Meeqqavit Guutimik ilisimassutsikkut peroriartornissaannik ikiukkit

INUIT inuiaqatigiinnit assigiinngitsorpassuarneersut assigiinngitsorujussuarnillu tunuliaqutaqartut Jesus ajoqersuillaqqissusiagut ileqqussatigullu ilinniartitsillaqqissusiagut nersorpaat. Pissutsit aalajangersimasut perorsarneqarnermini atorsimasai tamatumunnga pissutaaqataasinnaappat? Ilaqutariit inuuffigisimasai peroriartorfigisimasaalu ullumikkut angajoqqaat sumik ilinniarfigisinnaavaat?

Jesusip meeraaneranut tunngasumik Bibelimi annikitsuinnarmik paasissutissinneqarpugut. Iluamik oqaatigalugu ukiut inuffii aqqaneq-marluk siulliit versini marlunni ataatsimut eqikkarlugit naatsumik oqaatigineqarput: ’Tamaasalu Jehovap inatsisai malillugit Josefip Mariallu naammassigamikkik Galilæamut uterput illoqarfimminnut Nazaretimut. Nukappiararli alliartorpoq nakussatsillunilu ilisimassummillu peqangaalerluni; Guutillu saammaannerata qulangerpaa.’ (Lúkarse 2:39, 40) Naammattumilli paasissutissiivoq angajoqqaanut ilinniutaasinnaasumik.

Nukappiaraq ’alliartorpoq nakussatsillunilu’. Taamaattumillu timikkut pisariaqartitaanik angajoqqaavisa pilersorsimassavaat. Aammattaaq ’ilisimassummik peqangaalerpoq’.a Tamatumunngalu ilisimassummut tunngavissamik ilinniartinnissaanut silaqarsutsimillu tuninissaanut kikkut akisussaaffeqarpat?

Mosesip inatsisai naapertorlugit angajoqqaat tamanna akisussaaffigaat. Inatsimmi Jehova angajoqqaanut Israelikkuusunut ima oqarpoq: ’Oqaatsillu makku ullumi ilinnut inassutigisakka uummammiugissavatit. Puiugaanaveersassavatillu qitornannut oqaluuserissallugillu illunni issiasaraangavilluunniit aqqusinikkulluunniit ingerlasaraangavit, innaraangavillu makikkaangavillu.’ (5 Môrsase 6:6, 7) Malunnarpoq Josefip Mariallu inatsit tamanna maleruarsimagaat, tassami Jesus ’ilisimassummik peqangaalermat’ ’Guutillu saammaannerata qulangermagu’.

Inuit ilaat immaqa isumaqassapput meeqqat allat Jesusip perorsarneqarneratut perorsassallugit tulluutinngitsoq, tassami Jesus naammalluinnartuummat. Kisianni Josef Marialu naammalluinnartuunngillat, taamaakkaluartorli timikkut anersaakkullu pisariaqartitaanik isumagaat, naak meeqqatik amerliartortillugit isumagisassatik amerliartoraluartut. (Matîuse 13:55, 56) Naallu Jesus naammalluinnartuugaluarluni taamaattoq meeraaneq inuusuttuunerlu aqqusaartariaqarsimavai — taamalu inersimasunngorluni. Ajunngitsumik perorsarniarlugu angajoqqaavisa tamaviaarlutik sulissutigisariaqarsimavaat, malunnarporli suliassaq tamanna naammaginartumik naammassisimagaat.

Jesus aqqaneq-marlunnik ukioqartoq

’Angajoqqaalu ukiut tamaasa Jerusalemiliartarput poorskisioriartorlutik.’ (Lúkarse 2:41) Guutip inatsisaani peqqussutigineqarpoq angutit tamarmik pinngitsoqaratik Jerusalemimi nalliuttorsuit najuuffigisassagaat. (5 Môrsase 16:16) Oqaluttuamili allassimavoq angajoqqaavi marluullutik ’ukiut tamaasa Jerusalemiliartartut’. Josefip Maria qularnanngitsumillu meeqqatik tamaasa ilagalugit Jerusalemimut kilometerit 100-t sinnerlugit angalasarsimavai nalliuttorsuit nuannersut nalaanni. (5 Môrsase 16:6, 11) Tamanna ileqqorisimavaat — inuunerminni nalliussiuartagaat. Najuuffigitsiaannarnerlu ajorpaat, nalliuttorsuilli ullui tamaasa tassaniittarlutik. — Lúkarse 2:42, 43.

Tamassa angajoqqaat ullumikkut ilinniarfigisinnaasaat. Tamakku nalliuttut ukiumoortut Jerusalemimi pisartut nalliuttorsuarnut atatillugit katerisimaarfiusarput nuannaarsaqatigiiffiusarlutillu. (3 Môrsase 23:4, 36) Tassani Josef, Maria inuusuttorlu Jesus anersaakkut nakussassarsinnaapput. Ullumikkut angajoqqaat silatusaassapput katerisimaarnerit taama ittut meeqqamik allamik misigisaqalaarnissaannut tamannalu ilutigalugu anersaakkut nakussassarnissaannut atorluarniartarunikkik. Angajoqqaat Jehovamut Nalunaajaasuusut tamanna isumagisarpaat meeqqatik ataatsimeersuarnernut ukiup ingerlanerani pisartunut ilagisaraangamikkik. Taamaalillutik meeqqat immaqa pissanganartumik angalasarput aammalu ullut ilaat uppeqaterpassuamik ilaginissaannut periarfissinneqartarlutik. Ataataq ingerlalluartunik meeralik isumaqarpoq ingerlalluarnerannut pissutaanerpaaq tassaasoq ukiut 45-t matuma siornatigut kuisikkamili ataatsimeersuarnerni eqqartorneqartut tamaviisa malinnaaffiginngitsuunngisaannarsimagamigit — meeqqanilu kajumissaartarsimallugit maligassiani tamanna maleqqullugu.

Paatsooqatigiinneq

Jesus mikinerugallarami ukiut tamaasa illoqarfissuarmut Jerusalemimut angalagaangamik qularnanngitsumik angajoqqaami eqqaanniiginnartarpoq. Alliartortillunili nammineersinnaatitaanera alliartorsimassaaq. Aqqaneq-marlunnik ukioqalerami ukiut anguai juutinit pingaartinneqarluartut, tassa angutinngoriartulerfiummata. Allanngulerneq pissusissamisoortoq tamanna immaqa pissutaasimassaaq paasinerluinermut qaqugu Josef ilaquttanilu Jerusalemimit angerlamut aallassanersut. Oqaluttuaq ima nipeqarpoq: ’Angerlaleramillu nukappiaraq Jesus Jerusalemimi unippoq; angajoqqaasalu arajutsivaat. Ingerlaqatiminnulli ilagisorigamikku ulloq ataaseq ingerlagamik ujalerpaat eqqarliminni ilisarisimasaminnilu.’ — Lúkarse 2:43, 44.

Angajoqqaat meeqqallumi immaqa sikisassapput pisimasoq tamanna ilisaralugulusooq. Pisimasorli tamanna ataatsimik immikkooruteqarpoq: Jesus naammalluinnartuuvoq; naalallunilu Josef Marialu pimmagit taava naatsorsuutigisinnaanngilarput isumaqatigiissutertik unioqqutissimassagaa. (Lúkarse 2:51, 52) Matumanili pineqartoq tassaaneruvoq ataqatigiinnerata unittuullatsiarsimanera. Angajoqqaavi isumaqarput Jesus eqqarlitik ilisarisimasatillu, aamma angerlamut ingerlasut, ilagigai. (Lúkarse 2:44) Takorloorneqarluarsinnaavoq Jerusalemimit aallalerlutik ulapaarnerminni meeqqatik minnerusut nakkutiginerusimassagaat, isumaqarlutillu ernertik angajulleq, Jesus, nammineq malinnaasoq.

Qularnanngitsumillu Jesus nammineq isumaqarsimassaaq angajoqqaami sumiinnini nalunngikkaat. Tamanna angajoqqaaminut akissutaani erserpoq: ’Sooq ujarpisinga? Nalugassinga ataatama pii najussagikka?’ Ataqqinninngippalunngilaq. Oqaasiisa nalunaarpaat tupaallaatigigini angajoqqaami sumiinnini nalusimammassuk. Taamatut paatsooqatigiinneq nalinginnaasuuvoq angajoqqaat angisuunngulersunik meerallit nalaattarsinnaasaat. — Lúkarse 2:49.

Takorlooriaruk Josef Marialu isumaaluttut ulloq siulleq naammat paasileramikku Jesus peqanngitsoq. Takorlooriarullu isumaalunnerat suli alliartortoq ulluni marlunni Jerusalemimi ujarlernerminni. Nalorninartorsiornermili tamatumani erserpoq Jesusimik ilinniartitsisimanerat kinguneqarluarsimasoq. Jesusip ileqqorluttut ilaliussimanngilai. Angajoqqaani kanngunaatissinngilai. ’Nanivaat naalaffimmi ajoqersuisut akornanni issiasoq, tusarnaarlugillu apersortarai. Tusartaasali tamarmik sianissusiagut akisarnerisigullu tupigingaarpaat.’ — Lúkarse 2:46, 47.

Jesusip naalaffimmiissimanerata Bibelimilu najoqqutassiarineqartunik paasinnilluarsimanerata, Josef Marialu ataqqinaatissippai, tassuunami ersermat qanoq perorsaariaaseqarsimanerat. Taamaakkaluartorli anaanat isumaaluttut pisarnerattut Maria qisuariarpoq: siullermik erni ajunngitsoq nassaarigamiuk eqqissiallaatigaa; taavalu isumaalunnini annilaanganinilu annillugit: ’Ernera, sooq taama pivisigut? Ata, ataatavit uangalu erloqilluta ujarpatsigit.’ (Lúkarse 2:48) Tupinnanngilaq Josefimit siulliulluni oqalulermat marluullutillu isumaalunnertik oqaatigalugu. Tamanna pillugu inuusuttuararpassuit oqarumassapput: „Soorlulimi tassa anaanaga oqaluttoq!“

Sumik ilinniarfigisinnaagipput

Pisimasoq tamanna sumik ilinniarfigisinnaavarput? Inuusuttuaqqat naatsorsuutigeqqajaasarpaat angajoqqaamik qanoq eqqarsarnertik ilisimasaraat. Oqarajuttarput: „Isumaqarlungami nalunngikkit.“ Inuusuttuaqqat paasinerluinerminnut atatillugu angajoqqaaminnut taama oqartartut takornartaanngillat.

Meeqqat inersimasunngoriartortillutik nammineersinnaaleriartortarput. Tamanna allanngoriartorneruvoq pissusissamisoortoq angajoqqaallu akuerisariaqagaat. Allaalli pitsaanerpaamik perorsaagaluarluni paatsooqatigiinnerit pisinnaasarput, angajoqqaallu pinngitsoqaratik isumaaluutissaqartarput. Kisiannili Josefip Mariallu maligassiuilluarnerat malikkunikku, taava meeqqaminnut perorsaasimanerat nalorninartorsiulernermi qitornaasa iluaqutissarsiffigissavaat.

Qularnanngitsumik Jesus inuusuttuaraanerani angajoqqaavisa perorsartuarpaat. Pisimasup misissoriikkatta matuma kingorna, maleruulluni angajoqqaani najukkaminnukaqatigai ’naalalluarlugillu’. Tamatuma suna kinguneraa? ’Jesusilu alliartorpoq ilisimassutsimigut ukiumigullu nuannarineqarnermigullu Guutimi inunnilu.’ Tassa pisimasoq tamanna pilluarnartumik naaneqarpoq. (Lúkarse 2:51, 52) Josefip Mariallu maligassiaat angajoqqaat malikkunikku meeqqamik Guutimik ilisimassutsikkut alliartortinniarneranni, angerlarsimaffiup pitsaasuunissaa meeqqamillu inunnit Guutimik asannittunit ajunngitsumik sunnerneqarnissaat isumagigunikku, taava ajunngitsumik ingerlanissaat ilimanaateqarnerungaassaaq. Ilimanaateqarluinnarpoq meeqqat akisussaassutsimik ilisimannittunngorlutik inersimasunngussasut, kristumiutut inersimasutut, pilluarnartumillu inuuneqalissallutik. (wD 15/2 87)

[Quppernerup ataani ilanngussaq]