Jesusip inuunera ajoqersuineralu

Jesusip nunamut pineranut pissutaasoq

SOORLU atuagassiap matuma siuliani paasereersimagipput, Jesus ajoqersukkani sisamat ilagalugit Kapernaumimi ulloq ulapaarfigeqisartik atorsimavaat. Siullermik angut anersaapilulik naalagiartarfimmi ajorunnaarsissimavaa. Taava Peterip sakia, Peterip illuaniittoq, ajorunnaarsippaa, unnummallu inuit Kapernaumimiut napparsimasortatik tamaasa ilagalugit tassunnakaapput ajorunnaarsinniassammagit. Jesus imminut piffissaqarfiginngivissimavoq.

Maanna aqaguani ullaannguuvoq. Naak suli taaraluartoq Jesus makippoq anillunilu, kisimiikkusulluni. Inoqanngitsumukarpoq akornusersorneqarani Ataataminut qinusinnaajumalluni. Jesusilli kisimiinnera sivisuallaanngilaq, tassami Peterip ilaasalu paasileramikku peqanngitsoq anipput ujarniarlugu.

Jesus nanigamikku Peter ima oqarpoq: „Tamarmik ujarpaatsit.“ Kapernaumimiut kissaatigaat Jesusip najussagaatik. Jesusip imminnut iliuuserisimasai pingaartippaat! Kisianni tupinnartuliornikkut ajorunnaarsitsisarnissani pingaarnerusumik pissutigalugu Jesus nunamut pisimava? Nammineq qanoq oqarpa?

Bibelimi oqaluttuat ilaat naapertorlugu Jesusip ajoqersukkani ima akivai: „Illorpannguaqarfinnut qaninnerusunut piartorta, tassanissaaq oqaluussissagama. Tamannami pilllugu aallartitaavunga.“ Naak illoqarfiup inuisa uninngaqqulluni qinnuigigaluaraanni Jesusip ima oqarfigai: „Nunaqarfinnut allanuttaaq Guutip naalagaaffianik iivangkiiliu oqaluutigisassaraara; tamanna pillugu aallartitaagama.“

Aap, Jesus Guutip naalagaaffiata, Ataatami aqqanik qutsillisitsisussap aammalu inuit ajuutaannik tamanik qaqugumut nungutitsisussap, oqaluussissutiginissaa pinerullugu nunamut pisimavoq. Tupinnartuliornikkullu ajorunnaarsitsisarpoq ersersinniarlugu Guutimit aallartitaanini. Aammattaaq ukiut hundredellit arlaqartut tamatuma siorna Moses tupinnartuliortarsimavoq Guutimut kiffaanini nalorninaallisinniarlugu.

Maanna Jesusip illoqarfinni allani oqaluussissalluni Kapernaumimit aallarmat ajoqersugaasa sisamat ilagaat. Taakku sisamat tassaapput Peter taassumalu qatanngutaa Andreas aammalu Johannes qatanngutaalu Jakob. Eqqaamassannguatsiarpat tamanna sapaatip- akunneranik ataatsimik sioqqullugu taakku siullerpaajullutik Jesusimit qaaqquneqarsimasut taassuminnga angalaqataallutik suleqataanissaminnut.

Jesus Galilæami ajoqersukkani sisamat ilagalugit nalunaajaatilluni pitsaaqisunik angusaqarpoq. Allaat Syria tamakkerlugu tusaamaneqalerpoq. Inuppassuit Galilæameersut, Judæameersut Jordanillu kuussuata illua- tungaaneersut Jesusimik ajoqersugaanillu malinnipput. Markus 1:35-39; Lukas 4:42, 43; Mattæus 4:23-25; 2 Môrsase 4:1-9, 30, 31. (wD 1/4 86)

◆ Ullormi Jesusip ulapaarfigisaata aqaguani Kapernaumimi ullaakkut sumik pisoqarpa?

◆ Jesusip nunamut pineranut suna pissutaava, aammalu tupinnartuliortarneranut suna siunertaava?

◆ Galilæami Jesus oqaluussiartussalluni aallarmat kikkut ilagaat, aammalu Jesusip suliaanut inuit qanoq qisuariarpat?