsaatigisaraakka anneruniartut, takugaangakkit guutiitsut atugarissaarlutik inuusut.“ Aap, Asaf inuunermini najoqqutassianik malittarisaqarpoq, allalli piumasaminnik iliorsinnaanertik — kingunerlutsitsigunarnatillu — usorsitsaarutigisarsimavaat. Pisoorsuusutut ipput, pigisaallu amerliartuinnarlutik. (Vers 12) Asaf nikallungaarami ima suaarpoq: „Uummatiga minguitsuutinniarsimavara asuliinnaasumik, pinngitsuutinniarlungalu assakka asattarsimallugit.“ — Tussiaat 73:13.

Qujanartumik Asaf isumaatsuliunngilaq. „Illernartuummut Guutip pianut“ iserpoq, eqqissisimanartunillu avatangiiseqarluni pissutsit eqqarsaatigeqqissaarpai. Erininarsinngitsoq Asafip guutiitsut nuannisarniarajuttut tupaallannartumik isummerfigai: „Aqqutinut quasartunut pisissavatit, ajunaarnermut ajattussavatit.“ — Tussiaat 73:17, 18.

Iluterpassuatit nuannaarniutaannarnik aallussisut aamma taama oqaatigineqarsinnaapput. Immaqa isumaqarput maanna nuannisarlutik. Ajortuliamilli nuannisaruteqarneq ataavartuussaanngilaq! (Eprîarit 11:25) ’Quasartumiipput’, Biibilip najoqqutassiai maleruannginnamikkik. Nakkarlutik ajoqusernissaat aarlerinaateqartuaannarpoq. Guutip oqaasia oqarpoq: ’Inuk siaruartikkani naapertorlugit katersuiumaarpoq.’ (Galâsiamiut 6:7) Immaqa tusarsimassavatit inuusuttut ukioqatitit inuunerminnik annaasaqareersimasut, nappaatipalaaqalersimasut, kissaatiginagu naartulersimasut parnaarussaasimasulluunniit, pilikassimanertik pissutigalugu. Paasisinnaalerpiuk tamakkunannga ingalassimaniarneq ilinnut pitsaanerpaajusoq? — Jesaja 48:17.

Salomon ima oqarami siunnersuilluarpoq: „Ajortuliortut sinngageqinagit, tamatigulli Guutimik mianerinninneq noqqaassutiguuk! Taamaalioruit siunissaqassaatit neriuutissaqartuassallutillu.“ (Ussatit 23:17, 18) Aap, ’nuannisarniaannarluni’ paratiisimi nunami naassaanngitsumik inuunermik neriuutip annaanissaa sianiitsuliorneruvoq.

Qanorli ililluni ilaannikkut nuannisarusunneq pissusissamisoortoq pineqarsinnaava? Aliikkusersuuteqarpa peqataaffigineqarsinnaasunik? Taavami aningaasat pisuussutillu allat killeqarpata? Sulerisoqarsinnaaneranik siunnersuutinik isummanillu Iteritsi!-p inuusuttut silarsuarmi sumi tamaaniittut saqqummiusseqqusimavai. Kingusinnerusukkut tamanna sammineqassaaq.

[Quppernerup ataani ilanngussaq]

[Qupp. 31-mi assiliartaq]

Silarsuup nuannersutut taasaanut ilaanngikkuit annaasaqartutut misigisariaqarpit?