Guutimut ilumoortumut nalunaajaasoorusuppit?
„’Ilissi nalunaajaasuuvusi uannut,’ oqarpoq Jehova, ’uangalu Guutiuvunga.’“ — Isaia 43:12, NV.
1. Sooq Guuti ilumoortoq unnersiutigisariaqarparput?
JESUSIP toqunini sioqqutitsiarlugu ’isini qilammut aarlortippai’ ’kisimi ilumut Guutiusumut’ qinuniarluni. (Juánase 17:1, 3) Tunngaveqarluartumik eqqarsarneruvoq aalajangiutissagaanni ataasiinnarmik uumasumik ilumoortumillu Guuteqartoq, tassa qilammi nunamilu kisimi oqartussaalluni Naalagaasoq, Pinngortitsisoq. Taanna qujanarsili inuugatta, taamaattumillu ataqqinaammik taassuma pisariaqagaanik ataqqisariaqarparput. Soorlu sarĸúmersitat 4:11-mi oqaatigineqartoq: ’Jehova Guuterput, ilinnut pigititassaapput naalannaat ataqqinaallu pissaanerlu, illit suut tamaasa pinngortikkakkit, illillu peqqusakkut ipput pinngortitaallutillu.’
2. (a) Guutip ilumoortup qanoq iliornissaa ilimagisinnaavarput? (b) Imminut pallorfiginnikkusuttut qanoq ililluni attaveqarfigisarpai?
2 Guutip ilumoortup ajussuseq nunami pinngortitaminut takussunarsaataasoq naassaanngitsumik ilaginnaannarusunngilaa. Taamaattumik ilimagisinnaavarput tamanna kipitikkumaaraa. Aammattaaq ilimagisinnaavarput qanoq iliuusissaminik aammalu eqqartuussutimi naammassinnginnerani pallorfigisimi qanoq iliornissaat kissaatigigini ilisimatittassagai. (Aamorse 3:7) Qanoq ililluni sallusuissummik ujarlersut attaveqarfigisarpai? Inuit namminneq kajumissusertik naapertorlugu kiffaritikkumasut oqaaseqartitatut atorpai: „’Ilissi nalunaajaasigaassi,’ oqarpoq Jehova, . . . ’Siunikkut Guutiusunik piliarisaqanngilaq, kingunikkullu ittoqanngittuassaaq. Uanga, uanga tassa Jehova, annaassisoqanngilarlu uangaanngitsumik.’“ (Isaia 43:10, 11, NV) Qanorli ililluni paasineqarsinnaava Guutip ilumoortup kikkut nalunaajaasumisut atornerai? Taakkua taakkualu tusarliussaat guutit allat malinnittaannit taakkualu tusarliussaannit qanoq immikkooruteqartigaat?
Guutinut allanut unammillerneq
3. Jehovap guutit allat qanoq unammillerpai?
3 Jehovap Esajas isumassarsitillugu guutinut allanut unammilliummik uuminnga allatsippaa: „[Inuiaat naggueqatigiillu guutiisa] arlaata tamanna [eqqortumik siulittuineq] nalunaarutigisinnaanerpaa, imaluun- niit siulliusunik [siunissami pisussanik] nalunaarfigaluta? [Guutisut] imminnut ilisimannittut sassartillisigik iluartuuteqqullutik [guutisut], imaluunniit [inuit inuianneersut] tusarlik oqarlutillu: ’Sallusuissutaavoq!’“ (Isaia 43:9, NV) Guuterpassuit pallorfigisaasut tamaasa taamatut Jehovap kajumissaarpai ilumut guutiunerminnik uppernarsaaqqullugit. Taakkua pallorfiginnittaat saqqummiussisinnaasariaqarput guutimik tutsuiginartuunerannik pallorfigineqarnissaminnullu qinngaqqunnannginnerannik nalujunnaarsitsisumik.
4. Qanoq ililluta paasisinnaavarput itsaq guutiusimasut ilumuunngitsuusut?
4 Sunali guutit taakkua pallorfiginnittaasalu nalunarunnaarsissimavaat? Ikiorsimavaatigut eqqissineq piviusoq, atugarissaarneq, peqqissuseq inuunerlu uagutsinnut angutillugit? Oqaluttuarisaanerup takutippaa guuterpassuit itsaq inuiannit pallorfigisaasimasut pissaaneqaratillu atorsinnaanngitsuusut. Ullumikkut peerussimapput, tassa imaappoq: pallorfigisassaasutut ataannarnissartik sapersimavaalluunniit. Paasinarsisimavoq guuterpassuit Ægyptenitoqqami, Assyriami, Babylonimi, Medo-Persiami, Grækenlandimi naalagaaffinnilu allani pallorfigisaasimasut ilumuunngitsuusut. Atuakkani oqaluttuarisaanermut tunngasuni katersugaasivinnilu guutiliatut eriagisatut saqqummersinneqarfigisaminni taamaallaat nanisassaapput.
5. Ullumikkut guutigineqartut pillugit qanoq aperisinnaavugut?
5 Ullumikkulli guutit pallorfiginnittaallu itsarnit pitsaaneruppat? Hinduinnaat eqqaassagutsigik, taakku millionilinnik guuterpassuaqarput. Juutit, katuullit, naaggaartut, Buddhasiortut, Konfuciusisiortut, shintosiortut, taosiortut upperisarsioqatigiillu allarpassuit tamarmik immikkut guuterpassuaqarput. Afrikami, Asiami nunanilu allani pinngortitarsuup nukingi, uumasut allallu assigiinngitsorpassuit guutitut pallorfigisaapput. Inuiaassutsimik nunallu piinik aammalumi namminermik pingaartitsiniarpallaarneq guutitullusooq ilersimapput, tassami inuppassuit allanut taarsiullugit taakku sammisarimmatigik. Pallorfiginninnerup qanoq ittup Guuti ima oqartoq ataqqivaa: „Uanga tassa Jehova, allamillu naami. Uangaanngitsumik Guuteqanngilaq“? — Isaia 45:5, NV.
’Inerititaannit ilisarissavasi’
6. Upperisaq ilumoortoq ilumuunngitsorlu qanoq ilillugit immikkoortinniarneqarsinnaappaat?
6 Upperisap ilumoortup ilumuunngitsullu immikkoortinniarnerani iluaqutigisinnaasatsinnik Jesusip tutsuiginartumik najoqqutassippaatigut. Oqarpoq: ’Inerititaannit ilisarissavasi. Orpik ajunngitsoq nungullugit ajunngitsumik inerititaqartarpoq, orpilli ajortoq ajortunik inerititaqartarpoq. Orpiit ajunngitsunik inerititaqanngitsut tamaasa kipissavaat innermullu igillugit.’ (Matîuse 7:16-19) Tassa imaappoq: Guuti ilumoortoq guutillu ilumuunngitsut, taakkualu pallorfiginnittaat, immikkoortissinnaajumallugit inerititaat misissortariaqarpavut. Ajunngitsuuppat imaluunniit ajortuuppat?
7. Ukiuni hundredelinni maanna atuuttuni pisimasut silarsuarmi maani upperisarsioqatigiit pillugit suna ersersippaat?
7 Silarsuarmi maani upperisarsioqatigiit kikkut nunarsuaq tamakkerlugu malitsigisamik akornanni eqqissinermik piviusumik pilersitsisimappat? Soorunami upperisamut ilumoortumut ilaasortat, anersaakkut qatanngutigiit, imminnut toqoraattussaanngillat. Inuilli hundredenik millionillit sorsunnerni maani ukiuni 1900-kkunni pisimasuni toqutaasimapput, sorsunnerillu tamakku tamarmik silap matuma upperisarsioqatigiivinit tapersersorneqarsimapput. Tassa inuit upperisarsiortut inuit allat, aamma upperisarsiortut, toquttarsimavaat, arlalippassuartigut namminermissut upperisallit. Katuullit katuuleqatitik toquttarsimavaat, naaggaartut naaggaartoqatitik toquttarsimavaat, muuamaakkut muuamaakkoqatitik toquttarsimavaat, ilaallu ilanngullugit.
8. Upperisarsiornerup ukiuni hundredelinni maanna atuuttuni inerititai ajortut qanoq oqaatigineqarpat?
8 Pingarnerutillugu allaaserisamini „Guutip aqqani nakuuserneq“-mik qulequtsersimasamini Mike Roykop silarsuup matuma upperisarsioqatigiivi ima allaaserai: „Hundredelippassuarnik toqoraanermikkut Guutimut tunniusimassusertik ersersittarpaat. Naatsorsuutigilluinnarpaat aappaata aappani piuneerussinnaaguniuk, taava tamanna ersiutaassasoq pineqartup Guutimik pallorfiginneriaasia eqqortuusoq.“ Eqqaavaattaaq naak oqaatigineqartaraluartoq paavi eqqissinermik pingaartitsisuusoq, taamaattorli „ajoqersugai ilisimaneqalersimasut kissaammeriarlutik aammik literinik millioninik ikinngitsunik kueraasartutut“. Aammattaaq USA-mi præsidentiusimasoq, Jimmy Carter, oqarsimavoq „silarsuaq ajorluinnartunngorsimasoq“, aammalu „qularani upperisamik pigisaqarneq asanninnikkut inunnik ataqatigiinnerulersitsisussaagaluaq, taamaattorli amerlanertigut nakutitsilluni silaarunnermut toqoraanersuarmullu saatitsisarsorinartoq“.
9. Suna pissutigalugu ’guutipiluit’ malinniassanngilavut?
9 Inerititat ajortut taamaattut Guutimik ilumoortumik pallorfiginnittut inerititarisariaqagaannut attuumassuteqanngilluinnarput. (Galâsiamiut 5:19-23) Taamaattumik upperisarsioqatigiinnik ajoqersuutinillu sorsukkumatoorpaluttunik tapersersuisut Ægyptenitoqqamiut, Assyriatoqqamiut, Babylonitoqqamiut allallu ’guutipilunnik oqajuitsunik’ pallorfiginninnerattorluinnaq ilumuunngitsunik guutisiorput. (Hâpakuk 2:18) Soorlu itsaq guutipilussiorneq pillugu Guutip oqaasia siulittuutaasoq eqquussimasoq, aammattaaq ullumikkut eqquukkumaarpoq: ’Guutipiluillu peqassanngillat naamerluinnaq.’ (Isaia 2:18) Jehovap mianersoqqussutaa tusarnaarutsigu silatusaassaagut: ’Gutipilunnut saassanngilasi.’ — 3 Môrsase 19:4.
Kikkut Jehova nalunaajaassutigaat?
10. Silap matuma upperisarsioqatigiivinut ilaasortat Guutimut ilumoortumut nalunaajaasuuppat?
10 Guutimut ilumoortumut nalunaajaasup taanna nalunaajaassutigisariaqarpaa. Silap matuma upperisarsioqatigiivinut ilaasortat taamaaliorpat? Qanoq akulikitsigisumik upperisartik ilinnut oqaluttuarisimavaat? Guutertik nalunaajaassutiginiarlugu pulaarsimavaatsit? Guutip guutinut ilumuunngitsunut nalunaajaasunik sassartitseqqullugit kajumissaarutaa soqutigineqanngilaq. Silap matuma uppeqatigiivinut ilaasortat nalunaajaasutut sulinngillat. Guuti ilumoortoq kinaanersoq siunertaaluunniit suunersut oqaluttuussinnaanngilaatigut. Palasiisa sallusuissut taakkununnga oqaluussissutigisimanngilaat. ’Tappiillutik tappiitsoqatitik tasiorpaat. Tappiitsulli tappiitsoqanni tasioruniuk itersamut nakkaqatigiissapput.’ — Matîuse 15:14.
11. Guutip ilumoortup aqqanik kikkut nalunaajaassutiginnittutuaappat?
11 Piffissartik, atortussatik allaallumi inuunertik kikkut pilliutigerusuppaat Guuti ilumoortoq nalunaajaassutiginiarlugu? Kikkut inoqatitik oqaluttuuppaat Guuti ilumoortoq ima oqarsimasoq: „Uanga tassa Jehova. Tassa atera“? (Isaia 42:8, NV) Kikkut ima nalunaajaappat „illit, Jehovamik atilik, illit kisivit Qutsinnerussaartutit nunarsuarmi tamarmi“? (Tussiaat 83:18, NV, kalaallisuumi versi 19.) Jesus nunamiikkallarami Guutimut ilumoortumut ima oqarsinnaasimavoq: ’Aternik nalujunnaarsippakka.’ (Juánase 17:6) Ullumikkut taamatut oqarsinnaasutuat tassaapput Jehovap Nalunaajaasui. Aap, taaguutertik eqqortumik atorpaat — Jehovamut nalunaajaasuugamik!
Naalagaaffimmik oqaluussissutiginninneq
12. Guutimut nalunaajaasut ilumoortut inunnut allanut suna pinngitsoornatik oqaluttuarisussaavaat?
12 Guutip ilumoortup aqqanik nalunaarutiginninnermik saniatigut nalunaajaasuisa taassuma siunertai oqaluttuarisussaavaat. Sunamiuna oqaluttuariniaraat? Guutip ilumoortup naalagaaffiata tikiunnissaanik qinnuiginissaanik ajoqersukkani ilinniartikkamigit Jesus maligassiuivoq. (Matîuse 6:10) Guutip naalagaaffia qilammiittoq tassaavoq nunarsuaq tamakkerlugu naalakkersuilersussaq. (Dâniale 2:44) Naalagaaffik taanna aammattaaq Jesusip oqaluussinerata tunngavigaa. (Matîuse 4:23) Naalagaaffik taanna tassaammat inuiaat ajornartorsiutaannik aaqqiissutissatuaq, Jesus ima kajumissaarivoq: ’Guutip naalagaaffia iluarnerlu taassuma pia piniaqqaarsigik.’ — Matîuse 6:33.
13. (a) Jehovap Nalunaajaasuisa Guutip naalagaaffianik oqaluussissutiginninnerat pillugu pisimasuiit suna ersersippaat? (b) Oqaluussissutiginninnerata qanoq takutippaa Jehova Guutituaasoq ilumoortumik siulittuisinnaasoq?
13 Kikkut ullumikkut Guutip naalagaaffianik nalunaajaatiginnittuuppat? Professori C. S. Braden, silarsuarmi upperutsinik misissueqqissaarsimasoq, ima oqarsimavoq: „Iluamik oqaatigissagaanni Jehovap Nalunaajaasuisa nalunaajaanerminni nunarsuaq tamakkersimavaat. . . . Ilumoorluinnaq, silarsuarmi upperisarsioqatigiit allat ataatsilluunniit Jehovap Nalunaajaasuisut Naalagaaffimmik tusagassamik nuannersumik nalunaajaaner- minnit ilungersuutiginninnerattut qasusuissusermillu takutitsinerattut iliorsimanngillat.“ Ukiulli 40-t matuma siornagut taama allappoq! Ullumikkut suli annertunerungaartumik Naalagaaffik nalunaajaassutigineqarpoq, tassami maanna Jehovap Nalunaajaasui quleriaataa sinnerlugu amerlassuseqalersimapput! Jehovap Nalunaajaasui millionit pingasut millionillu affaata missaanniittut ilagiinni 55.000-ingajannik amerlassusilinniittut nunarsuaq tamakkerlugu Naalagaaffimmik nalunaajaatiginnipput, sulilu amerliartortuarsinnarput. Inerititap ajunngitsup tamatuma ersersippaa Jehova tassaasoq Guuti eqqortumik siulittuisartoq. Tassaavoq taanna ernerminik Jesusimik isumassarsisitsilluni uagut nalitsinnik siulittuisitsisoq: „Naalagaaffimmillu tusagassaq nuannersoq tamanna nunarsuarmi inuit najugarisaanni tamarsuarmi oqaluussissutigineqassaaq inuiaqatigiit tamarmik nalujunnaarutissaannik; taavalu naggatissaq nalliutissaaq.“ — Matîuse 24:14, NV; Juánase 8:28.
Guutip asanninneranik issuaasut
14. Guutip pissusiisa ilaat sorleq nalunaajaasuisa ilumoortut issuarniartariaqarpaat, taamaaliunngikkunilli taakku pillugit suna nalunarunnaassava?
14 Guutip nalunaajaasuisa ilumoortut taassuma pissusiisa ersarinnersaat — asanninneq — issuarniartariaqarpaat. ’Asanninngitsup Guuti ilisarinngilaa; Guuti asassutaammat.’ (1 Juánase 4:8) Aap, ’tassannga nalunarunnaararaat Guutip qitornai Diaavulullu qitornai. Kinaluunniit iluarnermik ileqquliunngitsoq Guutimit pinngilaq, aammattaaq qatanngumminik asanninngitsoq. Asaqatigiissaagut, ima pinnata soorlu Kain ajortumit pisoq nukkilu toqukkaa.’ — 1 Juánase 3:10-12.
15. Suna pissutigalugu oqarsinnaavugut Jehovap Nalunaajaasuisa asanninneq piviusoq nittartaraat?
15 Jehovap Nalunaajaasuisa kisimik asanninneq taama ittoq takutippaat. Sorsunnerup, inuiaassutsimik pingaartitsiniarpallaarnerup ammillu qalipaataanik assigiinngisitsinerup guutii nakkaannarfiginngilaat. Silarsuarmi maani sorsunnerit arlaannaalluunniit tapersersorneq ajorpaat, taamaattumillu qatanngutiminnik nunani allani najugaqartunik toqutsinngisaannarlutik. Jesusip oqarsimaneratut taakku ’silarsuup inuisa ilaginngilaat’, aammalu ’pannamik tigusineq ajorlutik’. — Juánase 17:14; Matîuse 26:52.
16. Inuit allat qanoq oqarnermikkut Guutimut nalunaajaasut ilumoortut kikkuuneri nalunarunnaarsittarpaat?
16 Allakkami qulequtaqartumi „Nakuusernermik pinngitsuutitsineq tusaqqilaarlugu“ ima allassimasoqarpoq: „Jehovap Nalunaajaasuisa ’kristumiutut politikkimut sumulluunniit atannginnertik’ nakuusernertaqanngitsumik aalajangiusimajuarsimavaat . . . Naalagaaffimmut sakkutuutut sakkutuujunngitsutulluunniit kiffartuussinermut isiginninnertik aalajaatsoq, aammalu inuiaassutsiminnik ilisarnaateqarumannginnertik pillugit nunat ilarpassuini malersugaallutillu, parnaarussaasarlutillu inupiluuserfigineqartarsimapput . . . Nalunaajaasulli nakuusernerit nakuusernermik akinngisaannarpaat.“ Brasiliami aviisit ilaanni, O Tempo-mi, Jehovap Nalunaajaasui pillugit ima allassimavoq: „Naak ullumikkut upperisarsioqatigiippassuit nunarsuarmi tamarmi ilissarsiorlutik takoqqusaaruteqartaraluaqalutik, arlaannaalluunniit asanninnermik ataasiussusermillu, Jehovap Nalunaajaasuisa peqatigiissortaasa Guutip aqutsineratigut aaqqissuussaasup pigisaattut ittumik, takutitsisinnaanngillat.“ Jesus oqarsimavoq asanninneq piviusoq taama ittoq Guutip nalunaajaasuisa ilumoortut ilisarnaatigissagaat. ’Matumannga tamarmik ilisarissavaasi ajoqersugarigissi: asaqatigiikkussi.’ — Juánase 13:35.
Malersugaaneq pissutigalugu nalunaajaaneq annertusisimavoq
17, 18. Ungasinngitsukkut pisimasup suup takutippaa malersugaanerup Naalagaaffimmik nalunaajaatiginninneq annertusarsinnaagaa?
17 Malersugaanerup kingunerisinnaavaa Naalagaaffimmik nalunaajaatiginninnerup annertusinera. Soorlu: Indiami Jehovap Nalunaajaasui 8000-it missaannaanniipput, ungasinngitsukkulli Jehovap aqqa siunertaalu nunami tassani oqallisigineqartorujussuanngorput, Jehovap Nalunaajaasuisa meeraat aqqanillit ukiuni hundredelinni siullerni kristumiut eqqartuussisunut oqarsimanerattut iliorsimammata: „Guuti naalakkatsitut inunnit naalattariaqarneruarput.“ (apustilit suliait 5:29, NV) Meeqqat Indiamiut taakku inuiaassutsimik erinarsuummik erinarsoqataajumannginnertik pissutigalugu atuartuujunnaarsitaasimapput. Kisianni aviisimi Deccan Herald-imik taaguutilimmi, Bangaloremi saqqummersartumi, eqqartorneqartoq naapertorlugu Indiami eqqartuussisut qullersaata eqqartuussutip inerneranik aalajangiinermini taasimavaa „inatsit aalajangersakkanik inuiaassutsimik erinarsuummut pinngitsoorani erinarsoqataanissamik peqqusisunik imaqanngitsoq“. Eqqartuussisoqatigiittaaq tikkuarpaat meeqqat „naleqquttumik ataqqinninnermik ersersitsisimasut“ erinarsoqataannginnerallu „naalanngisaarnerunngillu- innartoq“. Taamaattumik eqqartuussisoqatigiit peqqusipput meeqqat atuartunngorteqqinneqassasut.
18 Aviisimi tassani aamma ima allassimavoq: „Meeqqat taakku inuiaassutsimik erinarsuummik erinarsoqataajumanngillat pissutigalugu Jehovap Nalunaajaasuisa imminnut kristumiutut isiginerat Guutillu naalagaaffianut tunniulluinnarsimanerat. . . . Taamaattumik naalagaaffiup politikkimut tunngasunik suliniutaanut ilaaneq ajorput.“ Aviisimi The Telegraph-imik taaguutilimmi, Calcuttami saqqummersartumi, aammattaaq ima allassimavoq: „Meeqqat atuartut iliuuserisimasaat pissutaalluni . . . Jehovap Nalunaajaasui, qanittoq tikillugu nunatsinni ilisimaneqarpianngikkaluit, tamanit arajutsinaveersaarneqarluinnalerput.“ Aap, ’naalagaaffimmik tusagassaq nuannersoq tamanna oqaluussissutigineqassaaq inuiaqatigiit tamarmik nalujunnaarutissaannik’ naggatissap nalliutinnginnerani. — Matîuse 24:14, NV.
Guutimut ilumoortumut nalunaajaasut katersorneqarput
19. Inuit peqqusersuitsut qanoq iliortariaqarpat Guuti ilumoortoq pallorfigiumagunikku?
19 Guutip ilumoortup, Jehovap, ullumikkut innuttani kisimi oqartussaanerminik siunertaminillu nalunaajaasippai. Tusarliussaminik nalunaajaanerat annertusiartortillugu inuit peqqusersuitsut inuiannit tamaneersut amerliartuinnartut peqatigiinnut imminut pallorfiginnittunut katersorpai. (Isaia 2:2-4) Guutitik ilumuunngitsut tunuppaat Guutimillu ilumoortumik pallorfiginninnermut saallutik, soorlu inuit Jehovamik pallorfiginnikkusuttut Babylonitoqqami, guutipilussiorfiungaartumi, inussiaanerminnit aniguisitaasimasut. — Isaia 43:14.
20, 21. Suna pissutigalugu inuit guutit ilumuunngitsut maannakkut tunuttariaqarpaat — Jehovamullu ’atasuusaartuu’innaanatik’?
20 Guutimut ilumoortumut nalunaajaasoorusuppit? Ilumoortumik pallorfiginninnissat aalajangiukkusuppiuk taamaalillutillu silap matuma taassumalu guutiisa ilumuunngitsut kanngunartuliungaarnermikkut pillagassaanerat peqataaffiginngitsoorlugu? Guuti ilungersortumik ima kajumissaarivoq: ’Taassumannga [eqqunngitsumik guutisiornermit Babylonerpaluttumit] anigitsi, innuttakka, ajortaasigut peqatigileqinavarsi, perluutissaanillu pineqaqinavusi.’ (sarĸúmersitat 18:4) Aap, ’anigitsi’ — kingusinaartinnasi! Katuullit atuagassiaata ilaanni angutitut, upperisarsiornini pillugu aperineqartutut, innaveerit, taanna ima akimmat: „Oqarsinnaavunga Jehovamut Atasuusaartuullunga. Upperisara annerusutigut Jehovap Nalunaajaasuisa upperisaannut assinguvoq — kisianni sumulluunniit akulerukkusunngilanga.“
21 Silap matuma guutii ilumuunngitsut taakkualu pallorfiginnittaat Guutip suujunnaarsilerpagit, nunarsuarmi tamarmi kinaluunniit kalluunnaveersaarniarsinnaanngilaq: ’Guutit qilammillu nunamillu pinngortitsinngitsut piiagaassapput nunamit qilaallu matuma ataanit.’ (Jerimia 10:11) Taamanikkussamut kinaluunniit oqaannarsinnaassanngilaq ’atasuusaartuulluni’. Qinigassat marluinnaapput: Guutimut ilumoortumut nalunaajaasut, taamaattuunngitsullu. (Matîuse 24:37-39; 2 Pîtruse 2:5; sarĸúmersitat 7:9-15) Guutimut ilumoortumut nalunaajaasoorusuppit? Taamaakkuit silatusaassaatit, tassami Guuti ilumoortoq „guutiuvoq annatsitsisartoq, [Jehovami] naalagaasumi toqumit aniguiffissaqarpoq“. — Tussiaat 68:21. (wD 1/2 88)
Apeqqutit uteqqitassat
□ Guutip ilumoortup guutit ilumuunngitsut qanoq unammillerpai?
□ Najoqqutassaq tutsuiginartoq suna najoqqutaralugu eqqortumik eqqunngitsumillu upperisarsiornerit immikkoortinniarsinnaavavut?
□ Silap matuma guutiisa inerititaasa suut ersersippaat itsaq guutigineqartutut naleqanngitsigisuusut?
□ Inerititat ajunngitsut suut Guutimut ilumoortumut nalunaajaasut inerititarisariaqarpaat, kikkullu taama ittunik inerititaqarpat?
□ Suna pillugu eqqunngitsumik upperisarsiornerit massakkorpiaq tunuttariaqarpavut?
[Qupp. 12-mi assiliartaq]
Itsaq inuiaqatigiit guutii maanna pallorfigisaajunnaarput
[Qupp. 13-mi assiliartaq]
Ukiuni hundredelinni maanna atuuttuni inuit hundredenik millionillit missaat sorsunnerni silap matuma upperisarsiortuinit tapersersugaasuni toqutaasimapput
[Suminngaanneernera]
U.S. Army photo
[Qupp. 14-mi assiliartaq]
Jesus oqarsimavoq nalunaajaasut ilumoortut asaqatigiinnertik ilisarnaatigissagaat