Jiisusip sumik ilinniartikkaatigut

Qinnutit Guutimit tusarneqartartut pillugit

Jiisusi Jehovamut qinuniaraangami, amerlanertigut kisimiiffigisinnaasaminukartarpoq, ajoqersukkanilu kajumissaarpai taamaaliortaqqullugit. Biibilimi ima allassimavoq: “Jiisusi uninngavigisamini qinulluni naammassimmat ajoqersugaasa ilaata oqarfigaa: ‘Naalagaq, ajoqersortigut qanoq qinusassasugut.’ . . . Oqarfigaalu: ‘Qinugaangassi ima oqartassaasi: Ataataq! Aqqit illernartitaali.’” (Lukasi 5:16; 11:1, 2) Taamatut oqarluni Jiisusip ersersippaa taamaallaat Ataataminut Jehovamut qinusoqartassasoq. Taanna kisiat Pinngortitsisigaarput ‘qinnutitsinnik tusartartoq’. — Tussiaat 65:3.

Qinnutit tamaasa Guutip iluarai?

Guutip qinnutit alanngaarlugit uteqattaarneqartut iluarinngilai. Jiisusi ima oqarpoq: ‘Qinusaraangassi Guutimik nalusutut iliortassanngilasi oqaaserpassualiorlusi [oqaatsisi uteqattaartassanngilasi, NV].’ (Matthæusi 6:7) Ataatatsinnut qilammiusumut oqalukkaangatta oqaatsivut qamannga pisuusariaqarput. Ilaanni Jiisusip ajoqersukkaminut erseqqissarpaa ajortuliortup ilumoorluni allanngorusuttup qinnutai, angutip pingaarniartup upperisarsiornermi ileqqutoqqanik malinneqqissaartup qinnutaanit Guutimut akuersaarnarnerusut. (Lukasi 18:10-14) Guutip qinnutivut tusassappagit maniguulluta oqaasii malillugit iliortariaqarpugut. Allaat Jiisusi ima oqarpoq: ‘Ataatap uannut ajoqersuutaa malillugu oqaluppunga. Tamatigut iluarisaanik iliortarpunga.’ (Johannesi 8:28, 29) Qinunermini ima oqarpoq: “Uanga piumasara pinnani illit piumasat pili.” — Lukasi 22:42.

Suut qinnutigisariaqarpavut?

Guutip aqqa mitaatigineqarlunilu asissorneqarmat Jiisusi ima oqarpoq: “Taamaattumik ilissi ima qinussaasi: Ataatarput qilanniittutit! Aqqit illernartitaali, naalagaaffiit tikiulli, piumasat qilammisut nunamissaaq pili.” (Matthæusi 6:9, 10) Guutip naalagaaffini aqqutigalugu piumasani qilammi nunamilu naammassisussaammagit Guutip naalagaaffiata tikiunnissaa qinnutigisariaqarparput. Jiisusi oqarpoq qinusinnaasugut ‘inuussutissatsinnik ullut tamaasa tunisaqqulluta’. Aamma suliffimmut, ineqarnermut, atisanut, peqqinnermut allanullu atatillugu Jehova qinnuigisinnaavarput. Aammattaaq Jiisusi oqarpoq isumakkeerfigeqqulluta Guuti qinnuigisariaqaripput. — Lukasi 11:3, 4.

Allanik qinnussisussaavugut?

Jiisusi allanik qinnussisarpoq. Biibilimi ima allassimavoq: “Meerannguit Jiisusimukaappaat assamminik pateqqullugit qinnuteqqullugillu.” (Matthæusi 19:13) Jiisusi apustilimut Petrusimut ima oqarpoq: ‘Uanga qinnuppakkit uppersutsit soraaqqunagu.’ (Lukasi 22:32) Jiisusip ajoqersukkani kajumissaarpai allanik qinnusseqqullugit, allaat malersuisunik ajuallatsitsisimasunillu. — Matthæusi 5:44; Lukasi 6:28.

Sooq qasusuilluta qinusariaqarpugut?

Jiisusip qinunissani piffissaqarfigisarpaa ajoqersukkanilu “qasusuilluni qinuttuinnariaqarnermik” kajumissaarpai. (Lukasi 18:1) Jehovap kajumissaarpaatigut eqqarsaatigisatta imminut oqaluttariuarnerisigut imminik tatiginninnitsinnik ersersitseqqulluta. Jiisusi ima oqarpoq: “Qinujuaannaritsi, tunineqassaasi taava.” (NV) Imaanngilarli Jehova nangaasoq imminik ataatatut qilammiusutut ataqqinnillutillu asannittut qinnutaasa akinissaannut. Jiisusi ima oqarpoq: “[Ilissi] ajortuususi qitornasi tunissutinik ajunngitsunik tunisinnaagassigit, taava qularnannginnerungaarpoq Ataatap qilammiittup imminut qinusut Anersaamik Illernartumik tuniumaarai.” — Lukasi 11:5-13. (wp09 02/01-E)

Atuakkami Hvad er det Bibelen virkelig lærer?a-imi kapitali 17-imi amerlanerusunik paasissutissaqarpoq

[Quppernerup ataani ilanngussaq]