Kristumiuuneraqatigiit paasineqarput eqqunngitsumik guutisiortitsisuusut
’Tamassa inuit Jehovap Guutimik nipaanik tusarumanngitsut inerteqqummillu ilassiumanngitsut.’ — Jerimia 7:28.
1, 2. Jeremias qanoq qisuariarpa Guutip suliassimmani?
„QULARUTEQANNGILLUINNARNINI kajumississutigaa; misigisimavoq pinngitsoorani sallusuissut oqaatigisariaqarlugu, avoqqaarinnittariaqarluni aammattaarli tuppallersaasariaqarluni.“ Tamakku oqaaseralugit hebræerit oqaasiinik misissueqqissaartut marluk Jeremiasip suliaa allaatigaat. Suliassaq Guutip taassumunnga suliareqqusaa mianernangaartuuvoq, taamaattorli nalunngilaa inuiaqatigiinnut Judakkunnut pisussaaffini naammassisariaqarlugu. Soorlu nammineq oqartoq: ’Ullut tamaasa mitaatigalungalu inukkutigisarpaannga Jehovap oqaasia pillugu. Isumaqaraluarpunga: „Isumakkiissavara, kingorna oqalussanngilanga aqqa taallugu.“’ Aap, tatineqarnini malersorneqarninilu artungajappai. Kisianni nakkaannarpa? — Jerimia 20:8, 9a.
2 Jeremiasip oqaatsini ima nangippai: ’Kisianni innertut ikumasutut ilerpoq uummatinni, saanima iluannit anniveqanngitsutut, taavalu ilumiugineq qatsuppara sapilerlugulu.’ (Jerimia 20:9b) Guutip eqqartuussutai Judamut tusarliutissallugit imminut suliareqqusaq Jeremiasip sumiginnanngilaa. — Jerimia 6:10, 11.
Jeremias ullumikkut
3. Jesusip ajoqersugaasalu imminut suliareqqusaq qanoq isumaqarfigaat?
3 Kristus Jesusip ajoqersugaasalu siulliit Jeremiasitut Guutip naalagaaffia pillugu tusarliussaq nuannarisaanngitsoq juutinut inuiaqatigiinnullu allanut qunusuillutik tusarliuppaat. Oqaluussinertik peqqutigalugu naak siornatigut parnaarussaasimagaluarlutik, Peterip apustilillu allat unnerluussisitik upperisarsiortuusut nakimaatsumik ima akivaat: „Guuti naalakkatsitut inunnit naalattariaqarneruarput.“ Nakimaassusertik pissutigalugu upperisarsiornikkut aqutsisut peqqussutaat malillugu iperartortinneqarput. Apustilit qanoq qisuariarpat? „Ullut tamaasa, naalaffimmi illumillu illumut angalaarlutik, soraarnatik ajoqersuiuaannarput Messiasimillu, Jesusimik, tusagassaq nuannersoq oqaluussissutigalugu.“ — apustilit suliait 5:29, 40-42, NV; Matîuse 23:13-33.
4. Ukiut 2000-issaanni kikkut Jeremiasip maligassiaanik malinnippat, qanorlu ilillutik taamaaliorpat?
4 Tassa kristumiut siulliit tanitaasut Jeremiasitut iliortarput. Naak ikinnerussuteqaraluarlutik upperisarsiortullu akeqqivissimasut akerarigaluarlugit, Guutip eqqartuussutai tusarliuttuaannarpaat. Ullumikkut, ukiut 2000-issaanni maanna atuuttuni, kikkut taakkua maligassiaannik malinnippat? Kikkut inuit tutsaanni illumiillu illumut angalaarlutik pissutsit aaqqissuussaanerannut matumunnga ingammillu Jerusalemimut assingusumut, kristumiuuneraqatigiinnut, Guutip eqqartuussutaanik tusarliussippat? Ukiuni 68-init amerlanerusuni pisimasut ersersippaat katersat Jeremiasitut ittut ullumikkut tassaasut Jehovamut Nalunaajaasut tanitaasut ikikkaluaqalutik qunusuitsut. Taakku 1935-miilli ’amerlangaartunit’ piumassuseqarlutik suleqatiginnittunit amerliartuinnartunit, maanna millionilikkuutaanngorsimasunit aammalu Jehovap Nalunaajaasuinik taaguuteqartutut ilisimaneqartunit, tapersersorneqarlutillu ikiorneqartuarsimapput. Aaqqiagiillutik Jeremiasitut kiffartuutertik naammassiniarpaat eqqunngitsumik upperisarsiornerit nakutitsiniartuunerannik peqquserluttuliortuunerannillu avoqqaaralugit. — sarĸúmersitat 7:9, 10; 14:1-5.
Kristumiuuneraqatigiit — sooq Jerusalemimut assinguppat?
5. Ullumikkut kristumiuuneraqatigiit aamma itsarsuaq Jerusalem sutigut assigiissuteqarpat?
5 ’Kisiannili,’ aperiumasoqarsinnaavoq, ’ullumikkut kristumiuuneraqatigiit itsarsuaq Jerusalemimut qanoq ilillutik assinguppat?’ Isummat pissutsillu itsarsuaq Jerusalemimi saqqumilaartuusut ullumikkut kristumiuuneraqatigiinni pingaarniartuni ersimmata. Ilaasortaasa tatigaat ’illoqarfitik illernartuusut’ iluartuutitaliaqarfitillu, soorlu Roma, Jerusalem, Canterbury, Fatima, Guadalupe aamma Zaragoza, ilaannaat taassagaanni. Oqaluffissaarsuatik, basilikaliatik, naalaffitik oqaluffitillu ingasattumik oqaluusererusuttarpaat, pisoqaassusii ilusilersugaanerilu usorsisimaarutigalugit, isumaqarlutillusooq tamakku pissutigalugit Guutimut immikkut attaveqarlutik. Allaat oqartarput illuliatik upperisarsiortarfiusut ’Guutip ataqqinaatissaanut’ sanaajusut. Upperisarsiortarfiilli taakkua ilaat qassit Guuti Jehovap aqqanik taaguuteqarpat? Guutip aqqa pinnagu kisianni illuliassamik titartaasut, pinnersaatitaannik qalipaasut qiperuisullu, pisoorsuit taakkuninnga aningaasaliisimasut imaluunniit „iluartuutitat“ pigititaasut aqqi eqqaaneqartuartarput. Kristumiuuneraqatigiit ileqqutoqqanik illulianillu itsarnitsanik tatiginninnerat itsaq juutit naalaffimminnik illernartumik tatiginninnerattorluinnaq tunngaveqanngitsigaaq. — Jerimia 7:4.
6. Jesusip juutit palaseqatigiivinik avoqqaarinnissimanera qanoq kristumiuuneraqatigiit palaseqatigiivinut atortuua?
6 Jeremiasip juutit palasiinik pruffiitiinillu avoqqaarinnissimaneratut ullumikkut kristumiuuneraqatigiit upperisarsiornikkut aqutsisui avoqqaarineqarsinnaappat? Jeremiasitut isertuanngitsigaluni Jesusip juutit palaseqatigiivisa pissusii eqqartorpai, tamannalu ullumikkut kristumiuuneraqatigiit palaseqatigiivinut naleqquppoq: ’Oqaraluarlutik taamaaliortarinngillat . . . Suliatik tamaasa suliarisaraat inunnut isigeqqullutik . . . nereqatigiissuni salliujumallaaraat, naalagiartarfinnilu issiaviit salliit ingiffigiumasarpaat.’ (Matîuse 23:3-7) Akuttunngitsumik takusarpavut palasit oqaluussisartullu nuimanerusut politikkikkut inuiaassutsikkullu ataatsimiinnernut katerisimaarnernullu najuunnermikkut pilluaqqugaat — politikerit ilagalugit tusagassiuutitigut takoqqusaarlutik!
7. (a) Oqaluussisartut ilaasa qanoq ilillutik inuppassuit salloqittarniarpaat? (b) Suliassaq ilungersunangaartoq suna palaseqatigiit soqutiginngilaat?
7 Ullumikkut, ukiuni fjernsyneqarfiusuni, nunarpassuarni TV-kkut oqaluussisartut isiginnaarut taanna iluaqutigisarpaat, isiginnaartitseriaatsit nakutitseriaataasut inuillu tarnaannut sunniiniutit assigiinngitsut, qanorluunniit ikkaluartut, sakkugalugit inuppassuit salloqittarniarlugit uppertullu kaasarfii imaarniarlugit. Jeremiasip avoqqaarinnissutaata ullumikkumut, allaat ukiut 2600-t kingornagut, ila naleqqulluassusia! ’Massa minnernit annernullu allaat tamarmik piumatuuallaartorsuupput, pruffiitinit palasinullu allaat tamarmik sallusaannarput.’ Kisiannili kristumiutut kiffartuussineq, tassa anguniagaq ilungersunangaartoq, inuinnaat saangerlugit illumiit illumut angalaarlutik oqaluussisarneq, arlaataluunniit atorumanngilaat. Taamaallaat Jehovap Nalunaajaasuisa — katersat Jeremiasitut ittut tanitaasunik ilaasortallit aammalu ’amerlangaartut’ — akisussaaffik tamanna suliariumavaat. — Jerimia 6:13; apustilit suliait 20:20, 21, NV.
Kristumiuuneraqatigiit annaanneqarsimappat?
8. Suna pissutigalugu kristumiuuneraqatigiit isumaqarpat Harmagedonimi eqqorneqarnaviarnatik?
8 TV-kkut oqaluussisartut taakkua inuinnaat toqqissisimanermik piviunngitsumik tunisarpaat „ernioqqissitaanermik“ aamma „annaanneqarsimasut tammarsinnaannginnerannik“ ajoqersuutit pillugit oqaasinnaat atortaramikkik. Inuit millionilippassuit kristumiuuneraqatigiinni uppeqatigiinnit immikkullu upperusersiortunit tamangajanneersut uppertitaapput „ernioqqissitaasimallutik“ aamma „annaanneqarsimallutik“. Aammattaaq politikerit ilarpassui kanngusujuillutik „ernioqqissitaasimallutillu“ „annaanneqarsimanerarput“. Aap, oqaluussisartunnaavisa oqarfigisarpaat Guutimik eqqisseqatiginnittuusut „annaanneqarsimagamik“ — massa upperisarsiornikkut, politikkikkut inuiassutsikkullu avissaartitersimagaluarlutik! Soorlu Jeremiasip nalaani taamaassimasoq, ullumikkut inuit tamanna upperilluinnarpaat! (Jerimia 5:31; 14:14) Isumaqarput Guutip eqqartuussutaata Harmagedonimi naammassineqartussap eqqornavianngikkaatik. — Jerimia 6:14; 23:17; 1 Korintumiut 1:10; sarĸúmersitat 16:14, 16.
9. (a) Kikkut taamaallaat ’ernioqqissitaappat’? (b) Tarneq pillugu Bibelimi qanoq allassimasoqarpa?
9 Kisiannili Guutip oqaasianik Kristusillu ajoqersuutaanik misissueqqissaarnikkut paasineqassaaq inuit killilimmik amerlassusillit taamaallaat ernioqqissitaaneq immikkut pisinnaatitaaffigissagaat, tassami ’imermit anersaamillu erniusimasut’ qilammi Kristus naalakkersueqatigissagamikku. (Juánase 3:3-5; Rûmamiut 8:16, 17; sarĸúmersitat 14:1-3) Ullumikkut kristumiut ilumoortut ’amerlangaartut’ ernioqqissitaasariaqanngillat, qilammi pinnatik nunamili naassaanngitsumik inuunissamik neriugisaqaramik. (2 Pîtruse 3:13; sarĸúmersitat 21:3, 4) Aammattaaq kristumiuuneraqatigiit ajoqersuutaata tamatuma eqqarsaat kukkusoq — inuk toqujuitsumik annattariaqartumik tarneqartoq — tunngavigaa. Bibelimi sumiluunniit ajoqersuummut tamatumunnga tunngavissaqanngilaq, tassami grækeritoqqat ilisimaqqissaarniarnikkut isumaliutaannit ajoqersuut tamanna aallaaveqarmat.a
Oqaasialuunniit aqqaluunniit nuannarinngilaat
10. Palasit ilarpassuisa Bibeli qanoq isigaat?
10 Itsarsuaq Jerusalem ullumikkullu kristumiuuneraqatigiit allatiguttaaq assigiissuteqarput. Jeremias oqarsimavoq: „Takuat! Jehovap oqaasia asissuissutigaat; kajumiginngilaat.“ (Jerimia 6:10, NV) Palasit Jehovap oqaasii issuaaffiginagit itisuunik eqqarsartartut ilisimatuullu oqaasii issuaaffigiumanerusarpaat. Ilarpassuisa Bibeli allaat kanngusuutigaat, aammalu illaruaatigisassanngortittarlugu Bibelimik isornartorsiuiumatunermikkut. Bibeli oqaluttuatoqqanik oqaluttualianillu atuakkiaalluartunik imaqarnerarpaat. (Jerimia 7:28) Atuakkiortuatalu aqqa narrugaat. Tamanna sumik uppernarsaatissaqartissinnaavarput?
11. Guutip aqqanik atuineq eqqarsaatigalugu kristumiuuneraqatigiit Jeremiasillu suna assigiinngissutigaat?
11 Guutip aqqa hebræerisooq sisamanik naqinnilik (יהוה) Allakkani Hebræerisuuni (Tastamantitoqqamik taaneqartartumi) naak 7000-ingajariarluni atorneqaraluartoq, ateq „Jehova“ imaluunniit „Jahve“ bibelimi kalaallusuumi „Nâlagaĸ“-mik atiunngitsumik taarserneqarsimavoq. Aamma bibelimi afrikaansisuunngortitami ateq taanna atorneqanngivippoq. Spaniamiutut bibelimi Franquesa- Solé- p nutsernerata naqiterneqaqqaataani Guutip aqqa atorneqartarpoq, naqiteqqitaaneranili ateq taanna peerneqarsimavoq — taarsiullugu Señor (Naalagaq) atorneqarluni. Guutip aqqa bibelini kristumiuuneraqatigiit nutsigaasa ilaanni ikittunnguani naak atorneqaraluartoq, palasertaasa qaqutigut atortarpaat. Kisianni Guutip nammineq aqqa allanit tamanit allaasoq Jeremiasip tusarliussamini siulittuutaasumi 726-riarlugu atortarpaa!b
’Qilaap kunngia arnaq’ guutipilussiornerlu
12-14. (a) Ilaqutariit juutiusut suna aalluppaat? (b) Taakkua pallorfiginninnerat Jehovap qanoq isigaa?
12 Jeremiasip Jerusalemimut tusarliussaa misissortillugu itsaq Jerusalem ullumikkullu kristumiuuneraqatigiit allamittaaq assigiissutissarsisinnaavavut. Jehovap pruffiitini inakkamiuk inuiannik taakkuninnga qinnusseqqunagu, suna pissutaasoq uparuarpaa. ’Isiginngiligit uku qanoq iliortut Judap illoqarfiini Jerusalemillu illuisa akornini? Qitornaat qisuttarput, angutaasalu inneq ikitippaat, arnallu uutigassat naqittarpaat.’ Ilaqutariit tamarmiullutik sunaana aallukkaat? „’Qilaap kunngianut arnamut’ tunissutissaminnik kaagiliorumallutik“! (NV) — Jerimia 7:16-18; 44:15, 19.
13 Juutit Bibelimik nassuiaataasa ilaanni ima allassimavoq: „’Qilaap kunngia arnaq’ aallussilluartumik saqqumisumillu guutipilussiorfigisaavoq.“ Uppernanngikkaluartumik, inuiaqatigiit Judakkut guutipilussiorput, pallorfigigamikku guutipiluk arnaq, immaqa tassaasoq Babylonimiut qitornigajussusermut guutiutitaat arnaq Isjtar, guutit ataasiullunilu pingasuusut nuimanerusut pingajuat. „Qilaap kunngia arnaq“ taanna tassaasinnaavortaaq Kana’animiut guutiat arnaq Astarte, taaneqareersumut illuatungiliuttoq. — 1 kúngit 11:5, 33.
14 Guutipiluup arnap taassuma saniatigut allanittaaq guutipilussiorfeqarput. Taamaaliornerat pissutigalugu Jehovap avoqqaarai, oqarluni: ’Soormi narrutsatsittarpaannga inuusaliaminnik qiperukkanik piunngitsuutiminnillu allanertanik?’ Unnerluussinini ima nangippaa: ’Nipiga naalanngilaat maleruarnagulu, uummatimilli ajorsusii malimmatigik Ba’alillu, soorlu siuaasamik sungiusaraatik.’ (Jerimia 8:19; 9:13, 14) Kristumiuuneraqatigiit tamannattaaq nakutitaassutigaat?
15. (a) Guutipilussiorneq pillugu ullumikkut kristumiuuneraqatigiit akornanni pissuseq suna atuuppa? Illoqarfimmi najukkanni assersuutinik taasaqarit. (b) Kristumiut ilumoortut Maria qanoq isigaat?
15 Oqaluffik oqaluffissaarsuarluunniit — naaggaartut piat, katuullit piat, imaluunniit ortodoksilerisut piat — sunaluunniit iserfigigaanni allanik guutiliaqanngikkuni qularnanngitsumik sanningasuleqassaaq. Katuullilli ortodoksilerisullu oqaluffiini inuusaliaqartarpoq assiliaqartarlunilu „Mariap niviarsiaajuaannartup iluartup, Guutip ilumoortup arnaata,“ assinginik, assigiinngitsorpassuarnik ilusilersugaalluni.c Alutornarnerpaanik taaguuserneqartarpoq, soorlu „Qilaap kunngia arnaq“ aamma „Qilaap nunallu dronningiat“!d Akerlianilli, katersat Jeremiasitut ittut, Maria Jesusip arnaatut uppertutullu tanitaasutut naak ataqqigaluarlugu, apustilip unnersuussutaa una mianersoqqissaarlutik malippaat: ’Guutipilunnut mianersoritsi.’ — 1 Juánase 5:21; Jerimia 10:14.
Guuti ataasiullunilu pingasuusoq Naalakkamut kisimi oqartussaasutuamut Jehovamut taartigititaasoq
16. Ajoqersuutip suup Mariamik ingasattumik ataqqinninnilerneq aqqutissiorpaa, qanorlu ilillugu?
16 Apeqqutigineqarsinnaavorli Mariamik pallorfiginninneq ingasattumillu ataqqinninneq qanoq aallarnersimanersoq? Guutipilussiortunik ilagiinnut ilanngutitsiniarlutik ilagiit tunusseqqammersut peqqusersiornerisa ilaat pissutaavoq. Eqqarsaat guuti ataasiullunilu pingasuusoq guutipilussiortuni atugaaqaaq. Romamiutoqqat naalaffiini ineeqqat pingasukkuutaartarput, „guutinut ataasiullunilu pingasuusunut ajoqersuutitigut pallorfiginninnikkullu ataqatigiinnut pigititaallutik. Assersuutitut taaneqarsinnaavoq Jupiter Optimus Maximusip naalaffia Capitoliumimiittoq, pingasuussusilimmut Capitolimi guutigisamut Jupiter-Juno-Minervamut pigititaq.“e
17, 18. Suna atorneqatsaalisaava, Guuti ataasiullunilu pingasuusumik ajoqersuutip siuarsimaneranik kingunilik?
17 „Guuti ataasiullunilu pingasuusoq iluartoq“-mik ajoqersuut saqqummeriartortoq ukiut hundredellit pingajussaanni sisamassaannilu siuarsarumallugu, ilagiit katuullit ajoqersuutigineqatsaaliorniarsarisariaqarpaat hebræerit paasisaat Jeremiasip oqaasiini erseqqissumik oqaatigisaq una: ’Ilittut ittoqanngilaq, Jehova, illit angingaarputit, aqqillu angingaarpoq pissaanikkut. Jehovali ilumut Guutiuvoq, taanna Guutiuvoq uumasoq, isuanut kunngiusoq.’ Paasisaq tamanna Jesusip uppernarsarpaa Mosesip oqaasii issuaramigit: ’Tusarnaarit, Israel-iaa, Jehova Guuterput, Jehova ataasiuvoq.’ — Jerimia 10:6, 10; Mákorse 12:29; 5 Môrsase 6:4.
18 Aqqip „Jahve“-p „Jehova“-lluunniit taaqqusaannginneranik juutit upperisapalaavat iluaqutigalugu, kristumiuuneraqatigiit tunussisimasut Guutip aqqa atorunnaarpaat. Aqqip taassuma atornissaraluanut taarsiullugu ajoqersuut „Guuti ataasiullunilu pingasuusoq“ atorneqarpoq.f
19. (a) Kristumiuuneraqatigiit Guuti ataasiullunilu pingasuusunik ajoqersuummik akuersinerat sumik kinguneqarpa? (b) Guuti ataasiullunilu pingasuusumik ajoqersuut uppernarsarniarlugu qanoq ilillutik peqquserluttuliorpat?
19 Taamaaliornikkut kristumiuuneraqatigiit ’guuti allanertaq’, guuti ataasiullunilu pingasuusoq, juutit, Kristusip kristumiullu ilumoortut nalulluinnagaat, malinnialerpaat. Ataasiullunilu pingasuusoq paasissaanngitsoq tamanna uppernarsarniarlugu kristumiuuneraqatigiit allaqqiisui peqquserluttuliorput allaat, allakkanik nutaannginnerusunik grækerisuunik allanngortitsillutik.g Guuti ataasiullunilu pingasuusumik ajoqersuutip kinguneranik, kristumiuuneraqatigiit ilarpassuisa „qilaap kunngia arnaq“, Maria, pallorfigilersimavaat imaluunniit ingasattumik ataqqilersimallugu. — Jerimia 7:17, 18.
Palasit malersuisitsisut
20, 21. Kristumiuuneraqatigiit palaseqatigiivi sumik periaaseqarpat, apeqqutillu suut apeqqutaalerpat?
20 Matuma siuliini eqqartukkat eqqarsaatigalugit, Jeremiasip apeqqutaa kristumiuuneraqatigiit palasiinut naleqqulluarpoq: ’Qanormi oqartarpisi: „Ilisimasuuvugut, Jehovap inatsisai uatsinniipput“? Massa allakkanik ilisimasut titartaataata salluniutaasup salluninngortikkai. . . . Takuasi, Jehovap oqaasia asiginnaraat, sunami ilisimassuserissavaat?’ (Jerimia 8:8, 9) Jehova taassumalu oqaaseqartitai, nalunaajaasui, narrugaat. Soorlu palasit pruffiitillu Jeremias malersoraat, aamma kristumiuuneraqatigiit palaseqatigiivisa ukiuni hundredelinni maanna atuuttuni Jehovap Nalunaajaasuinik naakkittaatsumik malersuinerup ilarujussua taperserpaat.
21 Sunali pissutigalugu taamatut malersuisitsippat? Jehovap Nalunaajaasui qanoq iliorpat palasit kamaatigisaannik? Atuagassiap uuma tullissaani apeqqutit tamakku tamakkununngalu assingusut akissutissaqartinneqassapput. (wD 1/4 88)
[Quppernerup ataani ilanngussat]
a Oqaluuserisat tamakku erseqqinnerusumik nassuiarneqarput quppernerni 103-107, 110-113 aamma 343, 344-mi atuakkami Lad os ræsonnere ud fra Skrifterne, Vagttårnip Peqatigiiffiata naqitertitaani.
b Guutip aqqanik atorneqatsaaliineq pillugu erseqqinnerusumik paasissutissaqarpoq atuagaaqqami Guds navn der vil bestå for evigt-imi, Vagttårnip Peqatigiiffiata naqitertitaani.
c The Image of Guadalupe — Myth or Miracle? Jody Brant Smithimit, qupperneq 6.
d The Glories of Mary Alphonsus de Liguorimit, qupperneq 424.
e Ajoqersuut Guuti ataasiullunilu pingasuusoq atuakkami Lad os ræsonnere ud fra Skrifterne-mi qupperneq 374-396-imi sammineqarpoq.
f Las Grandes Religiones Ilustradas (Upperutsit annerit assiliartaat), qupperneq 408.
g Juánasip agdlagai sujugdlît 5:7-imi nutsikkat ilaanni oqaaserpaalunnguit, Guuti ataasiullunilu pingasuusumik ajoqersuummut tapiissutaasut, peqquserluttumik ilanngunneqarput, aammalu Matîuse 24:36-mi oqaaseq ’ernerulluunniimmi’ peqquserluttumik ilanngunneqarsimanngilaq. Takukkit The Emphatic Diaglott, Vagttårnip Peqatigiiffiata naqitertitaa, quppernerup 803-p ataani nassuiaasiullugu ilanngussaq, kiisalu The Codex Sinaiticus and The Codex Alexandrinus, Trustees of the British Museum-ip naqitertitaa, qupperneq 27.
Uku eqqaamavigit?
□ Suup ersersippai ullumikkut katersat Jeremiasitut ittut kikkuuneri?
□ Itsarsuaq Jerusalemip ullumikkullu kristumiuuneraqatigiit imminnut assingussutaannik tasaqarit.
□ Palasit qanoq oqarlutik inuinnaat uppertunngortippaat Guutimik eqqisseqatiginnittuusut?
□ Kristumiuuneraqatigiit qanoq iliunngitsoorpat, qanorlu ilillutik guutipilussiortuuppat?
[Qupp. 12-mi assiliartaq]
1938-mi Jehovap Nalunaajaasuisa eqqunngitsumik upperisarsiorneq avoqqaaraat
[Qupp. 13-mi assiliartat]
Kristumiuuneraqatigiit illernartuutiliatik tatigaat — soorlu itsaq juutit naalaffik tatigigaat
[Qupp. 14-mi assiliartaq]
Kristumiuuneraqatigiit TV-kkut oqaluussisartuisa inuit millionillit „annaanneqarsima“nerannik imaluunniit „ernioqqissitaasima“nerannik uppertunngortippaat