Silarsuaq pinerlunniarfiunngitsoq ungasikkunnaarpoq!

PAASISSUTISSAASINNAASUT pinerluttut kinaassusiinik periaasiinillu qulaarisinnaasut ikiortigalugit pinerlunnerit pinerluttunik paasiniaasartunit paasiniarneqartarput. Tamatuminnga pingaarnerutitalinnik silarsuarmi sumi tamaani pinerluttulersaarutinik atuakkiortoqartarpoq. Naalli paasiniaasartup iluatsitsilluni inupiluk nanisaraluaraa, taamaattoq aatsaat pinerluttoqareerneratigut sulinera aallartittarpoq.

Pinerlunniartarnerit amerliartuinnarnerata ersersippaa pinerluttoq tigusarineqartoq ataasiugaangat pinerlunniartartunngortut arlaqartartut. Tassa naammanngilaq pinerlunnerit paasiniassallugit paasissallugillu — aammattaaq pitsaalineqartariaqarput. Inuit pinerlunniartartunngornissaat qanoq pitsaaliniarneqarsinnaava?

Pinerlunniartarneq ileqqussanut tunngasuuvoq. Assortugassaanngilaq inuarneq, pinngitsaaliilluni atoqateqarneq peqqarniitsuliornerillu allat pinerluttuliornerummata. Akileraarutitigummi peqquserlunneq? Aamma tamanna pinerluttuliorneruvoq, tassami ileqqussatigut najoqqutassat unneqqarissuunissamik piumasaannut tamanna akerliuvoq. Pinerlunniartarneq taamaatitinneqarluinnassappat iliuutsit ileqqussanik unioqqutitsinerusut tamarmik taamaatittariaqarput.

Maanna Bibelimi eqqartorneqartut pingasut ajortup sorlaanik qulaariinnaratik aammattaarli pinerlunniartarnerup qanoq ililluni taamaatitinneqarnissaanik ersersitsisut sammeriartigik.

Guutimik-mianerinninneq akerlialu sinnganeq

Tussiaasiortup Asafip oqaasii malugikkit: „Pingaarniartummi sinngagisarsimagakkit, guutiitsut eqqissinerat takugaangakku.“ (Tussiaat 73:3, NV) Aap, inuit ilaat aperisarput: Pissuserissaarneq sumik iluanaarutaasarpa? Taama aperisartut pinerlunniartartut inuulluataapilunnerat sinngagalugu inatsisinut akerliusunik iliulersarput. Inuillu ajortumik uumissuinissaannik kajumissaarnissaannut taarsiullugu pinerlunniartarneq tutsuiginartutut pissanganartutullu isikkoqalersillugu tv-kkut tusagassiuutitigullu sammineqartarpoq.

ússatit-nilli isumassarsisitaalluni allattoq ima siunnersuivoq: ’Ajortuliartut uummappit ilungersuutiginngikkiligit [sinngaginngikkiligit, NV], kisianni Jehova mianeriuaruk ullut nungullugit.’ Ajornartorsiutiviusoq tassaavoq inuit isumaat pileritussusiallu. Tamannali Guutimik mianerinnilerniarnikkut, tassa Jehovap iluarinngisaanik iliortoornissamik siooraginnilerniarnikkut, allanngortinneqarsinnaavoq, ’massa kingullissaq piumaarpat, taava asuliinnaq neriussimassanngilatit.’ — ússatit 23:17, 18.

Upperneq akerlialu piumatussuseq

Ukiumi 33-mi upernaakkut Jesus illoqarfikkut Jerikokkut ingerlaarpoq. Zakæus, Lukasip eqqartuineratut ’ilanngaaserisuusoq pisuujusorlu’, tassani najugaqarpoq. Jerikop eqqaa naggorissuugami akileraarutitigut iluanaarfiulluarnartuusimavoq, Zakæusilu nassuerpoq atorfini atornerlullugu iluanaarniartarsimalluni. Pinerluttuuninili ingerlatiinnanngilaa. — Lúkarse 19:1-8.

Zakæusip tusaramiuk Jesus aggersoq inuit taassuma eqqaanut katersuussimasut siornannukapallappoq, mikisuugamilu takusaqarluarnerusinnaajumalluni fiigequllussuarmut qaqivoq. Jesusip Zakæus takuaa aqqaqqullugulu, Jerikomiinnermini najugaqarfigiumagamiuk. Kingorna Zakæusip oqaasiisa taassuma allanngorsimanera erserpaat: ’Pigisama affaat piitsunut tunniuppakka, kimillu ilanngaanikkut innarliortitsigaluaruma sisamariarlugu taarsissavara.’ Aningaasarpassuit tamatumani pineqarput, taamatullu neriorsuinermigut Jesusimut upperluinnarnini Zakæusip ersersippaa. Isummamigut allanngorami aningaasat inatsisinik unioqqutitsilluni inunnit iluanaarutigisarsimasani utertippai, tamatumalu saniatigut taakkua pingasoriaataannik akiliilluni. Ajortuliarisimasami aaqqinneratigut, aap, sinnilimmik aaqqinneratigut, Zakæusip ilumut allamik isumataarsimanini takussaasumik uppernarsarpaa. — 2 Korintumiut 7:11.

Inuit pigisanit pingaarnerupput

Jesus Kristus unnerluutigisaasoq pillugu Romamiut nunamut naalagarsuaatitaat Pontius Pilatus ima oqarsimavoq: ’Inuk taanna patsisaasumik nassaarfiginngilara.’ (Lúkarse 23:4) Isertortukkut periaaseqarluni aningaasanik katersuinermut taarsiullugu Jesus nunami kiffartornermini asannittuulluni inunnik allanik soqutiginnittuusimavoq. ’Inuppassuit takugamigit nalligingaalerpai, paarinerlugaallutillu isumakkiigaammata savatut paarsisoqanngitsutut. Taava ajoqersukkani oqarfigai: „Katersugassat amerlaqaat, sulisussalli ikeqaat. Taamaattumik katersugassat inuat qinnuigisiuk sulisussanik katersuiffimminut aallartitseqqullugu.“’ (Matîuse 9:36-38) Ersarippoq Jesusip inuit timip piisigut erlinnartuutinit pingaarnerutissimagai. Ajoqersukkani inuppassuillu imminut ikiortissarsiorlutillu siunersiuisut isumagiumallugit allaat nammineq soqutigisani ilorrisimaarnissanilu tunulliuttarpai. (Matîuse 8:20; 14:13-16) Tamatumuuna Jesusip maligassippaatigut. — 1 Pîtruse 2:21.

Ullumikkut nunami pisuussutinik katersuinissamut taarsiullugu Jesusip tumiinik malinnillunilu tullip soqutigisaanik salliutitsisoqarsinnaava? Akissut aappiuvoq. Assersuutigalugu, Jehovap Nalunaajaasuisa 3.000.000-init amerlanerungaatsiartut sapinngisaminnik Kristusitut isumaqarniarsaripput tamannalu suliamikkut ersersinniarlugu. Kissaatit ajoqutaasut pinerlunnermik kinguneqarsinnaasut uummatiminnit ingalassimatinnissaat sulissutigiuarpaat. Ilaat siornatigut pinerluttuusimapput, Bibelimilli atuaqqissaarnerminni Guutimik asannikkiartuaarsimallutik, arlaqartullu siornatigut pinerluttuliarisimasaminnut taarsiillutik akiliisimapput. Inunnit nuannarineqarniaannarlutik taamaaliunngillat, Jehova Guutili eqqisseqatigiumallugu taamaalillutillu Jesus Kristusip pilliutaanik utertitsissutaasumik, Guutip ajunngissusianut pisassarinngisaraluatsinnut ersiutaasumik, iluaqutiginnilerniarlutik taamaaliorput. — 1 Korintumiut 2:16; 6:11; 2 Korintumiut 5:18-20.

Kristumiut taakkua tulliminnut ilumoortumik asannillutik piffissartik atortarpaat inunnut pulaartarlutik oqaluttuullugillu qanoq ililluni Guutip naalakkersuinerata ataani Paratiisimi inuusussanngortoqarsinnaasoq. Sapaatit-akunneri tamaasa Jehovap Nalunaajaasui ataatsimiittarfimminni ataatsimiittarput. Angut tillinniartartuunerminik nassuerutiginnittoq ataatsimiinnermut qaaqquneqarnerminut akuersivoq takorusullugu susoqartarnersoq. Taanna ima oqaluttuarpoq: „Tupaallattorujussuuvunga. Ilimagisaraluattut pikkunaannanilu avaanngunanngilaq. Qanilaarneq asanninnerlu taavani uannut ersersinneqartut nalunanngitsumik ilumoortuupput. Anersaamut tunngasunik pingaartitsinermik taama annertutigisumik siornatigut takusimanngisaannarpunga.“ Ataatsimiinnermut najuunnini killinneqaatigingaaramiuk ataatsimiinnernut tamanut orniguttalerpoq, tamannalu allanngornissaminut iluaqutigaa. Pinerluttuusimagaluaruit pinerluttuusimanngikkaluaruilluunniit Guutip innuttai ataatsimooqatigilerukkit malugissavat taamatorpiaq pigisanut pinnatik ilumoortumik inoqatiminnut soqutiginnilluinnartuusut. — Matîuse 22:39.

Pinerlunniartarneq nungutilluinnareersimavaat?

Jehovap Nalunaajaasui, akunnerminni pinerlunniartartoqannginnamik, imaappa naammalluinnartuusut? Naamerluinnaq! Jehovap Nalunaajaasuisa inuttulli allatut ajorti siuaasatsinnit, Adamimit, kingornussimasarput pigaat. (Rûmamiut 5:12; 1 Juánase 1:8) Soorluli silarsuaq tamakkerlugu oqaluussineratigut ajoqersuineratigullu takuneqarsinnaasoq ataasiussuseqarlutik Guutimut kiffartorput, tamannalu sakkortuumik takussutissaavoq Esajasip siulittuutaata eqquussimaneranut: „Ullussani kingullerni Jehovap illuata qaqqaa qaqqat kaarfisa qulaanni aalajangersitaajumaarpoq, . . . inuiaallu tamarmik tassunga aggiajumaarput.“ (Isaia 2:2, NV) Aap, millionillit arlaqartut Jehovamik pallorfiginninnermut qutsissisitamut aggiapput taassuma aqqutigeqqusaanik ilinniartinneqarnissartik kissaatigalugu. Taakkununnga ilanngunnikkut inuit pinerlunniarneq ajortut ilagilersinnaavatit.

Pinerlunniartarneq taamaatissava?

Eqqortumik oqaatigissagaanni pinerlunniartarnerit amerliartuinnarnerat Guutip akuliunnissaata inuillu ajortut, ilaatigut inatsisinik unioqqutitsisut, piiarneqarnissaata qanillineranut takussutissaavoq. „Ajortummi piiagaasussaapput . . . Guutiitsoq erniinnaq peeruttussaavoq, inaa takuniaraluarukku peerutereersimassaaq.“ (Tussiaat 37:9, 10) Pinerlunniartarneq erniinnaq, tassa pinerluttoq siulleq Satan Diaavulu qilersorneqarluni itinersuarmut iginneqarpat, taamaatissaaq. (sarĸúmersitat 20:1-3) Nuanneqaaq ilisimallugu saassunneqarnissamik tilliffigineqarnissamillu siooraneq erniinnaq peeruttussaasoq!

Inuimmi millionilippassuit makititaaffissami nunarsuarmi makitinneqartussat? (apustilit suliait 24:15) Toqunertik sioqqullugu pisarsimanermissut suli eqqarsartarlutillu pissusilersorpata, taava pinerlunniartarneq siaruaatipallaqqissanngila? Tamanna annilanngassutigisariaqanngilaq, Jesusimmi tillittoq makinnissaanik neriorsoramiuk ima oqarpoq: „Ilumut, ullumi oqarfigaakkit: Paratiisimeeqatigiumaarparma.“ (Lúkarse 23:43, NV) Tamatuma ersersippaa makissimasut inuunerminnik allannguisariaqassasut; taamaanngippammi silarsuassaq nutaaq paratiisiunavianngilaq.

Soorlu pinerlunniartartut uerisimasut ajornartorsiortitsinatik inuiaqatigiit akornanni inuuleqqissinnaatitaalersinneqannginnerminni iluarsarneqaqqaartariaqartartut, taamatuttaaq ilinniartitsinermik aaqqissuussaanikkut annertuukkut Guutip naalagaaffiani innuttaasut inatsisinik naalattuunissaannik ilinniartinneqassapput. (sarĸúmersitat 20:12, 13) Aammalu inuit Paratiisimi makititaasut inunnit Guutip inatsisaanut naalattunit avatangerneqarsimassapput, inuuniarnikkullu ajunngitsumik ingerlasoqassaaq. (Isaia 65:21-23) Pissaanillit naapertuilluartuussapput, ajortuliortullu iluarsivissaqanngitsut tamarmik peerneqassapput. (Isaia 32:1; 65:20) Tassa pissutissaqarluarpoq upperissallugu pinerlunniartarneq naggataatigut taamaatitinneqarumaartoq.

Naak silarsuarmi pinerlunniarfioqisumi inuugaluarluta Jehova, kiffaminik aalajaatsunik naammalluinnarlutik Paratiisimi inuunissaannik neriorsuisimasoq, tunaartarisinnaavarput. Akeqanngitsumik Bibelimik atuaqqissaaqatigiumallutit Jehovap Nalunaajaasuisa neqeroorutaat ilassiniaruk. (Juánase 17:3) Tulliani naammattoorukkit tamanna pillugu oqaloqatiginiarigit. Imaluunniit allaffeqarfiit atuagassiami matumani quppernermi 2-mi adressellit arlaannut allassinnaavutit. Misissuilersimanerit peqqissimissutiginavianngilat, tassami siunissaq pinerlunniarfiunngitsoq ungasikkunnaarpoq! (wD 15/8 89)

[Qupp. x-mi assiliartaq]

Uppernerminit kajumissisinneqarluni Zakæusip inatsisinik unioqqutitsilluni iluanaarutigisimasani taarserlugit akilerpai

[Qupp. 7-mi assiliartaq]

Ilinniartitsinermik aaqqissuussaanikkut Guutip naalagaaffiani innuttaasut inatsisinik maleruaanissaminnik ilinniartinneqassapput