Kiisami ernertaarput!

Aaperaat Saaralu ukiorpassuarni katissimapput. Angerlarsimaffitsik nuannersoq Urimiittoq qimappaat tupermilu najugaqalerlutik. Saaralli Jehova tatigigamiuk naammagit­taalliunngilaq.

Saara meerartaarusungaarami Aaperaamut oqarpoq: ‘Kiffara Haakari meerartaarfigisuugukku uanga nammineq qitornattut pissagaluarpara.’ Piffissap ingerlanerani Haakari ernertaarpoq. Taannalu Ismaelimik atserneqarpoq.

Ukiorpassuit qaangiummata Aaperaat 99-inik Saaralu 89-inik ukioqartut pingasunik pulaartoqarput. Aaperaap orpiup ataani qasuersaaqquai nerisas­saannillu tunillugit. Nalunngiliuk pulaartut kikkuunersut? Inngiliupput! Aaperaat oqarfigaat: ‘Aappaagu piffissap taamaalinerani, illit nuliallu ernertaassaasi.’ Saarap tupermiitilluni tusarnaarpai. Qamuuna illarpoq ima eqqarsarluni: ‘Ilumut taamak utoqqaatigalunga meerartaarsin­naagama?’

Ukioq ataaseq qaangiummat Saara, Jehovap inngiliata oqarneratut, ernertaarpoq. Aaperaap Iisaamik atserpaa, ‘illarnermik’ isumaqartumik.

Iisaaq tallimat missaannik ukioqartoq Saarap takusalerpaa Ismaelip qinngasaaraa. Ernini illersor­niarlugu Aaperaat oqarfigaa Haakari Ismaelilu aallaqqussagai. Siullermik Aaperaat piumanngik­kaluarpoq. Taava Jehovap Aaperaat oqarfigaa: ‘Saaramut tusarnaarniarit. Uanga Ismaeli paarissaq­qaarpara. Neriorsuutikkali Iisaaq aqqutigalugu piviusun­ngorumaarput.’