Guutip eqqartuussutai tusarliunneqartariaqarput
’Pikillutit oqaluffigalugillu tamanik ilinnut inassutigisannik. Annilaarutigissanngilatit.’ — Jerimia 1:17.
1. Jehovap Nalunaajaasuisa Tysklandimi nazistit naalakkersuisuutillugit qanoq ilillutik ’qaamasortik qaamatippaat’?
„JEHOVAP NALUNAAJAASUISA Naalagaaffimmi Holocausteqarfiusimasumi [Tysklandimi nazistit naalakkersuisuutillugit] malersugaanerat oqaluttuarisaaneranni naalliutsitaanerisa ilaannaraat.“ (Holocaust Studies Annual, Volume II — The Churches’ Response to the Holocaust) Aammalu 15. juli 1939-mi aviisimi Afrika Kujallermi ullormut saqqummersartumi Daily News-imi Jehovap Nalunaajaasui Tysklandimiittut pillugit ima allassimasoqarpoq: „Qaamasutut issulinneq ajortutut kristumiorpaaluit angutit arnallu uppernerminni aalajaalluinnarput, Münchenip Kunngianit [Adolf Hitlerimit] ajoriuaannagaallutik taassumalu toqusinnaassusianut uummaarissumik takussutissaallutik.“ Oqaatsit taakkua eqqaasippaatigut Jesus oqarsimammat ajoqersugai ’silarsuup qaamasorissagai’ qaamasortillu silarsuarmiunut qaamatittariaqaraat, qanorluunniit naleqassagaluartoq. — Matîuse 5:11, 12, 14-16.
2, 3. Qatanngut angut Sri Lankamiittoq qanoq ililluni qunusuilluni oqaluussiva?
2 Sri Lankamit eqqissiviilliortoqangaarfiusumit nalunaarutigineqarpoq qanoq Nalunaajaasup inuusuttup tamiliusup, David Gunaratnamip, Jeremiasitorluinnaq iliorluni, sakkutuut oqartussaasut ersisuitsumik nalunaajaaffigigai. Angutit inuusuttut allat ilanngullugit tigusarineqarpoq apersorneqarlunilu. Nalunaarusiami allassimasoqarpoq: „Sakkutuut naalagaasalu [Davidip] ilisimassusia tupigusuutigaat, ingammillu nalunaatsumik peqqusersuilluni oqaasia: ’Peqqarniisaarnianillu taaneqartartunik naapitaqassagaluaruma tamannarpiaq taakkununngattaaq oqaluussissutigissagaluarpara.’“
3 Unnuaq tamannarpiaq peqqarniisaarniat, Davidip sakkutuunut ikiuisuuneranik pasilliisut, angerlarsimaffianit aallaruppaat. Arlaannulluunniit illersuisuunnginnini aalajangiuppaa oqarlunilu taamaallaat Guutip naalagaaffianik tusarliussaq oqaluussissutigalugu. „Guutip suliareqqusaanik sulivunga suliuaannassallungalu. Tusarnaarusuttut kikkuugaluartulluunniit oqaluussiffigisarpakka.“ Nalunaajaasoq qunusuitsoq taanna peqqarniisaarnianit aallaaneqarluni toqunneqarpoq. Nuliani inuusuttoq erninnguanilu qimatarai. — Naleqqiukkit apustilit suliait 7:51-60.
4. Nunat Latinamerikamiittut ilaanni Jehovap Nalunaajaasui palasit akuerisaannik qanoq malersorneqarpat?
4 Nunamit Latinamerikamiittumit, Jehovap Nalunaajaasuinik malersuinerup katuullit presbyterianerillu palasertaasa ilaannit akuerineqarfigisaanit, pisimasoq una nalunaarutigineqarpoq: „Jehovap Nalunaajaasui sakkutuut tammaarfianniittut tallimaapput . . . Unatarneqartarput ineeqqamilu kisimiititaasarlutik nerisaqartinneqaratik. Naalakkersuinermut tunngasunik oqartussaasup immikkoortortaqarfitsinniittup pinngitsaaliinikkut isummanik aalajangiussisitsiniaanermik aqutsisup pillartarpai sakkutuut allat oqaluussiffigisarmatigik. Oqarpoq upperisarsiortut naalagaaffiup pingaarnerutitaanik isumaqarumanngitsut tamarmik Jehovap Nalunaajaasui navianarnerpaartarigaat.“
Pissutit malunniutaasullu
5. Soorlu Jeremiasimut pisimasoq, Jehovap Nalunaajaasuinik malersuinermut suna pissutaasarpa?
5 Aap, soorlu Jeremias upperisarsiornerup naalakkersuinerullu tungaasigut pisortanit malersugaasimasoq, aamma Jehovap Nalunaajaasui silarsuarmi tamarmi taakkunanngarpiaq malersorneqartarput. Sooq malersorneqartarpat? Innuttaaqatigiinni suniluunniit Nalunaajaasut naak qanilaarnerpaajullutillu inatsisinik maleruaanerpaajugaluartut, akeraasa Guutip Oqaasia navianartuusoraat, Guutip naalagaaffia pillugu tusarliussap imarisaa nuannarinnginnamikku akueriumanagulu. Nalunaajaasut isumaqatiginngisaminnut akuersiinnaratik oqaluussinerisa ileqqoreqqusanillu aalajangiussinerisa Satanip pissutsinik aaqqissuussinerata naalakkersuinermut, niuerniarnermut upperisarsiornermullu tunngasortaasa namminissarsiorneri ilumoortuusaarniarnerilu qulaarpaat. — Juánase 15:18, 19; 1 Juánase 5:19.
6. Jehovap Nalunaajaasui malersugaagaangamik qanoq qisuariartarpat?
6 Naalli parnaarussaasaraluarlutik, unatarneqartaraluarlutik, ilaallu toqunneqartaraluarlutik, Jehovap Nalunaajaasui, silarsuarmi tamarmi ittut, Jeremiasitut itsarsuaq inuusutut qisuariartarput. Asannissuseqarlutik ajuallatsitsiumanngissuseqarlutillu Guutip eqqartuussutai nuannarisaanngitsut inuiannut tusarliuttuarpaat. (2 Timûtiuse 2:23-26) Nalunngilaat Guuti Naalakkatut inunnit naalattariaqarnerullugu. (apustilit suliait 4:19, 20; 5:29) Paulusip kristumiunut hebræerinut oqaaqqissaarutaa, tassa Guutip piumasaanik naammassinninniarnerminni aalajaattuaqqullugit, sianigaat. Taamaaliorunik neriorsuutigisaq, inuuneq naassaanngitsoq, piumaarpaat. Taava, Paulusitut Jeremiasitullu oqarsinnaasariaqarpugut: ’Uagut nigortut tammarumaartut ilaginngilaatigut, uppertulli tarnimikkut annakkumaartut ilagaatigut.’ — Eprîarit 10:35-39.
Ullumikkut Jeremiasitut ittut kristumiuuneraqatigiit qulaaraat
7. Jehovap Nalunaajaasui ukiut hundredellit 20-ssaanni qanoq iliorpat, pruffiitit aalajaatsut Jehovap Israelimut Judamullu aallartitaasa iliornerattut?
7 Soorlu Jehovap pruffiitini Israelikkunnut Judakkunnullu aallartittuarai, ullumikkut nalunaajaasuni aallartittarpai eqqartuussiumaarnissaminik tusarliussaq tusarliuttuaannaqqullugu. (Jerimia 7:25, 26; 25:4, 8, 9) Ingammik ukiumiit anersaakkut ittumik inuummarissinartumik pisimasoqarfiusumiit, 1919-imiilli, Kristusip qatanngutaasa sinneruttut tanitaasut Guutip eqqartuussutai, suujunnaarsitaanissamik tusarliussat kimittuut, kristumiuuneraqatigiinnut qunusuillutik tusarliuttuarpaat. (Naleqqiuguk Jerimia 11:9-13.) Ukiumi tassani atuagassiaq The Golden Age tuluttooq saqqummeqqaarpoq. 1925-mi martsimi qallunaatut-norskisuunngorlugu saqqummeqqaarpoq Den Gylne Tidsalder taaguutigalugu; qallunaatuunngorlugu 1930-mi januarimi saqqummeqqaarluni Ny Verden taaguutigalugu. 1947-mi 1. julimi Vågn op!-imik taaguuteqalerpoq. Ukiorpassuit ingerlaneranni atuagassiami tassani kristumiuuneraqatigiit upperisap tungaatigut salluliutaat kristumiuusaarnerallu qulaarneqartarput.
8, 9. (a) Suna pillugu ilagiit kristumiuunerartut 1922-mi avoqqaarineqarpat? (b) Qanoq pineqarnissaat siulittuutigineqarpa?
8 Assersuutigalugu 1922-mi 11. oktoberimi eqqunngitsumik upperisarsiornerit The Golden Age-mi ima avoqqaarineqarput: „Uppeqatigiiffiit assigiinngitsut taakkualu palasertaasa, pisortaasa iligisaasalu tamarmik nunami pissutsit aaqqissuussaanerat annaanniarlugu aalajangeqqinniarlugulu noqqaaniarneri . . . iluatsinngitsuussapput, Messiasip naalagaaffianut ilaannginnamik. Akerlianilli, Sorsunnersuup nalaani uppeqatigiiffiit assigiinngitsut taakkua palaseqatigiivi ilumoorfigisassaminnut Naalakkamut Jesus Kristusimut ilumuunngillat, Sorsunnersuaq siuarsarumallugu niuerniarneq atorlugu iluanaarniartut politikerillu pissaaneqarumatuut peqquserlullutik iligigamikkik.“
9 Avoqqaarinninnerat ima nangippoq: „Aammalu Naalagaq taassumalu naalagaaffia ilassiumanngilaat ilumoorfigisassaminnullu ilumuunngissusertik ersersillugu kajuminnerminnit Satanip peqatigiiffia suleqatigileramikku silarsuarmullu nakimaatsumik nalunaarutigigamikku Naalagaaffiit Peqatigiit siulliit (Folkeforbundi) Guutip naalagaaffiata nunarsuarmi politikkikkut ersernerigaa.“ Naggataatigut suujunnaarsitsinissamik eqqartuussut tusarliunneqarpoq: „Tamanna pissutigalugu naalliunnartoqangaarneq ingalanneqarsinnaajunnaarpoq nunarsuullu inuiaqatigiivinut nalliutilerluni, Kristus Jesusip oqaasii naapertorlugit tassaassasoq ’naalliunnartoqangaarneq silarsuaqaleqqaarneranit mannalu tikillugu naleqanngisaannartoq kingornaluunniit naleqassanngitsoq’.“
10. 1926-mi avoqqaarissut suna saqqummiunneqarpa?
10 Jeremiasitut kiffartuussineq atuagassiat atuakkiallu allat sakkugalugit annertunerusumik naammassiniarneqarpoq. Assersuutigalugu 1926-mi atuakkami Deliverance (Aniguisitaaneq)-mi kristumiuuneraqatigiit ajoqersuutaat tammarsaataasut kimittuumik qulaarneqarput. Qupperneq 203-mi ima allassimasoqarpoq: „Ajoqersuinerluutit amerliartuinnartut [kristumiuuneraqatigiinnut tunussisimasunut] eqqunneqarput sallusuissummut taarsiullugit. Ajoqersuutit taakkua ilagaat ajoqersuutit Guuti ataasiullunilu pingasuusoq, tarnit tamarmik toqusuitsuunerat, ajortut naassaanngitsumik anniartitaanissaat, palasit Guutimit palasinngortitaanerat kunngillu Guutimit naalakkersuisinnaatitaanerat. Ukiut ingerlaneranni Maria, meeqqap Jesusip anaanaa, guutinngortinneqarpoq, uppertullu kajumissaarneqarput taanna Guutip arnaatut pallorfigeqqullugu.“
Kristumiuuneraqatigiit avissaartitersimasut mianersoqquneqartut
11, 12. (a) Palaseqatigiit sorsunnermut ilanngunnaveersaannginnerat qanoq qulaarneqarpa? (b) Katersat Jeremiasitut ittut suna mianersoqqussutigaat?
11 Aamma atuakkami tassani palaseqatigiit sorsunnernut suleqataanerat ima qulaarneqarpoq: „Uppeqatigiiffiit assigiinngitsut palasertaasa sakkutooqatigiit niuernermik pingaartitsisunit naalakkersuinermillu ingerlatitsisunit sorsunnernut aallartitaasut, akerleriit tamaasa assigiissillugit, pilluaqqusarpaat. Palasit Guutimut taannaasumut qinunerartarput akerleriit tamarmik sakkutooqatigiivi tamaasa pilluaqqoqqullugit.“ (Naleqqiuguk Jerimia 7:31.) Taava qanittukkut eqqartuunneqarnissaat sioorasaarutigineqarpoq: „Satanip takussaasumik peqatigiiffiata immikkoortortai tamakku tamarmik katersorneqariartorput Harmagedonimi akiuunnissarsuarmut.“ — sarĸúmersitat 16:14-16.
12 Jeremiasip ulluinisut, pisortat oqartarmata aarlerinartoqanngitsoq Guutimillu eqqisseqatiginninnerarlutik, „taamatut ullumikkut upperisarsiornikkut pisortat imminnut oqarfigisarput aarlerinartoqanngitsoq, Kristusip aqqanik imminut taagunik taava Diaavulup innera navianartorsioratik pinnguaatigiuaannarsinnaallugu. Imminut tappiillisikkamik inoqatiminnittaaq tappiillisitsillutik piaaraluneerlutik pissusiviusut takujumanngilaat. (Deliverance, qupperneq 270) Imminut salloqittarnerat Bibelimik Atuaqqissaartartut, soorlu Jehovap Nalunaajaasui taamani taaneqartut, aallussilluarlutik ersersittarpaat. — Matîuse 7:21-23.
13. Suna 1931-mi pisimava, sunalu pissutigalugu tamanna naleqqulluarlunilu tulluarpa?
13 Ukiut ingerlatillugit Bibelimik Atuaqqissaartartut Jeremias assiginerusinnaalerpaat 1931-mi Columbusimi, Ohiomi, U.S.A.-mi ataatsimeersuarneranni nalunaarutigineqarmat kristumioqatigiit qunusuitsut taakkua taaguut Bibelimeersoq „Jehovap Nalunaajaasui“ taaguutigilissagaat. (Isaia 43:10-12) Taaguut taanna ukiut 800-ssaanni u.n.a.s. taaneqarpoq Jehovap Israelimut atortuutilermagu. Taamaammat ukiut hundredet missaat tamatuma kingornagut, Jeremias pruffiitiugami aammattaaq Jehovamut nalunaajaasuuvoq. (Jerimia 16:21) Aammattaaq Jesus, juutiulluni nunamiikkallarami, Ataataminut Jehovamut nalunaajaasuuvoq. (Juánase 17:25, 26; sarĸúmersitat 1:5; 3:14) Taamaattumik naleqqulluarpoq, Guutip piffissarititaa nalliummat, innuttaasa taaguut Guutip nammineq aalajangersimasaa — „Jehovap Nalunaajaasui“ — taaguutigilermassuk. — Juánase 17:6, 11, 12.
Kristumiuuneraqatigiit qulaarneqartut
14. Kristumiuuneraqatigiit ukiut 70-it qaangiuttut ingerlaneranni qanoq qulaarneqarpat?
14 Ukiut 70-it kingulliit ingerlaneranni, Jehovap naalagaaffianut neriuummik nuanningaartumik oqaluussissutiginnitsillutik, Jehovap Nalunaajaasuisa silarsuarmi tamarsuarmi avoqqaarinninnerit eqqartuussutillu qarsutsinersuartut ilersillugit tusarliutigaat. Naqitikkat Bibelilersaarutaasut isertuanngitsut sakkortuumillu imallit hundredenik millionilikkuutaat siaruartersimasatik atorlugit kristumiuuneraqatigiit qulaarpaat, tassaanerarlugit upperisarsiornikkut uersartup, ’Babylon Angisuup’ sarĸúmersitat kapitaliisa 17-ianni 18-iannilu avoqqaarineqartup, ilai assuarnarnerpaat. (Takukkit quppernerit 123-161 atuakkami „Babylon den store er faldet!“ Guds rige hersker! (’Babylon angisooq uppippoq!’ Guutip naalagaaffia aallartippoq!)-mi, Vagttårnip Peqatigiiffiata naqitigaani.)
15. 1955-imi kristumiuuneraqatigiit qanoq qulaarneqarpat?
15 1955-imi Jehovap Nalunaajaasuisa atuagaaraq Kristenheden eller kristendommen — hvilken af dem er „verdens lys“? (Kristumiuuneraqatigiit imaluunniit kristumiussuseq — sorleq ’silarsuup qaamasoraa’?) millionilikkuutaat agguarpaat. Ilaat tuusintilikkuutaat kristumiuuneraqatigiit palasertaannut toqqaannartumik tunniunneqarput. Atuagaaqqamilu tassani sumik oqaluttuunneqarpat? Jeremiasip periaasiatorluinnaq allassimasoqarpoq: „Naak ajunngequterpassuaqaraluartut aningaasatigut, isummakkut sakkutooqarnikkullu siuarsaatigisimasaminnik, kristumiuuneraqatigiit ’silarsuarmut qaamasuunngillat’. Sooq? . . . Kristumiussuseq [Bibelimut naapertuuttoq] oqaluussissutiginagulu suliarinngilaat.“ Taava una apeqqutaalersinneqarpoq: „Eqqunngitsumik upperutsinik qulaarineq tapersersortaannik malersuinerua? Kristumiorpalunngitsumik ilumoortuusaarniarnerua?“
16. Nalunaajaasut kristumiuuneraqatigiinnik qulaarinerat ilumoortuusaarniarnerua? Erseqqinnerusumik nassuiaruk.
16 Akissut imaappoq: „Naagga; taamaakkaluarpammi Jesus Kristus juutinik ilumoortuusaarniarluni malersuisuusimassagaluarpoq, . . . Jehovallu pruffiitii itsarsuaq Jesusip siornagut inuusut tamarmik [Jeremias ilanngullugu] malersuisuusimassagaluarput ilumoortuusaarniartuullutillu, tassami taakkua tamarmik juutit tunussisimasut inuiaqatigiillu Guutimik nalusuusut eqqunngitsumik upperisarsiorneri qulaartaramikkik.“ Soorunami kristumiut ilumoortut ’silarsuup qaamasorissappatik’, taava anersaakkut „taarneq“ qulaartariaqarpaat. (2 Korintumiut 6:14-17) Tassa imaanngilaq inuit ataasiakkaat saassunneqartartut, aaqqissuussinerilli inunnik inussianngortitsisut saassunneqartarput. Taamaattumik Jehovap Jeremias ima peqquaa: ’Qitikkut qiteruserit taava pikillutillu oqaluffigalugillu tamanik ilinnut inassutigisannik. Annilaarutigissanngilatit . . . Sorsukkaluarunisit artussavaatsit, uanga najorakkit, oqarpoq Jehova, annaakkumaarlutillu.’ — Jerimia 1:17, 19.
Jeremiasitut suliaq naammassiartortoq
17, 18. (a) Jehovap Nalunaajaasuisa ukiuni qaninnerusuni qanoq ilillutik Jeremiasitut suliartik sulissutigiuarpaat? (b) Inuit peqqusersuitsut qanoq unnersuunneqarpat?
17 Jehovap Nalunaajaasuisa Guutip eqqartuussutai pikkunaallisissimavaat? Ullumikkut inuit allat upperisaannik isornartorsiuineq tulluanngitsutut isigineqartaraluarpoq. Taamaakkaluartorli Jehovap Nalunaajaasuisa naqitigaanni tusarliussaq kristumiuuneraqatigiinnut eqqartuussutaasoq taannaasoq saqqummiunneqartuarpoq. Assersuutigalugu, ukiuni sisamani qaangiuttuni Jehovap Nalunaajaasuisa atuagaq pâratîsime nuname nâgssáungitsumik inûsínauvutit oqaatsini 76-ini 32 millioninngorlugu naqitersimavaat. Atuakkami tassani apeqqutit ullumikkut apeqqutigineqartartut arlallit akissutissaqartinneqarput, soorlu makku: ’Inuk toqugaangat qanoq pisoqartarpa?’ ’Suna pillugu Guutip ajussuseq atuutitippaa?’ aamma ’Eqqortumik upperutsip ilisarnaatai’. Aammattaarli eqqunngitsumik upperisarsiornerup silarsuarmi tamarmi naalagaaffissua erseqqissumik mianersoqqussutigineqarpoq.
18 Kapitalit 25-anni ’Sumut atavit: Satanip silarsuaanut imaluunniit Guutip aaqqissuussinissaanut nutaamut?’-mik qulequtalimmi ima allassimavoq: ’Eqqunngitsumik upperisarsiorneq Bibelimi assersuunneqarpoq „uersartorsuar“mut, tassa arnamut akilersilluni atortittartumut, atilimmut ’Baapali [Babylon] angisooq’. . . . Naluneqanngilarlu silamiut ingerlaasiatigut upperisarsiortut naalakkersuinermut akuliuttartut, amerlasuutigut naalakkersuisut qanoq iliornissaannik naalakkertarlugit.’ Taamaammat, atuakkami tassani suna unnersuussutigineqarpa? Ima aperivoq: ’Satanip silarsuaanut ilaajumavit? Imaluunniit Guutip aaqqissuussineranut nutaamut atavit? Guutip aaqqissuussineranut nutaamut ataguvit, silarsuup matuma inui ilagissanngilatit, tassalu eqqunngitsumik upperisarsiornerinit immikkoorlutit. Peqqussut una maleruassavat: „Taassumannga [Babylonimit angisuumit] anigitsi, innuttakka.“ (sarĸúmersitat 18:4)’
19. Suna uppernarsaatigalugu ersersissinnaaviuk ullumikkut katersat Jeremiasitut ittut nipangersimanngitsut?
19 Avissaaqqusinermik eqqartuunneqarnissaanillu tusarliussaq kimittooq tamannarpiaq atuakkami Sikkerhed i verden under Fredsfyrsten (Silarsuarmi toqqissisimaarnissaq Eqqissinerup Naalagaata ataani)-mi 1986-imi naqitikkami, (oqaatsini 25-ni 6.000.000-inngorlugu naqitaasoq) erseqqissumik saqqummiunneqarpoq. Kristumiuuneraqatigiit palasertaat qulaarneqarput oqaluussinermikkut angutit inuusuttut kajumissaaramikkik sorsunnersuarmut siullermut sorsoqataanissaannut. Nangilluni allassimavoq: „Ulloq manna tikivillugu kristumiuuneraqatigiit Guutimut Qutsinnerussaartumut akeraasutut periaaseqartuarput. Guutimit sernissugaanngillat, tamannarpiarlu pissutigalugu ataavarnissaat nalorninartorujussuuvoq.“ (Takukkit quppernerit 30 aamma 31.) Ullumikkut Jeremiasitut ittut nipangersimanngillat! Naak palasit politikerillu Guutip eqqartuussutaanik tusarliussinertik unitsinniarsarigaluaraat, nalunaajaasui aalajaatsut tusarliussiuarput, aalajangersimagamik mianersoqqusinermik naammassinissaata tungaanut sulissutigiuassallugu. — Jerimia 18:18.
20. Suna pissutigalugu Jehovap Nalunaajaasuisa Jehovap inuiannut eqqartuussutai tusarliuttuassavaat?
20 Suna pissutigalugu suliassaq tamanna naammassineqartariaqarpa? Jehovap, Naalakkap uumasup qilammi nunamilu kisimi Oqartussaasup, inuiaat upperisarsiortuilu nassueqqujumaarmagit. Soorlu Jehovap Juda Jerusalemilu salloqittaasut aperisimagai, aammalu ullumikkut apeqqut tamannarpiaq kristumiuuneraqatigiinnut naleqqulluarpoq: ’„Tamakku pillugit takusassannginnerikka?“ oqarpoq Jehova. „Tarnima akiniassannginnerai inuiaat ukutut ittut?“’ Taamaattumik Jehovap Nalunaajaasuisa inuit inuiaqatigiinnit tamaneersut ornittuassavaat tusarliullugu tusarliussaq, eqqartuussutaanera pissutigalugu inunnit amerlanernit uumigisaasoq, inunnilli ikinnerusunit tusakkatut nuannersutut nuannaarutigisaasoq — tassa Guutip naalagaaffia pillugu tusagassaq nuannersoq. — Jerimia 5:9, 29; 9:9; apustilit suliait 8:4, 12.
21. Ajunaarnissarsuaq naak nalliuttussaagaluartoq, Jeremiasitut suliamut naalaarluartut nuanningaartut suut neriugisinnaavaat? (Tussiaat 37:9, 11, 18, 19, 28, 29)
21 Naak ajunaarnissamik siulittuisartutut Jeremias taaneqartaraluarluni, taamaattoq tusarliussaasa aammattaaq juutit neriuutissippaat. (Jerimia 23:5, 6; 31:16, 17) Taamaapportaaq tusarliussaq Jehovap Nalunaajaasuisa ullumikkut tusarliuttagaat. ’Annikilliornartussaq angisooq’ ungasinngitsukkut nalliuttussaq Guutillu Harmagedonimi eqqartuussinissaa oqaluussissutigisarpaat, aammattaarli oqaluttuaralugit ’qilaap nutaap nunallu nutaap’ pilluaqqussutissaat nunami maani naapertuilluarnerup pissutsillu paratiisimitut ittut atuutilerseqqitaanissaannik kinguneqarumaartut, tassanimiullu naassaanngitsumik inuussuteqalernissaat. (Matîuse 24:21, 22; sarĸúmersitat 16:16; 21:1-4) Taamaattumik piffissanngorpoq Jehovap tusarliuteqqusaa eqqartuussutaasoq naalaassallugu Jeremiasitullu suliassap pingaarutilissuup naammassiniarneqarnissaanut suleqataassalluni. — Naleqqiuguk Jerimia 38:7-13. (wD 1/4 88)
Uku eqqaamavigit?
□ Jeremiasitut Jehovap Nalunaajaasui qanoq malersorneqartarpat?
□ Suna pissutigalugu Jehovap Nalunaajaasui oqaluussiuarpat?
□ Jeremiasitut suliaq qanoq annertusarneqarpa?
□ Ungasinngitsukkut atuakkiarineqartut suut ersersippaat avoqqaarissutit taakkuusut saqqummiunneqartartut?
□ Suujunnaarsitaanissaq naak tusarliunneqartaraluartoq, peqqusersuitsut suut neriugisaraat?
[Qupp. 14-mi assiliartaq]
1931-mi ataatsimeersuarnerminni Bibelimik Atuaqqissaartartut taaguut „Jehovap Nalunaajaasui“ taaguutigilerpaat
[Qupp. 15-mi assiliartat]
Silarsuarmi tamarmi Jehovap Nalunaajaasuisa Jeremiasip maligassiaa malittarpaat