„Takorluulaariassagit“

Meeqqavit suut takusarpaat? Sorsunneq? Pinerlunneq? Mingutsitsineq? Piitsuussuseq? Nappaatit? Pissutsimmi tamakku atuuttuarput. Pissutsilli tamakku siumut qaangerlugit siunissamik nuanningaartumik Biibilimi neriorsuutigineqartumi oqaluttuuttarpigit? Nukappiaqqap qulingiluanik ukiullip Joel Piersonip angajoqqaavi taamaaliortarput. Qanoq kingunilimmik?

Joel allaaserinnissimavoq „Takorluulaariassagit“-mik qulequtsikkaminik. Takorluukkersaarut tamanna Virginiami USA-miittumi atuartut allaaserinnitsinneqarneranni allaaserisimavaa. Malugiuk allaaserisaa aviisimi The Central Virginian-imi, 22. aggusti 1996-imoortumi, ilanngunneqarsimasoq takutitsisoq nukappiaqqap neriugisaa Guutip oqaasiani ilikkagaanik tunngaveqartoq. Ima allappoq:

„Takorluulaariassagit, suut tamarmik siunertaasutut nuannerluinnarput.

Takorloorsinnaaviuk qanoq nuannertigisoq ullaakkut iterluni paasillugulu mingutsitsineq soraarsimasoq? Toqoraaneq pinerlunnerlu tusagaajunnaarlutik, eqqissineq pilluarnerlu inuit atugarilersimavaat.

Sanileriit suleqatigiillutik ikinngutertik illuliortoq ikiorpaat. Qanittumi takuneqarsinnaapput inuit naatsiiviliortut. Taamaaliuinnanngillat, aamma pissutiginiagaat minguitsuupput. Tamarmik nuannaarlutik ikioqatigiipput. Piitsoqarunnaassaaq, sumilu tamaani nerisassarpassuaqassaaq. Nunarsuarmi tamarmi inuit ataasiussuseqarlutillu eqqisseqatigiissapput. Perlilertoqartarunnaarlunilu napparsimasoqartarunnaassaaq. Avatangiisit nuannerluinnartut tamanut takussaapput, takoriassagillu, meeraq tiigerimik qimusserpoq! Tiigeriinnaanngitsoq aammali uumasut allat tamarmik inuillu eqqisseqatigiipput.

Silarsuarmi taama ittumi inoorusuppunga. Illimmi, ilagerusuppinga?“

Ilumut Joeleeqqap eqqartugaatut ittunik Guuti neriorsuisimava? Aap! Biibilit qupperiassagit, neriorsuutillu taamaattut takorusukkukkit atuassavatit Tussiaat 46:9, 10; 67:7; 72:16; Jesaja 2:3, 4; 11:6-9; 33:24; 65:17-25; Matîuse 6:9, 10; 2 Pîtruse 3:13; sarĸúmersitat 21:3, 4. (gE 22/6 97)