Inuusuttut aperipput:

Kina nuannaartorissavara?

„Basketballimik arsarnermut kakkaqaaq. Ikinngutima tamarmik nuannareqaat. Uangattaaq nuannaartoreqaara, asullu assigerusullugu taassumatullu angusaqarusullunga.“ — Ping, nukappiaraq Asiamiu.

INUIT pingaartorsiutigineqarlutillu ilaarneqartut nuannaartorisanik taaneqartarput. Atuakkiortoq Linda Nielsen ima allappoq: „Inuusuttut assigipajaakkatik, namminnerlu kissaatigisamittut pingaartorsiutigisaasut nersugaasullu, ilaarniartarpaat.“ Taamaattumik inuusuttut kammalaatitik nuannarisaasut ajuutigineqartulluunniit qummut isigisarpaat. Inuusuttulli ilarpassui ingammik filmiliaritittartunik, nipilersortartunik timersortartunillu tusaamasanik nuannaartorisaqartarput.

Tusaamasat amerlanersaat pissutsinut piviusunut naapertuutinngitsumik aaqqissuulluakkamik imminnut avammut saqqummiuttarput sanngiissutitik matoorlugit, inuusuttunit malugineqarumallutik pingaarnerpaamillu tunisaqarumallutik! Ping, siusinnerusukkut issuarneqartoq, nassuerpoq: „Basketballertartumik nuannaartorisannik videoliat tamaasa pisiarisarpakka atisallu kamippaallu taassuma atortagaatut ilisarnaatillit atortarlugit.“ Inuusuttut ilaat TV-mi nuannaartorisamittut timersortartutulluunniit nuannaartorisamittut atisalersortarput, nujalerisarlutik allaallu taakkunatut pisunniartarlutik oqalunniartarlutillu.

Maligassat ajunngitsut nuannaartorisallu ajortut

’Inummik allamik nuannaartorisaqarneq ajortuugami?’ immaqa aperiumassaatit. Apeqqutaavoq kina nuannaartorinerlugu. Biibilimi allassimavoq: „Sianisuunik peqateqartoq ilisimassuseqalersarpoq, silaatsulli ikinngutaa ajortumeertussaasarpoq.“ (Ussatit 13:20) Biibilimi kajumissaarneqanngilagut inunnik naalakkatut malinninnissatsinnik. (Matîuse 23:10) Allassimavorli ’upperlutik erinitsajuillutillu unnersuutigisamik kingornussisut malissagivut’, tassa ilaassagivut. (Eprîarit 6:12) Oqaatsinik tamakkuninnga allattoq tassaavoq apustili Paulus, taannalu nammineq kristumiunut siullernut maligassiuilluarsimavoq. Taamaattumik ima oqarsinnaasimavoq: ’Malinniarsinga [ilaarniasinga, NV] soorlu uangattaaq Kristus malinniariga [ilaarniariga, NV].’ — 1 Korintumiut 11:1.

Angut inuusuttoq Timoteusimik atilik taamaaliorsimavoq. Ajoqersuiartortitatut angalanerminni taanna Paulusilu qanimut ikinngutigiilersimapput. (apustilit suliait 16:1-4) Paulusip Timoteus ’Naalakkami qitornarisamisut asanartutut ilumoortutullu’ isigisimavaa. (1 Korintumiut 4:17) Paulusimit ikiorneqarluni Timoteus kristumiunngorsimavoq malunnaatilik. — Filípimiut 2:19-23.

Kukkusumik nuannaartorisaqaraanni qanoq pisoqarsinnaava? Angut inuusuttoq Richardimik atilik ima oqaluttuarpoq: „15-inik ukioqarlunga atuaqatiga Mario ikinngutigillualerpara. Angajoqqaakka kristumiuupput, anersaakkullu ikiorniaraluarpaannga. Marioli nuannersunik tamanik sammisaqarsinnaavoq, soorlu qitigiarsinnaalluni, festeriarsinnaalluni, motorsikkilersinnaalluni assigisaannillu. Piumallerlunilu qanorluunniit iliorsinnaavoq. Uangali taamaalioqqusaanngilanga. Taamaattumik 16-inik ukioqalerama angajoqqaakka oqarfigaakka kristumiuujunnaarniarlunga, taamaaliorpungalu.“

Tusaamasanik timersortartunilluunniit nuannaartorisaqarneq taamatut kinguneqarsinnaava? Aap. Soorunami timersortartup, isiginnaartitsisartup nipilersortartulluunniit piginnaaneri alutorsaatigissallugit kukkunerunngilaq. Imali imminut apereriarit: ’Inuit tamakkua inuttut inuunerminni qanoq ittumik maligassiuippat?’ Timersortartut, nipilersortartut eqqumiitsuliortullu allat tusaamasat ilarpassui kanngunartumik inooriaasilittut ikiaroornartumillu imigassamillu atornerluisutut tusaamaneqannginnerpat? Ilumuunnginnerpalu ilarpassui pisuujugaluarlutik tusaamasaagaluarlutillu pilluaallutik nalerisimaarnatillu inuusut? Tamakku eqqarsaatigigukkit taava inuit taamaattut ilaarnissaat sukkut iluaqutissartaqassava?

Immaqa tusaamasap nujalereriaasia, atisalersoriaasia oqaloriaasialuunniit ilaassallugu soqutaarpasinngikkaluarpoq. Taamaaliornerli ’silap matuma inuinik ileqqoqateqaleriartuaarnissamut’ alloriarnerusinnaavoq siulleq. (Rûmamiut 12:2) Silamiunik ileqqoqateqalerneq immaqa aallaqqaataani nuanneraluarpoq. Tamakkiisumilli ileqqoqatigilerukkit pinngitsoornak Guutimut akerliusumik ileqqoqalissaatit. ’Silap piinik asanninneq Guutimut akerartuutaavoq,’ Biibilimi Jâko 4:4-mi allassimavoq.

Maligassaq ajunngitsoq iluaqutigisinnaavat

Maligassaalluartumik ilaarsiguit inuuninnut ajunngitsumik sunniuteqarsinnaavoq. Uppeqativit akornanni ’oqaatsikkut, ileqqukkut, asannissutsikkut, uppernikkut minguissutsikkullu’ maligassaasunik amerlasuunik nassaassaqassaaq. (1 Timûtiuse 4:12) Ilumoorpoq allaat ilagiit kristumiut iluanni ikinngutissannik qinersininni mianersortariaqaravit. (2 Timûtiuse 2:20, 21) Ajornakusoornerli ajorpoq kikkut ilumut ’sallusuissut eqqorlugu saqisut’ takunissaat. (2 Juánase 4) Eprîarinut agdlagkat 13:7-imi imaattumik najoqqutassiaqarpoq: ’Inuunerata naggataa misissorlugu uppersusiatigut malissigik.’ Peqativit ’inuunerata naggataata’, tassa inooriaasiisa kingunerisa, paasinarsinissaannut piffissaq sivisusinnaavoq. Ilagiinnili inersimasoqarpoq aalajaannerminnik takutitsisimasunik, taakkulu ilisarisimalerniarnissaat silatusaarneruvoq.

’Uannit utoqqaanerit ilisarisimalerniassavakka?’ immaqa aperissaatit. Taamaaliornissaq immaqa aallaqqaammut nakernarpallaanngikkaluarpoq. Timoteusilli ikinngumminut utoqqaanerusumut, apustili Paulusimut, attaveqarsimanera eqqarsaatigeriaruk. Timoteusip piukkunnaatai Paulusip takusinnaasimavai, kajumissaarsimallugulu ’Guutip tunissutai’ pigisani ikummarissassagai. (2 Timûtiuse 1:6) Iluaqutaassannginnerpalu illittaaq arlaannit ikiorneqassaguit kajumissaarneqarlutillu Guutip ilinnut tunissutaanik ineriartortitsinissannik?

Periarfissaq tamanna angutip inuusuttup Brianimik atillip atorluarsimavaa. Ilagiinni kiffartortumik kisimiittumik utoqqaanerulaartumik ikinngutitaarnermi siorna imminut tatiginnginnermik akiugassaqarsimavoq. Brian oqarpoq: „Taassuma allanut, uannullu, asannittumik isumassuinera, oqaluussinermi ilungersuussinera oqalugiaatigisartagaalu assut kajungernartippakka.“ Kristumiup qatanngutip utoqqaanerusup taassuma soqutiginninnera Brianip assut iluaqutigilereersimavaa. Isertuarani ima oqarpoq: „Qangatut ittoortigiunnaarlungalu matoqqatigiunnaarpunga.“

Angajoqqaat maligassat

Atuakkami Adolescence — Generation Under Pressure-mi allassimasutut „inuusuttuaqqap inuttut kinaassutsimigut aalajaatsuunissaanut iluaqutaasumik akornutaasumilluunniit qallikkut sunniinerpaasinnaasut“ tassaapput angajoqqaat. Atuakkami nangilluni allassimavoq inuusuttut erseqqissumik ilitsersuunneqartanngikkunik kinaassutsimillu misigisimanngikkunik assigissagaat „umiarsuaq aquuteqanngitsoq, malinnit tissukaatitittoq“. Tamanna ukiut 1900-nit amerlanerusut matuma siorna ajoqersukkap Jakobip unnersuussutaanut assinguvoq: ’Upperluni qinuli nakimanani; nakimasummi assigaa immap malinga anorip aalatitaa qaffiumisaartoq.’ (Jâko 1:6) Qularnanngitsumik inuusuttunik taama ittunik nalunngisaqarputit. Pissanganartussarsiortuaannarput, aqagussaq eqqarsaatiginagu.

Illit ilagiinni maligassiuilluartunik angajoqqaaqarpit? Taamaappat, tusarnaartarpigit? Imaluunniit assortuuteqatigikulavigit? Eqqaamassavat angajoqqaaqanngimmat naammalluinnartunik. Pissusii ajunngitsut isiginngitsuusaarnagit ilaarniarsarigukkit iluaqutigissavat. „Angajoqqaakka nuannaartoreqaakka,“ angut inuusuttoq kristumiu Jarrodimik atilik oqarpoq. „Oqaluussinermi ilungersuussinerat, aningaasatigut ajornartorsiutinik aaqqiiniartarnerat piffissarlu tamaat oqaluussisartunngornissannik kajumissaarisarnerat uannut ajunngitsumik sunniuteqarsimapput. Angajoqqaakka maligassattut isigiuaannarsimavakka.“

Maligassat pitsaanersaat

USA-mi inuusuttut ilaat Gallupip isumasiuisitsisarfianit aperineqaramik kina oqaluttuarisaanermi inuit pingaarnersaattut isigineritsik, amerlanersaasa Amerikami naalakkersuinermik suliallit taasimavaat. Taamaallat 6 procentit Jesus Kristus taasimavaat. Biibilimili oqaatigineqarpoq Jesus Kristusip naammalluinnartumik maligassiorsimagaatigut tumini atuaqqullugit. (1 Pîtruse 2:21; Eprîarit 12:3) Taassuma ajoqersukkani kajumissaartarsimavai ilinniarfigeqqulluni. (Matîuse 11:28, 29) Qanoq iliorluni taamaaliortoqarsinnaava?

Taamaaliortoqarsinnaavoq Jesusip inuunerata ilisimasaqarfigillualerneratigut. Iivangkiiliulersaarutit tamaasa, aamma atuagaq Inuk inuit inuusimasut pingaarnerpaartaat, atuariakkit.a Jesusip ajoqersueriaasia, allanut isumassuinera sapiissuserlu tatineqarnermini ersersittagaa maluginiakkit. Taava paasilissavat Jesus maligassat malissinnaasavit pitsaanersarigaat.

Maligassaq naammalluinnartoq taanna ilikkarnerujartortillugu kammalaativit tusaamasalluunniit ilaarnissaat nakeriunnaariartussavat. Ping timersortartorsuarmik nuannaartorinnissuataartoq eqqaamaviuk? Suli ilaatigooriarluni nuannariinnarlugu baskeballertarpoq, paasisimavaali tusaamasanik ilaarsiuarneq qanoq sianiitsuliornerutigisoq.

Richardimi qanoq piva? Nuannaartorisaata kristumiut upperisaannit nigortissimavaa. Taavali Simon, angut inuusuttoq Jehovap nalunaajaasuisa ilaat 20-t sinnerlugit ukiulik, ilisarisimalerpaa. „Simonilu ikinngutigiillualerpugut, ikiorpaangalu paasitillunga Biibilimi najoqqutassiat sumiginnanngikkaluarlugit nuannaarluni inuusoqarluarsinnaasoq. Simon erniinnaq ataqqilerpara, taassumalu maligassiaa ilagiinnut uterusulerninnut inuunermalu Jehovamut tunniulluinnarneranut pisooqataasorujussuuvoq. Nuannaarnerujussuanngorsimavunga, inuuneralu piviusumik imaqalersimavoq.“

Aap, nuannaartorisatit ilinnut assut sunniuteqartarput! (gE 22/5 98)

[Quppernerup ataani ilanngussaq]

[Qupp. 28-mi assiliartaq]

Inersimasunik tusaamasaalluartunik peqateqartarneq iluaqutigisinnaavat