Upperisarsiornerup pisariaqartitatsinnik tunisinnaavaatigut?

SUNA nerissavarput? Suna imissavarput? Suna atissavarput? Apeqqutit taama ittut pingaaruteqalersarput pissutsini allaat inuunermi pisariaqartunik minnerpaanilluunniit amigaateqarfiusuni. Kisianni malugeriaruk tamatumunnga tunngatillugu Jesus Kristus qanoq oqarnersoq: ’Inuunersi isumakuluutigissanngilarsi, suna nerissagissi sunaluunniit imissagissi; timisiluunniit isumakuluutigissanngilasi, suna atissagissi.’ (Matîuse 6:25) Tamanna eqqumiippa? Nerisassat, atisassat inissarluunniit amigaatigigaanni taava siullerpaamik atortussatigut ikiorneqarnissaq pisariaqartinneqartannginnerpa, oqaatsit upperisarsiorpaluttut tusarneraluarlutik kisianni tunngaveqanngitsutut inuit ilaannit immaqa taaneqarsinnaasut pinnagit?

Pissutsinut inuit allat atugarisaannut Jesus misigittaatsuunngilaq imaluunniit pissutsit atugaat sanioqqutiinnarniarneq ajorlugit. Inuit suut pisariaqartinneraat ilisimalluarpaa. Kisianni tamanna ilutigalugu navianaatilik piviusoq sianigaa: Pisariaqartitatta piniarneranni atortussat tunngavigalugit inuunerput ingerlatilersoorsinnaavarput taamaalillutalu misigilersarluta Guuti pisariaqartinnagu. Taamaattumik inuunitsinni sunik pingaarnerutitsinerluta sianigisariaqarparput.

Jesusip siunnersuutaa malikkutsigu inuunitsinni eqqortunik pingaarnerutitaqassaagut. Ima oqarpoq: ’Guutilli naalagaaffia iluarnerlu [Guutip] pia piniaqqaarsigik, taava tamakku tamaasa ilanngullugit piumaarpasi.’ (Matîuse 6:33) Siunnersuut tamanna malikkutsigu misigilissavarput upperisarsiornerup — upperisarsiornerup ilumoortup, Bibelimik tunngaveqartup — pisariaqartitatsinnik tunisinnaagaatigut.

Jesus taama oqarnermigut isumaqanngilaq taassumunnga ajoqersugannguinnarluta ajoqersuutaanillu maleruaaliinnarluta tassuuguinnaq ajornartorsiutivut tamarmik aaqqinneqassasut. Aammattaaq ima isumaqanngilaq ajoqersugai ingiinnarlutik pisariaqartitaminnik tupinnartuliakkut Guutimit tunineqarnissartik utaqqiinnassagaat. Kikkulluunniit tamarmik kristumiunngussanngikkaluarnerpat tassuuguinnaq inuunerup ajornartorsiornartuinit aniguisinneqarnissaq pineqaraluarpat? Jesusip taamatut oqarnermigut isumagisaa tassaavoq Ataatani, Jehova Guuti, tassaasoq pisariaqartitatsinnik pingaarnerusunik tamanik tunisisinnaasoq. Taamaattumik Jesus aammattaaq ima oqarpoq: ’Ataatassi qilammiusup ilisimavaasi tamakkuninnga tamanik pisariaqartusi.’ — Matîuse 6:32.

Jehovap atortussatigut pisariaqartitatsinnik isumassuinnanngilaatigut aammattaarli inuunermut pisariaqartumik allamik, tassa anersaakkut pisariaqartitatsinnik, isumassorluta. Inuunerput ajunnginnerpaamik pissarsiffigissagutsigu qanoq iliussanersugut isumassarsiarititaasumik Bibelimi unnersuussimavaatigut. (Isaia 48:17) Taavalu Guutip pallorfiginnitsini peqatigiiffimmut katersorsimavai pisariaqaraangat imminnut tapersersoqatigiissinnaaqqullugit. (apustilit suliait 4:34) Aammattaaq anersaani iluartoq imaluunniit pissaanini sulissutiginnittoq ikiortigalugu sassartarpoq kiffanilu ikiortarlugit. (Lúkarse 11:13; Galâsiamiut 5:22-25) Aammalu nunami Paratiisi atulerseqqinniarlugu Guuti aaqqissuussisimavoq. — Lúkarse 23:43; sarĸúmersitat 21:1-4.

Atortussatigut pisariaqartitatsinnik pinissatsinnut ikiuut

Atagu maanna sammeriartigik Bibelimi najoqqutassat atortussatigut pisariaqartitat piniarneranni inunnut amerlasuunut ikiuutaasimasut. Kristumiu apustili Paulus ima allappoq:

’Immitsinnik eqqiarniarta uinngullu anersaallu mingui tamaasa piiarlugit.’ (2 Korintumiut 7:1)

Eqqarsaatigeriakkit tupa, ikiaroornartunik atornerluineq allallu timitsinnut mingutsitsisinnaasut ingalassimagutsigik ajornartorsiuterpassuit pinngitsoorsinnaasavut. Aamma eqqarsaatigeriaruk qanoq pitsaatigisumik inissisimassanersugut aningaasaativut, piffissarput alapernaasernerpullu atuagassianut aliikkutassianulluunniit ileqqorluttunik imalinnut, anersaakkut mingutsissutaasinnaallutillu aseroriartuutaasinnaasunut, atorneq ajorutsigik!

Bibelimi aamma ima allassimasoqarpoq:

’Viinnimik imerajuttut neqimillu nungutitsilussinnartut akornanneeqinak, imerajuttut nungutitsilussinnartullu piitsunngussammata, sinikkusuttorlu alittorsimasunik atisaqassammat.’ (ússatit 23:20, 21)

Imerajunnerup nerrersuallaarnerullu kinguneri malugikkit — piitsuuneq naalliungaarnerlu. Ullumikkut inuppassuit — allaat inuit upperisarsiortorujussuusut — piitsuullutik inuupput imigassartorpallaarnertik imaluunniit arlaannik timimut mingunnartunik pinngitsoorsinnaajunnaarsimanertik pissutigalugu. Bibelip najoqqutassiai malillugit inuulerutta tamakkulu pinngitsoorlugit, taava tamanna annertuumik pisooqataassaaq nerisassanik, atisassanik inissamillu pisariaqartitatta pinissaannut.

Najoqqutaasoq alla kristumiut pissarsiornerminni atorsimasaat Paulusip eqqartorpaa:

’Isumalluarpugut sumik ilerasuutigisaqarnata, tamatigut assuarnaatsutut iliorniaratta.’ (Eprîarit 13:18)

Kristumiorpassuit imminnut ilaquttaminnillu pilersuisinnaasimapput tamatigut unneqqarissuunertik pissutigalugu. Taamaalillutik ajunngitsumik oqaatigisaalersimapput, tamannalu pissutaalluni allanit niueqatigiumaneqarnerusarlutik. Soorunami inuit unneqqarissut tamatiguunngitsoq pigissaartuusarput, kisianni pisariaqartut pigisarpaat aammattaaq imminut tatiginertik pigisarlugu.

Najoqqutaasumut siuliani taaneqartumut siunnersuut tulliuttoq ilaavoq:

’Tillittartoq tillissaarli, tamaviaarlunili assamminik ajunngitsuliorli.’ (Evfisumiut 4:28)

Amerlasuut suliffittaarsinnaasimapput, imaluunniit suliffitsik suliffigiuaannarsinnaasimavaat, siunnersuummik tamatuminnga malinnissimanertik, tamatumalu kingunerisaanik tatiginartuunertik, pissutigalugu. Tamatuma kingunerisaanik imminnut ilaquttaminnillu pilersuisinnaasimapput. Silarsuup unneqqaserlunnermut isiginninngitsuusaarfiusup anersaavanik sunnertinnatik kristumiut unneqqarissuujuaannarsimapput taamaalillutillu ajunngitsumik angusaqarsimallutik.

Assersuutigalugu: Japanimi Jehovap Nalunaajaasuisa ilaata anersaakkut suliaqalernerorusulluni sapaatip- akunneranut nalunaaquttap akunneri ikinnerusut sulisalernissani kissaatigisimavaa. Kisianni kissaatigisani sulisitsisuminut saqqummiukkamiuk soraarsitaavoq. Sulisitsisup anaanaata susoqarsimanersoq paasivaa erninilu oqarfigalugu: „Imaappa angut sulisunnit tamanit unneqqarinnerpaaq soraarsissimagit?“ Nalunaajaasoq allamik suliffittaarpoq, suliffittaavatali qitianik ajornartorsiortippaa. Kingunitsiannguagut sulisitsisorisimasani isumatsangaaqqasoq naapippaa. Taassuma paaseqqammersimavaa sulisumi ilaat pinnersaataarniarfiutimini kuultimik, platinimik assammiunillu tillissimasoq. Sulisitsisup Nalunaajaasoq aperigasuarpaa suliffeqarfimminut uterusunnginnersoq piumasanilu naapertorlugu sulilluni. Tatigisinnaasaminik sulisoqarusuppoq.

Apustili Paulus allappoq kristumiu tamaviaartariaqartoq, imminut pilersornissani kisiat pinnagu, aammattaarli ’ajorsartunut tunniussassaqaqqulluni’. (Evfisumiut 4:28) Kristumiut ilumoortut inuit allat pisariaqartitsilerneranni ikiuunnissaminnut piareersimasariaqarput. Qeqertani Fijini ilaqutariit tamanna misigisimavaat. Kristumiut ataatsimeersuarnerat peqataaffigereerlugu angerlaramik paasivaat illortik ulussaarsuarneratigut aserorsimasoq. Takusaat annilaarnaraluaqaaq, kisianni paasinarsivoq uppeqataasa taakkua inissaqartinnissaannut illortillu sanalerpassuk ikiuunnissaminnut piareersimasut. „Tuppallernartorujussuuvoq,“ ilaqutariinni ataataasoq oqarpoq, „malugalugu isumassuingaartunik kristumiunik angutinik arnanillu qatannguteqarluni.“

Jesus Kristus inuit pissakilliorlutik inuusut misiginneqatigingaartarsimavai. Amerlasoorpassuariarluni inuit pitsaanngitsunik atugaqartut nammineerluni ikiortarsimavai. Soorunami Jesusip ilisimavaa aaqqissuussaaneq manna ajortoq atuutsillugu piitsuussuseq aammalu atugarisatigut ajornartorsiutit atuuttuassasut. (Juánase 12:8) Taamaattumik naak inuit timip piisigut ikiorniarlugit qanoq iliuuseqarsimagaluaqaluni, taamaattoq pingaarnerutillugu anersaakkut pisariaqartitaannik ikiortarpai.

Ilaanni Jesusip inuppassuit, kingorna imminik Kapernaumimut malinnittut, nerisippai. Inuit taakkua qisuariarnerat pissutigalugu Jesus ima oqarpoq: ’Ujarassinga nalunaaqqutit takusasi pissutiginngilasi, kisianni timiusartorassi qaarsillarlusilu. Neqissaq nungujasoq sulissutigeqinasiuk, inuunermulli naassaanngitsumut ittuartumik neqissarsioritsi, tamatuminnga inuup ernerata tunissavaasi.’ (Juánase 6:26, 27) Taama oqarnermigut qanoq- una Jesus isumaqartoq?

Aap, ulorianaatilik sianigaa, tassa inuit timip piisigut iluanaarnissartik piinnarlugu Jesusimut ajoqersugaanullu ilanngussulersinnaanerat. Jesusillu nalunngilaa tamanna naassaanngitsumik iluaqutiginavianngikkaat. Taamaattumik ima oqarpoq: „Pilluarput anersaakkut ittunik pisariaqartitaqarnerminnik miserratiginninngitsut, qilammiup naalagaaffia pigigamikku. Pilluarput iluarnermut kaattut imerusuttullu, qaarsillassagamik.“ — Matîuse 5:3, 6, NV.

Soorlu timikkut inuussutissanik pisariaqartitaqartugut, taamatuttaaq sallusuissummik aammalu anersaakkut inuussutissanik pisariaqartitsivugut. Anersaakkut pisariaqartitavut pigaangatsigik taava pilluarnermik ilumoortumik pisarpugut. Inuiaqatigiit timip piinik pingaartitsivallaartut kristumiuuneraqatigiinnit pilersinneqarsimapput. Aamma inuit kangiani upperisarsioqatigiinnit anersaakkut taarmiuffimmut pisinneqarsimapput. Akerlianilli eqqortumik upperisarsiornerup ilumoortup — upperisarsiornerup Jesusip oqaluussissutigisimasaata — inuit anersaakkut pisariaqartitaannik tunisinnaasimavai. Aammattaaq illit anersaakkut pisariaqartitannik tunisinnaavaatit — periarfissanik ilinnut ammatinneqartunik atuinersutit apeqqutaalluni.

Assersuutigalugu angutip inuusuttup Mauritiusimiup atuagassiat Napasuliaq Alapernaarsuiffik aamma Vågn op!, oqaluussisartumit kristumiumit aqqusinermi naapitaminit, neqeroorutigineqartut tiguai. Sapaatip- akunnerani tulliuttumi angut inuusuttoq aggerpoq atuagassianik peqqikkusulluni. Oqaluttuarpoq aningaasatigut ajornartorsiuteqarnini pissutigalugu imminornissani eqqarsaatigisimagaluarlugu, kisianni atuagassiat ikiortigalugit paasisimavaa Guuteqartoq uagutsinnut soqutiginnittumik. Maanna angutip inuusuttup anersaakkut pisariaqartitani pisalerpai.

Qaquguluunniit pisariaqartitavut tamaasa pisinnaalissanerpavut? Aap, tamatuminnga Bibelimi neriorsorneqarpugut. Ilumoorpoq inuppassuit qatsummassuk siunissami ajunnginnerusunik atugaqalernissaminnik neriorsuuterpassuit tusassallugit. Arlaleriaqalutik pakatsisarsimaqaat. Kisianni uagut Bibelimi neriorsuutigineqartut tatigilluinnarsinnaavavut. Taassuminnga atuakkiortup, Jehova Guutip, neriorsuutini eqquutitittuaannarpai. Josuap nunaqqatiminut, Israelikkunnut, ajunngeqisumik eqqaasitsineratut ippoq: ’Uummatissigut iluunngarlusi tarnissigullu iluunngarlusi ilisimassaasi, oqaatsimik ataatsimilluunniit atunngitsoqanngitsoq oqaatsit ajunngitsut tamarmik ilaannik, Jehovap Guutissi ilissinnut oqaaserisaasa; tamarmik ilissinnut eqquupput; ilaannik oqaatsimik ataatsimilluunniit atunngitsoqanngilaq.’ — Jôrsua 23:14.

Ajornartorsiutitsinnik tamanik aaqqiisinnaasuik tassaavoq Guutip nunarsuarmik saliinissaminik neriorsuutaa. (sarĸúmersitat 11:18) Naalagaaffini aqqutigalugu Guutip Paratiisi nunami atuutilerseqqippagu, taamaalillunilu inunnik siunertavini naammassillugu, pisariaqartitavut tamaasa pisinnaalissavavut. (Matîuse 6:9, 10) Inuit pisariaqartitaminnik pisinnaanngitsut ’qiasut nipaat nilliasulluunniit nipaat’ taamanikkussamut ’tusarneqassaassaaq’. Nersornartumik sulinermikkut najoqqutassallu Guutiminngaanneersut maleruarnerisigut inuuneq pisooq iluarisimaarnartorlu atulersinnaassavaat. — Isaia 65: 17-25.

Maria, katuuleq mattuttoq allaatigisap matuma siuliani eqqartorneqartoq, neriorsuutit tamakku piviusunngornissaannik tatiginnilerpoq. Paasilerpaa ukiorpassuarni anersaakkut taarsiorfimmiissimalluni, siunissamut sioorasimalluni aammalu ilumut inuunerup siunertaqarnera takusinnaasimanagu. Sallusuissulli Bibelimeersoq ilikkaramiuk suna tamarmi allanngorpoq. „Taartuminngaanniit qaamanermut qaammaraluttuinnartumut pivunga,“ oqarpoq. (Tussiaat 43:3; ússatit 4:18) Tamatuma timikkut pisariaqartitaannaanik tunisimanngilaa, aammattaarli anersaakkut kaannini qilalerninilu qaangerpai. Aap, upperisarsiornerup — malugalugu eqqortumik upperisarsiornerup — pisariaqartitatsinnik tunisinnaavaatigut. (wD 15/11 87)

[Qupp. 7-mi assiliartaq]

Eqqortumik upperisarsiornerup pisariaqartitatsinnik tamanik tunissavaatigut