Jesusip inuunera ajoqersuineralu

Jehovamut pallorfiginninnermik ilungersuutiginninneq

KANAMI katittorsiortut peqataaffigereerlugit Jesus Kapernaumimut, illoqarfimmut Galilæap tasersuata eqqaaniittumut, aallarpoq. Ajoqersugaasa, arnaata qatanngutaasalu Jakobip, Josefip, Simonip Judallu ilagivaat. Aallannginnerminni qularnanngitsumik Jesusip najugaani Nazaretimeeqqaarsimapput ilaqutariit nassatassaat pisariaqartut poortoriartorlugit.

Kisianni sooq Jesusip Kanami, Nazaretimi imaluunniit Galilæap qaqqaasa eqqaani oqaluussinini ingerlatiinnanngilaa Kapernaumimut aallarani? Siullermik pissutigalugu Kapernaum pitsaanerusumik inissisimaffeqarmat illoqarfialu anginerulluni. Kisianni aamma pissutigalugu Jesusip ajoqersugai amerlanerit Kapernaumimi imaluunniit eqqaani najugaqarmata, taamaattumillu angerlarsimaffitsik qimanngikkaluarlugu Jesusimit ajoqersorneqarsinnaallutik.

Kapernaumimiitillutik Jesus arlaleriarluni tupinnartuliortarpoq, qaammatillu arlaqartut qaangiummata nammineerluni tamanna eqqartorpaa. Erniinnarli Jesus ajoqersugaalu ingerlaqqipput. Upernaajuvoq, ukiumi 30-mi, Jerusalemimullu ingerlaarput poorskisioqataajartorlutik. Tassaniitillutik ajoqersugaasa qularnanngitsumik siornatigut takusimanngisaannik Jesus iliuuseqarpoq.

Guutip inatsisai naapertorlugit Israelikkut uumasumik pilliuteqartartussaapput. Pilliuteqariartortut ilorrisimaarutissaannut pisartumut tamatumunnga atatillugu niuertut uumasunik timmissanillu tuniniaarrattarput. Tamannali naalaffimmi pisarpoq, inuillu uukapaasiarisarpaat akisunaariffiginerisigut.

Jesus kamangaarluni allunaasamik iperaatserpoq niuertullu aniatillugit. Aningaasanik aggortitsisartut aningaasaataat kuerarpai nerriviilu uppiterarlugit. „Tamakku annissigik!“ tuinik tuniniaasartut suaarpai. „Ataatama illua niuertarfinngorteqinasiuk!“

Jesusip ajoqersugaasa tamanna takugamikku, Guutip ernera pillugu siulittuutaasimasoq eqqaavaat: „Illunnik ilungersuutiginninnerma nungutilerpaanga.“ Juutilli aperipput: „Taamaalioravit nalunaaqqummik qanoq ittumik takutissavisigut?“ Jesusip akivai oqarluni: „Naalaffik manna ingutsersiuk, taava ullut pingasut naatinnagit napparteqqikkumaarpara.“

Juutit isumaqarput Jesusip naalaffivik pigaa, kisianniuna ’naalaffimmik oqarami timini pigaa’. Ukiut pingasut qaangiuttut toqusunit makimmat, ajoqersugaasa oqaaserisimasai taakku eqqaavaat. Johannes 2:12-22; Mattæus 13:55; Lukas 4:23. (wD 15/11 85)

◆ Kanami katittorsiortuneereerluni Jesus sumunnarpa?

◆ Sooq Jesus kamalerpa, qanorlu iliorpa?

◆ Jesusip ajoqersugaasa suna eqqaavaat taamaaliortoq takugamikku?

◆ „Naalaffik manna“ pillugu Jesus qanoq oqaaseqarpa, qanorlu isumaqarluni taama oqarpa?