Seqineq unittoq

JOSUA takuuk. Oqarpoq: ’Seqineq, unigit!’ Seqinerlu unippoq. Qilaap qeqqaniittuarpoq ulloq naallugu. Jehovap taamaalisippaa! Paasiniartiguli suna pillugu Josuap seqineq seqinnertuaannaqqugaa.

Kunngit ajortut tallimat Kana’anip nunaaniittut Gibeonimiunut sorsukkiartulermata, Gibeonimiut angummik aallartitsipput Josuamut ikioriartoqqullutik. ’Tuaviorlusi ornitsigut!’ oqarpoq. ’Annaatsigut! Kunngit nunami qattunertuumi ittut tamarmik kiffannut sorsukkiartorput.’

Josua sakkutuuilu aallarasuarput. Unnuaq naallugu ingerlaarput. Gibeonimut tikimmata kunngit tallimaasut sakkutuui annilaarput qimaalerlutillu. Taava Jehovap nataqqornarsuit qilammit nakkaatippai, sakkutuullu nataqqornanit eqqorneqarlutik toqutaasut Josuap sakkutuuisa toqutaannit amerlanerupput.

Josuap takusinnaavaa seqineq tarrilersoq. Taarsissaaq, kunngillu ajortut tallimaasut sakkutuuisa ilarpassui aniguillutik qimaasinnaalissapput. Taamaattumik Josuap Jehova qinnuigaa, oqarlunilu: ’Seqineq, unigit!’ Seqinniinnarmallu Israelikkut ajugaanertik naammassisinnaalerpaat.

Kana’anip nunaani allarpassuarnik ajortunik kunngeqarpoq Guutip innuttaanik uumissuisunik. Josuap sakkutooqatigiivisalu ukiut arfinillit missingi atorpaat kunngit 31-t ajugaaffiginissaannut. Taava Josuap isumagaa Kana’anip nunaata naggueqatigiinnut suli nunassamik atorfissaqartitsisunut agguarneqarnissaa.

Ukiorpassuit ingerlapput, Josualu toquvoq 110-nik ukioqarluni. Taassuma ikinngutaasalu uumaneranni inuit Jehovamut naalattarput. Angutilli ajunngitsut taakku toqummata, inuit ajortuliortalerput, eqqissiviilliorneqalerporlu. Taava Guutimit ikiorneqartariaqarluinnalerput.