Jesusip inuunera ajoqersuineralu
Kapernaumimi tupinnartuliat suli allat
AJOQERSUKKANI siulliit sisamat, Peter, Andreas, Jakob aamma Johannes, Jesusip qaaqqoreerlugit — sapaataagaa Kapernaumimi naalagiartarfimmut iserput. Tassani Jesus ajoqersuilluni aallartippoq, inuillu tupigusuutigaat naalattariaqartutut ajoqersormatik allakkanik ilisimasutut pinnani.
Najuuttut ilagaat angut anersaapilulik. Tassanngaannaq suaartarluni aallartippoq: ’Sussagatsigit, Jesus Nazaretimiu? Aserorumalluta tikiuppit? Nalunngilakkit kinaasutit, taannaasutit Guutip Illernartua.’
Anersaapiluk angummiittoq nalunanngitsumik tassaavoq Satanip inngilipiluisa ilaat. Jesusip sukannersumik anersaapiluk oqaluffigaa oqarlunilu: „Nipangerit, uumanngalu aniit.“
Anersaapiluup angut noqartippaa nipitoorsuarmillu suaartarluni. Angummilli anivoq ajoqusernagu. Tamarmik tupigusuttorujussuupput! „Sunaana manna?“ aperipput. „Anersaalluunniit minguttuut inammatik naalappaat.“ Pisimasorlu tamanna tamani tusagaalerpoq.
Taava Jesusip ajoqersukkani ilagalugit naalagiartarfik qimappaa Simonillu, aamma Peterimik taaneqartartup, illuanut iserput. Tassani Peterip sakia arnaq kissarnilerujussuulluni napparsimaqaluni nalavoq. Jesus qinnuigaat arnaq ikioqqullugu. Taassumalu ornippaa, assaatigut tigullugu nikuisillugulu. Ingerlaannarlu ajorunnaarpoq nerisassaannillu piareersaatilerlugit!
Kingornagut, seqineq tarrereersoq, inuit sumit tamaneersut Peterip illuanut aggiapput napparsimasortatik nassarlugit. Erniinnarlu illoqarfiup inui tamarmik matup silataaniilerput! Jesusip sumilluunniit nappaatillit tamaasa ajorunnaarsippai. Allaat anersaapilullit tamaasa aniguisippai. Anersaapiluit anisikkaangatik ima nillertarput: „Illit Guutip erneraatit.“ Jesusilli sukannersumik oqaluffigai oqaloqqunagillu, Messiasiusunimi ilisimammanni. Markus 1: 21-34; Lukas 4: 31-41; Mattæus 8: 14-17. (wD 15/3 86)
◆ Jesusip ajoqersukkani siulliit sisamat qaaqqoreerlugit sapaatiugaa naalagiartarfimmiitillugit sumik pisoqarpa?
◆ Naalagiartarfimmit anigami Jesus sumunnarpa, taavanilu sumik tupinnartuliorpa?
◆ Unnuk taanna susoqarpa?
[Qupperneq 9-mi tamakkerlugu asseq]