Siunissaq qanoq issasoraajuk?

AKISSUT BIIBILIMEERSOQ

‘Guutip qulliit tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.’ — Saqqummersitat 21:3, 4.

TAMANNA QANOQ ILUAQUTIGISINNAAGIT

Siunertaqarluartumik nalerisimaarnartumillu suliaqarsinnaavutit. — Esaja 65:21-23.

Napparsimassaarsinnaallutillu naalliuutaarussinnaavutit. — Esaja 25:8; 33:24.

Ilaquttatit ikinngutitillu ilagalugit pilluarlutit naassaanngitsumik inuusinnaavutit. — Tussiaat 37:11, 29.

BIIBILIMI ALLASSIMASUT UPPERISINNAAVAVUT?

Aap, ilaatigut uku marluk pissutigalugit:

• Guuti neriorsuutiminik eqquutitsinissaminik piginnaassuseqarmat. Jehova Guuti killeqanngitsumik pissaaneqarami Biibilimi kisimi ‘Ajugaqanngitsutut’ allaatigineqarpoq. (Saqqummersitat 15:3) Taamaattumik neriorsuinermisut nunarsuarmi pissutsinik pitsaanerulersitsinissaminut piginnaassuseqarpoq. Biibilimi allassimavoq ‘Guutimut ajornartoqanngitsoq’. — Matthæusi 19:26.

• Guuti neriorsuutiminik eqquutitsinissaminik piumassuseqarmat. Assersuutigalugu Jehovap inuit toqusimasut ‘kipitsavigigamigit’ uummarteqqikkusuppai. — Jobi 14:14, 15, New World Translation.

  Biibilimi aamma allaatigineqarpoq Guutip ernerata, Jiisusip, napparsimasut ajorunnaarsittarai. Sooq ajorunnaarsitsisarpa? ‘Piumagami.’ (Markusi 1:40, 41) Jiisusip inunnik pisariaqartitsisunik ikiuerusunnermigut Ataatani ilaaqqissaarpaa. — Johannesi 14:9.

  Taamaattumik upperilluinnarsinnaavarput Jehova aamma Jiisusi nuannersumik siunissaqarsinnaaqqulluta iliuuseqarumaartut. — Tussiaat 72:12-14; 145:16; 2 Petrusi 3:9.