’Jehova Guuterput kiffartuukkumavarput’
„Uanga inoqutimalu, uagut Jehova kiffartuukkumavarput.“ — Jôrsua 24:15, NW.
1. Josuap allagai uatsinnut qanoq kajumissaataallutillu illersuutissaappat?
PISIMASUT killinnartut Josuap allagaani oqaluttuarineqartut allassimapput ’uatsinnut ilinniutissaallutik’ ’mianersoqqussutaallutillu uatsinnut ullunik kingullernik angumerinnittunut’. (Rûmamiut 15:4; 1 Korintumiut 10:11) Pissutsit Guutimik mianerinninnartut, soorlu qasusuissuseq, upperneq naalannerlu, erseqqissarneqarput. ’Uppernikkut Jerikop ungalorsui ullut arfineq-marluk kaavinneqaramik nakkarput. Uppernikkut Rahab uersartup naalasseriitsut piiagaaqatiginngilai misiliiartortut ilassigamigit eqqissisillugit.’ (Eprîarit 11:30, 31) Josuap, Rahabip unneqqarissullu allat taamani inuusimasut uppersusiat killinneqaatigissavarput tatitusaarluta pissatsingaarlutalu, Guutip suliareqqusaa ullumikkut naammassissallugu. — Jôrsua 10:25; Juánase 4:34.
2. (a) Qanoq ililluni Josua peqqissaarluinnartumik naalattarpa? (b) Qaqqani Ebalimi Garizimimilu suna pisimava?
2 Ajimi ajugaarujussuarnerata kingornagut, unnersuussutit peqqissaartut Môrsasip agdlagaisa tatdlimáine 27:1-imiit 28:68 ilanngullugu allassimasut Josuap soqutigilerpai. Qaqqami Ebalimi ujaqqanik ilanngarneqanngitsunik tunisiviliorpoq, tassanilu inassut una naalappaa: ’Tunissutinillu qujaniutinik pilliissaatit nerillutillu tassani tipaatsullutillu Jehovap Guutivit saanni.’ Ujaqqat allat eqqaassutissatut nappartinneqarput, qaqortumik qalipanneqarlutik, inatsisillu oqaasii ujaqqanut titarneqarput. Taava naggueqatigiit avissaartinneqarput, ilaat qaqqami Garizimimi qeqarlutik ’inuit pilluaqqussallugit’, ilaallu ’qaqqami Ebalimi perloqqusissallutik’. Levikkut nipituumik nalunaarutigaat naalasseriitsunut perloqqussutissat, inuillu tamarmik akisarput ’aammen’. Taava naalattunut pilluaqqussutissat nalunaarutigineqarput. Israelikkulli eqqanaq inatsisit oqaasii tamaasa maleruanngitsoorunikkik Jehovallu Guutip aqqa naalannangaartoq mianerisariaqartorlu mianerinngitsoorunikku! — Jôrsua 8:32-35.
3, 4. (a) Israelikkut ingerlaasiat ullumikkut uatsinnut qanoq ilinniutissaava killinnartoq? (b) Suna pillugu taakkuusut tusartaqattaarlugit qatsunneq ajussavavut? (c) ’Isertarfikkut nerukitsukkut’ isissagutta qanoq iliortariaqarpugut?
3 Israelikkut ’inatsisit oqaasii’ maleruartuarnerpaat? Naak Mosesip, kingornatigullu Josuap, oqaaqqissaartaqattaaraluaraat, inuit ajoraluartumik naalasseriipput. Tamanna uatsinnut ullumikkut inuusunut ilinniutissaavoq kimittooq! Naak mianersoqquneqartaraluarlutik, inoqartarpoq isumaqartunik Guutip piumasaanik sumiginnaasinnaallutik, ’nammineersinnaallutik’, aamma annassallutik. Sianiissusii! Israelikkut misilittagaat issuarlugit, Paulus oqarpoq: ’Kinaluunniit qeqartuusorisoq mianersorli orloqqunani.’ — 1 Korintumiut 10:12; akugdlîssup oĸausê 2:13.
4 Guutip innuttaasa ilaasa mianersoqqussutit naammagittaalliuutigisarpaat, oqarlutik oqaassutit uteqattaartut tusartarlugit qatsukkitik. Taamatulli oqartut Satanimit napititaaqqajaasarput. Bibelip atuagartaasa ilaasa, Môrsasip agdlagaisa tatdlimaisa, (epræerisut taaneqartut mishneh’ hattorah’, tassa „inatsisinik utiineq“), annersamikkut imaraat Mosesip oqalugiaatai sisamat; tamakkunuunatigut erseqqissarneqartarpoq Israelikkut Jehovap inatsisai inassutigineqareersimasut maleruartariaqaraat. Naalasseriinnermik naalasseriittunullu ’perloqqussutinik’ mianersoqqussutiginninnermigut ’pilluaqqussutinik’ oqaluutiginninnerminiit Mosesip oqaatsit sisamariaataannit amerlanerusut atorpai. Qaqqami Ebalimi Josuap Israelikkut oqaaqqissaaqqippai naalattariaqartut. Tamatuma takutinnginnerpaa ’isertarfikkut nerukitsukkut’ iserniarnissatta pisariaqassusia? — Matîuse 7:13, 14, 24-27; 24:21, 22.
5. Israelikkut kikkut iligiinnerat akerarilerpaat, ullumikkullu tamatumunnga illua-tungiliuttumik sumik pissuseqarpa?
5 Piumaartussat pissanganaqisut nalliutilerput. Illoqarfik Jeriko Kana’animut aqquserngit pingaarnerit akornanniittoq piuneerunneqarsimavoq, soorlu ’annikilliornartup angisuup’ aallartilernissaani eqqunngitsumik upperisarsiornerit piuneerunneqarsimassasut. Illoqarfik Aj piuneerunneqarsimavoq. Maannali ’kunngit tamarmik Jordanip tungaani qaqqanilu naqittuanilu imarsuullu sinaani tamarsuarmi Libanonip akiani ittut Hetikkullu Amorikkullu Kana’animiullu Perizzikkullu Hivvikkullu Jebusikkullu . . . ataatsikkut katersorput isumaqatigiillutik, Josua Israelikkullu sorsukkumallugit’. (Jôrsua 9:1, 2) Ullumikkut tamatumunnga illua-tungiliuttumik nunarsuarmi inuiaqatigiit Naalagaaffiit Peqatigiinnik taaneqartuni (tassa FN) peqatigiinngorsimanerat assersuunneqarpoq. Namminneq aalajangikkatik naapertorlugit imminnut eqqissinermik isumannaassusissamillu atuutilersitsiniarput, ’pilersaarutipiloqarpulli Jehovamut taassumalu tanitaanut’, Josuamut pingaarnermut. (Tussiaat 2:1, 2) Taamaaliornerata suna inernerissavaa?
Silassorissumik iliorneq
6, 7. (a) Gibeonimiut suna soqutigaat, sunalu peqqusersusaarutigaat? (b) Josuap tamanna qanoq nalilerpaa?
6 Rahab assigalugu, Israelikkuunngitsut allat maanna annakkusulerput. Tassa Gibeonimi, illorpassuaqarfimmi Jebusip, tassa Jerusalemip, avannaata tungaaniittumi, najugaqartut. Jehovap suliai angingaartut tusaamavaat aalajangerlutillu Jehovap pinngitsoorani naammasseqqusai naapertorlugit eqqissinissaq isumannaassusissarlu piniassagitik. Qanorli ilillutik? Angutit panertunik seqummalasunillu taquallit puunillu poorutsinillu viinniusivinnik nungullarnikunik nassartut, ilaartugaasunik atisaqartut nungullarsimasunillu aloqutillit Israelikkut tammaarfiannut aallartippaat. Josuamut ornigullutik angutit taakku oqarput: ’Nunamit ungasissorsuarmit kiffatit tikiupput Jehovap Guutivit aqqa pissutigalugu, tusaamasaassusia tusaamagatsigu.’ Tamanna tusaramiuk ’Josuap eqqissivissioqatigai angerfigalugillu inooqqullugit’. — Jôrsua 9:3-15.
7 Erniinnarli Israelikkut tusarpaat Gibeonimiut ’akunnerminni nunaqartut’! Peqqusersusaarnerat Josuap qanoq isigaa? Taakkununnga uppernarsaanini unioqqutikkumanngilaa, inuutippaali qisussiortartunngortillugillu imertartortartunngortillugillu ilagiinnut tamanut. — Jôrsua 9:16-27; naleqqiukkit Môrsasip agdlagaisa tatdlimait 20:10, 11.
8. Sutigut Gibeonimiut ’amerlangaartunut’ siumut assersuutaappat?
8 Netinim, tassa naalaffimmi kiffarsiat, ukiuni kingusinnerusuni Jehovap naalaffiutaani kiffartortut, ilarpassuisa Gibeonimiut siuaasarisimagunarpaat. Taamaattumik Gibeonimiut assersuutaalluarsinnaapput ’amerlangaartunut’ maanna ’ullukkullu unnuakkullu Guutip naalaffiutaani taassuminnga kiffartuussisunut’. (sarĸúmersitat 7:9, 15) Naak silarsuarmi Kana’anitut pissuseqartumi inuugaluarlutik, taakkua uummatimikkut ’silamiut ilaginngilaat’. Siornatigut anersaakkut inuussutissat ’seqummalasut’, kristumiuuneraqatigiit ilagiissaanni pissarsiarineqarsinnaasartut, naammagisariaqarpaat, aamma ’viinniuteqanngillat’ nuannaarnermut assersuutaasumik. Guutip innuttai atassuteqarfigileramikkik paasilerpaat Jehova nalunaajaasuni aqqutigalugit angingaartunik suliaqartartoq. Satanip silarsuaaninngaanniit aallarput, ’atisatillu’ nungullarsimasut taarserlugit Jehovap kiffaasut maniguuttutut ilisarnaatitaarput, pissusertaaq atisimagamikku. — Juánase 14:6; 17:11, 14, 16; Evfisumiut 4:22-24.
Peqatigiiffiup tapersersuinera
9. (a) Taava sumik ajornartorsiortoqaleruttorpa? (b) Josuap tamanna qanoq iliuuseqarfigilerpaa, sunalu isumalluutigalugu?
9 Jerusalemip kunngia Adoni-Zedek tusarami Gibeonimiut Israelikkut eqqissivissioqatigisimagaat, ’taava ilanilu sioorangaalerput, Gibeon illoqarfiummat angisooq, soorlu illoqarfiit kunngip piisa ilaat, angutitaalu tamarmik pissarsuullutik’. Kunngit sisamat allat iligilerpai, tamarmillu Gibeon ungusaraat. Erniinnaq Gibeonimiut Josua qinnuigaat oqarlutik: ’Tuaviortumik majuarfigitigut annaakkiartorluta ikioriartorlutalu.’ Erniinnaq Josua iliuuseqalerpoq, Jehovallu isumalluarsarpaa oqarfigalugu: ’Ersigissanngilatit, assannut tunniukkakkit; saanni ataginnaasoqassanngilaq taakkua ilaannik.’ Josua inuit sorsuttussat sorsullaqqissut ilagalugit ’unnuaq tamaat’ ingerlapput akeqqat qaninngarumallugit. — Jôrsua 10:1-9.
10. (a) Gibeonip ungusaaneranut illua-tungiliuttumik ullumikkut suna assersuunneqarpa? (b) Suna aalajangiussimallugu ullumikkut Gibeonimiutut ittut oqarpat?
10 Kunngit tallimaasut taakku assigalugit, ullumikkut naalakkersuisuni qullersaasut ilaat kamattarput innuttamik ilaat taama amerlatigisut — ’pissarsuit’ allaat — Josuamut pingaarnermut naalagaaffianullu naapertuilluartumut silarsuarmi tamarmi atuuttumut atalersut takugamikkik. Naalakkersuisut taakku isumaqarput naalagaaffiit killingi atatinneqartariaqartut, naak naalagaaffiit isumaqatigiinngissuteqartuaannaraluartut sorsuuttuaannaraluartullu. Taamaattumik ’amerlangaartut’ eqqissinermik nuannarisaqartut anersaakkut inuussutissanik pilersugaatsaaliniartarpaat, ataatsimiinnerit anersaakkut inuussutissarsiffigisartagaat inerteqqutiginiarlugit, anersaallu piinut tunngasut pillugit inunnut allanut oqalutsaaliniarlugit. Gibeonimiulli ullumikkut ittut anersaakkut Israelikkunnut aalajaatsumik atapput, oqarlutik: ’Ingerlaqatigilassi.’ — Saggaria 8:23; naleqqiukkit apustilit suliáinik agdlagkat 4:19, 20; 5:29.
11. Ullumikkut Jehovap Nalunaajaasuisa ajornartorsiuteqaleruttortut qanoq iliuuseqarfigisarpaat?
11 ’Amerlangaartut’ peqatigiiffik ’anaanamittut’ ittoq qinnuigigaangamikku ikioqqullutik, erniinnaq naammangaartumillu ikiorneqartarput. Jehovap Nalunaajaasuisa assigiinngitsunik naammassinninnermikkut pilertussusiat assigiinngitsorpassuarni takuneqarsinnaavoq — soorlu ajunaarnersuit pinngortitap imminit pilersitaasa kinguninnguisigut ikiuiartortitsineranni aammalu rigssalinik ataatsimeersuartarfinnillu allanik ’inuussutissa’qartitsisarfiusunik pilertortumik sanaartortitsineranni. Siorna junip qaammataani Yankee Stadiumimi, New Yorkimi, ataatsimeersuarneq pilersaarutigineqarmat, baseballertoqarnerup kingornatigut unnuap qeqqanut ipiiaasartorpaaluit kajuminnermit sulisut ipiiaajartorput; ulluni sisamani tulliuttuni timersortarfissuaq taanna aatsaat taama ipeqanngitsigaaq. Aammalu Jehovap Nalunaajaasuini utoqqaanertat akisussaassuseqartitaasut iliuuseqarasuartarput tusagassamik nuannersumik oqaluussissutiginninneq pillugu ajornartorsiortoqaleruttoraangat. — Filípimiut 1:6, 7.
Israelikkut illersorlugit Jehova sorsuttoq
12. Gibeonimiut saassunneqarneranni Israelikkut illersorlugit sorsukkami Jehova qanoq tupinnartuliorpa? (Naleqqiuguk Hâpakuk 3:1, 2, 11, 12.)
12 Atali, Gibeon qiviaruk. Jehovap akeqqat iligiiusut ularussisippai. Israelikkut malersorpaat toqorarlugit. Suunuku qilammit nakkartut? Sikuminersuinuku! Nataqqornanit ujaraasunit angingaartunit toqusut Israelikkut sorsuttartut toqutaannit amerlanerupput. Ataguli. Josua Jehovamut oqaluppoq; ’Israelikkut isigernanni’ qanoq oqarami? Oqarpoq: ’Seqineq unigit Gibeonip nalaani, qaammallu Aj’jalonip qooruata nalaani.’ Mianernartumik tupinnartuliaqaqqippoq! ’Ulloq iluitsungajak’ seqernup sorsuuffik qaammarsarpaa, Guutip akiniaanera tamakkiisumik naammassineqarsimatserlugu. Jehovap taamani qanoq iliorluni tupinnartuliorsimanera aalajangiunniarlugu uagut oqaloqatigiissutigisussaanngilarput, soorluttaaq eqqortumik nassuiarsinnaanngikkipput qanoq iliorluni ullut pinngortitsiffiusut sisamaanni qaammaqqussuit marluk qaamaqqullugit ’piliari’simanerai. (1 Môrsase 1:16-19; Tussiaat 135:5, 6) Allatut oqaatigisassaanngilaq, kisianni, soorlu allassimasoq: ’Naleqanngilarlu ulloq taanna siornagulluunniit kingornagulluunniit, inuup nipaa Jehovap naalammagu; massa Jehova sorsuppoq Israelikkut illersorlugit.’ — Jôrsua 10:10-14.
13. Josuap sorsuttunut naalagaanerutitani qanoq kajumissaaqqippai, sunalu tamatuma inerneraa?
13 Akiuunnerup kingornatigut pisimasut pingaarseruttorfigaat kunngit tallimaasut toqutaanerat, taamanikkullu Josuap sorsuttunut naalagaanerutitani oqarfigai: ’Siooranasi annilaarnasilu, tatitusaaritsi pissatsillusilu, Jehova taamaaliussammat qinngarsortissinnut sorsugassassinnut tamanut.’ Oqaatsit taakkua ilumuussusiat Kana’animi kunngit arfineq-marluk pillugit takutinneqareersimavoq, oqaatsillu taakku ilumoortuarput naalagaaffiit naammalluartunik amerlassusillit 24-t piuneerunneqarnerata nalaani. Tamanna pereerpat aatsaat, ukiut arfinillit sorsuffiusut naammatippata, nuna uninngavigineqassaaq sorsuffigineqassaarluni. — Jôrsua 10:16-25; 12:7-24.
14. Qanoq isumaqarluta sunalu isumalluutigalugu Harmagedon atugassaraarput?
14 Ullumikkut, sorsunnissaq inaarutaasoq Harmagedon atugassarigatsigu, tamatta Josua, sorsullaqqissut taassuma sorsoqatigisai, Israelikkorpassuillu assigalugit tatitusaarta pissatsingaarlutalu. Isumalluutigisinnaavarput, soorlu Jehovap Israelikkut arlalinnik millionillit ajoqusersimanngitsut nunamut neriorsuutigisamut isertissimagai, aammattaaq mianernartumik tupinnartulioqqissinnaassasoq innuttani ersisuitsut millionilinnik amerlassusillit Harmagedonimi annatsillugit aaqqissuussinissamini nutaassami inuutissallugit. — sarĸúmersitat 7:1-3, 9, 14; 19:11-21; 21:1-5.
Uagut aalajangiussarput
15. Guutip pissutsinik aaqqissuussinissaani nutaassami qanoq ittunik suliassaqartitaanissartik ’savat allat’ ilimagisinnaavaat?
15 Naak 90 pallillugit ukioqaraluarluni, Josua suli annertuumik suliassaqarpoq — Israelikkut naggueqatigiissortaannut nuna agguartariaqarpaa. Tassali imaanngilaq Israelikkut inuunerat atoruminarsissasoq. Tassami, Kalebip qinnutigaa Hebronimi, inorujussuit Anakikkut nunaanni, kingornussassaqartitaanissani; kissaatigaa tamaviaartuarnissani Jehovap akeraasa nunngutaat peersinniarlugit. Tamatuma takutitsianngilaa Kristusip ukiuni tuusintilinni nunamut naalakkersuinissaata nalaani inunnik akeraqassasoq. Suliassaqassaarli. Pissutsinik aaqqissuussinissami nutaassami ilungersornaitsumik naparliinnarlunilu inuunissarput ilimagissanngilarput. ’Nunami nutaami’ najugassaqartitaalereerunik suliassaqartitaalereerlutillu, Naalakkap ’savaatai allat’ naammangaartumik suliassaqassapput suliassaq annertoorujussuaq nunamik kusanarsaanissaq paratiisinngortitsinissarlu sulissutigissallugu. — Jôrsua 14:6-15; Mákorse 10:29, 30; Rûmamiut 12:11.
16. ’Illoqarfinnik qimarravissaasunik’ Jehovap aaqqissuussinera ullumikkut sumut assersuutaava?
16 Nuna agguaramiuk Josuap Levikkut illoqarfiisa ilaat arfinillit immikkoortippai illoqarfinngorlugit qimarravissaasut, Jordanip illuatungaani illuatungaanilu pingasut. Jehovap tamanna aaqqissugaraa piaarinaatsoortumik inuartup illoqarfiit taakkua ilaannut qimaasinnaasup illersugaanissaanut. Piaarinani inuartup Guutip isaani ilerasuuteqannginnini uppernarsartariaqarpaa, taamaaliorsinnaavorlu palasiuneq toqutserlugu illoqarfimmi tassani unilluni. Taakkununnga assingullutik ullumikkut ’amerlangaartut’, silarsuarmiut aammik kuisisunut aammillu kuiseqataasunut attaveqaraluarnertik pissutigalugu, Guutip isaani ilerasuuteqannginniartariaqarput. Ilerasuutissaarussinnaapput ajortuliaminnik anngiiarlutik, allamik isumataarlutik, allamut saallutik, Jehovamut tunniulluinnarlutik imermullu kuisillutik. Taava aalajangerfigisartik tamanna aalajangiuttariaqarpaat. ’Amerlangaartut’ illoqarfimmi unittariaqarput Jesus palasiunertut suliani eqqarsaatigalugit assersuutikkut toqutserlugu, ukiuni tuusintilinni naalakkersuinermi naanissaani. — Jôrsua 20:1-9; sarĸúmersitat 20:4, 5; 1 Korintumiut 15:22, 25, 26.
17. Ullumikkut nuannaarnartunik sunik ilimagisaqarpugut?
17 Jehovap innuttani Israelikkut tupinnangaartumik pilluaqquai! Ingerlaviat artornarpoq, amerlasuunillu misilinneqarsimapput. Kiisamili nunamut neriorsuutigisamut isersimapput inissisimallutillu. Jehovamut uummatimikkut qujamasungaarsimassusii! Guutitsinnullu unneqqarilluta uaguttaaq taakkunatut nuannaaruteqarta aaqqissuussinissaanut nutaamut, ’nunamik nutaassamik’ ilaqartumut iserluta. Uagut misigiumaarparput, soorlu Josuap ulluini taakkua misigigaat: ’Oqaatsimik ataatsimilluunniit atunngitsoqanngilaq oqaatsit ajunngitsut tamarmik ilaannik, Jehovap Israelip inoqutaanut oqaaserisaasa; tamarmik eqquupput.’ (Jôrsua 21:45) Illit pilluarnartumik ilangeeqataagittoq!
18. (a) Josuap Israelikkunni utoqqaanertanut suut oqaluttuareqqippai? (b) Jehovap aaqqissuussinissaa nutaassaq pillugu suna kissaatigissavarput?
18 Taava 110-nik ukioqarluni Josuap Israelikkut naggueqatigiissortaanni utoqqaanertat katersorpai. Taakkununnga oqaluttuareqqippaa qanoq Jehovap tupinnartumik innuttani pilluaqqusarai Abrahamip nalaaninngaanniilli ulloq taanna tikillugu. Taava Jehovap oqaluttuuppai: ’Nunalu ilissinnut tunniuppara erloqissutiginngisat illoqarfiillu qarmanngisasi, ineqarfigaasilu; naatsiiviit viinnequtillit naatsiiviillu uuliaqutillit ikkussuiffiginngisasi nerisarfigaasi.’ Taama naammangaartigisumik pissaqartitaagamik Israelikkut piumassavaat ’Jehova miarneriumallugu kiffartuullugulu assuarnaallutik ilumoorlutillu’ soraajuitsumik. Nunamilu matumani pissutsinik Jehovap aaqqissuussinissaa alutornangaartoq nutaassaq erininanngitsumik atuutilerumaartussaq qilanaaralugu, qularnanngitsumik tamatta immikkut taamatut kissaateqassaagut. — Jôrsua 24:13, 14.
19. (a) Josuap taava inuit sumik qinigassaqartippai, qanorlu oqarlutik akivaat? (b) Uagut kikkut assigiumassavavut? (c) Suna qinissavarput, sunalu aalajangiutissallugu?
19 Taava Josua inunnut erseqqissumik saqqummiussaqarpoq: ’Iluarinngikkussiulli Jehova kiffartorfigissallugu, ullumi taava ilissinnut qinersigik kiffartuukkumasasi: . . . kisiannili UANGALI INOQUTIMALU, UAGUT JEHOVA KIFFARTUUKKUMAVARPUT.’ Uagut tamatta immikkut, ilaquttatta uppertuusut, ilagiissitta, ’Guutip inoqutaasa’ silarsuarmi tamarmi ittut, oqaatsit taakku utersinnaanerpavut? Utersinnaavavut! (Evfisumiut 2:19) Josuap nalaani inuit taanna akivaat oqarlutik: ’Jehova Guuterput kiffartuukkumavarput nipaalu naalakkumallugu.’ (Jôrsua 24:15, 24) Ajoraluartumilli ukiuni kingusinnerusuni taamaaliunngitsoorput. Taamaaliunngitsoortut uagut assigiumanngilavut. Josua inoqutaalu, Kaleb, Gibeonimiut, Rahabilu uagut assigiumavavut. Aap, ’JEHOVA KIFFARTUUKKUMAVARPUT’. Tatituumik taamaaliorta, isumalluutigilluinnarlugu suulluunniit ’avissaartinnaviassanngikkaatigut Guutip asannissusianit Kristusi-Jesusimi Naalakkatsinni’. — Rûmamiut 8:39. (wD 15/12 86)
Josuap allagai sumik ilinniarfigisinnaavavut —
□ Oqaaqqissaarnerit uteqattaartut iluaqutigissallugit?
□ Ullumikkut Gibeonimiutut ittut isumassussallugit?
□ Jehovap Harmagedonimi qanoq sorsunnissaa pillugu?
□ ’Illoqarfimmut qimarravissaasumut’ qimaasariaqarneq pillugu?
□ Kina kiffartuukkumallugu qinersinissarput pillugu?