Inuusuttusi — ilaqutariinni pilluartuni ataasiussuseqartuni inissarsi

’Uangami ataatama ernerigaanga, anaanama aqassugaralungalu pisuarigaanga.’ — ússatit 4:3.

1, 2. Ilaqutariit kristumiuusut ilaasa suna ajornartorsiutigaat?

ILA PISSATSINNASSUSIA isumakuluutigisani aniatissinnaassallugit asasiminut, misigissutsiminik paasiniaasumut misiginneqataallunilu siunnersuisartumut — ingammillu ataataminut anaanaminulluunniit taamaaliorsinnaanerup pilluarnassusia! Inuusuttulli tamakkeratik angajoqqaaminnut taama qanitsigisumik qamanngavillu pisumik attaveqarput. Illimmi?

² Inuusuttuaqqat kristumiunik angajoqqaallit marluk imannak allassimapput: „Attaveqatigiinniarneq pingaartumik ajornartorsiutigaarput. Angajoqqaavut oqaluukkuminaatsorujussuupput. Tamatta angajoqqaavut assorsuaq asavavut, kisiannili soorlu oqaluussinnaanngikkivut. Tamanna pillugu Jehovamut qinuttuinnarpunga, aaqqiissutissarsisinnaanangali.“ Suna pissutaasinnaava ilaatigut allaat ilaqutariit kristumiuusut iluamik attaveqatigiilluarneq ajornerannut? Suna aaqqiissutissaava?

Attaveqatigiilluarnermut akornutaasinnaasut

3, 4. Angajoqqaat qitornaasalu attaveqatigiinnginnerannit ajornartorsiutinut pissutaasinnaasunik taasaqarit.

³ Inuusuttuaqqat aatsaannguaq issuarneqartut aliikkusersuutigisartakkatik ikinngutigisartakkatillu pillugit angajoqqaatik isumaqatigineq ajorpaat. Isumaqatigiinngissuteqarneq isummaminillu sumiginnagaasunik misigineq ilanngullugu attaveqatigiinniarnermut akornusiisinnaapput. Sunali pissutigalugu isumaqatigiinngissuteqartarpat? Patsisaasinnaasut ilaat ússatit 20:29-mi atuagassaavoq: ’Sakkunerlaat [angutit inuusunnerit] nukisik usornaatigaat, utoqqaallu qiit ataqqinaatigaat.’ Inuusuttut ’nukii’ ukiorpassuarni misilittakkatigut suli maattutsissimanngimmata, ilissi inuusuttusi navianartorsiutaasinnaasut arajutsisinnaavasi, isumaqarlusi ’aasiit ajornavianngitsoq’. Angajoqqaasili, ukiorpassuarni misilittakkaminnit ilisimatuunngortitaasimagamik — immaqaluunniit peqqissiminartumik misigisaqarnerminnit — allamik isumaqarsinnaapput. Naak ilissi misigissutsisi paasigaluarlugit, navianartut qaamikkut ulorianaateqarpalunngitsut ilissi arajutsisasi sianigisarpaat. — ússatit 29:15.

⁴ Ilaatigut misigissutsit annernartut uummammiugisasi aniatissallugit artorassiuk, immaqa attaveqatigiilluarneq ajorpusi. Nammineq kukkusoorsimanisi pillugit imaluunniit arlaanik isumaqatigiinngissuteqarassi immaqa sakkortuumik isumakuluppusi. Immaqa Jobisut isumaqartarpusi, taanna misigisimammat nammineq qatanngutimi, ikinngutimi qanigisat, allaallu illoqatimi narrugigaanni. (Jûpe 19:13-19) Ilaatigut inuusuttuaqqap misigissutsi allanut oqaatigiuminaatsut oqaluuseriniarsarigaangagit, angajoqqaavisa ’siutitik milippaat’ tamannalu soorunami attaveqatigiilluarniarnermut akornutaasinnaavoq. (ússatit 21:13) Arnaq inuusuttoq kappialalluni oqarsimavoq: „Assut aliasuppunga qiasarlungalu — ataatagali oqaannarpoq: ’Qianeq iluaqutaanavianngilaq.’ Taava misigissutsikka ersersinnaveersaartalerpakka. Ataatama najuunnerani qianeq ajorpunga — oqaloqatigissaarlugulu.“

5. Attaveqatigiinnersi pitsaanerulersinniarlugu siullermik qanoq iliortariaqassavit?

⁵ Angajoqqaalli qanoq isumaqaraluarpataluunniit, illit assigiinngitsunik iliuuseqarsinnaavutit attaveqatigilluarniarlugit! Aallaqqaatigalugu angajoqqaannut pissutsit ilumoortumik nalilerniaruk. Assersuutigalugu, Israelikkut Ataataminnut qilammiusumut qanimut pissuseqartuusaarput, oqarlutik: ’Ataatagaakkit, inuusunninni tasissersortigaakkit.’ Piviusutulli oqaatigalugu Guuti aaqqiaginngilaat naalasseriitsumik iliuuseqarajukkamik. (Jerimia 3:4, 5) Angajoqqaatit ilumut ’tasissersortigaagit’? Iliuuseqartarnerpit, immaqaluunniit iliuuseqartoortarnerpit, attaveqatigiilluarnissinnut akornutaasinnaasunik? Salomonitut oqarsinnaanerpit: „Uangami ataatama [anaanamalu] ernerilluaraanga“? (ússatit 4:3, NW) Qanoq iliorsinnaavit angajoqqaannut qanillattorniarlutit?

„Unneqqarissumik nuannarinnilluinnarneq ilumoornerlu“

6. (a) ússatit 3:3 naapertorlugu, inuusuttoq ’saammaannarsissappat Guutip inuillu takkuanni’, pissutsit suut iluaqutissiissappat? (b) Qanoq ililluni tamakku ’qungatsinnut ujamilius’sinnaavigit?

⁶ Kunngip silatuup Salomonip eqqarsaatigaa suna pisariaqassasoq inuusuttoq ’saammaannarsissappat ajunngitsumillu sianilissalluni Guutillu inuillu [angajoqqaami ilanngullutik] takkuanni’. Suut pisariaqartuutippai? ’Erninnguara, . . . isumassuineq [unneqqarissumik nuannarinnilluinnarneq, NW] ilumoornerlu ilinnit alinaveerlit. Qungatsinnut ujamiliukkit, uummappit allattagassartaanut allakkit.’ (ússatit 3:1-4) Unneqqarissumik nuannarinnilluinnarneq ilumoornerlu angajoqqaannut qaninnerussutigisinnaavatit. Pissutsilli tamakku katattussaanngitsumik pissuserisariaqarpatit, ’qungatsinnut ujamiliullugit uummappillu allattagassartaanut allassimallugit’. Bibelip pilerfiata nalaani assammiu naqitsisaasoq ujamiliuttagaasarpoq. (1 Môrsase 38:18) Assammiu taanna nalissaqanngilaq, taannaannarmi naqitsisigalugu allakkat pingaartut aalajangersarneqarsinnaapput. Assammiullup puiorneq ajorpaa nalissaqangaarneralu eqqaamajuaannarlugu. Taamatut unneqqarissumik nuannarinnilluinnarneq ilumoornerlu eqqarsaatigiuaannagassaapput nalissaviallu puiortariaqarani. Pissutsilli tamakku qanorpiaq ilillugit ersersinniarsinnaavigit?

7. Attaveqatigiinneq pitsaanerulersinniarlugu inuup unneqqarissumik nuannarinnilluinnarneq qanoq ililluni ersersinniarsinnaavaa?

⁷ „Unneqqarissumik nuannarinnilluinnarneq,“ hebræerisoorlugu isumavia naapertorlugu, tassaavoq „ilumoortumik asanninneq“ inummullu allamut attaveqarnikkut piseritinnermik isumaqarluni. Illit angajoqqaannut ilumoorpit misigissutsikkullu attavigiuassallugit piseritillutit? Saggariap agdlagaine 7:9, 10-mi isumassuineq, tassa unneqqarissumik nuannarinnilluinnarneq, angajoqqaatserfiginninnermut misiginneqataanermullu atatinneqarpoq. Angajoqqaatit tatineqarnerisigut misigeqatigaagit? Inuit ilaasa unneqqarissumik nuannarinnilluinnarnerat ’ullaakkut nuissersutut ippoq, isugutanertut nungujaartutut’. (Húsia 6:4) Illit unneqqarissumik nuannarinnilluinnarnerit sakkortuumik isumaqatigiinngikkaangassi imaluunniit piumasatit pinngikkaangakkit aanngartarpa? Arrakkaangavit ’inatsit unneqqarissumik nuannarinnilluinnaqqussut oqqannit pisarpa’? Ilumoorneq misiginneqataanerlu attaveqatigiilluarniarnermut pisariaqavipput. — ússatit 31:26.

8. Inuusuttup ilumoortuussutsi qanoq ililluni ersersinniarsinnaavaa?

⁸ „Ilumoorneq“ tatiginninnermik pilersitsisarpoq, qanimummi attaveqatigiissagaanni tatiginninneq pisariaqarpoq. „Sallutuut“ pissusivimminnik paasineqatsaaliisut assiginaveerigit. (Tussiaat 26:4) Immaqa marloqiusamik inooriaaseqarusussaatit — angajoqqaavit kristumiuusut najuunneranni immikkut pissuseqarlutit, peqannginnerannilu allamik pissuseqarlutit. Taamatulli pissuseqarniarneq alianangaartumik kinguneqartarpoq, ingammik ilungersornartumik ajornartorsiuteqassaguit ikiorteqaratit anigorsinnaanngisannik. Eqqarsaatigiuttaaq tatigisaajunnaarnissat paasineqalerpat unneqqaserluttumik iliuuseqarsimasutit. „Angajoqqaat ilimagisatsinnit annerusumik ilisimasaqartarput,“ niviarsiaq kristumiuusoq oqarpoq. „Angajoqqaakka anngigisaqarfiginiarukkit, imminuinnaq salloqittarpunga Jehovalu salloqittarniarlugu.“ Aalajangersimagit ilumoorneq pigiliunneqavissumik pissuseriniassallugu. Ilumoornerli tassaaginnarpa ’mumingasumik’ oqalunnaveersaarneq iliuuseqarnaveersaarnerlu? — ússatit 4:20, 24; 10:9.

Uummatikkut peqqusersuillutit oqaluttarit’

9. Inuusuttut marluk ajornartorsiut suna anigorpaat, tamannalu qanoq kinguneqarpa?

⁹ Inuusuttut ilaasa misigissutsitik eqqartoraangamikkik angajoqqaaminnut ammasumik ilumoortumillu oqaluttuarneq ajorpaat. Assersuutigalugu, inuusuttuaqqat immikkoortut aappaani issuarneqartut aappaat misiarnani oqarpoq: „Isumaqatigiinnginnaveersaarluta angajoqqaatta tusarumasaannik oqaluttuartalerpugut, misigissusivivulli oqaatigineq ajorpavut.“ Inuusuttuaqqat taakku ikiortissarsiorput. Utoqqaanertap kajumissaarpai angajoqqaatik saaffigeqqullugit inuusuttorlu Elihu malinniarlugu, taanna oqarsimammat: ’Uummatikkut peqqusersuillunga oqalussaanga.’ (Jûpe 33:3) Qamannga pisumik qinoreersimallutik kiisa uummammiugisatik angajoqqaaminnut aniatippaat, misigissutsimikkut narrutsassimanertik nassuiarlugu. (Naleqqiuguk ússatit 12:18.) Ataataat oqariarneq sapilerpoq qitornami misigissusii paasileramigit, misiarnanilu oqarpoq ingasaassisimalluni. Eqqarsaatitik aniatimmatigik qujagaa. Pania naggasiilluni oqarpoq: „Ilaqutariissutut pissuserput arriitsumik pitsanngoriartorpoq. Ammanerusumik oqaloqatigiittaleratta, angajoqqaatta najoqqutassiaannut suut patsisaasut paasilerpavut. Naalungiarsuttut isilluta nikanarsarunnaarpaatigut. Paaseqatigiinnerujartorpugut.“

10, 11. (a) ússatit 27:19 naapertorlugu suna ilaqutariinni kristumiuusuni asanninnermut allissutaasinnaava? (b) Inuusuttut qanoq ilillutik versi taanna atorniarsinnaavaat?

¹⁰ Eqqarsaatitit angajoqqaannut aniatittarukkit uummatissigut pitsaanerujartortumik attaveqatigiilissaasi. Eqqissisimallutit ataqqinnippaluttumillu oqaluttaruit, angajoqqaavit suna uummatinniittoq malugisinnaassavaat. (ússatit 29:11) Aammattaaq taakkua uummataasigut pissusii takusinnaalissavatit. Ammassumik misiginneqataarpaluttumillu oqaloqatigiittarnissigut nammineq uummatinniittoq paasiartorumaarpat. ússatit 27:19-imi allassimavoq: ’Soorlu kiinaq tarrarsortartoq imikkut, taamaappoq inuup uummataa aapparminut.’a Soorlu kiinnat taseeqqakkut qatsungasukkut tarrarsortartoq, taama angajoqqaatillu isertuanngitsumik oqaloqatigiinnissigut immaqa paasilerumaarpat taakkua misigissusii pissutigisaallu illit nammineq misigissutsinnit pissutigisannillu allaavallaanngitsut. Ilumoortumik oqaloqatigiittarnissarsi paaseqatigiinnissamik isumassoqatigiinnissamillu pilersitsissaaq — tamakkulu atugaappata aatsaat naakkittartumik asannittumillu ilaqutariissut inooqatigiissinnaassaasi.

¹¹ Taamaattumik suut tamaasa — annernartut allaat — pillugit angajoqqaatit oqaloqatigiumasakkit. Nuannaarutigisatit angusaqarluarnitillu piinnarnagit aammattaaq annilaarutigisatit iluatsinngitsoornitillu angajoqqaannut oqaluttuarisakkit. Inuuninni anguniakkatit qinnutigisartakkatillu oqaluuserisakkit. Avissaarinaveerit. (ússatit 18:1) Angajoqqaatit tamaasa immikkut marluinnaallusi najortigisakkit, allanut isertukkannik oqaluttuarfigisarniarlugit. Inuusuttut ilaat tamakku samminiarlugit periarfissarsisarput ataatartik anaanartilluunniit ilagalugu angalaartillutik oqaluussinerup nalaani pulaarnerit akunnerini, ungasilaartumut pisuloortillutik, imaluunniit ilaqutariit aliikkusersornerisa nalaanni.

12. Inuusuttut piviusut suut arajutsissanngilaat?

¹² Angajoqqaannut attaveqatigiilluarnissaq allisarniarukku amerlanertigut kinguneqarluassaaq, eqqaamaniarulli illilluunniit angajoqqaatilluunniit naammalluinnartuunngitsusi. Angajoqqaat ilaatigut naapertuilluanngitsumik iliuuseqartarput, inuit allat misigissusiinut misigittaattarlutik, imaluunniit ajunngitsumik maligassiuinngitsoortarlutik. Ilaat uppinngitsuupput ilaatigullu Bibelimi najoqqutassiarineqartut naapertorlugit iliorfigineq ajorlutit. Inuusuttut ilarpassui ataasiinnarmik angajoqqaaqarput, ilaallu angutissaqarput arnassaqarlutilluunniit. Taamatut pissuseqarluni immikkut ittumik ajornartorsiornartarpoq. Angajoqqaatilli qanoq qanitsigisumik attavigigaluarukkilluunniit, ilaatigut ajonartorsiutitit kisermaattassavatit. Taamatut atugarliornerit nakkaannarnak qanoq iliorlutit atorsinnaavigit?

’Nammaat inuusunninni nammassallugu’ ilinniaruk

13. Jeremiasip oqaasia úputit 3:27-mi allassimasoq sooq eqqumiippaluppa?

¹³ Jehovap pruffiitinngortimmani Jeremias pilerpoq: ’Takuarma oqalunneq nalusunga, inuusuppallaarama.’ Jehovalli kajumissaarpaa pissatsillugulu. Naalliuttarami, annilaangagami pakatsisaramilu ilaatigut taamaatikkusuttarpoq, ilaannilu oqarsimalluni: ’Perloqqunarsili ulloq inunngorfiga.’ (Jerimia 1:6, 19; 20:7-9, 11, 14) Kingusinnerusukkut allappoq: ’Iluanaassaaq angut, nammaat nammakkuniuk inuusunnermini.’ (úputit 3:27) Qanorli ililluni nammaat atugarliorneq nammakkuniuk iluanaassava? Josefimut pisimasut assersuutaalluarput.

14, 15. (a) Josefip inuusuttuunermini suut atugarai? (b) Qanoq ililluni ’Jehovap oqaasianit sukuluiarneqarpa’?

¹⁴ 17-inik ukioqarluni Josef sinnattukkakkut Guutimit neriorsorneqarpoq nuimasumik atorfinikkumaartoq. Ajoraluartumilli qatanngutaasa sinngasut inussiatut tunivaat! Ægyptenimukaanneqarpoq kingornatigullu parnaarussiveerapalaami qilersorsimalluni sallusumik angutaaserluni arneriniartuunerarneqarami. (1 Môrsase 37:2, 4-11, 28; 39:20) Inuusuttoq maligassiuilluartoq nuanningaartumillu neriorsugaasoq taanna parnaarussiveerapalaap iluani annikilliortitaavoq. Takornartaagami misiginneqataasumik imaluunniit naalakkamut sassassutigaluni qajassuuteqqusisumik ikinnguteqanngilaq.

¹⁵ „[Josefip] isigai kalunnernik aalangeeruserpaat, qungatsimigut saviminermik tassilerneqarpoq. Oqaasia naammassineqarserlugu [Jehovap] neriorsuutaatigut nakussassarneqarpoq [Jehovap oqaasiata sukuluiarpaa, NW].“ (Tussiaat 105:17-19) Ukiut 13-it Josef inussiatut parnaarussatullu naalliuppoq Jehovap neriorsuutaa eqqortitserlugu. Taamatut misilinneqarnermigut sukuluiarneqarpoq. Annikilliuutigisaanut pisuunngikkaluarluni, Jehovap annikilliuutinik atugaqarnera ilaginnarpaa immikkut siunertaqarami. Josefip Jehovap „oqaasia“ neriuutigiuaannassanerpaa naak atugarliortitaagaluarluni? Pissutsit nersornartut ineriartortissavai, kamajuissuserlu, nikanartinneq, anersaakkut nakuussuseq aalajangeriataallaqqissuserlu suliareqqusaq atoruminaatsoq naammassiniarsinnaassallugu pisariaqartitassani ineriartortissallugit? Aap. Josefip annikilliuutigisani sukuluiarneqaatigai, soorlu kuulti aatsitaanermigut akuiarneqartartoq, tamatumalu pereerneratigut Guutimut suli annerusumik erlinnarsisimavoq, taassumalu annertuumik sakkugilersinnaanngorpaa. — 1 Môrsase 41:14, 38-41, 46; 42:6, 9.

16. Inuusuttup atugarliorneq qanoq isigissavaa?

¹⁶ Josef Jeremiasilu pisuunngikkaluarlutik naalliupput. Guuti malinniarlugu pissuserissaareersimapput. Atugarliornerminnili pissusii sukuluiarneqaqqipput. Inuusuttut kukkusoorsimasut suli annerusumik sukuluiarneqartariaqarput! Perorsaammik pineqarneq atortillugu nuannertarinngikkaluarpoq, tassuunali sungiusagaasut pissaannik iluarnissamik kingunissaqararaaq. (Eprîarit 12:5-7, 11) Sungiusarneqarnikkut ilorlikkut nakussatsittarput, soorlu sisak kissagaanikkut manngertisarneqartartoq. Soorlu ’Jehovap Josef aapparigaa, isumaginnissutsi taassumunnga sangutillugu’, taamatut pissusissaq akimorlugu pissatsikkumaarpaatit qasusuissutsit pillugu assut akilerumaarlutit. — 1 Môrsase 39:21; 2 Korintumiut 4:7, NW.

17. Niviarsissap inuusuttup atugarliornini qanoq sunnerneqaatigaa? Taassuma misilittagai uagut qanoq ilinniarfigisinnaavavut?

¹⁷ Assersuutitut una taasigu: Niviarsissap inuusuttup ilaquttani qimanniarpai angutissartaani sukannerpallaaqisorigamiuk ataatamilu asangaakkap toquneranik aliasungaarnermini misigeqatiginngimmani. Nalunnginnamiulli qimakkunigit ajornartorsiutini alliinnassasut, najortuarpai, atukkani atuinnarlugit. Maanna, ukiut 13-ingajaat qaangiuttut, isummani una inerpaa: „Angutissama perorsaanera pissuserississutigaara. Anaanagalu marluinnaagallaratta nukassagaavunga naalasseriillungalu. Piumasara piniartuaannarpara. Innimisunnerli ilinniarpara. Aamma ataatagigaluama toqua qaangerniarlugu angutissaralu qaninniarlugu pissatseqqullunga qinnuterparujussuakka Jehovap tusarpai.“ Aap, atugarliorneq atorsinnaajumallugu sungiusarninni Jehovamut qanilliartorumaarputit. Tassuuna taanna Ikinngutigilissavat, ’inuusunninnilli qimarravigisarlugu’. — Tussiaat 71:5.

18. (a) Inuusuttup inuunerata qanoq ingerlanissaanik suut aalajangiisuuppat? (b) Suna pillugu inuusuttut angajoqqaatik erlinnartuutissavaat?

¹⁸ Puiornaveeruk angerlarsimaffinni avatangiisit kisimik illit nammineq qanoq naleqartigissutsinnik imaluunniit inuunerpit qanoq ingerlajumaarnissaanik aalajangiisutuaanngitsut. Kisiannili ’inuusuttoq suliaanit nalunarunnaararaaq, minguitsuunersoq peqqusersuitsutullu iliornersoq’. (ússatit 20:11) Illit nammineq peqqusersuitsumik suliavit Guutimut asaneqalersissavaatsit inuunerillu siunertalersussallugu nalilersussallugulu. Naammalluinnartunik ilaqutariissoqarnavianngilaq, illoqativilli pissusii nersornartut pingaarnerutillugit malugeriakkit. Eqqarsaatigeriakkit angajoqqaavit nuannarisaminnik taamaatitsisariaqarsimaneri illit nerisassanik, atisassanik, illussanik, nakorsaatissanik taamaaqataanillu pilersorumallutit. Qujasuissusermik akilernagit ’ataatat anaanallu ataqqikkit’. Erlinnangaartuutikkit; naleqangaartikkit. — Evfisumiut 6:1-3; ússatit 16:20; 17:13.

19. Angajoqqaani uummatikkut naalattarunigit suna akissarsiarissavaa?

¹⁹ Angajoqqaatit isertuarnak pissutsillu tamaat ersersillugu attavigiuarukkit, taakkuninnga asanninnerit alliartuinnassaaq. Taava uummatikkut naalattassavatit. ’Erninnguara [imaluunniit paninnguara], inatsisikka puiornaveerigit, inassutikka uummappit maleruarligit,’ ataata silatooq kajumissaarilluni oqarsimavoq. Tulliullugu akissarsiassaq uparuarpaa: ’Inuunertunissaq ukiullu inuummarinnartut eqqissinerlu ilinnut amerlisissammatigik.’ — ússatit 3:1, 2. (wD 1/11 86)

[Quppernerup ataani ilanngussaq]

Pingaarnersiukkat

□ Suut attaveqatigiissinnaannginnermut pissutaasinnaappat?

□ Inuusuttup unneqqarissumik nuannarinnilluinnarneq qanoq ililluni ersersissinnaavaa?

□ Sutigut ilumoorneq ilaqutariit attaveqatigiinnerannut pitsaanerulissutaassava?

□ Inuusuttut atugarliorneq qanoq iluaqutigisinnaavaat?

[Qupp. 13-mi assiliartaq]

Soorlu nammakkap atugarliornerup pilersitaata Josefip pissusii sukuluiarai, taama inuusuttuunermi atugarliornikkut inuup pissusii sukuluiarneqassapput