Upperisarsiornerup pisariaqartitatsinnik tunisimavaatigut?
MARIA ukiuni 21-ni katuulitut Romalerisutut mattuttuusimavoq. Upperisarsiortorujussuit avatangiiseralugit peroriartorsimavoq. Suli mikisunnguutillunili unnuaannakkut makissinnaasarsimavoq inunnik allanik qinnussiniarluni! Ukiut ingerlatillugit paasiartulerpaa silarsuaq piitsuussusermik, anniaatinik naapertuilluanngissusermillu suli ulikkaartoq, naak upperisarsiorneq ukiuni tuusintilikkuutaani arlaqartuni sunniuteqarniartarsimagaluartoq; taamaattumik eqqarsaatigisalerpaa upperisarsiornerup ilumut pisariaqartitatsinnik tunisinnaasimaneraatigut.
Upperisarsiornerit amerlanersaasa ileqqussatigut najoqqutassat qutsissut atugaanissaat ilungersuutigaat. Taamaakkaluartorli inuit amerlasuut upperisarsiorneq ajornartorsiutinut aallaavittut isigaat, pisariaqartitatsinnik tunisisutut isiginagu. Assersuutigalugu eqqarsaatigeriakkit upperisarsiornermut tunngasunik misissuisartut oqaaserisimasaat uku: „Itinerusumik eqqarsaatigigaanni nakuusernerit naakkittaatsuliornerillu upperisarsiornermit pilerfeqarput.“ (National Review) „Sorsunnerup pissutigisaa pingaarneq tassaajunnaarsimavoq piumatussuseq kisianni upperisarsiorneq.“ (Toronto Star) „Sorsunnersuup aappaani juutinik toqoraanersuaq ’tassaalluinnarpoq kristumiutut kuisimasut suliaat’.“ — The Tampa Tribune.
Taamaattumik tupinnanngilaq inuppassuit upperisarsiornerup pisariaqartitatsinnik tunisisinnaanerarnera isumaqatigineq ajormassuk — tassami akulikeqisumik tamatuma inerititaasa sunniutai takusaramikkik. Assersuutigalugu „shintosiornerup, Japanimi upperisarsiornerit pingaarnersaata, sorsunnermut atortuusunut tamanut iluunngarluni sorsunnerup tapersersuisuuginnarani aammattaarli sorsutsitsinerup tunngavippiaa ilagaa,“ taama allassimasoqarpoq atuagassiami The Christian Century-mi. Upperisarsiornerit qassit taamaaliorsimannginnerpat — ’sorsunnermut atortuusunut tamanut iluunngarlutik tapersersuisuullutik’! Eqqarsaatigeriakkit Sri Lankami toqoraannersuit aammalu akiniaalluni saassussinerit buddhasiortunit hindusiortunillu ingerlanneqarsimasut, Irlandimi Avannarlermi toqoraannerit naakkittaatsuliornerillu katuullinit naaggaartunillu akisussaaffigineqartut — aap, tulleriiaarlugit taagussagaluarutsigik naasinnaanavianngikkaluarpavut! „Ukiuni hundredelinni Indiami hindusiortut, muuamaakkut, sikhit allallu imminnut akiuuttuarsimapput,“ atuagassiami U.S. News & World Report-imi taama allassimasoqarpoq.
Inuit allat immaqa upperisarsiorneq ajortutut isigineq ajoraluarpaat, kisianni aamma pitsaasumik sunniutilittut isigineq ajorlugu. Aviisi National Catholic Reporter allassimavoq „ilagiit nalinginnaasut inuit kissaatigisaasa pisariaqartitaasalu naammattumik isumaginissaat isumaginngitsoorsimavaat“. Aamma atuagassiami Liberty-mi allaaserineqarpoq ilagiinni kiffartuutillit assiliaataannartut nalliuttorsiornerniinnaq saqqummertartutut inuiaqatigiinnit isigineqannguatsiartut. Atuagassiaq nangilluni ima allappoq: „Inuppassuit sianissusianni [palasi] tassaavoq pissutsit allanngoratik taamaaginnarnerannut sinniisaasoq.“ Illit upperisarsiorneq taamatut isigaajuk — uagutsinnut ajoqutaagunanngitsutut aammattaarli iluaqutaagunanngitsutut?
Ullumikkut upperisarsiornermi pissutsit Jesus Kristus nunamiikkallarmat upperisarsiornermi pissutsinit allaaneruallaanngillat. Upperisarsiornermi siuttuusut pillugit taanna oqarpoq taamaallat qarluminnit Guuti ataqqigaat. Ileqqulersuutit taakkua inunnut maleruaqqusaat inuit ataasiakkaat pisariaqartitaannik matusisuunatik nammakkersuutaaginnarput. ’Ersugassanik oqimaatsunik ersunneq artornartunik qilersuisaraat inuillu tuiinut ilillugit,’ Jesus oqarpoq. (Matîuse 23:4) Nalitsinni upperisarsiornerit neriorsuutinik neriulluarsaarisuusunik kisianni ulluinnarni atussallugit pitsaavallaanngitsunik saqqummiussuisaqaat. Taamaattumik eqqortuliorneruvoq aperissalluni ilumut pissutissaqarnersoq isumaqassalluni upperisarsiornerup pisariaqartitatsinnik tunisinnaagaatigut. (wD 15/11 87)