Eqqartuussissut silarsuarmut tamarmut tunngasoq ilinnut sunniuteqartoq
’„Saqitsaatersi qaassiuk,“ oqarpoq Jehova; „saqqummiussigik pinngitsuussutiginiakkasi.“’ — Isaia 41:21.
1, 2. (a) Eqqartuussutit pingaarnerpaartaannut kikkut akuliussaappat? (b) Eqqartuussut taanna sumut tunngava?
OQALUTTUARISAANERUP ingerlanerani eqqartuussissuterparujussuit suliarineqartarsimapput. Ilisimannittut killisiorneqartarsimapput, uppernarsaatiginiakkat saqqummiunneqartarsimallutik illuatungeriit arlaannut tapersersuutaasut. Eqqartuussissutit ilarparujussui inunnut ataasiakkaanut tunngasarsimapput, allallu inunnut amerlanerusunut tunngasarsimallutik. Eqqartuussissutaasimasulli tamakku tamarmik soqutaanngitsutut isikkoqarput eqqartuussissummut silarsuarmut tamarmut tunngasumut maannakkut tamani tusarliunneqartumut naleqqiullugit. Tassaavoq oqaluttuarisaanermi eqqartuussissutit pingaaruteqarnerpaartaat. Taassumunnga peqataanissarput kissaatigigaluarutsigu kissaatiginngikkaluarutsiguluunniit inernera tamatsinnut malunniuteqassaaq.
2 Suliap tamatuma qiterisaa tassaavoq qilammi nunamilu tamarmi Qutsinnersaq, Jehova Guuti, ’qilammik pinngortitsisoq isuitillugulu, nunamik siaartitsisoq naalersitai tappullugit, anersaarnermik tunniussisoq inunnut qaaniittunut’. (Isaia 42:5) Sunaana eqqartuussissutigisassaq? Guutip guutiussusia, aammalu silarsuarmut tamarmut, nunarsuaq tassanilu ineqartut ilanngullugit, naalagaasussaviunera pineqarpoq. Tamanna taaneqarsinnaavoq qilammut nunamullu tamarmut kisimi oqartussaanermut apeqqut akerleriissutaasoq.
3. Eqqartuussutissamut atatillugu suut tunngaviusumik apeqqutaappat?
3 Eqqartuussutissap apeqqutai tunngaviusut imaapput: Guuterpassuit pallorfigisaasarsimasut arlaat, ima tutsuiginartigippat pallorfigisimik inuunerat siunissaallu allaat qulakkeersinnaallugu? Taakkua arlaat piviusuusimappat, arlaallu inuit eqqarsaatersuutaannit piliaappat? Guuteqarpa ilumoortumik uumasumillu, Guuti qutsinnerussaartoq inunnillu maannakkut atugaannit nalorninartunit aniguisitsisinnaasoq aammalu naalakkersueriaatsimik eqqortumik, naalakkersueriaatsimik eqqissinermik piviusumik, isumannaassusermik, pigissaarnermik peqqissusermillu inunnut qulakkeerisinnaasumik ivertitsisinnaasoq?
4. Guutimut upperamik taamaattumik eqqartuussummut tamatumunnga attuumassuteqaratik oqartut pillugit qanoq oqartoqarsinnaava?
4 Inuppassuit oqartarput Guutimut upperlutik taamaattumillu apeqqut akerleriissutaasoq tamanna imminnut attuumassuteqanngitsoq. Kisianni Guuti pallorfigisartik ilumut taannaanersoq Guuti ilumoortoq, neriorsuutaalu tutsuiginartuunersut aammalu siunertaanit inatsisaanillu siulersorneqarnerlutik uppernarsaammik saqqummiussaqarsinnaanerpat? Apeqqummut tassunga angerunik, apeqqutit tulliuttut aammattaaq akisinnaasariaqarpaat: Ilumoortumik, tutsuiginartumik neriorsuutilimmik, ilumut Guuteqarneranik suut uppernarsaatitut saqqummiussinnaavigit? Inuit nunarsuarlu eqqarsaatigalugit suna Guutip siunertaraa? Guutip piffissamik naatsorsueriaasia naapertorlugu piffissap qanoq ilinerani ullumikkut inuuvugut, siunissamilu qaninnerusumi qanoq pisoqassava? Apeqqut akerleriissutaasoq eqqarsaatigalugu sumi inissisimanerput ersersinniarlugu qanoq iliussasugut Guutip kissaatigaa?
5. Guutimut uppernerminnut ersarissumik uppernarsaatissarsisinnaanngitsut kikkunnut assersuunneqarsinnaappat?
5 Apeqqutit taakku Guutimut upperlutik oqartut amerlanersaasa naammattumik akisinnaanngilaat. Assersuunneqarsinnaapput inunnut ukiut hundredillit siullersaanni inuusunut Guutimut uppernerartunut, suliamikkulli takutitsisunut uppernerarnermik oqaasiinnaaneranik. Taakku pillugit Bibelimi allassimavoq: ’Guuti ilisaralugu oqartarput, suliamikkulli miserratigisarpaat.’ Aap, ’upperneq sulianik ilaqanngitsoq toqungavoq’. (Títuse 1:16; Jâko 2:26) Guutimut upperlutik oqartut ersarissumilli uppernarsaatissaqanngitsut, ukiuni hundredilinni qaangiutereersuni guutipilunnut, ullumikkut pallorfigisaajunnaakatareersunut, uppertunit allaanerussuteqarpallaarujussuanngillat.
Assersuutit itsarnitsat
6, 7. (a) Ægyptenimiutoqqat upperisarsiornerat oqaluttuariuk. (b) Apeqqummut akerleriissutaasumut Jehovamut Ægyptenimiullu guutiinut tunngasumut qanoq ilillutik Israelikkut akulerussaappat?
6 Tamakkua ilagaat eqqartuussutissaq ukiunik naatsorsuisarnitta aallartinnera ukiunik 1500-t missaanniittunik sioqqullugu Ægyptenitoqqap inuisa guutiinut eqqartuussutissanngortitaq. Ægyptenimiut guuterpassuit pallorfigisimavaat, ilaatigut uumasut, soorlu naraseq, pulateriaarsuk, kuukkooriarsuaq, qitsuk, nersussuaq, ussik anguteralak, liiveq, amorarnaq (qimmit nujuartat ilaat qaasuttoq), amaroq, kissaviarsuk nattoraliusarlu. Uumasut taakkua ilarpassui guutimit imaluunniit guutimit arnamit timitarineqartutut isigineqartarput, uumasullu taakkua ilaannik piaaraluni toqutsineq toqumik pillagaanermik kinguneqartarsimalluni. Uumasut iluartuutitat toqugaangata tipigissumik aanaveersarneqartarsimapput persuarsiortumillu alutornarsagaaqisumik ilineqartarsimallutik.
7 Guuterpassuit taakkua qulaanniippoq Guuti Israelikkut pallorfigisaat, Jehova. Oqaaseqartittagaa, Moses, Faraomukartinneqarpoq Jehovap inuuttai, taamani inussiaasut, iperagaaqqujartorlugit — tassami Jehovap kiffani neriorsorsimagamigit inussiaajunnaarumaartut. (2 Môrsase 3:6-10) Faraoli akivoq: ’Kinaana taanna Jehova, taassuma nipaa tusassagiga Israelikkut aallaqqussallugit? Jehova taanna nalulluinnarpara, Israelikkullu aallaqqussanngilakka.’ (2 Môrsase 5:2) Farao isumaqarluinnarpoq Ægyptenimiut guutigisaat Jehovamit pissaaneqarnerusut.
8, 9. (a) Qanoq ililluni Jehovap takutippaa Ægyptenimiut guutiinit pissaaneqarnerulluni? (b) Pisimasut eqqarsaatigalugit Ægyptenimiut guutii pillugit qanoq oqartariaqarpugut?
8 Kinaana taanna Guuti ilumoortoq, Guuti neriorsuutiminik eqquutitsisinnaasoq innuttaminillu sernissuisinnaasoq? Tamanna katsorna nalunarumaanngilaq. Jehova siulittuisimavoq: ’Ægyptenimiullu guutigisaat tamaasa eqqartuussivigiumaarpakka.’ (2 Môrsase 12:12) Siulittuut tamanna eqquutsippaa? Aap! Ægyptenimiunut perluit qulit nungutitsisut Jehovap nalliutsippai taakkua guutii nikanartinniarlugit. Guutiisa arlaannaataluunniit Ægyptenimiut sernissorsinnaasimanngilaat. Perluillu qulingat malunnaateqarnerpaavoq, tassami tassuunakkut Ægyptenimiut angajulliliaat, aammattaaq Faraop angajulliliaa, toqorarneqarmata. Tamanna guutiannut qutsinnerpaatitaannut, Ra- (Amon-Ra-)mut, toqqaannartumik saassussineruvoq, tassami Ægyptenimi naalagaasut imminnut guutisut, Rap ernerisut, isigisarsimammata. Taamaattumik Faraop angajulliliaa toqummat Ægyptenimiut isaannit guuteq toquvoq.
9 Israelikkulli angajulliliaannik ataatsimilluunniit toqusoqanngilaq, tassami Jehovap sernissormagit. Aammattaaq Guuti neriorsuutigisimasani naapertorlugu innuttani inussiaajunnaarsippai. Ægyptenimiut guutiinut ilumuunngitsunut saassussinertut inaarutaasutut Farao sakkutuuilu tamarmik Immami Aappalaartumi ajunaartitaapput. Taamaalilluni Jehova imminut ersersippoq tassaalluni Guuti ilumoortoq. Taassuma neriorsuutai eqquupput, taassumalu kiffai sernissorneqarput. (2 Môrsase 14:21-31) Akerlianilli Ægyptenimiut guutiisa pallorfigisitik ikiorsinnaasimanngilaat, tassami piviusuunnginnamik inuilli eqqarsaatersuutaannit piliaannaallutik.
10. Akerleriissut suna Jehovap kiffaasa Assyriamiullu akornanni saqqummerpa?
10 Pisimasoq alla kia Guuti ilumoortuuneranik apeqqummut tunngassuteqartoq ukiut 800-t qaangiuttut, kunngi Ezekiasip nalaani, saqqummerpoq.a Jehovap kiffai Assyriamiut naalagaaffissuannit qununartumit, naalagaaffinnik akornutigisaminnik tamanik aju- gaaffiginnissimasumit, aarlerinartorsiortinneqarput. Piumasarilerpaat Jerusalem, illoqarfik ’Jehovap issiavissaarsuata’, nunami pallorfigisaaneranut assersuutaasup, inissisimaffigisaa, tunniutiinnassasoq. (1 nalunaerssûtigdlit 29:23) Judap kunngiata, Ezekiasip, nalunngilaa Assyriamiut ’piuneerukkaat nunat tamaasa guutiilu innermut igikkaat, guutiummata inuit assaasa sanaarisaat’. — Isaia 37:18, 19.
11. Jehovap qanoq ililluni pallorfigisini ikioriartorpai, taamaalillunilu suna tamanut ersarissiva?
11 Maanna Ezekiasip ilumoortup Jehova qinnuigaa sernissoqqulluni. Jehovap neriorsuutigaa Assyriamiut sakkuisa ataatsilluunniit Jerusalem eqqussanngikkaa. (Isaia 37:33) Siulittuut tamanna eqquussimavoq. ’Taava Jehovap inngilia anivoq Assyriamiut tammaarfianni toqorarlugit hundredilinnik arfineq-pingasunillu qulilinnik tallimanillu tuusintillit [185.000-it].’ Ajorsartitaalluinnarnermi tamatuma kingorna Assyriap kunngia, Sankerib, tunuarpoq. Kingorna guutini, Nisrok, pallorfiginiartillugu ernerminit inuartarineqarpoq. (Isaia 37:36-38) Taamaalilluni Jehovap erserseqqippaa Guutiulluni ilumoortumik siulittuisartoq, aammalu Guutiulluni pallorfigisiminik aniguisitsisinnaasoq. Nalunarunnaarpoq Assyriap taassumalu eqqaaniittut nunat inuisa guutii ilumuunngitsuusut — guutiusut piviusuunngitsut, malinnitsiminnik sernissuisinnaanngitsut.
12. Qanoq ililluni Belsazzarip Jehova mitaatigaa?
12 Ukiut 200-t missaanniittut qaangiummata Guutip akueraa innuttami ilumoorunnaarsimasut Babylonimi, naalagaaffissuit sunniuteqarnerpaasimasut tullianni, inussianngornissaat. Naalagaaffissuarmi tassani maluginiarnarnerpaaq tassaavoq guuterparujussuaqarnera naalaffipparujussuaqarneralu. Ullulli ilaanni Babylonip kunngiata, Belsazzarip, pingaakujunnermigut Jehova mitaatigilerpaa. Nerersuaqatigiitsillutik peqqusivoq ermutsit illernartut naalaffimmit Jerusalemimiittumit tigusat aaqqullugit, ’kunngillu taassumalu naalagaaffiani annertaasut kunngillu nuliaasa panerfaasalu imertarfigaat; viinnisoramillu guutit kuultiusut, sølviusut, kanngussaasut, saviusut, qisuusut ujaraasullu unnersiutigaat’. — Dâniale 5:1-4.
13. Jehovap Daniel Belsazzarimut qanoq oqartippaa?
13 Tamanna Jehovamut toqqaannartumik mitaatiginninneruvoq, taamaalilluni Belsazzarip Babylonimiut guutiisa aqqanni Jehova unammillerpaalusooq. Taamaattumik Jehovap pruffiitini Daniel nakimanngitsumik kunngi Belsazzarimut nerersuarnermilu qaaqqusanut tamanut nalunaajaasippaa. Jehovap Guutiussusia Danielip taperserpaa kunngi Belsazzar ima oqarfigigamiuk: ’Uummatit makitanaveersanngilat, kisianni qilaap Naalagaanut anneruniarputit, guutillu sølviusut, kuultiusut, kanngussaasut, saviusut qisuusut ujaraasut isigisaqanngitsut tusaasaqanngitsut misigisaqanngitsut unnersiutigaatit; Guutili inna anersaarnernik ingerlavissannillu tamanik najumminnittoq ataqqinngilat.’ — Dâniale 5:22, 23.
14. Qanoq ililluni Jehovap ersersippaa tassaalluni Guuti ilumoortoq?
14 Taava Jehovap nalunaarutaa, kunngi Belsazzarip naalagaaniarumatuup Babylonillu Mediamiunit Persiamiunillu unnuaq taannarpiaq uppitsinneqarnissaannut tunngasoq, Danielip tusarliuppaa. (Dâniale 5:24-28) Siulittuut taanna eqquuppa? Aap. ’Unnuaq tamanna Belsazzar Kaldæerit kunngiat toqutaavoq, Dariusillu Mediamiup naalagaaffik pigilerpaa.’ (Dâniale 5:30; 6:1) Soorlu Ægyptenimut Assyriamullu iliuuseqarmat taamaassimasoq, aammattaaq maannakkut erserpoq Jehova taannaasoq Guuti ilumoortoq, Guuti neriorsuutiminik eqquutitsisartoq. Tamanna kiffaanut iluaqutaavoq, tassami inussiaajunnaarsinneqarput nunavimminnullu utersinnaalerlutik. Guutipilunnilli pallorfiginninnerminnik ingerlatsiinnartut ajunaarput.
Nalerput pillugu siulittuutit
15. (a) Siulittuutit Bibelimiittut ilarpassui qanoq oqaatigineqarsinnaappat? (b) Oqaaseq „guuti“ aamma qanoq nassuiarneqarsinnaava?
15 Pruffiiti Esajas isumassarsisitaanermigut siulittuutinik allatsinneqarpoq, siulittuutillu tamakku qangarsuarli eqquutereersimapput. Siulittuutilli Bibelimiittut ilarpassui ullumikkut allamik pingaarnerusumillu eqquupput, tamakkununngalu ilaapput siulittuutit Esajasip allassimasaasa ilarpassui. Siulittuutaasa ilaasa imaraat qanoq ililluni Jehovap ullumikkut inuiaqatigiit taakkualu guutii unammillerumaarai. Oqaratta ’guutii’ eqqarsaatigisavut tassaaginnanngillat guutit inunnit silarsuup ilaanit tamaneersunit, ilaatigut nunani Guutimik nalusuuffiusunik taaneqartartuni, toqqaannartumik pallorfigisaasut, aammattaarli pivavut oqaatsip ’guutip’ oqaatsinik ujarlerfissiami nassuiarneqarnerani eqqartorneqartunut naleqquttut tamaasa: „Inuk pissusiviusup ilaanik piginnaaffigisaqartoq; inuk imaluunniit suna pingaartinneqartoq.“
16. Inuit inuiannit assigiinngitsuneersut guutit suut ullumikkut pallorfigaat, ilaatigut nunani kristumiuunerartoqarfiusuni?
16 Ullumikkut guutit tassaapput guutit millionillit hinduinit pallorfigisaasut, aammalu Buddhasiortunit, shintosiortunit, suut tamarmik anersaaqarnerannik upperisaqartunit upperisarsiortunillu allanit pallorfigisaasut. Aammattaaq tamatumani pineqarpoq pigisanik pingaartitsiniarpallaarneq, tamanna guutitut taaneqarsinnaavoq pissutigalugu inuit amerlanersaasa pingaartittorujussuummatigik inuunerminnilu ingerlatigisarigamikku pingaarnerpaaq. Aammattaaq pineqarpoq sakkutuunut tunngasutigut pissaaneqarneq ilisimatuussutsimullu tunngasut, toqqissisimanermut annannissamullu inuiaat isumalluarfigisaat. Allaat kristumiuuneraqatigiit iluanni amerlanerit Guutimut upperneraraluarlutik taamaattoq taanna tatiginngilaat ilumoorlutillu kiffartuunnagu, taarsiulluguli inuit imaluunniit piit suulluunniit isumalluarfigaat salliutillugillu ilumoorfigalugit.
17. Qanoq ililluni Esajasip tusarliussaa pingaarnerusumik eqquuppa?
17 Tamakkununngaana ’guuterpassuarnut’ tunngatillugu Esajasip tusarliussai pingaarnerusumik eqquuttut. Naggueqatigiit katersuuteqqullugit ’oqaloqqullugillu’ Jehovap kajumissaarpai. Unammillerpalullugit ima oqarfigai: ’Eqqartuutikkiartoqatigiissa.’ (Isaia 41:1) Piffissami silarsuup eqqartuunneqarfissaani maanna inuuvugut. Soorlu Timûtiusimut agdlagkat áipait 3:1-5-imi aammalu Matîuse 24:1-14-imi siulittuutigineqareersoq, silarsuup matuma ’ulluni kingulliit’ atorpai. Inuiaat guutii Jehovap kajumissaarpai siunissaq eqqorluartumik siulittuutigeqqullugu taamaalillutillu guutiussusertik ersersillugu. Aammattaaq kajumissaarpai sapinngikkunik malinnitsitik sernissoqqullugit. ’Saqitsaatersi qaassiuk,’ oqarpoq. ’Saqqummiussigik pinngitsuussutiginiakkasi, nalliuttussat [pisussat] saqqummiullugit nalunaarfigilisigut.’ — Isaia 41:21, 22.
18. Guuti ajugaqanngitsoq imminut pilluni qanoq oqarpa, pallorfigisinilu sumik neriorsorpai?
18 Guutip ajugaqanngitsup kinaassutsi nammineq oqaluttuaraa: ’Uanga Jehova, tassa atera. Naalannarsusera allamut tunniutissanngilara, unnersiutigisaaneraluunniit inuusaliamut qiperukkamut.’ (Isaia 42:8) Kiffaminullu ilumoortunut tamanut ima oqarpoq: ’Siooranak, uanga aapparaakkit [ilagaakkit]; nakimanak, uanga Guutigaarma. Pissatsippakkit ikiorlutillu.’ Ima neriorsuisimavoq: ’Pakatsillutik kanngusussapput tamarmik ilinnik uumissuisut; piiagaassappullu angutit ilinnut saqitsaasut.’ ’Sakkut tamarmik sorsukkumallutit sananeqartut pilluassanngillat [atorsinnaassanngillat]. Tamassa Jehovap kiffaasa kingornussassaat.’ — Isaia 41:10, 11; 54:17.
19, 20. (a) Qanoq ililluni Esajasip ersersippaa Jehova nunarsuarmi pissutsinut akulerunnissaminut piffissamik aalajangersagaqartoq? (b) Jehovap ’ulluni kingullerni’ atukkatsinni kikkut sassartippai, qanorlu ilillutik taassuma oqaaseqartitaasut sulippat?
19 Piffissami sivisuumi — aap, ukiuni hundredilinni arlaqartuni — Jehovap inuiaat namminneq piumasaminnik ingerlanerat akuerisimavaa. Piffissarli nunami pissutsinut akulerunnissaminut aalajangersarsimasaa nalliussimavoq. Taamaattumik ima oqarpoq: ’Qangarsuarli nipangeraluarpunga, sunngilanga nunullungalu.’ Maannali ’Jehova anivoq pissarsuartut, ilungersortitsiumaarpoq sorsuttartutut; nillerumaarpoq nipituumik, pissaajumaarpoq akerartortiminut’. (Isaia 42:13, 14) Esajasip, Bibelimik allaqataasut allat Jesusillu siulittuinerisigut, Jehovap siulittuutigisarsimavaa maanna ’ulluni kingullerni’ inunnik aallussilluarlutik imminik nalunaajaasuusunik, eqqartuussissummi ilisimannittuusunillusooq, sassartitsiumaarnissani.
20 Inuit taakku Jehovap imminut kiffartuussisussatut sassartitai taassuma tassaaneranik Guuti ilumoortoq, pallorfigisiminik aniguisitsisuuneranik guutinillu ilumuunngitsunik taakkualu upperfiginnittaannik suujunnaarsitsisuuneranik nalujunnaarsitsisunik saqqummiussaqarput. Maanna Jehovap innuttai erinarsorput ’erinniukkamik nutaamik, unnersiutigalugu nunap isuinit, naalagaaffinnit tamanit qeqertanillu, qaqqat qaarpiaannit’. (Isaia 42:10-12) Tassuunattaaq siulittuut alla Esajasip saqqummiussimasaa eqquuppoq. „Ullussanilu kingullerni [uagut nalitsinni] Jehovap illuata qaqqaa [taassuminnga pallorfiginninneq ilumoortoq] qaqqasinnersaalluni aalajangersitaajumaarpoq, qattunernillu [pallorfiginninnernit assigiinngitsunit allanit tamanit] qutsinnerusunngortitaajumaarpoq; inuiaqatigiillu tamarmik [inuit inuiaqatigiinnit tamaneersut] tassunga aggiajumaarput.“ Taakkua inuit allat qanoq ilioqqullugit kajumissaarpaat? Inunnut peqqusersuitsunut ima oqarput: „Qaagitsi, Jehovap qaqqaanut majuarta, . . . aqqutigeqqusaminik ajoqersorumaarpaatigut, aqqusernisigullu ingerlassaagut.“ — Isaia 2:2-4, NV.
21. Jehovap inuiaat guutiinut unammillernermini apeqqutit suut saqqummiuppai?
21 Eqqartuussivimmi tusarnaartunullusooq Jehova taamaattumik oqarpoq: „Inuiaqatigiit tamarmik ataatsimut katersorlit, inuiaallu ataatsimoortitaallit. . . . Imminnut ilisimannittut sassartillisigik iluartuuteqqullutik, imaluunniit tusarlik oqarlutillu: ’Sallusuissutaavoq!’“ (Isaia 43:9, NV) Tamanna toqqaannartumik inuiaat guutiinut unammillerneruvoq. Taakkua arlaata siunissaaq siulittuutigisinnaanerpaa? Itsaq taamaaliorsinnaasimanerpat? Tunngaveqarluartumik uppernarsaatissarsisimanerpat tassaallutik guutit ilumoortut ilumoorfigineqarnissaminnut naleqquttut? Inuiaat guutii taakkualu malittaat ullumikkut qanoq pisinnaasaqartigippat? Itsaq Ægyptenimiut, Assyriamiut Babylonimiullu guutiinit pisinnaasaqarneruppat? Aammattaaq aperisinnaavugut Jehovamut nalunaajaasuusut tunngaveqarluartumik uppernarsaatissaqarnersut Jehovap tassaaneranik Guuti ilumoortoq, kisimi pallorfigisariaqagaq? Ilanngutassiami tulliuttumi apeqqutit tamakku sammissavavut. (wD 1/2 88)
[Quppernerup ataani ilanngussaq]
a Napasuliaq Alapernaarsuiffik-mi 1. aprili 1988-imi saqqummersumi Ezekiasip Jehovamik tatiginninnera taassumanngalu pilluaqqusaanera allaaserineqarput. Aammattaaq pisimasut ilungersorpaluttut tamakku kia Guuti ilumoortuuneranik apeqqummut tunngapput.
Apeqqutit uteqqitassat
□ Qilammi nunamilu tamarmi kisimi oqartussaaneq pillugu sunaana apeqqut akerleriissutaasoq?
□ Guutit inuiaat pallorfigisaat suut ullumikkut apeqqummut akerleriissutaasumut akuliussaappat?
□ Itsaq pisimasut pingasut suut ersersippaat Jehova guutinit ilumuunngitsunit pissaaneqarnerujussuusoq?
□ Esajasip qanoq takutippaa Jehova nalitsinni pissutsinut akuliukkumaartoq?
□ Ullumikkut upperisarsiortut tamaasa pillugit apeqqut suna uagut akineqartikkumavarput?
[Qupp. 5-mi assiliartaq]
Ægyptenimiut guutii Guutimut ilumoortumut, Jehovamut, qanoq ilioriarsinnaanngillat
[Qupp. 6-mi assiliartaq]
Guutip ilumoortup Assyriamiut guutii malittaallu suujunnaarsilluinnarpai
[Qupp. 7-mi assiliartaq]
Jehovap tusarliussaa Babylonimi guutipilussiortunut Danielip saqqummiuppaa