Kristus — inuusuttunut maligassaq
1 Angut inuusuttoq silamiu sivisulaartumik Biibili pillugu oqaloqateqareersimalluni ima oqarpoq: „Jesusip inuttut sunniisinnaassuseqarnera assut maluginiarnartippara. . . . Taanna siulersuisutut tapersersorsinnaavara.“ Naalakkersuisut, timersortartut aliikkusersuinermilluunniit tusaamasaasut arlaannaalluunniit taama allaatigineqarsinnaanngilaq. Taakkua silamiutut najoqqutassiaat kristumiuunngitsutullu inooriaasiat pissutigalugit maligassarisinnaanngivippavut. — Tus. 146:3, 4.
2 Inuusuttut Jesus Kristus upperigunikku takutissavaat Guutip savaataanut ilaallutik taamaalillutik Jesusimit ilisarineqarlutik. Savanik paarsisup ajunngitsup isumagissavai. (Juá. 10:14, 15, 27) Inuusuttut Kristus maligassatut malinniartarunikku pilluaqquneqassapput.
3 Qatanngut angut maanna Brooklynimi Betelimi sulisartoq arfineq-pingasuinnarnilli ukioqarnerluni kiffartuussineq tamanna immikkut ittoq anguniagarisimavaa. Betelimi kiffartuussinissaq Kristusimik malinninniarnermut periarfissatut isigeqqullugu kajumissaarneqarsimavoq. Angajoqqaavisa nakkutilliisullu angalasartut tamatuminnga anguniagassaqartittarsimavaat. Taamaaliornissaanullu piareersaaqqullugu kajumissaartarpaat Betelimi sulisut assigalugit angerlarsimaffimmi suliassanik eqiasueqqullugu, naagalagaaffilersaartarfimmi aserfallattaaliinermut peqataasaqqullugu oqaluussinermilu pikkorissartaqqullugu. Maanna ukiorpassuit Betelimi sulisarnini qatanngutip angutip taassuma iluarusuutigaa alliartornermini Kristus malinniarlugu noqqaassuteqartarsimagami.
4 Jesusip silarsuarmi angusaqarluarnissani noqqaassutigisimanngilaa, Guutimulli kiffartuussineq qinersimallugu. Qatanngutip arnap inuusuttoq atuartuujunnaarami pioneerinngornissani kissaatigigaluarpaa nangaallunili ullup ilaannaa suliffissaqannginnami. Ima eqqarsartuarsimavoq: ’Suliffeqaqqaarniarpunga, taava pioneerinngornissamik qinnuteqarsinnaavunga.’ Ilagiinnili utoqqaanertat ilaasa oqarfigaa pioneerinngornissani kinguartittuaruniuk ulloq naallugu suliffeqarnissaq piuminarnerussagaluartoq, tamanna itigartissallugu pissutissaqannginnguatsiarami. Ima oqaluttuarpoq: „Jehova kipisuitsumik qinnuigisarpara iliornera eqqarsaatikkalu anersaavanit siulersorneqaqqullugit.“ Ikiorti-pioneeritut aallartippoq kingusinnerusukkullu pioneerinngorluni. Tamatumalu kinguninnguani suliffeqalerpoq pioneeritut kiffartuussinermut tulluartumik.
5 Jesusip isumalluarluni Naalagaaffik pillugu tusarliussaq kikkunnulluunniit oqaluussissutigisarsimavaa. (Mat. 4:23) Kristumiut inuusuttut aamma oqaluussinermi qunusuillutik isumalluarnissartik ilikkarsinnaavaat. Oqaluussisartoq 14-inik ukiulik oqaluttuarpoq: „Atuarfimmi tamarmik kristumiutut aalajangerfigisara nalunngilaat. Aap, ima nalunngilluartigimmassuk oqaluussinermi atuaqatikka naammattooraluaraangakkit kanngussuutiginngilara. Amerlanertigut tusarnaartarput akuttunngitsumillu atuagassanik pisarlutik.“
6 Kristusip maligassiaa eqqarsaatigigunikku inuusuttut namminneq siunissartik pillugu silatuumik aalajangersinnaavaat. Silamiut sammisartagaat aalluppallaarnagit Pinngortitsisertik eqqarsaatigissavaat Jehovamut kiffartuussinermi ulapputeqarlutik. (Nal. oq. 12:1) Jesus Kristusitut ’Ataatap asanninnera’ ineriartortittarpaat, pilluaqqussutissanik silarsuup matuma neqeroorutigisinnaanngisaanik kinguneqartumik. Silarsuartoqaq manna ilagalugu ’nungujartussanatik’ ’naassaanngitsumik atasinnaanissartik’ qilanaarutigisinnaavaat. — 1 Juá. 2:15-17. (kmD 95/6 Jesus — et forbillede for unge)