Pinerlunniarnerpassuit sumik pissuteqarpat?
„PINERLUNNIARTARNERIT amerlanersaat tassaapput imminut iluanaartinniarluni peqquserluttuliornerit,“ naqitigaaqqami tuluit oqartussaasuinit naqitertinneqarsimasumi taama allassimasoqarpoq. Tuluit Nunaannili peqqarniisaarluni pinerlunniarnerit tassaapput „pinerlunniariaatsit annertusiartornerpaartaat“, naak inatsisinik unioqqutitsinerit tallimararterutaannarigaluaraat.
Silarsuaq tamaat eqqarsaatigalugu aamma taamaappoq. Timmisartunik tiguaanernik, sakkulisarluni ujajaanernik, pinngitsaaliilluni atoqateqarnernik aammalu peqqarniisaarluni pinerlunniarnernik allanik nalunaarutit silarsuarmi tusagassiuutitigut sammineqarajuttuupput, akerlianilli pinerlunniarnerit peqqarniisaarnertaqanngitsut arajutsineqartutut ittarlutik. Tassa illit inuttut pigisatillu navianartorsiorpusi. Soorli inuit ilaat pinerlunniartartunngortarpat?
Ussernartumik naammattuuineq tillittunngortitsisarpoq, taama oqartoqartarpoq. Taamaattumik pinerlunniarnerit amerliartorunnaarsinniaraluarlugit oqartussaasut inunnik kajumissaarisarput eqqaminni pisut alapernaaseqqullugit. Pinerlunnernilli pitsaaliiniarluni suliniarnerit taama ittut nutaanik pinerlunniartartoqalernissaanik pitsaaliisimappat? Naagga.
Pinerlunniarajuttuunermut pissutaasunik paasiniaalluni peqqissaartumik misissuisoqartarsimaqaaq. Guutip oqaasiani, Bibelimi, pinerlunniartartut eqqarsartaasiat pillugu soqutiginartumik paasissutissinneqarpugut. Tassani inuusuttunut mianersoqqussutigineqarput pilerisaarillutik ima oqartut: ’Ilagilatsigit, aammik piniarluta qoqasseeqisa asuliinnaq pinngitsoq taqissorlugu, uneriffissut ililluta uumatillugit iiumaarpavut assuarnaatsut anniveqanngitsumut samunnartutut isillugit, pequtinik erlinnartunik tamalaanik naapitsiumaarpugut, illuvut piiakkanik immerumaarpavut, immeraateqatigiumaarpatsigit, tamatta aningaasalivik ataaseq pigeqatigiissavarput.’ (ússatit 1:11-14) Aap, piumatussuseq, allat piinik pileritsaatiginninneq pigisaleritussuserlu pinerlunniarnermik kinguneqartarput.
Aammattaaq ikiaroornartunik atornerluineq imminillu pingaartippallaarneq ukiut hundredellit 20-ssaanni maani malunnaqaat. Nuannaarniutipiluillu akissaqartinneqartariaqartarput, inuit allat inuunerat peqqinnerallu ajoquserneqassagaluarpataluunniit. ’Ulluni nalorninartorsiorfiusuni’ (NV) makkunani inuit amerliartuinnartut ’isigaat ajortumut arpapput, aammik kuisiumallutik tuaviorlutik’. — 2 Timûtiuse 3:1, 3, 4; ússatit 1:16.
Oqaatsinik qinerlerfissiami pinerluttuliorneq nassuiarneqarpoq „ingammik ileqqussatigut, unioqqutitsineq sualuttoq“. Ukiut ileqqussatigut ajortunngorsimaffiusut atorpavut. Kristumiut Efesusimiittut inunnut imaattunut Paulusip mianersoqquai: ’Eqqarsaatimikkut piunngitsorsiorlutik saqisartut, taarsiorput isumamikkullu inuunermit Guutip pianit avissaarsimallutik ilumikkut nalusuugamik uummatimikkullu manngertuugamik; taakku sianigissaarupput [ileqqorinnissamik misigissuseerussimapput, NV].’ Ullumikkuttaaq mianersortariaqarpugut. — Evfisumiut 4:17-19.
Qularutissaanngilluinnarunarpoq videokkut isiginnaagassiat naalliutsitsinernik imallit, sorsunnermik unnersiutiginninneq aammalu namminissarsiorluni nuannaarniutinik noqqaaniarneq inuit pisuussuteqanngitsut ajoquserneqaatigisaannik inuppassuarnik pinerlunniarnermut saatitsisarmata. Inatsisaatsussutsimulli pissutaasut ilaat ataaseq alla mininneqartariaqanngilaq. Suna?
Tassaavoq Satan Diaavulu. Taanna kamannermigut patsisissaqarani peqqarniisaarnermik pinerlunniarnermillu, narsaannarsuup ikuallannerani innerup siaruaanneratut sukkatigaluni silarsuarmi siaruaattumik, annertusisitsivoq. (1 Juánase 5:19; sarĸúmersitat 12:12) Taassuma siunertaraa inuit tamaasa Guutimit ilumoortumit, Jehovamit, tunussitinnissaat. Naak amerlasuutigut iluatsitsisimagaluartoq taamaattoq Bibelimi siulittuutigineqarpoq Guutip ilumoortup kiffaasa assuarnaassusiat killinnavianngikkaa. Naggataatigut Satan peerneqassaaq. Kisianni tamanna pinerlunniartarnerup taamaatinneranik kinguneqassanerpa? Silarsuaq pinerlunniarfiunngitsoq atuutilerumaarpa? (wD 15/8 89)