Jehova mianeriuk aqqalu illernartoq unnersiutigiuk
’Kia mianerissannginneraatit, Jehova, aqqillu unnersiutiginagu? Kisivit illernartorsuugavit.’ — SARKÚMERSITAT 15:4.
1, 2. (a) 1991-imiilli Jehovap qanoq ililluni qilaat suppivii ammaqqatippai? (b) Ajoqersuiartortitaq inuunermini qanoq misigisaqarsimanini pissutigalugu nangaanani ima siunnersuiva: „Jehova mianerisiuk“?
JEHOVAP ’qilaap suppivii ammarsimavai pilluaatissiissutinillu killiligaanngitsunik kueraalluni’. Oqaatsit taakkua Jehovap Nalunaajaasuinut atorneqartuarsinnaasimapput. (Malaki 3:10) Assersuutigalugu, kristumiutut ataatsimooqatigiinnermut qiimasuutiginninneq tikeraani najugaqavissunilu immikkut ataatsimeersuarnernut nunarsuarmi sumi tamaani pisuni takuneqarsinnaasimavoq, siullermik São Paulomi (17.-19. augusti 1990) Buenos Airesimilu Amerika Kujallermiittuni, taavalu Manilami, Taipeimi Bangkokimilu Kangianiittuni, Budapestimi, Pragimi Zagrebimilu (16.-18. augusti 1991) Europap Kangianiittuni.
2 Nalunaajaasut aalajaattuarsimasut naapisimaarnerat tikeraanut nunanit allaneersunut assorsuaq nuannaarutaasimavoq! Assersuutigalugu, Bangkokimi Frank Dewarip — Thailandimi Naalagaaffimmik oqaluussissutiginnittartutut kisimiissimagaluartup — ukiuni 58-ini ajoqersuiartortitatut sulisimanini oqaluttuaraa. Qeqertani Manerassuarmiittunit Asia kujalleq kangilleq, allaallu Kina tikillugu oqaluussiffigisimavai. Umiungajannermit, orpippassuarni uumasunit nujuartanit, kiattuni nappaatinit, Japanimiullu naalakkersuisuinit peqqarniitsunit sakkutuujusunit navianartorsiornerit atortarsimavai. Aperineqarami ataatsimeersuartut qanoq siunnersorsinnaanerini ima akiinnarpoq: „Jehova mianerisiuk!“
3. Sooq Guutimik mianerinninnermik ersersitsisariaqarpugut?
3 „Jehova mianerisiuk!“ Mianerinninnerup peqqinnartup tamatuma uagutsinni ineriartortinnissaa assut pingaaruteqarpoq. „[Jehovamik] mianerinninneq tassa siuneqarnermut aallarniutaasoq.“ (Tussiaat 111:10) Mianerinninneq tamanna tassaanngilaq Jehovamut qununeq ingasattoq. Tassaavorli naalagaassusianik Guutillu pissusiinik ataqqinningaarneq, Guutip oqaasianik atuaqqissaarnikkut ilisimalikkanik tunngaveqartoq. Mosesip Savaaqqallu erinarsuutaat sarĸúmersitat 15:3, 4-miittoq ima nipeqarpoq: ’Angeqaat tupinnaqalutillu suliatit, Jehova Guuti ajugaqanngitsutit; iluarput ilumoorlutillu aqqutigisatit, inuiaqatigiit kunngiat-aa. Kia mianerissannginneraatit, Jehova, aqqillu unnersiutiginagu? Kisivit illernartorsuugavit.’ Pallorfiginnitsiminut ilumoorluni Jehovap ’atuakkat allanneqartippai Jehovap aqqanik ataqqinnittut Jehovamit eqqaaneqaatissaannik’, inuunermillu naassaanngitsumik akilerneqassapput. — Malaki 3:16; sarĸúmersitat 20:12, 15.
Guutimik mianerinninneq ajugaasarpoq!
4. Itsaq aniguisitaasimaneq suna Jehovamik mianerinninnissatsinnut kajumississutigisariaqarparput?
4 Israelikkut Faraop Egyptenianit animmata Mosesip ersarissumik ersersippaa Jehova kisiat mianeralugu. Israelikkut Imaq Aappalaartup Egyptenimiullu sakkutuuisa pissaaneqaqisut akornanni ajorsipput. Qanoruna iliorniassappat? „Mosesilli Israelikkut ima oqarfigai: ’Erseqinasi! Aalajaallusi [Jehovap] annaanniarlusi qanoq iliornissaa isiginnaaginnarsiuk, Egyptenimiut uku ullumi takunerisut kingorna takoqqissannginnassigit. [Jehova] illersorlusi sorsukkumaarpoq, ilissili qanoq ilioriassanngilasi.’“ Jehovap tupinnartuliorluni imaq avissaartippaa. Israelikkut imaq avissaaqqasoq akulloqqullugu ingerlareermata imaq pissusissamisut ileqqippoq. Faraop sakkutuui nungutitaapput. Inuiaat Guutimik mianerinnittut taakku annaatiitigalugit Jehovap Egyptenimiunut Guutimik ataqqinartitsinngitsunut eqqartuussutini naammassivaa. Ullumikkuttaaq Nalunaajaasumi Guutimik mianerinnittut Satanip silarsuaanit aniguisinnerisigut taakkununnga ilumuussutsini ersersikkumaarpaa. — 2 Moses 14:13, 14; Rûmamiut 15:4.
5, 6. Josuap nalaani pisimasut suut ersersippaat inuit pinnagit Jehovali mianerisariaqaripput?
5 Egyptenimit anereeramik Mosesip angutit aqqaneq-marluk nunamut neriorsuutigisaasumut alapernaarsuiartortippai. Tassani inuit angisoorsuit takuleramikkik qulit ersilerput Israelikkullu nunamut tassunga isinnginnissaannik inannialerlugit. Ilaalli marluk, Josua Kalebilu, ima oqarput: „Nuna angallavigalugu misissugarput ajunngitsorujussuuvoq. [Jehovap] nunamut tassunga isertikkumaarpaatigut imminut saammaannartissimagutta, nunataariniartigumi nuna taanna immummik tungusunnitsuummillu kuuttoq. [Jehova] akerlilersorniaqinasiuk, inuillu tassani najugaqartut ersigeqinasigit; iffiap oqummigassannguup iinissaatut ajornanngisitsigalugit nungutissinnaavavut. Illersuisuisa qimassimavaat, uagulli [Jehovap] najorpaatigut. Taamaattumik inuiaat taakku ersigeqinasigit.“ — 4 Moses 14:7-9.
6 Taamaakkaluartorli Israelikkut inunnut siooranermut nakkaannarput. Tamatuma kingunerisaanik nunamut neriorsuutigisamut isinngisaannarput. Josuakkulli Kalebilu, kinguaariit Israelikkut nutaat ilagalugit, immikkut pisinnaatitaaffittut nunamut tassunga iserput viinnissanillu uuliaqutinillu naatitsiortorlutik. Israelikkunnut katersuussimasunut naggataamik oqalunnermini Josua ima siunnersuivoq: „[Jehova] mianerissavarsi kiffartuutissallugulu uummatissigut iluunngarlusi ilumoorlusilu.“ Josuallu oqaatsini ima ilavai: „Uangali eqqarleriissortamalu [Jehova] kiffartuukkumavarput.“ (Josva 24:14, 15) Oqaatsit tamakku Guutip silarsuassaanut naapertuilluartumut ikaarnissatsinnut piareersarnitsinni ilaqutariinnut qullersaasunut allanullu Jehovamik mianerinninnissamut assut kajumissinarput!
7. Guutimik mianerinninnerup pingaaruteqassusia Davidip qanoq ililluni erseqqissarpaa?
7 Aammattaaq savanik paarsisoq inuusuttoq, David, Guutip aqqani Goliatimut unammillernermini Jehovamik mianerinninnermigut maligassiuilluarsimavoq. (1 Samuel 17:45, 47) David toqulernermini ima oqarsinnaasimavoq: „Uakkut oqaluppoq [Jehovap] anersaava, oqaasii oqqanniipput. Jaakup Guutia oqaluppoq, Israelip qaarsuata oqaluffigaanga: ’Innuttaminik naalakkersuisup naapertuilluarnikkut, siulersuisup Guutimik mianerinnilluni, assigaa ullaap qaamarnga qilammi allaaqqissumi seqernup nuinerani.’“ (2 Samuel 23:2-4) Guutimik mianerinninneq tamanna silarsuup naalakkersuisuisa akornanni atuutinngilaq, ilalu kingunera alianarmat! Jesus, ’Davidip ernera’, Guutimik mianerinnilluni nunarsuarmut naalakkersuilerpat kingunera allaanerulluinnassaaq! — Matîuse 21:9.
Jehovamik mianerinnilluni iliuuseqarneq
8. Sooq Juda Josafatip kunngiunerani ajunngitsumik ingerlasimava, tamannalu sumik ilinniarfigisinnaavarput?
8 Ukiut hundredet missaanni Davidip toqunerata kingorna Josafat Judami kunnginngorpoq. Judami teokratiimik aaqqissuusseqqippoq, nunami tamarmi eqqartuussisunik ivertitsilluni, imalu ilitsersuullugit: „Qanoq iliornisi sianigilluarniarsigit. Inuit eqqartuussissutinngilasi, [Jehovali] eqqartuussissupparsi. [Jehova] najuuttarpoq eqqartuussigaangassi. [Jehova] mianerisiuk, qanoq iliornissinnilu mianersortaritsi, [Jehovami] Guuterput naapertuilluanngitsumik iliorneq ajorpoq; inunnik assigiinngisitsineq ajorpoq . . . Kiffartuutersi unneqqarillusi uummatissigullu ilumoorluinnarlusi suliarissavarsi.“ (2 Israelikkut 19:6-9) Taamaalilluni Juda Guutimik mianerinnikkami ajunngitsumik ingerlasimavoq, soorlu ullumikkut Guutip innuttaasa nakkutilliisut naakkittartut sulinerat iluaqutigisaraat.
9, 10. Josafat Jehovamik mianerinnilluni qanoq ililluni ajugaava?
9 Judali akeraqarsimavoq. Taakkua Guutip innuttaanik aseruinissartik aalajangiusimavaat. Ammonimi, Moabimi aammalu Seirip qaqqalittaani sakkutuut iligeeqatigiiusut Judap ilaanut isaapput Jerusalemilu navianartorsiortilerlugu. Sakkutuut taakku pissaanilissuupput. Josafatip Jehova saaffigaa qinnuigalugulu ’Judamit Jerusalemimillu aggersut Jehovap naalaffiani ungalulikkap saaniitillugit’. Taava qinnutaa akillugu Jehovap anersaava Jahasielimut Levikkuusumut pivoq, taannalu ima oqarpoq: „Annilaaqinasi, sakkutoorpassuillu taakku ersigeqinasigit ilissi sorsuttussaannginnassi, Guutili sorsuttussaammat. Aqagu saassukkiartorisigit. . . . Kisianni tamatumuuna ilissi sorsuttussaassanngilasi. Angutit ilissi Judamit Jeruusalaamillu pisut uninngaannarumaarpusi isiginnaarlugulu [Jehovap] qanoq ililluni annaatissagaasi. Erseqinasi, sapiissuseeruteqinasilu. Aqagu ornikkisigit! [Jehovap] najorumaarpaasi.“ — 2 Israelikkut 20:5-17.
10 Aqaguani angutit Judamiut makiaarput. Naalallutik akeqqamik tungaannut ingerlaartillugit Josafat sioraannut sassarpoq oqarlunilu: „Judakkuususi, Jerusalaamiuususilu, tusaasinnga! [Jehova] Guutersi tatigisiuk, taava atasinnaajumaarpusi. Pruffiitii upperisigit, taava iluatsitsissaasi.“ Angutit sakkullit sioraanniillutik Jehovap tussiartartui appipput: „[Jehova] qutsavigisiuk [ilumoorluni-tunniusimanera, NV] atammat naassaanngitsumut.“ Akeqqat paatsiveerutsillugit imminnut toqorartinnerisigut Jehovap ilumoorluni-tunniusimanini ersersippaa. Judakkut inoqajuitsup tungaanut nasittarfimmut pigamik allamik takusaqanngillat taamaallaat akeqqamik timaat toqungasut sumi tamaaniittut. — 2 Israelikkut 20:20-24.
11. Siooraneq eqqarsaatigalugu silamiut Guutip innuttaanit qanoq allaaneruppat?
11 Inuiaat eqqaamiuusut „Guutimit annilaartinneqangaarput“ tupinnartuliornikkut aniguisitaaneq tamanna tusaramikku. Inuiaalli Jehovamik mianerinnillutik naalassimasut ’tamarmik eqqissipput’. (2 Israelikkut 20:29, 30) Taamatuttaaq Harmagedonimi Jehovap inuiannut eqqartuussutini naammassippagu inuiaat ’Guutimit taassumalu Eqqartuussisuutitaanit Jesus Kristusimit annilaartinneqangaassapput’, ullussamilu tamatumani Guutip kamaffiani aniguinavianngillat. — sarĸúmersitat 6:15-17.
12. Itsaq Jehovamik mianerinninneq qanoq ililluni pilluaqqusaasimava?
12 Jehovamik mianerinninneq peqqinnartoq pilluaqqussutinik kinguneqarluartarpoq. ’Noap mianerinnilluni umiarsuaq inoqutimi annaffissaat piareersarpaa.’ (Eprîarit 11:7) Kristumiullu ukiuni hundredelinni siullerni inuusut pillugit eqqartorneqarpoq ilagiit malersorneqarnermik kingorna ’eqqissilersut ineriartortillutillu, Naalagarlu mianeralugu saqissut anersaarlu illernartoq illersortigalugu amerliartorlutik,’ — soorluttaaq ullumikkut Europap Kangiani pisartoq. — apustilit suliáinik agdlagkat 9:31.
Ajunngitsoq asajuk, ajortoq uumigiuk
13. Qanoq ililluta Jehovap pilluaqqusinera misigisinnaavarput?
13 Jehova ajunngilluinnartuuvoq. Taamaammat ’Jehova mianerigaanni ajortoq uumigisassaavoq’. (Ussatit 8:13) Jesus pillugu ima allassimasoqarpoq: ’Iluarneq asavat iluaannerlu uumigalugu; tamanna pillugu Guutip, Guutivit, uuliamik tipaatsuummik peqatigisannit annermik tanippaatit.’ (Eprîarit 1:9) Uagut Jehovap pilluaqqusinissaa Jesusitulli kissaatigigutsigu ajussuseq, kanngunartuliorneq, nakuuserneq Satanillu silarsuaani makitasuumi piumatussuseq maajugisariaqarpavut. (Naleqqiuguk Ussatit 6:16-19.) Jehovap asasai asasariaqarpavut uumigisaalu uumigalugit. Jehovap iluarinngisaanik iliortoornisaarput siooragisariaqarparput. „Inuup ajortut ingalassimasarpai Guutimik mianerinninnermigut.“ — Ussatit 16:6.
14. Jesusip qanoq maligassippaatigut?
14 Jesusip tumini uagutsinnut atuaqqullugit maligassatsinnik qimatsivigisimavaatigut. ’Taanna oqagaagami oqarninngilaq, anniarami sioorasaarinngilaq, eqqartuussilluartumulli peqquaa.’ (1 Pîtruse 2:21-23) Uaguttaaq Jehova mianerigutsigu Satanip silarsuaanit assuarineqarnerpassuavut, mitallerneqarnerpassuavut malersugaanerpassuavullu nikallujuilluta atorsinnaassavavut.
15. Sooq Jehova timimik toqutsisinnaasunit ersiginerusariaqarparput, imaluunniit mianerinerusariaqarparput?
15 Matîuse 10:28-mi Jesusip ima oqaappaatigut: ’Ersigissanngilasi timimik toqutsisut, tarnimilli toqutsisinnaanatik; annerusumilli ersigisiuk timimillu tarnimillu anniarfimmi [Gehennami, NV] aserortitsisinnaasoq.’ Jehovamik mianerinnittoq allaat akeqqamit toqutaassagaluarpat toqup alianartua ataavarnavianngilaq. (Hosea 13:14, NV) Makititaanermini ima oqarsinnaassaaq: ’Toqu-aa, ajugaanerit naak? Toqu-aa, iguutit naak?’ — 1 Korintumiut 15:55.
16. Jesusip qanoq ililluni Jehovamik mianerinninnini ersersippaa naalannarsisillugulu?
16 Jesus nammineq Jehovap naapertuilluassusianik nuannarisaqartunut ajortumillu uumiginnittunut tamanut pitsaalluinnartumik maligassiusimavoq. Jesusip ajoqersukkaminut naggataarutaasumik oqaasiisigut, Juánase 16:33-mi allassimasutigut, Jehovamik mianerinnissusia erserpoq: ’Tamakkuninnga oqaluffigaassi uakkut eqqisseqqullusi; tuppalleritsili, silarsuarmut ajugaagama.’ Johannesip oqaluttuaa ima nangippoq: ’Tamakkuninnga Jesus oqalukkami isini qilammut aarlortillugit oqarpoq: „Ataataq, maanna piffissaq nalliuppoq, ernerit naalannarsisiguk, illittaaq ernernut naalannarseqqullutit, . . . Inuit uannut tunniussatit aternik nalujunnaarsippakka.“’ — Juánase 17:1-6.
Jehova mianeriuk unnersiutigalugulu
17. Jesusip maligassiaa qanoq ililluta malissinnaavarput?
17 Jesusip sapiitsumik maligassiaa uagut ullumikkut malissinnaavarput? Soorunami taamaaliorsinnaavugut, Jehovamik mianerinnikkutta! Jehovap aqqanik nuanningaartumik pissusiinillu Jesusip nalujunnaarsissimavaatigut. Jehova naalakkatut Kisimi Oqartussaasutut mianeralugu guutinit allanit tamanit, aamma kristumiuunerartut ataasiullunilu pingasuusumik upperisaannit eqqumiitsumit, qutsinnerpaasutut nersorparput. Jesusip Jehova peqqinnartumik mianeralugu kiffartuussimavaa, inunnut toqujasunut siooraneq nakutitaassutigisimanngivillugu. ’Taanna uineqarnermini nillingaarluni qullilillunilu qinnutinik kutsiuutinillu aatsigami issumunnga toqumit annaassisigisinnaasaminut, qussalanerminilu tusarneqarami.’ Jesusip iliorsimaneratut Jehova mianerisariaqarparput atugarliornitsinni naalannissarput ilinniartuaannaatigalugu — naassaanngitsussamut annaanneqarnissarput tamatigut anguniagaralugu. — Eprîarit 5:7-9.
18. Qanoq ililluta Guutimik mianerinnilluta Guuti illernartumik kiffartuussinnaavarput?
18 Kristumiunut hebriiariusunut allakkamini taakkunani kingusinnerusukkut kristumiut tanitaasut ima oqaaqqissaarpai: ’Taamaattumik naalagaaffik aalajaatsoq pigileratsigu qujalluta pisa tamatumuunalu Guuti iluarisaanik kiffartorfigalugu ittoorluta mianersorlutalu.’ Ullumikkut kiffartornermi illernartumi tamatumani ’amerlangaartut’ suleqataapput. Kiffartorneq tamanna sunaava? Jehovap ernerminik, Jesusimik, pilliutiginninnermigut annannissamik aqqutissiuussisimanermigut ajunngissutsimik pisassarinngisaraluatsinnik ersersitsisimanera nassuiareerlugu Paulus ima oqarpoq: ’Taamaattumik soraarata taassumuuna pilliutinik qujaniutinik Guuti aatsivigisigu, tamassa qarlut taassuma aqqanik nassuerutiginnittut anitaannik.’ (Eprîarit 12:28; 13:12, 15) Jehovap ajunngissusia pisassarinngisaraluarput pingaartikkutsigu taassuminnga kiffartuussinermut illernartumut periarfissavut tamaasa atorumassavavut. Ullumikkut ’amerlangaartut’ kristumiunut tanitanut sinneruttunut suleqataasutut ilumoortutut kiffartornerup tamatuma annerpaartaa suleqataaffigaat. Taakkua annassut Guutimut Kristusimullu pigitippaat, assersuutaasumik Guutip issiavissaarsuata saani qeqarlutik, ’naalaffiutaani kiffartuullugu ullukkullu unnuakkullu’. — sarĸúmersitat 7:9, 10, 15.
Jehova naassaanngitsumik naalannarsisiguk
19, 20. Siooranerit assigiinngitsut marluk suut „Jehovap ullussarsuani“ takuneqarsinnaassappat?
19 Jehovap ullussaa angingaartoq qanilliartortorujussuuvoq! „Maanna nalliutilerpoq ulloq uutsitsivittut ikumasutut ittoq. Soqqusaatsut guutiitsutullu iliortut karriiarnikutut ilissapput; ullussallu piumaartussap ikikkassavai.“ Ajunaarnersuaqarfiusussaq tamanna tassaavoq Jehovap „ullussaa pingaartoq siooranaqisorlu“. (Malaki 4: 1, 5) Tamanna ajortut uummataannut ’annilaanganangaassaaq’, ’aniguinavianngillallu’. — Jeremia 8:15; 1 Tásalûníkamiut 5:3.
20 Jehovalli innuttaasa siooraneq allatut ittoq pigaat. Inngilip ’tusagassamik nuannersumik ittuinnartumik’ tusarliussassallip nipituumik oqarluni ima kajumissaarpai: ’Guuti mianerisiuk, taannalu naalannartissiuk, eqqartuussivia nalliummat.’ (sarĸúmersitat 14:6, 7) Eqqartuussutip ikualanertut ittup tamatuma Harmagedonimi Satanip silarsuaa ikuallappagu ataqqinninnermik mianerittumik assut misigissaagut. Jehovamik mianerinninneq peqqinnartoq uummatitsinni piigassaanngitsumik ikkussimassaaq. Qanortoq taamanikkussamut ’Jehovap aqqanik torlorfiginnittut annattut’ akornanniikkisa. — Joel 3:4, 5; Rûmamiut 10:13.
21. Jehovamik mianerinninneq pilluaqqussutissanik sunik malitseqassava?
21 ’Ukiut inuuffigisassavut amerlasuut’ naassaanngitsussamut ingerlasussat nuanningaartunik pilluaqqussutissartarpassuaqassapput! (Ussatit 9:11; Tussiaat 37:9-11, 29) Taamaattumik, qilammi Naalagaaffimmik kingornussinissamik imaluunniit nunami inuunissamik neriugisaqaraluarutta, Guutimik kiffartuussinerput illernartoq Guutimik mianerinnilluta ataqqinnillutalu maanna aalluttuartigu. Aqqa illernartoq naalannarsisittuartigu. Taava qanoq pilluaqqusaassaagut? Jehovamik mianerinnittuarnissamik kajumissaarut sianisooq uummatitsigut pigiliussimagatsigu naassaanngitsumik qujamasuttuassaagut! (wD 1/1 92)
Apeqqutit uteqqiissutissat
□ „Jehovamik mianerinninneq qanoq paasisariaqarpa?
□ Itsaq Guutip innuttaasa Guutimik mianerinninnertik qanoq iluaqutigisimavaat?
□ Guutimik mianerinninnermik Jesusip qanoq maligassiuuppaatigut?
□ Jehovamik mianerinninnerput qanoq ililluta attattuartariaqarparput?
[Qupp. 8-mi assiliartaq]
Sarĸúmersitat-ni takorloorneqarput Jesusip qatanngutai ’Mosesip erinarsuutaanik’ erinarsortut, Jehovamik unnersiutiginnillutik
[Qupp. 10-mi assiliartaq]
Jofasatip sakkutuui ajugaapput Jehovamik mianerinnillutik
[Qupp. 13-mi assiliartaq]
Jehovamik mianerinnittut ullunik inuuffigisassaminnik naassaanngitsunik akissarsiaqassapput