„Ajoqersortigut qanoq qinussasugut“
’Ajoqersugaasa ilaata oqarfigaa: „Ajoqersortigut qanoq qinussasugut.“’ — Lúkarse 11:1.
1-3. (a) Sooq Jesusip ajoqersugai qinunermik ilinniartinneqarusuppat? (b) Suut apeqqutigisinnaavavut?
INUIT ilaat erinagissuupput. Allat inunnguutsiminnik nipilersuutinut pikkorissuupput. Erinarsortartulli nipilersortartullu inunnguutsiminnik piginnaanertik tamakkiisumik atorluassagunikku ilinniartinneqartariaqarput. Qinunertaaq eqqarsaatigalugu taama ippoq. Jesus Kristusip ajoqersugaasa nalunngilaat qinnutitik Guutip tusarnaassappagit ilinniartinneqartariaqarlutik.
2 Jesus Ataataminut qinugaangami nammineerluni taamaaliorajuppoq. Assersuutigalugu, apustilimi aqqaneq-marluk toqqannginneranni unnuaq ataaseq qinunermut atorpaa. (Lúkarse 6:12-16) Ajoqersukkanissaaq namminneq qinusarnissaannik kajumissaarpai, aammattaarli taassuma kikkut tamarmik tutsaanni qinunera taakkua tusarpaat malugaallu upperisarsiortut ilumoortuusaartut pisarnerattut inunnit takuneqarniaannarluni taamaaliunngitsoq. (Matîuse 6:5, 6) Paasinarluarpoq ajoqersukkat qinunermut ilinniartilluarneqarusummata. Ima allassimavoq: ’Pivorlu [Jesus] uniffigisamini qinulluni soraarmat ajoqersugaasa ilaata oqarfigaa: „Naalagaq, ajoqersortigut qanoq qinussasugut, soorluttaaq Johannesip ajoqersukkani ajoqersorai.“’ — Lúkarse 11:1.
3 Jesus qanoq akiva? Taassuma maligassiaa sumik ilinniarfigisinnaavarput? Qinunermillu unnersuussutaa qanoq ililluta iluaqutissarsiffigisinnaavarput?
Ilinniagassarput
4. Sooq ’kipisuitsumik qinusariaqarpugut’, tamannalu qanoq paasisariaqarpa?
4 Jesusip oqaasii qinunermillu maligassiaa annertuumik ilinniarfigisinnaavavut. Ingammik manna: Guutip ernera naammalluinnartoq aalajangersimasumik akuttunngitsumik qinusarnissaminik pisariaqartitsisimappat, taava ajoqersugai naammalluinnanngitsut Guutip unnersuussutaanik, tuppallersaataanik anersaakkullu nakussatsitsinissaanik tunaartarinnittuarnissaminnut suli pisariaqartitsinerungaarput. Taamaattumik ’kipisuitsumik qinusariaqarpugut’. (1 Tásalûníkamiut 5:17) Soorunami tamanna isumaqanngilaq ulloq naavillugu seeqqumiarluta qinujuartassasugut, imaapporli qinorpaluttumik pissuseqartuassasugut. Siuneqarsuseqartumik iliorsinnaaqqulluta Guutimillu iluarisaajuarumalluta taassuma unnersuussutai inuunitsinni sutigut tamatigut tunaartarisariaqarpavut. — Ussatit 15:24.
5. Piffissaq qinunermut atortariaqaraluagarput sunit inangerneqarsinnaava, qanorlu ililluta tamanna pinngitsoortissinnaavarput?
5 Piffissaq qinunermut atugassaraluarput ’ulluni kingullerni’ sorpassuarnit inangerneqarsinnaavoq. (2 Timûtiuse 3:1) Ulluinnarni suliarisartakkatta, suliffitta, niuernikkut suliassatta allalluunniit Ataatatsinnut qilammiusumut aalajangersimasumik akuttunngitsumik qinusarnissaraluarput akornuseqqappassuk ulluinnarni inuunitsinni isumakuluutitsinnit nanertugaavallaarsimassaagut. Taamaappat allatut ingerlalerasuartariaqarpugut, qinusanngikkuttami uppernerput nungussaaq. Suliarisartakkavut silamiorpaluttut killilersinnaavavut, imaluunniit taamaaliorsinnaanngikkutta Jehovamit unnersuunneqarnissarput qinnutigikulanerusariaqarparput. ’Qinusarnermut peqqissaartuusariaqarpugut’. — 1 Pîtruse 4:7.
6. Qinnut suna maannakkut sammissavarput, sunalu siunertaralugu?
6 Qinunermut najoqqutassatut taaneqartartumi, „Ataatarpooq“-mi, Jesusip ajoqersukkani qanoq qinusarnissaannik ilinniartippai, imaanngitsoq oqaatsinik issuaqqissaagassaannik ilinniartikkai. Lukasip Mattæusillu qinnummik tamatuminnga issuaaneri assigiilluinnanngillat, pisut assigiinngitsut marluk eqqartoramikkik. Qinnut tamanna, Jesusip ajoqersugaasut Jehovallu nalunaajaasuisut qanoq qinusarnissatsinnik assersuutaasoq, maanna sammissavarput.
Ataatarput taassumalu aqqa
7. Kikkut immikkut pisinnaatitaaffeqarpat Jehova ’Ataatamissut’ taasinnaallugu?
7 ’Ataatarput qilammiusutit.’ (Matîuse 6:9; Lúkarse 11:2) Jehova inuit Pinngortitsisigimmassuk qilammilu najugaqarmat naleqquppoq taasassallugu „Ataatarput qilammiusoq“. (1 Kunnginik allakkat 8:49; apustilit suliáinik agdlagkat 17:24, 28) Piginnittorsiutip „Ataatarput“-p atorneratigut inunnik allanittaaq Guutimut qanimut attaveqartoqarnera akueraarput. Kikkut immikkut pisinnaatitaaffeqarluinnarpat Ataataminnik taasinnaanissaanik? Ilaqutariissortaanut pallorfiginnittunut ilaasortaasut tunniulluinnarsimasut kuisimasullu kisimik. Jehova ’Ataatatsinnik’ taagaangatsigu ersersittarparput Guuti upperigipput Jesusillu pilliutaanik utertitsitsissutaasumik ilassinnilluinnarnitsigut aatsaat Guutimit saammaanneqarsinnaanerput isumaqatigigipput. — Eprîarit 4:14-16; 11:6.
8. Sooq Jehovamut qinunissarput nuannarisariaqarparput?
8 Ataatatsinnut qilammisumut qanimut attaveqartutut misigisariaqarpugut. Meeqqat ataataminnut ornigunnissaminnut qatsussineq ajortut assigalugit piffissarput Guutimut qinunermut nuannaarluta atortariaqarparput. Anersaakkut timikkullu pilluaqqussutigisartagai qujamasuutigalugit taassuma ajunngissusia qujassutigisariaqarparput. Nikallunnginnissatsinnik ikiuinissaa tatigalugu nanertuutigisatta taassumunnga tunniunnissaannut kajumittariaqarpugut. (Tussiaat 55:23) Qularutigissanngilarput aalajaakkutta naggataatigut suut tamarmik aaqqinneqarumaartut, Guutimmi isumassugaraatigut. — 1 Pîtruse 5:6, 7.
9. Guutip aqqa illernarseqqullugu qinnut sumik qinnutaava?
9 ’Aqqit illernarsili.’ (Matîuse 6:9; Lúkarse 11:2) Oqaaseq „ateq“ inummut namminermut taarsiullugu ilaannikkut atorneqartarpoq, aammalu „illernarsivaa“ isumaqarpoq „illernarsisippaa, immikkoortippaa imaluunniit illernartuutippaa“. (Naleqqiuguk sarĸúmersitat 3:4.) Iluamik oqaatigalugu Guutip aqqata illernarsinissaanik qinnut Jehovap imminik illernarsisinnissaanik qinnutaavoq. Qanoq ililluni? Atermi kanngunarsagaasimanera tamaat peerlugu. (Tussiaat 135:13) Guuti taamaaliussaaq ajussutsip peerneratigut, imminik qutsissisinnermigut namminerlu Jehovaanerminik inuiaat paasitinneratigut. (Hesekiel 36:23; 38:23) Tamatuma pinissaa erinigigutsigu Jehovallu naalannassusianik ilumoortumik ataqqinnikkutta, tamatigut oqaatsitut ukutut ataqqinnippalutsigaluta saaffigisassavarput: „Aqqit illernarsili.“
Guutip naalagaaffia piumasaalu
10. Guutip naalagaaffiata tikiunnissaanik qinnutigiginninneq qanoq isumaqarpa?
10 ’Naalagaaffiit tikiulli.’ (Matîuse 6:10; Lúkarse 11:2) Naalagaaffik tamanna Jehovap nunami qilammilu naalakkersuineraa, naalagaaffik Messiasikkoortoq qilammiittoq aqqutigalugu ingerlanneqartoq. Jesus Kristus taassumalu ilagisai ’iluartut’ tamatuminnga aqutsisuupput. (Daniel 7:13, 14, 18, 27; Jesaja 9:6, 7; 11:1-5) Guutip naalagaaffiata ’tikiunnissaanik’ qinnutiginnittarnerput qanoq paasisariaqarpa? Imaappoq Guutip naalagaaffianik akerlilersuisunik nunamiittunik tamanik akuliuffiginninnissaa qinnutigisaripput. Guutip naalagaaffiata ’naalagaaffiit nunamiittut tamaasa sequmisillugit aseroreerpagit’ nunarsuaq tamakkerluni paratiisinngortinneqassaaq. — Daniel 2:44; Lúkarse 23:43.
11. Jehovap piumasaata sumi tamarmi pinissaa kissaatigilluinnarutsigu qanoq iliortariaqarpugut?
11 ’[Piumasat] qilammisut nunamissaaq pili.’ (Matîuse 6:10) Tamanna qinnutaavoq Guutip nunamik siunertarisaminik naammassinninnissaanik, akeqqaminik nungutitsinissaa ilanngullugu. (Tussiaat 83:9-18; 135:6-10) Tamanna qinnutigigaangatsigu ersersittarparput Guutip piumasaata sumi tamarmi pinissaa erinigigipput. Tamatuma pinissaa kissaatigilluinnarutsigu sapinngisarput tamaat Jehovap piumasaanik iliortuartariaqarpugut. Taassuma piumasaa naapertorlugu inuunngikkutta Guutip piumasaata pinissaa ilumoorluta qinnutigisinnaanngilarput. Taamaattumik Guutip piumasaanut akerliusumik iliunnginnissarput qulakkeersimasariaqarparput, assersuutigalugu, uppinngitsumik ’peeraqarnaveersaarluta’ imaluunniit silamiutut ileqqoqarnaveersaarluta. (1 Korintumiut 7:39; 1 Juánase 2:15-17) Sumilluunniit nalaataqaraangatta tamatigut imminut ima aperisariaqarpugut: ’Tamatumani suna Guutip piumasaraa?’ Aap, uummaterput tamakkerlugu Guuti asagutsigu inuunitsinni sutigut tamatigut tassumannga unnersuutsittariaqarpugut. — Matîuse 22:37.
Ullormut inuutissavut
12. ’Ullumiinnaq inuutissanik’ qinuneq uagutsinnut qanoq iluaqutaava?
12 ’Inuutissatsinnik ullumi tunisigut.’ (Matîuse 6:11) Lukasip oqaluttuaani ima allassimavoq: ’[Ullormi matumani, NV] inuutissatsinnik tunisigut.’ (Lúkarse 11:3) „Ullormi matumani“ inuutissatsinnik pisariaqartunik Guuti qinnuigigaangatsigu pisariaqartitatsinnik ullormiit ullormut matusisinnaassusianik upperinninnerput nakussatsittarpoq. Israelikkut mannat ’ullormut pisariaqakkatik’ — sapaatip-akunneranuunngitsoq sivisunerusumulluunniit — kisiisa katersortussaasimavaat. (2 Moses 16:4) Pitsaanersiukkanik sinnilimmilluunniit tunineqarnissarput qinnutigisassanngilarput, ullormulli pisariaqakkavut takkukkaangata matussutissinneqarnissaat qinnutigisassallugu. Ullormuinnaq inuutissatsinnik qinusarutta piumatuunngunnginnissatsinnut iluaqutigissavarput. — 1 Korintumiut 6:9, 10.
13. (a) Ullormut inuutissanik qinugaangatta sunarpiaq ersersittarparput? (b) Naak sulerulooraluarluta pissakilliorutta qanoq isumaqartariaqarpugut?
13 Ullormut inuutissatsinnik qinugaangatta ersersittarparput Guuti pinngitsoorsinnaanagu taassumalu nerisassatsinnik, imigassatsinnik, atisassatsinnik allanillu pisariaqartunik pilersuinissaa isumalluarfigigipput. Taassuma ilaqutariissortaanut ilaasortaasutut tunniulluinnarsimasutut Ataatarput tunaaraarput. Uninngaannarlutali tupinnartuliorluni uagutsinnik isumaginninnissaa utaqqiinnanngilarput. Sulisarpugut, inuussutissanillu allanillu pisariaqartunik pissarsinissamut periarfissat ammasut atorluartarlutigik. Eqqortumilli iliorluta qinunitsinni Guuti qutsavigisarparput qularutiginagu pissarsiarisartakkavut Ataatatta qilammiusup asanninnerata, ilisimassusiata pissaaneratalu ersernerigai. (apustilit suliáinik agdlagkat 14:15-17; naleqqiuguk Lúkarse 22:19.) Eqiasuilluta sulilluarnerput pissutigalugu immaqa allaat pigissaartunngorsinnaavugut. Aammali naak sulerulooraluarluta pisariaqakkatsinnut naammaannartumik pissarsisaraluarluta qujamasullutalu naammagisimaarinnittariaqarpugut. (Filípimiut 4:12; 1 Timûtiuse 6:6-8) Inuk anersaakkut pingaartitsisoq naammaannartunik nerisaqarlunilu pilimanngitsunik atisaqartoq piisaarluni inuusumit pilluarnerungaarsinnaavoq. Pissutsit qanoq iliuuseqarfigisinnaanngisavut pissutigalugu pissakillioraluarutta nikallussanngilagut. Anersaakkut pisuujusinnaavugut. Aap, uppernikkut, neriunnikkut uummatitsigullu qujamasuffigisatsinnut qinunikkullu unnersiutigisatsinnut, Jehovamut, asanninnikkut piitsuusariaqanngilagut.
Akiitsukkatsinnik isumakkeerfiginninneq
14. Akiitsukkat suut isumakkeerfigineqarnissaat qinnutigisinnaavarput, qanorlu ililluni Guutip isumakkeerfigisinnaavaatigut?
14 ’Akiitsukkatsinnillu isumakkeerfigitigut, soorlu uaguttaaq akiitsortivut isumakkeerfigigivut.’ (Matîuse 6:12) Lukasip oqaluttuaani erserpoq ’akiitsukkat’ taakku tassaasut ajortit. (Lúkarse 11:4) Ajortip kingornussaasup tamatuma Ataatap piumasaa naammalluinnartoq naapertorlugu iliortuaannarnissatsinnik akornuserpaatigut. ’Anersaaq najortigalugu saqilerattali’ unioqqutitsinerit tamakku pissutigalugit Guutimut akiitsugaqalersimavugut — qujamasunnissamik akiitsukkamik. (Galâsiamiut 5:16-25; naleqqiuguk Rûmamiunut agdlagkat 7:21-25.) Naammalluinnanngitsuunerput Guutillu najoqqutassiaanik maannakkut eqqortitseqqissaarsinnaannginnerput pissutigalugit taamatut akiitsugaqarpugut imaluunniit ajortuliaqarpugut. Ajortittali tamakku isumakkeerfigineqarnissaat qinnutigisinnaavarput. Qujanartumillu Jesusip utertitsissutissatut pilliutaa tunngavigalugu Guutip akiitsukkatsinnik, ajortitsinnik, isumakkeerfigisinnaavaatigut. — Rûmamiut 5:8; 6:23.
15. Pisariaqartumik perorsaatissinneqarneq qanoq isigisariaqarparput?
15 Akiitsukkatsinnik, imaluunniit ajortitsinnik, Guutip isumakkeerfiginninnissaa kissaatigigutsigu isumataartariaqarpugut perorsaatissinneqarnissarlu akuerisariaqarlugu. (Ussatit 28:13; apustilit suliáinik agdlagkat 3:19) Jehovap asagamisigut kukkunivut sanngiissutivullu aaqqinniarlugit inuttut ataasiakkaatut perorsaatissinneqartariaqarnerput isumagisarpaa. (Ussatit 6:23; Eprîarit 12:4-6) Soorunami nuannersuuvoq uppernikkut ilisimassutikkullu ima inerilluarsimatigigutta allaat uummaterput Guutip inatsisaanut najoqqutassiaanullu naapertuulluinnartunngorsimalluni piaaralutalu kukkuluttortarunnaarsimalluta. Taavami paasilerutsigu piaaraluta ajortuliulaartalersimalluta? Taava ilumoorluta peqqissimisariaqarpugut ilungersorlutalu Guutimut isumakkeerfigeqqusariaqarluta. (Eprîarit 10:26-31) Unnersuunneqarnerpullu maleruartariqarparput eqqortumillu ingerlaleqqipallattariaqarluta.
16. Guutip ajortitsinnik isumakkeerfiginninnissaanik qinnuigiuarnissaa sooq pitsaava?
16 Ajortitsinnik isumakkeerfigeqqulluta akulikitsumik Guutimut qinusarnissarput iluaqutigissavarput. Taamaalilluta ajortiliunerput eqqaamajuassavarput, tamannalu maniguuttuussutigisariaqarparput. (Tussiaat 51:3, 4, 7) Ataatatsinnit qilammiusumit ’ajortitsinnik isumakkeerfigineqarnissarput iluaatsunillu sunik tamanik piiaaffigineqarnissarput’ pisariaqartipparput. (1 Juánase 1:8, 9) Aammalu ajortivut qinunitsinni eqqaasarutsigik ilungersorluta akiornissaannut iluaqutigissavarput. Taamaalilluta eqqaasinneqartuartassaagut utertitsissut Jesusillu aavata kuisap nalinga pisariaqartikkivut. — 1 Juánase 2:1, 2; sarĸúmersitat 7:9, 14.
17. Qanoq ililluta Guutimut isumakkeerfigeqqusarnerput ilakkuminartunnguutigisinnaavarput?
17 Isumakkeerfigineqarnissarput nammineq qinnutigisarutsigu inunnut allanut uagutsinnut mikisumik angisuumilluunniit akiitsugaqartunut naakkinnittuullutalu misiginneqataasuullutalu akaarinninnissarput ajornannginnerutissavarput. Lukasip oqaluttuaani ima allassimavoq: ’Ajortitsinnik isumakkeerfigitigut, uaguttaaq akiitsortivut tamaasa isumakkeerfigigatsigik.’ (Lúkarse 11:4) Tassa ’akiitsortivut [uagutsinnik ajortuliorfiginnissimasut] isumakkeerfigisimagutsigik’ aatsaat Guutimit isumakkeerfigineqarsinnaavugut. (Matîuse 6:12; Mákorse 11:25) Jesus ima ilanngussivoq: ’Inuimmi tammartarnerinik isumakkeerfigigussigik, ataatassissaaq qilammiusup isumakkeerfigissavaasi; inuilli tammartarnerinik isumakkeerfiginngikkussigik ataatassissaaq tammartarnissinnik isumakkeerfigissanngilaasi.’ (Matîuse 6:14, 15) Uagut nammineq ajortitsinnik isumakkeerfigineqarnissarput qinnutigisarutsigu inuit allat akaarisinnaasariaqarpavut isumakkeerfigisinnaasariaqarlugillu. Apustili Paulus allappoq: ’Soorlu [Jehovap, NV] isumakkeerigigaasi, taamattaaq ilissi pigitsi.’ — Kulorsamiut 3:13; Evfisumiut 4:32.
Ussernartoq ajortorlu
18. Ussernartorsiortinneqarnernut misilinneqarnernullu sooq Guuti pisuutinngisaannassavarput?
18 ’Ussernartumullu pisinnata.’ (Matîuse 6:13; Lúkarse 11:4) Imaanngilaq ajortuliornissatsinnut Jehovap ussernartorsiortittaraatigut. Bibelimi ilaannikkut oqaatigineqartarpoq Guuti arlaannut pisuusoq, eqqortumilli oqaatigalugu imaappoq arlaannik pisoqarnera ilaginnaraa imaluunniit akueriinnaraa. (Rut 1:20, 21; naleqqiuguk Nalunaajaasup oqaasii 11:5.) ’Guuti ajortumut ussertinnavianngilaq, namminerlu kinaluunniit ussertanngilaa,’ ajoqersugaq Jakob taama allappoq. (Jâko 1:13) Taamaattumik ussernartorsiortinneqaraangatta ajortumilluunniit misilinneqaraangatta Ataatarput qilammiusoq pisuutinnaveertigu, Ussiisormi uagutsinnillu Guutimut ajortuliortitsiniarsarisoq tassaavoq Satan. — Matîuse 4:3; 1 Tásalûníkamiut 3:5.
19. Ussernartorsiorfissat eqqarsaatigalugit qanoq qinusinnaavugut?
19 Ima qinugaangatta: ’Ussernartumut pisinnata,’ eqqortumik oqaatigalugu Jehovamut qinnutigisarparput ussernartorsiortinneqaraangatta imaluunniit Guutimut naalanngitsinniarneqaraangatta nakkaannarnissarput akuerissanngikkaa. Artukkatsinnik ussernartorsiortinneqaqqunata Ataatatsinnit siulersorneqarnissarput qinnutigisinnaavarput. Tamanna pillugu Paulus allappoq: ’Allamik usserneqanngisaannarpusi kisianni inuit atortagaannik; Guutili ilumoorpoq; taassuma artukkassinnik ussersinnavianngilaasi, kisianni aniguinissaq ussernartumut aappiullugu pinngortissavaa ilissinnut artornarunnaarsillugu.’ (1 Korintumiut 10:13) Piginnaasavut qaangerlugit ussernartorsiortinneqannginniassagatta Jehovap siulersuinissaa navianartorsiuleruttalu aniguiffissaqartitsinissaa qinnutigisinnaavarput. Diaavulup, timitta ajortiliusup saangiissutittaluunniit allat ussernartorsiortissinnaavaatigut, artorsartitaannginniassagattalu Ataatatta asannittup siulersorsinnaavaatigut.
20. Sooq ’ajortumit’ annaanneqarnissarput qinnutigissavarput?
20 ’Ajortumilli annaatsigut.’ (Matîuse 6:13) Satanip, ’ajortup’, artorsartitsinissaralua Guutip akornusersinnaavaa. (2 Pîtruse 2:9) Diaavulumit aniguisitaanissamik pisariaqartitsinerput ullumikkut aatsaat taama atsigilersimavoq, ’piffissakissutsi nalunnginnamiuk kamattorsuummat’. (sarĸúmersitat 12:12) Satanip pilersaarutai nalunngilavut, aammattaarli taassuma sanngiissutivut nalunngilai. Taamaattumik pingaaruteqarpoq akeqqap ’løvitut kukiinit’ Jehovamit annaanneqarnissatta qinnutigisarnissaa. (2 Korintumiut 2:11; 1 Pîtruse 5:8, 9; naleqqiuguk Tussiaat 141:8, 9.) Assersuutigalugu, katikkusuttoq Satanip pilersaarutaanut nakkannginniassagami silamiumillu ilisarisimasartaarnissaminut ussernartorsiunnginniassagami Guutimut ikioqqulluni qinusinnaavoq; angutaagaanni arnamik arnaagaannilu angummik silamiumik ilisarisimasartaarneq kanngunartuliornermik kinguneqarsinnaavoq imaluunniit uppinngitsumik aappaqalernermik, Guutimut naalanngitsuliornerusumik, kinguneqarsinnaavoq. (5 Moses 7:3, 4; 1 Korintumiut 7:39) Pisuussutit pingaartippallaarpavut? Taamaappat taava unneqqaserluttumik iliornissamut aningaasannanniarnissamullu ussernartorsiornissaq akiorniarlugu qinunikkut ikioqqusinnaavugut. Jehovamut attaveqarnerput ilungersorluni aserorniarlugu Satanip suut ussernartuusinnaasut tamarluinnaasa atorpai. Taamaattumik Ataatarput qilammiusoq, naapertuilluartuliorumasumik ussernartorsiortinneqartumik ilaginnaanngisaannartoq, ajortumilli annaassisartoq qinnuigiuartariaqarparput.
Upperneq neriunnerlu qinunerup nakussatsittarpai
21. Guutip naalagaaffia tikiuteqqullugu qinusarnivut qanoq iluaqutigisimavavut?
21 Ataatatta qilammiusup, uagutsinnik ajortumit annaassisup, pilluaqqungaarnissarput kissaatigaa. Soorli taama sivisutigisumik innuttami asasami qinnutaat manna tusarnaaginnarpaa: ’Naalagaaffiit tikiulli’? Miserratigisariaqanngilarput Guutip naalagaaffianik eriniginninnerput nersuinerpullu tikiunnissaanik qinnutiginnittarnitta ukiut ingerlaneranni annertusisissimammagu. Naalagaaffiup qilammiittup tamatuma iluaqutissaasup qanoq pisariaqartitsigineranik qinnutip tamatuma eqqaasittuarsimavaatigut. Taamaalilluta Guutip naalakkersuinerata ataani inuunissatsinnik neriuuterput attattuarparput. — sarĸúmersitat 21:1-5.
22. Ataatatsinnut qilammiusumut, Jehovamut, qinusarnerput qanoq isigiuartariaqarparput?
22 Qularutissaanngilaq Jehovamut uppernerput qinnutip nakussatsittarmagu. Qinnutivut akigaangagit taassumunnga qaninnerulersarpugut. Taamaattumik ullut tamaasa taassumunnga qujaniarfiginninnerput, unnersiutiginninnerput qinusarnerpullu qatsunnaveertigik. Ajoqersukkami qinnutaannut matumunnga Jesusip akissutaa qujamasuutigisigu: ’Naalagaq, ajoqersortigut qanoq qinussasugut.’ (wD 15/5 90)
Eqqaamavigit?
□ Qinunermut atatillugu Jesusip oqaasii maligassiaalu sunik ilinniarfigisinnaavavut?
□ Ataatatsinnut qilammiusumut taassumalu aqqanut atatillugu suut qinnutigisariaqarpavut?
□ Guutip naalagaaffianik tikiuteqqusilluni piumasaanillu peqqusilluni qinnutit qanoq paasisariaqarpat?
□ Ullormut inuutissat qinnutigigaangatsigik suna qinnutigisarparput?
□ Ajortitta isumakkeerfigineqarnissaannik qinussagutta suna pisariaqarpa?
□ Ussernartorsiortinneqarnermi ikiorneqarnissamik Satanimillu, ajortumit, aniguisinneqarnissamik qinunissaq sooq taama pingaaruteqartigaa?
[Qupp. 28-mi assiliartaq]
Qinunermik ilinniartinneqarnissaminnik Jesus ajoqersugaasa qinnuigaat. Nalunngiliuk akissutaa qanoq ililluta iluaqutigisinnaagipput?