Jiisusimut qinusassaagut?

ILISIMATUUP inuusuttut 800-nit amerlanerusut upperisarsioqatigiinnit assigiinngitsuneersut Jiisusip qinnutinik akisisarneranik upperinninnersut immersuisitsinikkut apersorpai. 60 procentinit amerlanerusut tamanna upperilluinnarnerarpaat. Ataatsilli ateq Jiisusi titariarlugu “Guuti” allassimavaa.

Illimmi, qanoq isumaqarpit? Jiisusimut imaluunniit Guutimut qinusassaagut?a Tamanna akissutissarsiumallugu Jiisusip ajoqersukkami qanoq qinusarnissaannik ilinniartinnerai sammeriartigu.

JIISUSIP ILINNIARTITSINERA NAAPERTORLUGU KIMUT QINUSASSAAGUT?

Jiisusip kimut qinusassanersugut ilinniartitsissutigalugulu maligassippaatigut.

ILINNIARTITSINERA: Ajoqersukkami ilaata ima oqarfigimmani: “Naalagaq, ajoqersortigut qanoq qinusassasugut,” Jiisusi ima oqarpoq: “Qinugaangassi ima oqartassaasi: Ataataq!” (Lukasi 11:1, 2) Aamma qaqqami oqaluutsimini ilisimaneqarluartumi tusarnaartuni qinusarnissaannik kajumissaarpai. Ima oqarpoq: ‘Ataatannut qinugit.’ Aamma tatiginneqqullugit ima oqarfigai: “[Ataatassi] pisariaqakkasi ilisimareerpai suliluunniit qinnuiginngikkissinni.” (Matthæusi 6:6, 8) Inuttut inuunermini unnummi kingullermi Jiisusip ajoqersukkani ima oqarfigai: “Ataataq uanga atikkut sumik qinnuigigussiuk qinnutigisassinnik tunissavaasi.” (Johannesi 16:23) Jiisusip ilinniartippaatigut Ataataminut uagullu Ataatatsinnut, Jehovamut Guutimut, qinusassasugut. — Johannesi 20:17.

MALIGASSIAA: Qinunermut tunngatillugu ilinniartitsissutigisaminut naapertuuttumik Jiisusi nammineq ima qinuvoq: “Unnersiutigaakkit Ataataq qilaap nunallu Naalagaat.” (Lukasi 10:21) Ilaanni “Jiisusi aarlorpoq oqarlunilu: ‘Ataataq, qutsavigaakkit tusaramma.’” (Johannesi 11:41) Toqulerlunilu ima qinuvoq: “Ataataq, anersaara assannut tunniuppara.” (Lukasi 23:46) Jiisusip ‘qilaap nunallu Naalagaannut’ qinusarnermigut inuit tamaasa paatsuugassaanngitsumik maligassippai. (Matthæusi 11:25; 26:41, 42; 1 Johannesi 2:6) Tamanna Jiisusip ajoqersugaasa siulliit taamatut paasivaat?

KRISTUMIUT SIULLIIT KIMUT QINUSARPAT?

Jiisusip qilammut uternerata kingorna sapaatit-akunnialui qaangiuttut taassuma ajoqersugai akerlilersuisunit sioorasaarneqarput. (Apustilit Suliaat 4:18) Soorunami ikioqqullutik qinupput — kimulli qinuppat? “Tamarmik ataatsikkut nillerput Guutimullu qinullutik” taassuma ‘kiffaata illernartup Jiisusip aqqagut’ ikiortuaqqullutik. (Apustilit Suliaat 4:24, 30) Tassa ajoqersukkat Jiisusip qinunermut tunngatillugu ilinniartitsinera maleruarpaat. Guutimut, Jiisusimuunngitsoq, qinusarput.

Ukiut arlallit tamatuma kingorna apustilip Paulusip uppeqatinilu qanoq qinusarnerlutik allaatigaa. Kristumioqatiminut ima allappoq: “Guuti, Naalakkatta Jiisusi-Kristusip Ataataa tamatigut qutsavigisarparput qinnuttaraangassi.” (Kolossemiut 1:3) Aamma ima kajumissaarpai: “[Tamatigut] suut tamaasa pillugit Guuti Ataataq qujaniarfigisarsiuk Naalakkatta Jiisusi-Kristusip aqqani.” (Efesosimiut 5:20) Oqaatsinit taakkunannga erserpoq Paulusip allaffigisani ‘suut tamaasa pillugit Guutimut Ataatamut’ — soorunami Jiisusip aqqani — ‘qinunikkut qujasaqqullugit’ kajumissaarai. — Kolossemiut 3:17.

Kristumiut siulliit iliortarnerattut Jiisusimik asanninnerput ersersissinnaavarput taassuma qinuneq pillugu maleruaqqusaanik maleruaanikkut. (Johannesi 14:15) Ataatatsinnuinnaq qilammiusumut qinusarutta tussiaasiortutut qularnata ima oqarsinnaassaagut: “Naalagaq asavara tusarmagu kimigiisernera. Siutini uannut manivaa torlorfigiganni.”b — Tussiaat 116:1, 2.