Sooq Guuti inunnit mianernarnerua?
’INUIT ersigalugit tassa napitiffimmut pissutaasoq, Jehovamulli isumalluartoq pineqarnaveersitaasarpoq.’ (ússatit 29:25) Oqaatsinik taakkuninnga ussatitoqqap siooraneq sianissutsimut toqunartuusoq — tassa inunnut siooraneq — erseqqissarpaa. Sooq inunnut siooraneq napitiffimmut assersuunneqarpa? Aap, uumasoq mikisoq, assersuutigalugu ukaleq, napitinneqaraangami sapilersarpoq. Qimaaniartaraluarpoq, napitiffimminilli naakkitaatsumik tigummineqartarporlusooq. Napititaq susinnaajunnaarluinnartarpoq.
Uagut inunnut siooralerutta ukallisut napititatut issaagut. Immaqa qanoq iliuuseqartariaqaraluarluta nalunngikkaluarparput. Immaqalu taamaaliornissarput kissaatigigaluarparput, siooranermilli saperpugut. Susinnaajunnaassaagut qanorlu iliuuseqarsinnaassanata.
Inunnut siooranikkut napitiffik
Assersuutit ilaat Bibelimeersut isumaliutigikkit paasiniarlugu siooranerup napitinnartuanut qanoq napititaajanartigisoq. Josuap nalaani angutit aqqaneq-marluk israelikkut saassussinialernissaat sioqqullugu Kana’animiut nunaat alapernaarsoqqullugu aallartitaasimapput. Alapernaarsuisut uteramik oqaluttuarput nuna naggorissuusoq pitsaallunilu, soorlu Guuti taamatorluinnaq neriorsuisimasoq. Kisianni alapernaarsuisut ilaat qulit Kana’animiut nakkuussusiat ersissutigaat. Inunnut siooranermik akeqqamik nakkuussusiat ingassaallugu oqaluttuaraat taamalillutillu israelikkut tamaasa annilaangatilerlugit. Guutip Kana’animut iseqqusinera nunamillu piginnileqqusinera israelikkut naalakkumajunnaarpaat. Tamatuma kinguneraa israelikkut angutit inersimasut tamarmik, ikittuinnaat kisimik pinnatik, puilasuitsumi ukiuni 40-ni tulliuttuni toqorarnerat. — 4 Môrsase 13:21–14:38.
Aammattaq Jonas inunnut sioorasimavoq. Illoqarfissuarmi Ninevemi eqqartuussummik oqaluussiartoqquneqarami ’pikivoq Tarsisimut qimaalersaarluni Jehovamit’. (Jûna 1:3) Sooq? Jonasip ilisimalluaramiuk Ninevemiut inuttut soqqusaatsutut nakuusertutullu tusaamasaanerat. Inunnut sioorangaarami killup tungaanut qimaavoq, Ninevimit ungasissumut. Naggataatigut suliassiissutigineqartoq akueraa, aatsaalli Jehovamit immikkut ittumik perorsaatissinneqarnermi kingorna. — Jûna 1:4, 17.
Allaat kunngit inunnut siooralersinnaasarput. Ilaanni kunngi Saulip Jehovap erseqqilluartumik peqqussutaa naalanngilluinnarpaa. Suna utoqqatsissutigalugu? ’Jehovap peqqusaa oqaatsisillu saneqqukkakkit; massa inuit ersigigakkit, nipaat naalaannarpara.’ (1 Sâmuale 15:24) Ukiut hundredellit arlallit tamatuma kingorna Jerusalem Babylonimiunit saassussineqarmat, pruffiitip aalajaatsup Jeremiasip kunngi Zedekias tunniutiinnarnissaanik siunnersorpaa, taamalilluni Jerusalemimiut aammik kuisinersuarmit annaanneqassammata. Zedekiasili akuersiumanngilaq. Sooq? Jeremiasimut nassuerpoq: ’Juutit siooragaakka Kaldæarinut saattut, taakkununnga piseqinavaannga mitaatigitillungalu.’ — Jerimia 38:19.
Apustilittaaq ersisinnaasimapput. Ullormi Jesusip toqutaaffimmini ajoqersukkani imminik qimatsiumaarnerannik uparuuppai. Peterili nakimaalluni oqarpoq: ’Naalagaq, parnaarussivimmut toqumullu aappar[eriaannaavakkit, NV].’ (Lúkarse 22:33; Matîuse 26:31, 33) Ilali kukkulluinnassusia! Nalunaaquttap-akunnialuinnanngui qaangiuttullu Peterip qunoqaluni Jesusimik najuisimanini miserratigaa allaallu ilisarisimanngilluinnarnerarlugu. Inunnut siooranerata artorsartippaa! Aap, inunnut siooraneq tassaavoq sianissutsimut toqunartoq.
Kina mianerisariaqarparput?
Qanoq ililluni inunnut siooraneq ajugaaffigineqarsinnaava? Taamaaliorsinnaavugut siooraneq ajunngitsoq immitsinni ineriartortikkutsigu, tassa apustilip Peterip ima eqqartorsimasaa: ’Guuti mianerisiuk.’ (1 Pîtruse 2:17) Johannesip takorruugaani sarĸúmersitani eqqartorneqartumi inngilip inuiaat suaarpai: ’Guuti mianerisiuk, taannalu naalannartissiuk.’ (sarĸúmersitat 14:7) Aammattaaq kunngip ilisimasup Salomonip atuartini taamatut mianerinninnissaannik kajumissaarpai oqarami: „Oqaatigisat tamarmik naggatissaat tusarlarput: Guuti ilumoortoq mianeruuk inassutaalu maleruarlugit. Tassaammat inuup naammassiniagassaa tamarmi.“ (akugdlîssup oĸausê 12:13, NV) Aap, ’Guuti mianerisussaavarput’ — Guutimik mianerinninnermik erserssitsinissaq pisussaaffigaarput.
Guutimik mianerinninneq iluaqutaaqaaq. Tussiaasiortoq erinarsorpoq: „[Jehovap] mianerinnitsiminut annaassinissaa qanippoq.“ (Tussiaat 85:10) Ussatip Bibelimeersup tamanna erseqqissarpaa: ’Jehova mianeralugu ullut ilasarput.’ (ússatit 10:27) Aap, Jehovamik mianerinninneq pitsaallunilu iluaqutaavoq. ’Kisiannimi,’ immaqa akerliliivutit, ’Jehova Guutiuvoq asannittoq. Taava suna pillugu mianerissavarput?’
Guuti asannittoq mianerisariaqarparput?
Guutimik mianerinninneq naakkinartumik susinnaajunnaarnartumillu siooranermut, inuit ilaatigut misigisartagaannut, naligitinneqarsinnaanngilaq. Kisianni naak meeqqap asaqatigiinnertik paasillugu ataatani asagaluarlugu taassumunnga mianerinninneranut naligitinneqarsinnaaneruvoq.
Guutimik mianerinninneq tassaavippoq Pinngortitsisup naapertuilluartumik, ilisimatuumik asannittumillu kinaassusiliuneranik paasinninnikkut taassuminnga ataqqinningaarneq. Guutimik mianerinninneq tassaavoq Guutip eqqartuussisuunerpaanera aammalu akissarsisitsinissamut pillaanissamullu pissaaneqarnera pissutigalugu taassuma iluarinngisaanik iliortoornissamik siooraneq ajunngitsoq. ’Guutip uumasup assaanut nalaatissalluni [nakkassalluni, NV] siooranaqaaq,’ apustili Paulus allappoq. (Eprîarit 10:31) Guutip asanninnera taamaattussaannartut isigineqarsinnaanngilaq, soorlu eqqartuussutaattaaq soqutaanngitsutut isigineqarsinnanngitsut. Taamaattumik-una Bibelimi eqqaasinneqartugut ima: ’Ilisimanermut aallaqqaataasoq tassa Jehova mianeralugu.’ — ússatit 9:10.
Eqqaamasariaqarparpulli Jehova — naak imminut naalanngitsunik pillaanissamut pissaaneqaraluarluni, taamaaliukulasimagaluarlunilu — toqutsiumatuunngimmat naakkittaatsuunaniluunniit. Ilumut Guutiuvoq asanittoq, naak ilaatigut angajoqqaatut asannittutut pissutissaqarluarluni kamalertaraluarluni. (1 Juánase 4:8) Taamaattumik taassuminnga mianerinninneq peqqinnartuuvoq. Inatsisaanik, iluaqutissatsinnut tunniunneqarsimasunik, maleruaannissatsinnut tamatuma kajumissisippaatigut. Guutip inatsisaanik maleruaaneq pilluarnermik kinguneqartarpoq, kisianni taakkuninnga unioqqutitsineq tamatigut kingunipiloqartarpoq. (Galâsiamiut 6:7, 8) Tussiaasiortoq isumassarsisitaalluni oqarpoq: „[Jehova] mianerisiuk ilissi illernartortai, taassuminngami mianerinnittut amigaateqassanngillat.“ — Tussiaat 34:10.
Kina mianeraajuk?
Inunnut siooranerup ajugaaffiginiarnerani qanoq ililluni Guutimik mianerinninnerup ikiorsinnaavaatigut? Immaqa inuit mitaatigissavaatigut imaluunniit allaat malersussavaatigut eqqortumik ilioratta, tamannalu soorunami tatineqaatigisorujussuusinnaavarput. Kisianni ataqqinnittumik Guutimik mianerinninnerup eqqortumik ingerlatissavaatigut, tamatuma nassatarissammagu Guutip iluarinngisaanik iliorusunnginneq. Aammattaaq Guutimut asanninnitta tassuma uumataanut nuannaarutaasunik iliornissatsinnut kajumissaassavaatigut. Aammattaarlu nalunnginnatsigu eqqortumik ilioraangatta Guutip akilertaraatigut suli annerusumik Guuti asalissavarput, taassumalu piumasaanik iliornissatsinnik kissaateqartilissalluta. Taamaammat Guuti oqimaaqatigiissumik isumaqarfigigutsigu inunnut siooranerput ajugaaffigisinnaassavarput.
Assersuutigalugu, inuusuttorpassuit kukkusumik iliornissaminnut tatineqartarput kammalaatimik peqataajumannginnissartik qanoq isumaqarfigissagaat siooragigamikku. Meeqqat atuartut amerlasuut pujortartarput, imigassamik ikiaroornartumillu ooqattaarisarput, kusanaatsunik oqaaseqarput imaluunniit kinguaassiuutitigut atoqateqatigiinnikkut ileqqorlunnerminnik (ilumoortuugaluarpata salluliuutaagaluarpataluunniit) pingaakujuutiginnittarlutik. Sooq? Immaqa taamaliorusuttanngikkaluarput kisianni kammalaatiminnit allaasumik iliortarunik taakkunannga qanoq isigineqarnissartik siooragigamikku. Inuusuttuugaannimi mitanneqarneq illaruaatigisassanngortitaanerlu timikkut malersugaanertut artornartigisinnaavoq.
Aamma inersimasut kukkusumik iliornissaminnut pinngitsaaliniarneqartarput. Assersuutigalugu, suliffimmi naalakkap sulisoq peqqusinnaavaa pisiniartut ilaata akiligassaanit annerusumik akiligasseqqullugu imaluunniit akileraaruserisut eqqunngitsumik nalunaarfigeqqullugit, suliffik akileraarnikinneruniassammat. Kristumiu taama peqqunneqartoq naalanngikkuni immaqa soraarsitaanissani siooragaa. Taamaalilluni inunnut siooranerup kukkusumik iliortissinnaavaa.
Tamakku pigaangata pitsaasumik Guutimik mianerinninnerup taassumalu inatsisaanik ataqqininnerup kristumiu inunnut siooranermut nakkartinngitsoortissinnaavaa. Tamanna ilutigalugu Guutimik asanninnerata taassuma inerteqqutaanik iliornaveersaartissaavaa. (ússatit 8:13) Tamatumalu saniatigut kristumiutut Guutimut uppernerata qularunnaarsissavaa nalunngeqatiginnissutsi Bibeli najoqqutaralugu perorsagaasoq maleruaruniuk qanorluunniit kinguneqassagaluarpat Guutip ikiorumaaraani. Apustili Paulusip upperneq taama ittoq ersersippaa oqarami: ’Tamaasa pissatsitsisikkut sapinngilakka.’ — Filípimiut 4:13.
Bibelimi angutinik arnanillu sualuttumik misilinneqarnerminni allaat Jehovamut ilumoortuartunik assersuuterpassuit eqqartorneqarput. ’Mitagaanerit iperartugaanerillu kalunnerillu parnaarussiviillu atorpaat; ujaqqanik milluugaapput, pilattugaapput, ussigaapput, panamik toqutaapput.’ (Eprîarit 11:36, 37) Inunnulli siooranermit ajugaaffigineqarsimanngillat. Aap, Jesusitut, kingorna ajoqersukkaminut ima oqartutut, isiginnittaaseqarput: ’Ersigissanngilasi timimik toqutsisut, tarnimilli toqutsisinnaanatik; annerusumilli ersigisiuk timimillu tarnimillu anniarfimmi [Gehennami, NV] aserortitsisinnaasoq.’ — Matîuse 10:28.
Kristumiut siulliit Jesusip unnersuussutaa tamanna, tassa Guuti inunnit mianerinerussagitsik, maleruaraangamikku „tusagassaq nuannersoq pillugu“ naalliunnerit, misilinneqarnerit malersugaanerlu tamaasa qasusuillutik atorsinnaasarpaat. (Fîlimût 13, NV) Apustili Paulus maligassaavoq malunnartoq. Korintumiunut allakkami aappaani takutippaa Guutimik mianerinninneq ikiortigalugu qanoq ililluni parnaarussivimmiinneq, unatarneqarneq, ujaqqanik milloorneqarneq, angalanermini assigiinngitsutigut naveersarneq, unnuatigut pigaarneq, perlilerneq, qilalerneq, qiiasarneq tamaqanngitsarnerlu tamaasa qasusuilluni atorsimagini. — 2 Korintumiut 11:23-27.
Guutimik mianerinninneq ikiortigalugu kristumiut ukiuni hundredelinni siullerni inuusimasut aamma Romamiut naalagaaffissuannit malersugaanerup sukannersup qasusuillutik atornissaanut nakkussatsinneqarput, naak ilatik allaat isiginnaartitsivinni nersutinut nujuartanut iginneqartaraluartut. Ukiuni akullerni kristumiut qunusuitsut upperisaminnut akerliusumut akuersiinnarumannginnamik inuit tamarmik takkuanni ikuallanneqartarsimapput. Sorsunnersuup aappaata nalaani kristumiut Guutip iluarinngisaanik iliornernissaraluamut taarsiullugu naalliukkumanerullutillu toqujumanerupput. Guutimik mianerinninneq pissaaneqartorujussuuvoq! Tamatuma pissutsini taama misilinneqarfiutigisuni kristumiut inunnut siooranermut ajugaaffiginissaannut nakkussatsissinnaasimappagit, uaguttaaq pissutsini qanoq ikkaluartuniluunniit nakkussatsinneqarsinnaassaagut!
Ullumikkut Satan Diaavulup tamaviaarluni Guutip iluarinngisaanik iliortinniartarpaatigut. Taamaattumik kristumiut ilumoortut Guutip oqaasianik aalajaatsuuniarnissaminnut Paulusitut aalajangertigisariaqarput: ’Uagulli nigortut tammarumaartut ilaginngilaatigut, uppertulli tarnimikkut annakkumaartut ilagaatigut.’ (Eprîarit 10:39) Jehovamik mianerinninneq tassaavoq nakussatsiffik piviusoq. Taamaattumik tamanna ikiortigalugu tamatta ’isumalluarluta oqarta: „[Jehovap] ikiormanga ersissanngilanga; inuit susinnaavaannga?“’ — Eprîarit 13:6. (wD 1/6 89)
[Qupp. 7-mi assiliartaq]
Guutimik mianerinninneq ikiortigalugu Paulusip tamaasa qasusuilluni atorsinnaasimavai, soorlu unatarneqarneq, parnaarussaaneq, umioqqajarnerlu. — 2 Korintumiut 11:23-27