Ilaqutariinni ilagiinnilu kristumiuni attaveqatigiinneq

’Alianaatsunik oqaaseqartaannaritsi, tarajorsimasunik.’ — KULORSAMIUT 4:6.

1. Guutip Eva imminukaammagu Adam qanoq oqarpa?

„INUK kinaluunniit qeqertaanngilaq . . . Inuit tamarmik nunavimmut ilaapput.“ Taama allassimavoq angut ilisimasoq ukiut hundredellit arlaqartut matuma siorna. Taamaalilluni Pinngortitsisup Adam pillugu oqaasii uppernarsaannarpai: „Iluanngilaq inuk kisimiimmat.“ Adam oqaatsit ikiortigalugit oqalussinnaassuseqarsimavoq, uumasummi tamaasa taaguusersorsimavai. Inummilli allamik Adam oqaloqatigisinnaasaqanngilaq. Taamaattumik tupinnarpallaanngilaq Guutip Eva pinnersoq pinngortimmagu imminullu nulissiullugu, ima nillermat: „Aatsaat tassa saaneq saanerma ilaa uinillu uinimma ilaa“! Ilaqutariit siulliit pilersinneqarmata taamaalilluni Adam inoqatiminik attaveqateqartalerpoq. — 1 Moses 2:18, 23.

2. TV-mik isiginnaarpallaarneq qanoq ajoqutaasinnaava?

² Ilaqutariinneq attaveqatigiiffissaalluarpoq. Tassami ilaqutariittut inuuneq pilluarnartuussappat oqaloqatigiilluartarnissaq pisariaqarpoq. Tamatumanili piffissaq iliuuseqarnissarlu pisariaqarput. Ullumikkut piffissaajaataanerpaanut ilaavoq TV. Tamanna marlutsigut ajoqutaasinnaavoq. Siullermik, ilaqutariit TV-mik isiginnaanngitsoornissartik sapileqqajaasinnaavaat, tamannalu oqaloqatigiittarnissamut akornutaasinnaaqaaq. Aappassaanik, ilaqutariinni paatsooqatigiinneqartillugu imaluunniit ajuallaqatigigiittoqartillugu TV qimaaffittut atorneqalersinnaavoq. Ajornartorsiutinik aaqqiiniarnissamut taarsiullugu aappariit ilaat nipangiinnartarput TV-lu ikillugu. Taamaalilluni TV ilaqutariinni oqaloqatigiinngippallaarnermut pissutaaqataasinnaavoq, oqaatigineqartarporlu oqaloqatigiinngippallaarneq aappariit avittarnerannut pissutaanerpaasoq. TV-mik isiginnaartarnerminnik annikilliliiuminaatsitsisut TV-mik peqarunnaarnissartik isumaliutigisariaqaraluarpaat. — Matîuse 5:29; 18:9.

3. TV-mik isiginnaartarnerminnik killiliisimasut qanoq iluaqutigisimavaat?

³ Allagarsisarsimavugummi angornioqalutik oqaluttuartunik TV-mik isiginnaartarnerminnik annikillisitserujussuarnertik imaluunniit allaat TV-qarunnaarnertik qanoq kinguneqarluartigisimasoq. Ilaqutariit ataatsit ima allapput: „Oqaloqatigiinnerujussuanngorpugut . . ., Bibelimik atuaqqissaarnerulerpugut . . . Pinnguaatinik sammisaqaqatigiittalerpugut . . . Oqaluussisarnerput sutigut tamatigut annertunerulersimavoq.“ Ilaqutariit allat TV-ertik pigiunnaareerlugu ima allapput: „Aningaasartuutivut ikinneruliinnanngillat [TV-p aqqutaanut akiliisarsimagaluaramik], aammattaarli ilaqutariittut immitsinnut qaninnerulerpugut, piffissarlu silatuumik sorpassuarnut atortalerparput. Susassaaleqinngisaannaratta avaanngusunngisaannarpugut.“

Isigigit, oqalugit tusarnaarillu

4. Aappariit qanoq ilillutik takutissinnaavaat imminnut pingaartillutik?

⁴ Ilaqutariinni attaveqatigiinnerit assigiinngitsuupput. Oqaaseqanngikkaluarluni attaveqatigiittoqarsinnaavoq. Inuit marluk imminnut isiginerat attaveqatigiinneruvoq. Najortigiinnerinnakkulluunniit takutinneqarsinnaavoq soqutigeqatigiilluni. Aappariit ajornanngippat sivisuumik takunngittarnissartik pinaveersaartariaqarpaat. Aappariit najortigiittarnerminnik nuannaarutiginnissinnaanissaq aappariinnermilu qanimut attaveqalersinnaanissaq ineriartortinniartariaqarpaat. Kikkut tamarmik takkuanni kisimiitillutillu asannittumik ataqqeqatigiittumilli pissuseqarfiginermikkut, aammalu ajunngitsumik pissusilersoqatigiinnermikkut ippinnanngitsunillu atisaqartarnermikkut, oqaaseqanngikkaluarlutik takutissinnaavaat imminnut assut pingaartillutik. Kunngip ilisimasup Salomonip ima oqaatigisimavaa: „Puilasuutit pilluaqquneqassaaq. Tipaatsuutigiuk inuusunninni nuliarilikkat.“ — Ussatit 5:18.

5, 6. Uiusup nuliaminik oqaloqateqartarnissami pingaaruteqassusianik eqqumaffiginninnissaa sooq pisariaqarpa?

⁵ Attaveqatigiinnermi pisariaqarportaaq oqaloqatigiinneq — imaaginnanngitsoq oqaluunneq. Immaqa arnat ilaat misigissutsiminnik aniatitsinissartik angutinit sapinnginnerusarpaat, tamannali angutit nipangersimaannarnissamut patsisiginiartariaqanngilaat. Uiusut kristumiuusut eqqumaffigisariaqarpaat oqaloqatigiilluartannginneq aappariippassuit ajornartorsiutigigaat, taamaattumillu ammasumik oqaloqatigiittarnissaq ilungersuutigisariaqarpaat. Taamaaliorsinnaapput nuliatillu apustili Paulusip unnersuussutaa pitsaasoq, Evfisumiunut agdlagkat 5:25-33-miittoq, maleruarunikku. Angutip nuliani timimisut asassaguniuk pilluarnissaa atugarissaarnissaalu soqutigisariaqarpaa, imminuinnaq eqqarsaatiginani. Tamatumani oqaloqatigiittarnissaq pisariaqarluinnarpoq.

⁶ Uiusoq eqqarsartariaqanngilaq nuliami soorunami nalunavianngikkaa pingaartikkini. Uppernarsaaffigisariaqartassavaa asallugu. Nuliaminik pingaartitsinini amerlasuutigut ersersissinnaavaa — tunniusimanerminik ersersitsivigisarneratigut, pakasarlugu tunissuteqarfigisarneratigut taassumunngalu attuumassuteqartunik tamanik ilisimatittarneratigut. Aammattaaq atisalersoriaasianik, ilaqutariinnut iluaqutissamik naammassisarpassuinik imaluunniit anersaakkut suliniutinut tamakkiisumik uummateqarluni tapersersuineranik pingaartitsinini oqaatigisarsinnaavaa. Uiusup ’nuliami silalimmik inooqatiginissaanik’ unnersuussut Pîtrusip agdlagai sujugdlît 3:7-imiittoq naalassaguniuk nuliani imminnut attuumassuteqartunik tamanik oqaloqatigiissuteqarfigisarneratigut paasinninnermik ersersitsivigisariaqarpaa, pisattatullu sanngiinnerusutut ataqqinninnermik ersersitsivigisariaqarlugu. — Ussatit 31:28, 29.

7. Sooq nuliaasup uiminik oqaloqateqarluartarnissani isumagisariaqarpaa?

⁷ Nuliaasuttaaq naalattuunissaminik unnersuussut Evfisumiunut agdlagkat 5:22-24-miittoq naalassaguniuk uiminik oqaloqateqarluartarnissani isumagisariaqarpaa. Oqaatsimigut iliuutsimigullu uini ’ataqqinningaarnermik’ ersersitsivigisariaqarpaa. Uini avaqqullugu iliuuseqarnianngisaannartariaqarpoq kissaatigisaalu sumiginnarnianngisaannartariaqarlugit. (Evfisumiut 5:33, NV) Aappariit imminnut isertuussaqaratik oqaloqatigiissinnaajuartariaqarput. — Naleqqiuguk Ussatit 15:22.

8. Ammasumik oqaloqatigiittarneq atatikkumallugu nuliaasoq sumut piumassuseqartariaqarpa?

⁸ Nuliaasup imminut nalligaluni nipaatsumik naalliunnissaq pinaveersaartariaqarpaa. Paatsooqatigiinneqarpat uini piffissaalluartukkut tamatuminnga oqaloqatigisinnaavaa. Tamatumunnga atatillugu dronning Ester ilinniarfissaalluartumik maligassiuisimavoq. Apeqqummik inuunermut toqumulluunniit attuumassuteqartumik uimi ilisimatinnissaa kissaatigisimavaa. Pinasuartumik, periaaserissumik silatusaartumillu iliuuseqarnermigut juutit annaappai. Aappaq ajuallannartumik iliuuseqarpat iliuuseqarsimappalluunniit tamanut ajunngitsussaq pillugu oqaloqatigiissutigisariaqarpoq. Periaaserissaaraanni naleqquttumillu quiasaarsinnaassuseqaraanni oqaloqatigiissinnaaneq ajornannginnerusinnaavoq. — Ester 4:15–5:8.

9. Oqaloqatigiitsilluni tusarnaartarnissaq qanoq pingaaruteqartigaa?

⁹ Oqaatsikkut attaveqatigiinneq eqqartortillugu aammattaaq pingaaruteqarpoq erseqqissassallugu aappariit aapparmik oqaasiinut tusarnaarnissaminnut tamarmik immikkut pisussaammata — aammalu maluginiassallugu suna eqqaaneqanngitsoornersoq. Tamatumani pisariaqarpoq oqaluttumut tusarnaaqqissaarnissaq. Eqqartorneqartuinnaanngitsut maluginiarneqassapput, aammali misigissutsit ersersinneqartut oqaatiginerannilu periaasiusoq maluginiarneqassallutik. Tamatumani uiusut kukkuluttorajuttarput. Nuliaasut ilaat uiminnit tusarnaarneqannginnertik pissutigalugu nikallortarput. Aammattaarli nuliaasut namminneq tusarnaaqqissaartariaqarput nukingerpallaamik isummaminnik aalajangiussissanngikkunik. ’Inuk sianisooq tusarnaartoq suli annerusumik ilisimasaqalertarpoq.’ — Ussatit 1:5.

Qitornat angajoqqaallu akornanni attaveqatigiinneq

10. Angajoqqaat meeqqaminnik attaveqatiginnilluassagunik sumut piumassuseqartariaqarpat?

¹⁰ Ilaatigut angajoqqaat qitornaminnik oqaloqateqarnissartik ajornakusoortittarpaat. ’Inuusuttoq ingerlavissaanik ajoqersuutissagaanni’ attaveqatigiilluarneq pisariaqarpoq, taamaalilluni qulakkeerneqarnerusinnaammat ’utoqqaliguni tamanna nigussanngikkaa’. (Ussatit 22:6) Qitornat sallusuissutip aqqutaanik qimatsisarnerat ilaatigut pissuteqartarpoq alliartornerminni angajoqqaatillu oqaloqatigiilluartarsimannginnerannik. Angajoqqaat qitornaminnik oqaloqateqarluartarnissaminnut pisussaanerat Mosesimik allakkat tallimaat 6:6, 7-imi erseqqissarneqarpoq: „Oqaatsit taakku peqqussutillu ullumi ilinnut tunniussakka uummammiugiuassavatit. Qitornannut nangeqqittuartassavatit eqqartortarlugillu angerlarsimatillutit issiasaraangavit, angalaartaraangavit, innartaraangavit makittaraangavillu.“ Aap, angajoqqaat qitornatik piffissaqarfigisariaqarpaat! Qitornaminnut iluaqutissamik pilliuteqarnissaminnut piumassuseqartariaqarput.

11. Angajoqqaat qitornatik ilaatigut sumik paasitittariaqarpaat?

¹¹ Ilissi angajoqqaat qitornasi paasitittariaqarpasi Jehovap asagai aammalu ilissi asagisi. (Ussatit 4:1-4) Takutissinnaasariaqarpasi taakku isumakkut, misigissutsikkut, timikkut anersaakkullu ineriartornissaannut iluaqutissaq anguniarlugu, ilorrisimaarnissaraluarsi aliikkutassarsiornissaraluarsilu pinngitsoorumasarisi. Tamatumani paasinnittuunissaq pisariaqarpoq, tassa pissutsit meeqqat isiginnittaasiannit isiginiarsinnaasariaqarput. Angajoqqaat ilissi namminissarsiunngitsumik asanninnissigut qitornasi nukittuumik ataqatigilersinnaassavasi kajumissaarsinnaassallugillu peqatiminnut pinnatik ilissinnulli uummammiuminnik aniatitsisarnissaannik. — Kulorsamiut 3:14.

12. Sooq inuusuttut meeqqallu angajoqqaaminnut ammasumik saaffiginnittassappat?

¹² Aappaatigulli aamma ilissi meeqqat angajoqqaassinnik oqaloqateqartarnissamut pisussaavusi. Taakkua ilissinnut iliuuserisimasarpassui eqqarsaatigisarussigik uummammiussinnik aniatitsiviginissaat ajornannginnerutissavarsi. Taakkunannga ikiorneqarnissarsi tapersersorneqarnissarsilu pisariaqartipparsi, taamaaliornissartillu ajornannginnerutissavaat ilissi ammaffigigussigik. Soormi peqatisi siunersiorumanerussavisigik? Qularnanngitsumik taakkua angajoqqaassi ilissinnut iliuuserisimasaannut naleqqiullugu ilissinnut iliuuseqarpallaarsimanngillat, aammattaarlu ilissinnit misilittagaqarnerunngillat. Aammalu ilagiinnut kristumiunut ilaanngikkunik naassaanngitsumik inuulluarnissarsi soqutiginavianngilaat.

Ilagiinni attaveqatigiinneq

13, 14. Kristumiut oqaloqatigiissagaangamik Bibelimi najoqqutassat suut najoqqutarisassavaat?

¹³ Aammattaaq qatanngutinut ilagiinniittunut attaveqarluarnerup attattuaannarniarnissaa imaannaanngitsuuvoq. Ilungersortumik kajumissaarneqarpugut ’katisimasarfitta qimannaveersaarnissaanik’. Soorli katisimasarpugut? ’Asanninnermut ajunngitsuliornermullu kajumissaaqatigiinniarluta.’ Tamatumani oqaloqatigiittarnissaq pisariaqarpoq. (Eprîarit 10:24, 25) Ajuallassimagaanni ataatsimiigianngitsoornissamut pissutissaqanngilluinnarpoq. Ammasumik oqaloqatigiittarneq attatissavarput Jesusip unnersuussutaa Matîuse 18:15-17-imiittoq maleruarlugu. Ajuallatsisititit oqaloqatigisakkit.

¹⁴ Qatanngutit arlaat isumaqatigiinngissuteqarfigigaanni Bibelimi unnersuussut Kulorsamiut 3:13-imiittoq maleruarneqartariaqarpoq: ’Immissinnut unnerluutissaqaraluarussi kamageqatigiillusilu isumakkeerfigeqatigiigitsi; soorlu [Jehovap, NV] isumakkeerfigigaasi, taamattaaq ilissi pigitsi.’ Tamatumani oqaloqatigiinnissaq, imaanngitsoq oqaloqatiginnikkumajunnaarnissaq, pisariaqarpoq. Malugigukku arlaata ilasseraanngitsumik pissuseqarfigigaatit pitsaassaaq unnersuussut Matîuse 5:23, 24-miittoq maleruarukku. Ajornartorsiut pillugu oqaloqatigiuk qatanngutillu eqqisseqatiginiarlugu iliuuseqarit. Tamatumani asanninneq maniguunnerlu pisariaqartippatit, illilli qatanngutillu pillusi Jesusip unnersuussutaa maleruartariaqarpat.

Siunnersuutit unnersuussutillu

15. Sooq kristumiut pissutissaqaraangamik unnersuussinngitsoortariaqanngillat?

¹⁵ Paulusip unnersuussutaa Galâsiamiut 6:1-imiittoq maleruassagaanni aammattaaq oqaloqatigiissinnaanissaq pisariaqarpoq: ’Qatanngutikka, inuk misiginngitsoorluni pinerlukkaluarpat taava ilissi anersaamut atasusi iluarsisinniarsiuk anersaamik qanilaartumik, misissorlutillu illittaaq usserneqaqqunatit.’ Oqaatsitsigut iliuutsitsigulluunniit kukkunerarneqarutta anneruniajuilluta akuersaarumassuseqartariaqarpugut. Tassa tamatta tussiaasiortutut Daviditut isumaqartariaqarpugut: „Iluartup patippanga isumassorneqassaanga, inerterpanga tarnima tarnutigissavaa, niaqora peqqunngissanngilaq.’ (Tussiaat 141:5, nutsigaq pisoqaq naapertorlugu) Ingammik utoqqaanertat maniguunnikkut maligassaalluartariaqarput suullu tamarmik namminneq iluarisaannatik malillugit ingerlanissaat malartaallutik piumasarisassanagu, isummaminnilli allat isumaannut naleqqussaanissaminnut piumassuseqartariaqarput, allassimaffik una eqqaamajuarlugu: ’ Asannittup patitsineri ilumoornermik pissuteqararaat.’ — ússatit 27:6, nutsigaq pisoqaq.

16. Oqalugiartalerlaat qanoq unnersuunneqarnissartik ilassiumasariaqarpaat?

¹⁶ Inuusuttut kristumiunik inersimasunik, qularnanngilluinnartumik atoriaannaasunik ikiuilluarsinnaasunik, siunersiuigaangamik ersersittarpaat ilisimassuteqarlutik anneruniajuissuseqarlutillu. Utoqqaanertattaaq unnersuunneqarnissaminnik pisariaqartitsisinnaasarput. Assersuutigalugu, utoqqaanertaq oqalugiarnermini oqarsimavoq pilluaqqussutissat sarĸúmersitat 7:16, 17-imi eqqartorneqartut, tassa inuit kaalissanatillu imerusulissanngitsut, tassaasut ’savat allat’ silarsuassami nutaami misigiumaagassaat. Allamili tikkuarneqarsimavoq allassimaffik taanna uagut nalitsinnut tunngasuusoq. (Takuuk Åbenbaringen — Det store klimaks er nær!,a qupperneq 126-128.) Tusarnaartut ilaat aamma utoqqaanertaasoq misigaaq tamanna oqalugiartumut eqqaasariaqarumaarlugu, tamatumunngali suli periarfissarserianngitsoq oqalugiartup nammineq sianerfigaa qinnuigalugulu qanoq ililluni oqalugiaatini pitsanngorsarsinnaanerini siunnersoqqulluni. Aap, ikiorneqarnissarput oqilisartigu siunnersorneqarusussuserput ersersittarlugu. Ajuallajanaveersaarniarta imaluunniit qajannarpallaarnaveersaarniarta.

17. Qatanngutit qanoq qiimmassarneqartarpat?

¹⁷ Najoqqutassamik matumani atorluarneqarsinnaasumik Kunngi Salomon saqqummiussisimavoq. Ima oqarsimavoq: „Ajorsartut ajunngitsuliorfigikkit, sapinngikkuit ikiuiumanngitsooqinak!“ (Ussatit 3:27) Qatanngutivut asanninnermik ersersitsiviginissaannik akiitsugaqarfigaavut. Paulus ima oqarsimavoq: ’Pisassaqarfigitinnaveeritsi, asaqatigiinnermik kisianni; aapparminnimmi asannittup inatsisit naammassivai.’ (Rûmamiut 13:8) Taamaattumik oqaatsinik qiimmassaasunik erliguussinaveerit. Ilagiinni kiffaq inuusuttoq siullermeerluni oqalugiarsimappat nersualaarniaruk. Qatanngut arnaq teokratimik ilinniarfimmi suliassani suliarilluarumallugu ilungersorsimappat imaluunniit torrallullugu saqqummiussimappagu oqarfiginiaruk suliassaminik ilungersuussisimanera nuannaarutigigit. Qatanngutivut angutit arnallu amerlanertigut sapinngisartik naapertorlugu iliorniartarput, oqaatsillu nersualaarutaasut nuannaarutigissavaat.

18. Imminut kakkagerpasippallaaluatsiartumik naammattoorsigaanni inussiarnersumik qanoq iliortoqarsinnaava?

¹⁸ Oqalugiartorli inuusuttoq pikkorissoq imminut kakkagerpasippallaaluatsiarpat, ingammik utoqqaassusia eqqarsaatigalugu, taava? Qanoq ililluni ikiorneqarsinnaava? Utoqqaanertaq inersimalluartoq asannittuliussannginnerpa saqqummiussaata pitsaasortaanik nersualaassaguniuk, tamannalu ilutigalugu qanoq siunissami maniguuppasinnerusumik sassartarnissaanik inussiarnerluni siunnersussaguniuk? Attaveqatigiinneq taama ittoq qatanngutinut asannissutsimut ersiutaassaaq inuusuttullu naleqqutinngitsumik pissusilersornermik siusissukkut, ileqquliussivinnginneranni, soraarussinissaannut ikiuutaassalluni.

19. Sooq utoqqaanertat ilaqutariinnilu qullersaasut oqaloqatiginnilluarsinnaasariaqarpat?

¹⁹ Iluaqutaasut pillugit utoqqaanertat imminnut oqaloqatigiittarput ilagiinnillu attaveqatiginnittarlutik — soorunami paasissutissat tamanut ammasuunngitsut, soorlu unioqqutitsinerit pillugit paasissutissat, tamanut tusarliutissanagit. Isertuusserpalaarpallaarnerli nikallornermik tatiginninnginnermillu pilersitsisinnaavoq ilagiinnilu — imaluunniit ilaqutariinni — akaareqatigiinnermik aseruisinnaalluni. Assersuutigalugu, kikkut tamarmik nutaarsiassanik qiimmaallannartunik tusassallutik nuannaarutigisarpaat. Soorlu apustili Paulusip qatanngutimi anersaakkut tunissutinik aveqatiginissaat qilanaarisarsimagaa, taamatuttaaq utoqqaanertat anersaakkut nakussatsinnartunik paasissutisseerusussuseqarluarsinnaapput. — Ussatit 15:30; 25:25; Rûmamiut 1:11, 12. (wD 1/9 91)

[Quppernerup ataani ilanngussaq]

Uteqqiinnissamut apeqqutissat

□ Ilaqutariinni attaveqatigiilluannginnermik ajornartorsiut qanoq aaqqinneqarsinnaasarpa?

□ Attaveqatigiilluarneq attatiinnarumallugu aappariit qanoq iliorsinnaappat?

□ Angajoqqaat qitornaasalu akunnerminni quppaqalersinnaanera qanoq pinngitsoortissinnaavaat?

□ Ilagiinni ilaqutariinnilu attaveqatigiinneq anersaakkut nakussatsinnartoq qanoq ililluni pilersinneqarsinnaava?

[Qupp. 26-mi assiliartaq]

Ataqatigiilluarnerup ilaqutariit pilluarnerat ineriartornerallu siuarsartarpaa