Guutip eqqartuussisunngortitaatigut tamanut naapertuilluartumik iliorneq
’Ataatammi Erneq asavaa . . . aammami Ataatap Erneq tamanut eqqartuussisunngortippaa.’ — JUÁNASE 5:20, 22.
1. Apeqqutit suut, ukiuni hundredelinni siullerni inuit eqqarsaatigisartagaat, aammattaaq uagut eqqarsaatigisariaqarpavut?
NAAPERTUILLUASSUSEQ ilinnut qanoq pingaaruteqartigaa? Piviusumik naapertuilluartumik iliorfigineqartarnissat, naapertuilluarnerullu nunarsuaq tamakkerlugu atuutilerfissaani inuunissat qulakkeerniarlugit qanoq atsigisumik ilungersorumassavit? Iluaqutigissavat apeqqutit tamakku eqqarsaatigigukkit, soorlu itsaq Grækenlandimi Athenimiut nuimasut ilaasa, angutit arnallu, eqqarsaatigisimagaat.
2, 3. (a) Paulusip tusarnaartiminut Athenimiunut allamik isumataarnissamik eqqartuinissani qanoq aallaqqaaserpaa? (b) Allamik isumataarnissamik eqqarsaat tusarnaartut taakkua suna pillugu eqqumiigisimassavaat?
2 Taakkua apustilip kristumiuusup Paulusip eqqartuusseqatigiinnut Areopagusimi katersuuttartunut tusaamasanut oqalugiaataa puiugassaanngitsoq tusarnaarpaat. Siullermik Guutip ataasiinnaap, Pinngortitsisup, tamatta inuunitsinnik qutsavigisassatta, piunera tunngavissaqarluartumik uppernarsisinniaqqaarpaa. Tunngaveqartumik eqqarsartitseriaasiata pissusissamisoortumik inerneraa Guuti taanna akisussaaffigigipput. Taamaalilluni Paulus oqarpoq: ’Ullut ilisarsinngiffiusut [soorlu inuit guutilianik pallorfiginniffigisaat] Guutip ilaginnaagallarfigigaluarpai, maannali inuit tamaasa tamaginni ittut allamik isumataaqquai.’ — apustilit suliait 17:30.
3 Allamik isumataarnissamik eqqarsaat tusarnaartunut taakkununnga tupaallannarsimassaqaaq. Sooq? Itsaq Grækerit allamik isumataarneq tassaatippaat iliuuserisimasamik oqaaserisimasamilluunniit peqqissimissutiginninneq. Soorluli oqaatsinik qinerlerfissiat ilaanni allassimasoqartoq, oqaaseq taanna ’isumaqartinneq ajorpaat ileqqussatigut tamakkiisumik allannguineq, inooriaatsimik allannguilluinnarneq, allamik isumataarneq inuup ileqquinut tamanut sunniuteqartoq’.
4. Allamik isumataarnissamik oqaatsini Paulusip qanoq tunngavissaqarluartissimavai?
4 Tamakkiisumilli allamik isumataarnissaq Paulusip tunngaveqarluartumik eqqarsartitseriaasiata pissusissamisoortumik inernerigaa paasiuminaatsuunngilaq. Inuit tamarmik Guuti inuunerminnik qutsavigisassaraat, taamaattumillu tamarmik taanna akisussaaffigaat. Taamaakkami pissusissamisuuginnarpoq eqqortuliornerussallunilu Guutip ilimagissagaa taakkua ujassagaanni, ilisariniassagaanni. Athenimiut taakkua manna tikillugu Guutip najoqqutassiaanik piumasaanillu nalusuusimagunik, taava tamakku ilinniartariaqalerpaat taavalu allamik isumataartariaqalerlutik ilikkakkatik naapertorlugit inuunialerlutik. Ilorrisimaarniaannarlutik allamik isumataarniassanngillat. Tamanna Paulusip naggasiutaanit killinnangaartumit paasineqarsinnaavoq: ’Tassa ullormi aalajangersakkamini inuit najugaat naapertuilluarluni angut taamaaqqusani kiffaralugu eqqartuukkumaaramiuk, taannalu tamanut uppernarsarpaa toqusunit makitikkamiuk.’ — apustilit suliait 17:31.
5. Tusarnaartut Paulusip oqalugiaataa qanoq qisuariarfigaat, aamma suna pillugu?
5 Versi taanna ataatsikkut ersarissuullunilu imalissuugami misissoqqissaarneqartariaqarpoq, uagut nalitsinni naapertuilluarnerup naammalluinnartup atuutilerumaarnissaanik neriulersitsigami. Oqariaatsit uku malugeriakkit: ’ullormi aalajangersakkamini’; ’inuit najugaat eqqartuukkumaaraa’; ’naapertuilluarluni’; ’angut taamaaqqusani kiffaralugu’; ’uppernarsarpaa’; ’toqusunit makitikkamiuk’. Oqaatsit kingulliit: ’toqusunit makitikkaa,’ Paulusip tusarnaartai sakkortuumik qisuariartippaat. Soorlu versinit 32-miit 34 ilanngullugu paasineqarsinnaasoq, ilaasa tamanna illaruaatigaat. Allat oqallinneq akuuffigiunnaarpaat. Ikittulli allamik isumataarput uppertunngorlutillu. Tusarnaartulli Athenimiittut amerlanersaannit uagut silatusaarnerusa, piviusumimmi naapertuilluartumik iliornissaq erinigigutsigu tamanna pisariaqarluinnarpoq. Versi 31 paasilluarniarlugu oqaaseqatigiit ’inuit najugaat eqqartuukkumaaraa’ misissoqqaariartigik. Kinaana tassani eqqartorneqartoq, suullu, ingammik naapertuilluarneq pillugu, najoqqutassiarai?
6. Nuna eqqartuukkumaarlugu ullormik aalajangersaasimasoq Taanna suut ikiortigalugit ilisarilersinnaavarput?
6 apustilit suliáinik agdlagkat 17:30-p ersersippaa Paulusip kina eqqartoraa — tassa Guuti tamanik allamik isumataaqqusisoq nammineq, inuunermik tunisiserput, Pinngortitsisoq. Soorunami pinngortitaanik qimerluuinikkut Guuti pillugu amerlasuunik ilinniarsinnaavugut. Naapertuilluarnermulli najoqqutassiai ilinniassagutsigik paasissutissaq alla sammisariaqarparput, tassa Bibeli, inunnut, soorlu Mosesimut, iliuuserisartagai pillugit oqaluttuamik aammattaaq Guutip Israelikkunnut inatsisaanik imaqartoq.
Eqqartuussineq naapertuilluassuserlu qanoq ittut?
7. Jehova naapertuilluassuserlu Mosesip qanoq nalunaajaatigai?
7 Eqqaamassagunarpat Mosesip ukiorpassuit Jehova Guuti qanittumik atassuteqarfigisarsimagaa, ima qanitsigisumik allaat Guuti oqarsimalluni ’qaninnik qarnanut Moses oqaloqatigisarlugu’. (4 Môrsase 12:8) Jehovap imminut iliuuserisartagai Mosesip ilisimavai, aammattaaq Guutip inunnut allanut inuiannullu ilivitsunut iliuuserisartagai ilisimallugit. Toqunissami siunitsiannguagut Mosesip Guuti isumalluarnartumik ima oqaluttuaraa: ’Qaarsuuvoq; piliai assuarnaapput, massa aqqutigisai tamarmik innarluissutaapput; Guutiuvoq ilumoortoq iluaassuseqanngitsoq, iluartuuvoq peqqusersuillunilu.’ — 5 Môrsase 32:4.
8. Elihup naapertuilluassuseq pillugu qanoq oqarsimanera suna pillugu malugisariaqarparput?
8 Aammattaaq Elihup, ilisimatussutsimigut siuneqarsutsimigullu tusaamasaasup, nalunaajaatai misissoriartigik. Taanna eqqarsaatigilluaqqaarnagu oqaaserisaqarneq ajorpoq. Ilaanni sapaatip-akunnera sinnerlugu issiaannarsimavoq illua-tungeriit tamarmik immikkut tunngavissiineri sivisuut tusarnaarumallugit. Nammineq misilittakkani Guutillu iliuuserisartagai tunngavigalugit Elihup Guuti pillugu qanoq isummersimava? Ima oqarsimavoq: ’Tamanna pillugu tusarniarsinga, isumatuut ukorsii: Guutimut ajornaqaaq iluaatsuliussalluni; ajugaqanngitsumut ajornaqaaq innarluttumik iliussalluni. Kisianni inuk akilersarpaa ileqqua eqqorlugu, nungullugit aqqutigisaa missiliorlugu naapitsisittarpaa. Ilumummi, Guuti iluaatsuliornavianngilaq; ajugaqanngitsup eqqartuussisissaq mumittarinngilaa.’ — Jûpe 34:10-12.
9, 10. Guutip eqqartuussisunik inuusunik aalajangersimasumik piumaffiginninnera suna pillugu tuppallersaataava? (3 Môrsase 19:15)
9 Imminut apereriarit: Guutip tassuuna oqaluttuarineqarnera tassaannginnerpa isummavut naapertorlugit eqqartuussisorerusussinnaasatta oqaluttuarineqarnera, inunnik tamanik tamarmik immikkut suliaat inooriaasiallu naapertorlugit iliorfiginnittartoq, nakerisarsiorneq ajortoq eqqartuussutissamillu allanngortitsiniarneq ajortoq? Illit eqqartuussisumut inummut sassartinneqassagaluaruit, taama pissuseqarpat eqqissiallassanngikkaluarnerpit?
10 Bibelimi Jehova taaneqarpoq ’silarsuarmut eqqartuussisoq’. (1 Môrsase 18:25) Ilaatigulli inuit eqqartuussisutut atortarpai. Eqqartuussisut Israelikkuusut sinniisini sumik piumasaqarfigai? Môrsasip agdlagaisa tatdlimait 16:19, 20-mi Guutip eqqartuussisunut najoqqutassiai atuarsinnaavavut: ’Eqqartuussisissaq mumissanngilat, inuup taannaassusia soqutigissanngilat, pajugutinillu tigusissanngilatit, pajugutip ilisimatuut isaat tappiillisittarmagit iluartut eqqartuutissutaat mumillugit. Iluarneq, iluarneq [innarluissut, NV] noqqaassutigissavat, inooqqullutit.’ Ullumikkut inuusaliat arnat naapertuilluassutsimut assersuutaasut sattaateqartinneqartarput eqqartuussinerit kinaassusersiorneq ajornissaannik isumalluuteqarneq ersersinniarlugu, Guutilli tamannaannaq killiffiginngilaa. Eqqartuussisut inuusut sinniisini inatsisaanillu unioqqutitsaalisitsisuusut nakerisarsiorneq ajornissaannik piumaffigai.
11. Naapertuilluassutsip Bibelimi eqqartugaaneranik misissuereersimalluta qanoq isummissaagut?
11 Guutip naapertuilluassutsimik isiginneriaasia pillugu tamatumuuna ilikkakkatta tamarmik Paulusip oqalugiaataata naggasiutaa attavigilluarpaat. apustilit suliáinik agdlagkat 17:31 naapertorlugu Paulus nalunaarpoq Guuti ’ullormik aalajangersaasimasoq inuit najugaat naapertuilluarluni eqqartuukkumaarlugu’. Tamannarpiaq Guutimit ilimagisinnaavarput — innarluissut, naapertuilluarneq, nakerisarsiunnginneq. Inuilli ilaasa immaqa isumakuluutigissavaat versi 31 naapertorlugu Guuti ’angummik’ inunnut tamanut eqqartuussisitassaminik toqqaasimammat. ’Angut’ taanna kinaava, aammalu Guutip naapertuilluarnermik najoqqutassiaanik eriaginartunik aalajangiussiumaarnissaa sumik qulakkeerutissaqarpa?
12, 13. Nuna eqqartuukkumaarlugu ’angut’ kina Guutip kiffarissagaa qanoq nalunngissinnaavarput?
12 apustilit suliáinik agdlagkat 17:18-imi atuarparput Paulusip ’Jesusimik makiffissamillu iivangkiiliu oqaluutigisimagaa’. Taamaattumik oqalugiarnermi naalernerani Paulus oqarmat ’Guutip inuit najugaat naapertuilluarluni angut taamaaqqusani kiffaralugu eqqartuukkumaaraa, Guutillu taanna toqusunit makitissimagaa’, Jesus Kristus pigaa tusarnaartaasa ilisimavaat.
13 Jesus nammineq oqarsimavoq Guutip eqqartuussisunngortissimagaani Guutip najoqqutassiaanik eqqortitsisoq. Juánase 5:22 naapertorlugu ima oqarsimavoq: ’Ataatap kinaluunniit eqqartuuttarinngilaa, kisianni Erneq tamanut eqqartuussisunngortippaa.’ Iliverni eqqaassutaasuniittunik makititsinissaq taareerlugulu, Jesusip oqaatsini ima ilavai: ’Isumannik qanoq-iliorsinnaanngilanga. Tusakkakka malillugit eqqartuussisaraanga, eqqartuussutigalu iluarpoq, peqqusara pinnagu aallartitsisima peqqusaa piniarakku.’ — Juánase 5:30; Tussiaat 72:2-7.
14. Jesusip qanoq iliuuseqarfigissagaatigut qanoq ilimagisinnaavarput?
14 Jesusip oqaasiisa tamakkua oqaatsillu apustilit suliáinik agdlagkat 17:31-miittut ila imminnut naapertuulluassusiat! Tassani Paulusip qularnaallisippaa Ernerup ’inuit najugaat naapertuilluarluni eqqartuukkumaaraa’. Aalajangivissimasumik naakkittaatsumillu eqqartuussineq pineqarunanngilaq, ilaa? Kisianni naapertuilluartumik eqqartuussineqarpat eqqartuussissutigisaq naakkinninnermik misiginneqatiginninnermillu nalilerneqartassaaq. Unali arajutsinaveertigu: Naak Jesus maanna qilammiikkaluarluni, qanga inuttut inuusimavoq. Taamaattumik misiginneqatigisinnaavaatigut. Eprîarinut agdlagkat 4:15, 16-imi Jesusip palasiuneruneranik allaatiginnilluni Paulusip tamanna taatsiarpaa.
15. Jesusip eqqartuussisunit inuusunit suut allaanerussutigai?
15 Eprîarinut agdlagkat 4:15, 16-imi allaaserisap atuarnerani Jesus eqqartuussisigatsigu eqqissiallannassusia takorlooriaruk: ’Qajannarsutsitsinnimmi naakkinnissinnaanngitsumik palasiuneqanngilagut [eqqartuussisoqarnatalu], kisianni tamatigut uatsitut usserneqartumik, ajorteqarnanili. Taamaattumik siooranata sassarniarta saammaassisup issiavissaarsuanut, nallittorneqaqqulluta saammaannarseqqullutalu pisariaqarfiagut ikiorneqaatissatsinnik.’ Ullumikkut eqqartuussivimmi eqqartuussisumut sassartitaalluni annilaanganarsinnaasarpoq. Kristusili eqqartuus- sisigatsigu, ’siooranata sassarsinnaavugut nallittorneqaqqulluta, saammaannarseqqulluta pisariaqarfiagullu ikiorneqaqqulluta’. Piffissaq eqqarsaatigalugu pissutissaqarluartumik aperisinnaavutit: ’Qaqugu Jesusip inuiaat naapertuilluarluni eqqartuukkumaarpai?’
Ulloq eqqartuutiffissaq — qaqugu?
16, 17. Maannakkut qilammit aqunneqartumik eqqartuussisoqarnera qanoq nalunngissinnaavarput?
16 Eqqaamajuk Paulus oqarsimasoq Guutip ’ullormi aalajangersakkamini’ eqqartuussisoq toqqakkani kiffaralugu silarsuaq eqqartuukkumaaraa. Maannangaaq, Ullup Eqqartuutiffissap tamatuma suli nalliutinngikkallarnerani, Jesusip eqqartuussineq pisariaqarluinnartoq suliaraa. Qanoq taama oqarsinnaavugut? Tigusarineqarnermi naapertuilluanngitsumillu toqusussanngortinneqarnermi siunitsiannguagut Jesusip piumaartussanik siulittuut uagut nalitsinnut tunngasoq saqqummiuppaa. Matîuse kapitali 24-mi tamanna atuarsinnaavarput. Tassani Jesusip silarsuarmi pisussat ukiunut „pissutsit aaqqissuussaanerata naalerfissaa“-nik taaneqartunut ilisarnaataajumaartussat eqqartorpai. Sorsunnerit, inuussutissaaleqinerit, nunap sajuttarneri, ajunaarnersuillu allat sorsunnersuup siulliup nalaaninngaanniilli nunarsuarmut eqquisut nalunarunnaarsippaat Jesusip siulittuutaa maannakkut eqquuttoq, ungasinngitsukkullu ’naggatissaq nalliutissasoq’. (Matîuse 24:3-14, NV) Ukiorpassuarni Jehovap Nalunaajaasuisa Bibeli tunngavigalugu tamanna eqqartortarsimavaat. Aaqqissuussaanerup naapertuilluanngitsup tamatuma ulluini kingullerni inuunitsinnut uppernarsaatinik allanittaaq paasisaqarusukkuit, taava Jehovap Nalunaajaasuisa ilaat aperiinnassavat.
17 Maannali Matîuse, kapitalit 25-ata affaa kingulleq, Jesusip ullut kingulliit pillugit siulittuutaanut ilaasoq, misissoqqissaassavarput. Matîuse 25:31, 32 uagut nalitsinnut tunngavoq: Ny Verden-nutsigaq naapertorlugu imaappoq: „Inuup Ernera naalannassutsi atisimallugu tikiukkuni, inngilillu tamaasa ilagalugit, taava issiavissaarsuarminut naalannassutsimi pianut [qilammiittumut] ingissaaq. Inuiaallu tamarsuarmik saanut katersorneqassapput, inuillu avissaartitissavai, soorlu nersutaatinik paarsisup savat savaasanit avissaartitertarai.“ Taava avissaartiterinermi, imaluunniit eqqartuussinermi, kinguneri pillugit Jesusip oqaasii atuariartigik. Versi 46 imaappoq: „Aallarumaarpullu taakku [Jesusip eqqartuussinera naapertorlugu ’savaasanut’ ilaasut] naassaanngitsumik uternaveersitaassallutik, iluartulli [„savat“] naassaanngitsumik inuussallutik.“
18. Ullumikkut eqqartuussinerup suna kingunerissavaa?
18 Allatut oqaatigalugu ulluni eqqartuutiffiusuni pingaartumik aalajangiiffiusuni inuuvugut. Inuit ullumikkut ’Guutimik ujarlersut nanisisullu’ ’savatut’ nalilerneqassapput aaqqissuussaanerullu maannakkut atuuttup naggatissaani annatsitaassallutik silarsuartaassamullu tulliuttussamut isertitaassallutik. Taava neriorsuut Pîtrusip agdlagaisa áipait 3:13-imiittoq piviusunngorumaarpoq: ’Unnersuutaa naapertorlugu ilimagisaqarpugut qilassanik nutaanik nunassamillu nutaamik iluarsuseqarfissanik.’ Tassaassaaq ’ulloq aalajangersagaq’, Paulusip apustilit suliáinik agdlagkat 17:31-mi oqaasiisa tamakkiisumik eqquuffissaat, nunap naapertuilluartumik eqqartuunneqarfissaa.
19, 20. Ullussami Eqqartuutiffiusumi kikkut eqqartuunneqassappat?
19 Ullormi Eqqartuutiffiusumi tassani eqqartuunneqartussat tassaaginnassanngillat savat assersuutaasut, tassa inuit silarsuarmut nutaassamut isertussaasutut nalilerneqareersimasut. Eqqaamassavat Jesus oqatsiareersoq Ataatami tunisimagaani eqqartuussisinnaanngortilluni, makiffissamik eqqartuisoq. Aammattaaq apustilit suliáinik agdlagkat 10:42-mi apustili Peter oqarpoq Jesus Kristus ’Guutip inuusunillu toqusunillu eqqartuussisussanngortitarigaa’.
20 Taava paasivarput ’ullormi aalajangersagaasumi’ apustilit suliáinik agdlagkat 17:31-mi eqqartugaasumi Guutip Jesus Kristus kiffaralugu ’inuit najugaannik naapertuilluarluni eqqartuussiffissaani’ aammattaaq toqusut makitinneqassasut. Guutip pissaanerata toqumut, inunnut naapertuilluanngitsuliornerit annerpaartaannut, ajugaanissaa takussallugu ila nuanningaassusissaa. Inuit ilaat, soorlu Jesus nammineq, naalakkersuisunit imaluunniit sakkutooqatigiinnit nunamut isaasimasunit naapertuilluanngitsumik toqunneqarsimapput. Allat nalaatsornikkut pisimasut, soorlu anorersuit, nunap sajunneri, ikuallattoornerit, ajunaarnersuillu taamaaqataat toqussutigisimavaat. — akugdlîssup oĸausê 9:11.
Naapertuilluanngitsuliornerit pereersut iluarsinneqassapput
21. Naapertuilluannginnerit itsaq pisimasut silarsuarmi nutaassami qanoq iluarsinneqassappat?
21 Asasatta takoqqinnissaata nuanningaassusissaa takorlooriaruk! Makittussat ilarpassui aatsaat taamanikkussaq periarfissaqalissapput ’Guuti ujassallugu nanissallugulu’, taavalu ’naassaanngitsumik inuunissamik’, „savat“ akissarsiarisassaannik, neriugisaqassallutik. Makittussat, aammattaaq pissutsit aaqqissuussaanerata naapertuilluanngitsup matuma nungunnissaani annakkumaartussat, ilagissavaat inuit innarluuteqarlutik, naapertuilluanngitsutut misigisimasaminnik, inuusimasut, soorlu iloqiaasut, tappiitsut, tusilartut oqqarluutillillu. Pissutsit taama ittut ’nunassami nutaami iluarsuseqarfiusumi’ atuunnissaat tulluassava? Jehovap Esajas atorsimavaa siulittuutinik assigiinngitsunik Ullussami Eqqartuutiffiusumi eqqortumik oqaatigalugu nuanningaartumik piviusunngorumaartussanik allattuinissamut. Ilimagisinnaasavut uku malugeriakkit: ’Taava uisitaassapput tappiitsut isaat, tusilartullu siutaat ammarneqarumaarput; taava tusiattut pissikkumaarput tuttutut, oqajuitsullu oqaat qiimmattassaaq.’ — Isaia 35:5, 6.
22. Naapertuilluassuseq eqqarsaatigalugu suna pillugu Isaia kapitali 65 taama qiimmassaataatigaa?
22 Naapertuilluanngitsuliornerimmi allat maannakkut naalliungaarnermut pissutaasartut? Isaiap agdlagai, kapitali 65, nuannaajallannaqisunik tamatumunnga akissutissarsiffiuvoq. Isaia 65:17 Pîtrusip agdlagaisa áipait 3:13-imut naleqqiukkaanni takusinnaavarput kapitalimi tassani piffissaq ’nutaanik qilaqarfissaq nutaamillu nunaqarfissaq’, pissutsit aaqqissuussaanerat naapertuilluartoq nutaaq, siumut tikkuarneqartoq. Kisiannili, eqqissinerup, aaqqiagiinnerup naapertuilluarnerullu iluaatsorpaalunnit aserorneqarnissaa qanoq pitsaalineqarsinnaassava? Isaia kapitali 65-imi versini kingusinnerulaartuni akissut eqqissiallannartoq atuarsinnaavarput.
23. Inunnut ataasiakkaanut Ulloq Eqqartuutiffissaq qanoq kinguneqarsinnaassava?
23 Ulloq Eqqartuutiffissaq tamanna ingerlatillugu Jesusip eqqartuussiutigaluni inuit tamaasa immikkut nalilerumaarpai paasiniarlugu inuunermut naassaanngitsumut naleqquttuunersut. Tamakkeratik akuerisaassapput. Guutimik ujarlernissaminnut piffissamik naammattumik, immaqa ukiunik hundredenik, piffissaqartinneqareersimallutik ilaasa ersersissavaat naapertuilluartumik iliorumanatik. Guutip naapertuilluassusia najoqqutaralugu silarsuarmi nutaassami inuuneq taakkua annaassavaat, soorlu Isaia 65:20-mit paasineqarsinnaasoq, Ny Verden-nutsigaq naapertorlugu imaattoq: „Hundredelinnik ukioqarluni perloqqusaq ajortuliortuuvoq.“ Inuunermut qinngaqqunnartutut eqqartuunneqartut ikinnerussuteqassapput. Pissutissaqarluarpugut ilimagissallugu uagut — inuillu amerlanersaasa — nuannaarutigalugu naapertuilluarneq ilinniassagipput maleruassallugulu. — Isaia 26:9.
24. Aningaasatigut naapertuilluannginneq taamanikkussaq qanoq oqaatigineqarsinnaassava?
24 Tassa imaappa qanoq ittumilluunniit, aningaasatigulluunniit, naapertuilluanngitsoqassanngitsoq? Taamatorluinnaq isumaqarpoq! Isaia 65:21-23-mi tamannarpiaq erseqqissarneqarpoq: ’Illuliorumaarput inigalugillu; viinnequtinik ikkussuiumaarput paarmaallu nerillugit. Illuliussanngillat allap inissaanik, ikkussuissanngillallu allap nerisassaanik; innuttama ullui orpiup ulluisut issammata, assammillu suliaat nungullartissavaat [tassa: atussavaat] qinikkama. Asuliinnaq erloqissanngillat, ernissanngillallu toqussutissamik; Jehovap pilluaqqusaasa kinguaat tassaammata, timiminnillu pinngortut ilagissavaat.’ Ullumikkut pissutsinit ila allaanerulluinnassusissaat! Pilluaqqusaanerup ila angingaassusissaa!
25. Guutip Eqqartuussisunngortitaata naapertuilluartuliornissaa eqqarsaatigalugu, illit sumik neriugisaqarpit, qanorlu aalajangersimavit?
25 Taamaattumik naapertuilluassutsimik ataavartumik eriniginnittut tamarmik isumalluarsinnaapput. Erniinnaq tamatuma nalliunnissaa qularnanngilaq. Maannakkut ulluni eqqartuutiffiusuni qaangiutilersuni piffissanngorsimavoq Jehovap Nalunaajaasui ilagalugit Guuti ujassallugu nanissallugulu, naassaanngitsumik pilluaqqusaanermik kinguneqassammat. (wD 15/2 89)
Apeqqutit uteqqitassat
□ Naapertuilluassuseq eqqarsaatigalugu Guutip najoqqutassiaasa suunerannut sunik nalunaajaateqarpa?
□ Ullussami Eqqartuutiffiusumi Jesus qanoq iliussava?
□ Guutip eqqartuussinera eqqarsaatigalugu suna pillugu uagut ulluvut ilungersornartutut oqaatigineqarsinnaappat?
□ Itsaq naapertuilluanngitsuliorsimanerit silarsuarmi nutaassami qanoq iluarsinneqassappat?
[Qupp. 17-mi suminngaanneernera]
Pictorial Archive (Near Eastern History) Est.