Qanoq ililluni upperisarsiornermit ilumuunngitsumit aniguisoqarsinnaasoq
’„Taamaattumik akornannit anigitsi,“ . . . oqarpoq Jehova, „mingunnartorlu attoqinasiuk; taava ilassiumaarpassi.“’ — 2 KORINTUMIUT 6:17.
1. Satanip Jesus sunik taartigeeqatigiumagaluarpaa, Satanillu taamatut neqerooruteqarnera sunik marlunnik ilikkarfigaarput?
’MAKKU tamaasa ilinnut tunniukkumaarpakka, nunamut pallorfigigumma.’ Naak oqaatsit taakku ilumuunngitsumik upperisarsiulerneq ukiunik tuusintilikkuutaanik kingoqqullugu oqaatigineqarsimagaluartut, kia upperisarsiornermut ilumuunngitsumut tunuliaqutaaneranut sumillu siunertaqarneranut paasissutigisinnaavavut. Ukiup 29-p u.n.k. naalernerani Diaavulup pallorfigineqarnissaminut taartitut silarsuarmi naalagaaffiit tamaasa Jesusimut neqeroorutigigaluarsimavai. Pisimasup tamatuma marlunnik paasitippaatigut: silarsuup matuma naalagaaffii Satanip pigigai piumasaminullu tunniussinnaagai, aammalu upperisarsiorneq ilumuunngitsoq allatut ajornartumik tassaasoq Diaavulumik pallorfiginninneq. — Matîuse 4:8, 9.
2. Matîuse 4:10-mi Jesusip oqaasii sumik ilinniarfigaavut?
2 Jesusip akissummini upperisarsiorneq ilumuunngitsoq tunuartiinnanngilaa, aammattaarli takutippaa upperisarsiorneq ilumoortoq sumik ilaqartoq. Ima oqarpoq: ’Nigorit, Sataniaa! Allassimammat: „Jehova Guutit pallorfigissavat kiffartuullugulu taanna kisiat.“’ (Matîuse 4:10) Tassa upperisarsiorneq ilumoortoq tassaavoq Guutimik ilumoortutuamik, Jehovamik, pallorfiginninneq. Tamatumunnga ilaapput upperneq naalannerlu, Jehovap piumasaanik iliorluni.
Upperisarsiornerup ilumuunngitsup pilernera
3. (a) Qanga qanorlu ililluni upperisarsiorneq ilumuunngitsoq nunarsuarmi pilerpa? (b) Upperisarsiornikkut allatut isumalinnik akaarinninnginneq qanga aallartippa, upperisarsiornikkullu malersuineq taamanimiilli qanoq ililluni ingerlaannarsimava?
3 Inuit siulliit Guutimut naalanngimmata suullu ajunngitsuuneranik suullu ajortuuneranik namminneq aalajangiinissaminnik pulateriaarsuup siunnersuutaanut akuersimmata upperisarsiorneq ilumuunngitsoq nunarsuarmi aallartippoq. (1 Moses 3:5) Taamaalillutik Jehovap kisimi oqartussaviunera tunuartippaat pallorfiginninnerlu ilumoortoq, upperisarsiorneq ilumoortoq, qimallugu. Inuit taakku siulliullutik ’Guutip sallusuissusia sallunermik taarserpaat, pinngortitarlu ataqqillugulu kiffartuuppaat Pinngortitsisumit pingaarnerutillugu, taanna unnersiutigisassaavoq naassaanngitsumik. Amen.’ (Rûmamiut 1:25) Pinngortitaq taanna nalullugu pallorfigiligaat allaanani tassaavoq Satan Diaavulu, ’pulateriaarsutoqaq’. (sarĸúmersitat 12:9) Ernerat angajulleq, Kain, Jehovap unnersuussutaanik asannittumik maleruaajumanngilaq taamaalillunilu kisimi oqartussaassusianik akerlilersuilluni. Nalugaluaruniuk nalunngikkaluaruniulluunniit, Kain tassaalerpoq ’ajortumit pisoq’, Diaavululu pallorfigilerlugu. Nukkani Abel pallorfiginninnermik ilumoortumik, upperisarsiornermik ilumoortumik, aallussisoq toquppaa. (1 Juánase 3:12; 1 Moses 4:3-8; Eprîarit 11:4) Abelip aava siulliulluni upperisarsiornikkut allatut isumalinnik akaarinninngissuseq pissutigalugu kuineqarpoq. Alianaraluartumik upperisarsiorneq ilumuunngitsoq nalerput tikivillugu aammik pisuussuteqanngitsumik kueraanermut pisuujuarpoq. — Takuuk Matîuse 23:29-35; 24:3, 9.
4. Allassimaffiit Noamut tunngasut suut ersersippaat upperisarsiornermut ilumoortumut suut ilaasut?
4 Satan inunnik upperisarsiornermik ilumoortumik tunussisitsiniaanermini iluatsitsilluni Ulersuup siorna inuit amerlanersaat tunussitissimavai. Noali ’Jehovamut saammaannarsisimavoq’. Sooq? ’Guutip saavani inuugami’. Allatut oqaaatigalugu, guutisiorneq ilumoortoq aallukkamiuk. Guutisiorneq ilumoortoq tassaanngilaq upperisarsiornikkut ileqqulersorneq, tassaavorli inooriaaseq. Tamatumunnga ilaavoq Jehovamut tunaarinninneq naalallunilu taassumunnga kiffartorneq, imaluunniit ’saavani inuuneq’. Noa taamatut inuusimavoq. — 1 Moses 6:8, 9, 22; 7:1; Eprîarit 11:6, 7.
5. (a) Ulersuup kingorna Satan sumik pilersaaleraluarpa, qanorlu ililluni? (b) Jehovap qanoq ililluni Diaavulup pilersaarutaa akornuserpaa, qanorlu kinguneqarpa?
5 Ulersuup kingunitsianngua Diaavulup qularnanngitsumik Nimrod, Jehovamut akerlilersuisuunermigut nalunngisaasoq, atorpaa inuiaat tamaasa Jehovamut akerlilersuisumik guutisiulerseqqinniarlugit ilungersornermini. (1 Moses 10:8, 9; 11:2-4) Siunertaraa guutisiorneq tamanna ilumuunngitsumik upperisarsioqatigiinninnguutissasoq, Diaavulumik pallorfiginninnerulerluni, illoqarfimmik napasuliamillu pallorfiginnittut sanaavannik qiteqarluni. Pilersaarut tamanna Jehovap akornuserpaa ’oqaatsit ataatsit’ taamani inuiaat tamarmik atugaasa paatsiveerutsinnerisigut. (1 Moses 11:5-9) Taamaattumik illoqarfik taanna Babelimik taagorneqalerpoq kingornalu Babylonimik, tamarmik isumaqartut „paatsiveerunneq“. Oqaatsinik paatsiveerutitsineq tamanna inuiaat nunarsuaq tamakkerlugu siaruarnerannik kinguneqarpoq.
6. (a) Upperisarsiornikkut ajoqersuutit suut Satanip Babylonimi pallorfiginnitsini siammartinneqanngikkallarmata pigiliutitissimavai? (b) Sooq upperisarsiornerit silarsuarmi tamarmiittut tunngavimmikkut assigiinnik ajoqersuuteqarpat? (c) Babylon Satanip qanoq siunertaqarfigisimagaluarpaa, itsarlu illoqarfiusimasoq taanna sumut assersuutinngorpa?
6 Upperisarsiornerulli oqaluttuarisaaneratigut erserpoq Jehovap inuit siammartinngikkallarmagilli Satanip ilumuunngitsumik upperisarsiornerup ajoqersuutai tunngaviusut ilaat inunnut pigiliutitissimagai, ilaatigut upperisarsiornikkut takorluukkat soorlu toqup kingorna tarneq inooqqittartoq, toqungasunut ersineq anniarfimmillu ikualasumik upperisaq, kiisalu guuterpassuarnik angutinik arnanillu ilaatigut ataasiullunilu pingasuussuseqartunik pallorfiginninneq. Upperisat tamakku oqaatsit assigiinngitsut aqqutigalugit nunarsuarmi tamarmi siammartinneqarsimapput. Ukiut ingerlaneranni ajoqersuutit tunngaviusut tamakku arlaatigut allannguuteqartarsimapput. Annerusutigulli silarsuarmi tamarmi ilumuunngitsumik upperisarsiornermi tunngavippiaapput. Babylon silarsuarmi illoqarfiit pingaarnersaattut qiteralugu upperisarsiornermik ilumuunngitsumik ataasiussuseqalersitseriaraluarnini akornuserneqarmat, Satanip ilumuunngitsumik guutisiornerit Babylonimit aallaaveqartut inuillu Jehovamut pinnatik imminut pallorfiginninnissaannik siunertaqartut assigiinngitsunillu periaaseqarluni ingerlanneqartut naammagiinnarpai. Ukiuni hundredelippassuarni Babylon guutipilussiornermut, ilisiinnernut, siulittuiniartarnermut ullorissallu najoqqutaralugit siulittuiniartarnermut — tamarmik upperisarsiornermut ilumuunngitsumut pingaaruteqartunut — qitiujuarsinnarsimavoq. Taamaattumik tupinnanngilaq upperisarsiornerup ilumuunngitsup silarsuarmi tamarmi naalagaaffissua sarĸúmersitat-ni tassaanerarneqarmat arnaq atortittartoq maajunnartoq Babylon Angisooq-mik taaguutilik. — sarĸúmersitat 17:1-5.
Upperisarsiorneq ilumoortoq
7. (a) Sooq upperisarsiorneq ilumoortoq oqaatsit paatsiveerutsinneqarnerannit eqqugaasimanngila? (b) Kina ’uppertunut tamanut ataataasutut’ ilisimaneqalersimava, sooq?
7 Jehovap inuit oqaasii Babelimi paatsiveerutsimmagit upperisarsiorneq ilumoortoq eqqorneqarsimanngilaq. Ulersuup siornagut angutit arnallu aalajaatsut soorlu Abel, Enok, Noa, Noap nulia, erneri ukuaalu ilumoortumik guutisiorsimapput. Ulersuup kingorna pallorfiginninneq ilumoortoq Noap ernerata Semip kinguaavisigut atatinneqarsimavoq. Abraham, Semip kinguaava, pallorfiginninnermik ilumoortumik aallussisimavoq ’uppertunullu tamanut ataataasutut’ ilisimaneqalerluni. (Rûmamiut 4:11) Taassuma uppernini suliamigut ersersissimavaa. (Jâko 2:21-23) Upperisani inooriaasersimavaa.
8. (a) Upperisarsiorneq ilumoortoq ukiut hundredellit 16-issaanni u.n.s. qanoq ililluni upperisarsiornermik ilumuunngitsumik avatangiiseqalerpa, tamannalu qanoq kinguneqarpa? (b) Pallorfiginninnermut ilumoortumut atatillugu Jehova qanoq nutaamik aaqqissuussiva?
8 Pallorfiginninneq ilumoortoq Abrahamip kinguaavi, Isak, Jakob (Israel), Jakobillu erneri aqqaneq-marluk tassaalersut Israelip naggueqatigiissortai aqqaneq-marluk, aqqutigalugit ingerlaannarsimavoq. Ukiut hundredellit 16-issaata naalernerani u.n.s. Abrahamip Isak aqqutigalugu kinguaavisa akeqqersimaarfiusumi guutipilussiorfiusumilu, Egyptenimi, inussianngortitaaffigilikkaminni pallorfiginninnerup ilumoortup attatiinnarnissaa sorsuutigisimavaat. Jehovap kiffani aalajaatsoq Moses, Levip kinguaava, atorlugu pallorfiginnitsini Egyptenimi, nunami ilumuunngitsumik upperisarsiorfiulluinnartumi, inussiaataanerannit aniguisissimavai. Moses akunnermiliuttoralugu Jehovap Israelikkut angerfigeqatigisimavai toqqakkamisullu innuttarilerlugit. Tassa taamani Jehovap pallorfiginninneq ilumoortoq inatsisitut katitikkatut allaganngortippaa, aaqqissuussamik utaqqiisaannaasumik pilersitsilluni, illernartuummi piviusumi — siullermik illertuummi angallattakkami kingornalu naalaffimmi Jerusalemimiittumi — palaseqatigiit pilliisartussanngorlugit.
9. (a) Inatsisitigut angeruseq pilersinneqanngikkallarmat pallorfiginninneq ilumoortoq qanoq ingerlanneqarsimava? (b) Jesusip qanoq ililluni ersersippaa atortutigut inatsisit ataavartussaanngitsut?
9 Malugisariaqarporli atortutigut aaqqissuussat tamakku pallorfiginninnermi ilumoortumi ataavartumik atortussatut pilersinneqanngimmata. Inatsisit tamakku tassaasimapput ’piumaartussap tarrai’. (Kulorsamiut 2:17; Eprîarit 9:8-10; 10:1) Ataataanerpaat nalaanni, Mosesip inatsisai atuutilersinneqanngikkallarmata, qularnanngitsumik ilaqutariinni qullersaasut inoqutitik sinnerlugit pilliiviliaminnut pilliisarsimapput. (1 Moses 12:8; 26:25; 35:2, 3; Job 1:5) Tassa taamanikkut aaqqissuussaasunik palaseqatigeeqarsimanngilaq imaluunniit ileqqulersuutinut aalajangersimasunut atatillugu pilliutissanut maleruagassaqarsimanani. Jesusittaaq ersersippaa pallorfiginninneq inatsisinik najoqqutassalik Jerusalemimi ingerlanneqarsimasoq utaqqiisaannaasumik aaqqissuussaasimasoq, taamani arnamut Samariamiumut ima oqarami: ’Ullut nalliukkumaarput, taava qaqqamiluunniit matumani [Garizimimi, Samariamiut naalaffiata inigisimasaani] Jerusalemimiluunniit Ataataq pallorfigissanngilarsi. . . . Ullulli nalliukkumaarput, maannakkummi nalliussimapput, taava pallorfiginnittut ilumoortut Ataataq pallorfigissavaat anersaakkut ittumik ilumoortumillu.’ (Juánase 4:21-23) Jesusip ersersippaa pallorfiginninneq ilumoortoq atortussanut atanngitsuusoq, kisianni anersaakkut ilumoorlunilu aallunneqartussaasoq.
Babylonimi inussiaataaneq
10. (a) Sooq Jehovap innuttami inussianngorlutik Babylonimukaanneqarnerat akueriinnarpaa? (b) Ukiumi 537-mi u.n.s. Jehovap aalajaatsut amiakkui qanoq marloriaammik aniguisippai, Judamullu uternerannut suna pingaarnerusumik siunertaava?
10 Edenimi pikitsitsisoqarmalli pallorfiginninnerup ilumoortup ilumuunngitsullu akornanni akerariinneqartuarsimavoq. Pallorfiginnittut ilumoortut upperisarsiornermit ilumuunngitsumit, Nimrodip nalaaniilli Babylonimik taaguuteqalersimasumit, assersuutaasumik inussiaataasarsimapput. Jehovap innuttai 617-imi 607-imilu u.n.s. Babylonimi inussiaatinngortinneqarnerminnik Jehovap akuersiinnarnerata siornagulli upperissarsiornermit ilumuunngitsumit Babylonimiorpaluttumit eqqorneqartareersimapput. (Jeremia 2:13-23; 15:2; 20:6; Hesekiel 12:10, 11) Ukiumi 537-mi u.n.s. aalajaatsut amiakkui Judamut uterput. (Jesaja 10:21) Kajumissaarut siulittuutaasoq malissimavaat: „Babylonimit anigitsi!“ (Jesaja 48:20) Timikkut aniguisitaaneq pineqaannanngilaq, aammattaaq avatangiisinit upperisarsiornermik ilumuunngitsumik minguttuumillu guutipilussiorfioqisumit anersaakkut aniguisitaaneruvoq. Taamaattumik aalajaatsut amiakkui ima peqquneqarput: „Aallaritsi, aallaritsi, Babylonimit aallaritsi, mingunnartumik attueqinasi. Aallaritsi, minguersaritsi ilissi ermutsinik [Jehovap] piinik tigumiartusi!“ (Jesaja 52:11) Judamut uternerannut siunertaasoq pingaarneq tassaavoq pallorfiginninnermik minguitsumik, upperisarsiornermik ilumoortumik, atuutilersitseqqinnissaq.
11. Pallorfiginninnerup minguitsup Judami pilerseqqinneqarnera ilutigalugu ukiut hundredellit arfinilissaanni u.n.s. upperisarsiornerit nutaat suut pilerpat?
11 Soqutiginarpoq takullugu qanoq ililluni upperisarsiorneq ilumuunngitsoq ukiut hundredellit arfinilissaanni u.n.s. Babylon Angisuup iluani avalequtitaartorsimasoq. Piffissami tamatumani buddhasiorneq, kungfutsesiorneq, zarathustrasiorneq jainasiornerlu pilerput, kiisalu griikerit sianissusiinnarmik pingaartitsillutik isumaliutersuutaat kingorna kristumiuuneraqatigiit ilagiivini assut sunniuteqarsimasut atuutilerlutik. Tassa pallorfiginninnerup minguitsup Judami atuutilerseqqinneqarnera ilutigalugu Guutimut akeraanerpaaq upperisarsiornerup ilumuunngitsup iluani qinigassanik amerlanerusunik pilersitsiortulerpoq.
12. Babylonimit aniguisitsineq suna ukiuni hundredelinni siullerni pisimava, Paulusilu qanoq mianersoqqusisimava?
12 Israelimi Jesusip saqqummernerata nalaani juutit guutisiornertik assigiinngitsunik periaaseqarlutik ingerlappaat, upperisarsiornikkut isummat Babylonimit pilerfeqartut assut atugaralugit. Upperisarsiornerat Babylon Angisuumut atalersimavoq. Juutit upperisarsiornerat Kristusip avoqqaaraa ajoqersukkanilu Babylonimit aniguisillugit. (Matîuse, kapitali 23; Lúkarse 4:18) Apustili Paulusip sumiiffinni oqaluussiffigisamini upperisarsiorneq ilumuunngitsoq griikerillu isumaliutersuutaat siaruarsimaqimmata Esajasip siulittuutaa issuaaffigisarsimavaa kristumiunullu, Babylon Angisuup sunniineranit minguttuumit aniguisinneqarnissaminnik pisariaqartitsisunut, tunngatittarlugu. Taanna ima allassimavoq: ’Guutip naalaffiutaata guutipiluit sukkut inissarseqatigissanerpai? Uagummi Guutip uumasup naalaffiutigaatigut, soorlu Guuti oqartoq: „Akornanni ineqarumaarpunga saqillungalu; Guutigissavaanngalu, uangalu innuttarissavakka.“ „Taamaattumik akornannit anigitsi avissaarlugillu,“ oqarpoq Jehova, „mingunnartorlu attoqinasiuk, taava ilassiumaarpassi.“’ — 2 Korintumiut 6:16, 17.
Naggatissap nalaani upperisarsiornermit ilumuunngitsumit aniguisitaaneq
13. Ilagiinnut arfineq-marluusunut Asiaaqqamiittunut Kristusip tusarliussai sumik ersersitsippat, kingornalu qanoq pisoqarpa?
13 Saqqummersitat apustili Johannesimut saqqummersinneqartut aqqutigalugit Kristusip ilagiinnut arfineq-marlunnut Asiaaqqamiittunut tusarliussaasigut malunnarluartumik erserpoq upperisarsiornikkut ileqqulersuutit Babylonimi pilerfeqartut ukiut hundredellit siulliit naalerneranni ilagiinni kristumiuni sunniukkiartuaalersimasut. (sarĸúmersitat, kapitali 2 aamma 3) Ingammik aatsaat ukiut hundredellit aappassaata tallimassaatalu u.n.k. akornanni tunussineq malunniullualersimavoq, kristumiut upperisaannik minguitsumik ilaarsinermik ajortunngorsimasumik kinguneqarluni. Ajoqersuutit Babylonimeersut soorlu tarneq toqusuitsoq, anniarfik ikualasoq Guutilu ataasiullunilu pingasuusoq kristumiut akornanni ajoqersuutigineqalerput. Katuullit Romalerisut, ilagiit griikerilerisut, kingornalu ilagiit naaggaartut ajoqersuutit ilumuunngitsut tamakku tamaasa ajoqersuutigilerpaat, taamaalillutillu Babylon Angisuumut, Diaavulup silarsuaq tamakkerlugu upperisarsiornermik ilumuunngitsumik naalagaaffissuanut, ilaalerlutik.
14, 15. (a) Qajuusiassanik naatsiiassapilunnillu Jesusip assersuusiaatigut suna erserpa? (b) 1800-kkut naalerneranni qanoq pisoqarsimava, kristumiullu ilumoortut 1914-imi suut paasereersimavaat?
14 Upperisarsiornerli ilumoortoq nungutitaalluinnanngisaannarsimavoq. Ukiut hundredelikkuutaat ingerlaneranni inoqartuaannarsimavoq sallusuissummik nuannarinnittunik. Taakkua ilaasa Jehovamut taassumalu oqaasianut, Bibelimut, ilumoortuarnertik pissutigalugu inuunertik akigisariaqarsimavaat. Kisianni soorlu Jesusip qajuusiassanik naatsiiassapilunnillu assersuusiaani ersertoq, Naalagaaffimmi qitornaasut tanitaasut, naasupilunnit, ajortup qitornaanit, ’silap matuma naggatissaani’ avissaartiterneqassapput. (Matîuse 13:24-30, 36-43) Naggatissaq avissaartiteriffiusussaq qanilliartortillugu Bibelimik atuaqqissaartut ilumoortut 1800-kkut naajartulerneranni upperisarsiornermit ilumuunngitsumit aniartuaalersimapput.
15 Kristumiut taakku, ullumikkut Jehovap Nalunaajaasuisut ilisimaneqartut, 1914 nalliummat utertitsissummut nukittuumik uppissuseqalereersimapput. Kristusip tikiunnissaata takussaanngitsuunissaa paasereersimavaat. Aamma paasisimavaat ’Guutimik nalusut ullussaat’ 1914-imi qaangiutissasut. (Lúkarse 21:24) Aammattaaq makititaaffissap tarnillu suussusii paasilluareersimavaat, kristumiuunerartullu ilagiivisa anniarfimmik aamma ataasiullunilu pingasuussusermik ajoqersuutaasa kukkulluinnartuunerat paasilluarsimallugu. Guutip aqqa ilikkarpaat atulerlugulu, paasivaallu pinngoriartorsimanermik isumaliutersuut ilumuunngitsuusoq anersaarsiornerlu eqqunngitsuusoq.
16. Kajumissaarut suna kristumiut tanitat 1919-imi maleruarpaat?
16 Upperisarsiornerup ilumuunngitsup kalunnerinit katakkiartornerminni iluatsitsipput, 1919-imilu Babylon Angisuup Guutip innuttai pissaaneqarfigiunnaarluinnarpai. Juutit ukiumi 537-mi Babylonimit aniguisitaasimasut assigalugit kristumiut tanitaasut aalajaatsut amiakkuisa ’Babylon Angisuumit aneqqusilluni’ kajumissaarut malissimavaat. — Jesaja 52:11.
17. (a) 1922 aallarnerfigalugu susoqartalerpa, Guutillu innuttai qanoq paasisaqarsimappat? (b) Ingasattajaarpaluttumik qanoq isummertoqarsimava, soorlu tamanna paasinarluarpa?
17 1922 aallarnerfigalugu ajoqersuutit ilumoortut sakkortuut Bibelimeersut upperisarsiornermik ilumuunngitsumik Babylonimit aallaavilimmik, ingammik kristumiuuneraqatigiinnik, qulaarisut naqitiganngortinneqartalerlutillu siaruarterneqartalerput. Upperisarsiornermut ilumuunngitsumut sumulluunniit atajunnaarluinnarnissap pisariaqassusianik Guutip innuttaasa minguiarneqarsimasut ilungersortumik eqqaamasassittariaqarnerata pisariaqartinneqarnera misiutigineqanngilaq. Taamaattumik pallorfiginninneq ilumoortoq pineqaraangat oqaaseq „upperisarsiorneq“ ukiorpassuarni atornaveersaarluinnarneqartarsimavoq. Allagartarsuit ima oqaasertallit: „Upperisarsiorneq napititsiniutaavoq peqquserluttumillu ingerlataalluni“ nassarlugit illoqarfissuit aqqusernini angalaartoqartarsimavoq. Atuakkani soorlu Naalakkersuineq (1928) aamma ’Sallusuissutip inussiaajunnaarsissavaasi’ (tuluttut 1943-mi) (kalaallisuunngortitaanngillat) „kristumiussuseq“ aamma „upperisarsiorneq“ ersarissumik immikkoortinneqarput. Ingasattajaarpaluttumik saqqummiussineq tamanna paasinarluarpoq, tassami Babylon Angisuup upperisarsiornikkut aaqqissuussaata ajortumik sunniilluinnarsimasup attavigiunnaarluinnarnissaa pisariaqaqaaq.
Upperisarsiorneq ilumoortoq ilumuunngitsorlu
18. Oqaaseq „upperisarsiorneq“ 1951-imi nutaamik qanoq paasineqarpa, ’Yearbook’-imilu 1975-imoortumi tamanna qanoq nassuiarneqarpa?
18 Upperisarsiornerup ilumoortup ilumuunngitsullu assigiinngissutaannik Jehovap innuttaminik ersarilluinnartumik paasisitsinissaanut 1951-imi piffissaallualersimavoq. 1975 Yearbook of Jehovah’s Witnesses-imi ima allassimasoqarpoq: „Pallorfiginninnermut ilumoortumut ilaasut 1951-imi oqaaseq ’upperisarsiorneq’ pillugu malugisariaqartumik ilikkagaqarput. Ilaasa eqqaamalluarpaat 1938-mi ilaannikkut allagartarsuarnik eqqarsariaallannartunik angallassisarsimanertik, soorlu ima allassimasunik: ’Upperisarsiorneq napititsiuniutaavoq peqquserluttumillu ingerlataalluni.’ Taakkua isaannit ’upperisarsiornerit’ tamarmik kristumiuunngitsuupput Diaavulumeersuullutillu. Kisianni The Watchtower-imi 15. martsi 1951-imeersumi oqaatsit ’ilumoortoq’ aamma ’ilumuunngitsoq’ upperisarsiornermut uiggiunneqarput. Atuakkami pissanganartumi Hvad Har Religion Betydet for Folkene?-mi (1951-imi tuluttut naqitigaq ataatsimeersuarnermilu ’Pallorfiginninneq minguitsoq’-mi Wembley Stadionimi Londonimiittumi pisumi saqqummersinneqartoq) ima allassimasoqarpoq: ’Oqaatsip „upperisarsiorneq“-up isumaa nalinginnaasoq tassaavoq pallorfiginnermik aaqqissuussaq, guutisioriaaseq, pallorfiginninneq ilumooraluarpat ilumuunngikkaluarpalluunniit. Oqaaseq hebriiarisooq upperisarsiornermut atorneqartoq [‛avōdhahʹ], ’kiffartornermik’ isumaqavissoq isumaqatigaa, kina kiffartorfigineqarnersoq apeqqutaatinnagu.’ Tamanna najoqqutaralugu oqariaatsit ’upperisarsiorneq ilumuunngitsoq’ aamma ’upperisarsiorneq ilumoortoq’ Jehovap Nalunaajaasuisa akornanni nalinginnaalersimapput.“ — Qupperneq 225.
19, 20. (a) Sooq pallorfiginnittut ilumoortut pallorfiginninnermut minguitsumut tunngatillugu oqaatsip ’upperisarsiornerup’ atornissaanut annilaangaqquneqanngillat? (b) Paasisaq nutaaq tamanna Jehovap innuttaasa qanoq iluaqutigaat?
19 Atuartartut apeqqutaannut akissutitut The Watchtower-imi 15. augusti 1951-imeersumi ima allassimasoqarpoq: „Oqaatsip ’upperisarsiornerup’ atornissaa kimilluunniit annilaangassutigineqartariaqanngilaq. Oqaaseq tamanna atuinnarlugu upperisarsiornernut ilumuunngitsunut ileqqulersuuterpassualinnut akuliussaanavianngilagut, soorlu kristumiutut immitsinnut taasarnitta oqaasiinnakkut kristumiuunerartunut akuliussaatinngikkaatigut.“
20 Oqaaseq „upperisarsiorneq“ pillugu paasisaq nutaaq tamanna sallusuissummit ungasilleriarnerunngilaq, Jehovalli innuttaasa upperisarsiornerup ilumoortup ilumuunngitsullu immikkoorutaannik itisiliinerunissaannut iluaqutissaalluni, soorlu ilanngutassiami tulliuttumi takussagipput. (wD 1/12 91)
Apeqqutit uteqqiissutissat
□ Qanga qanorlu ililluni upperisarsiorneq ilumuunngitsoq nunarsuarmi aallartippa?
□ Ulersuup kingorna Satan sumik pilersaarusiuleraluarpa, pilersaarutaalu qanoq ililluni akornuserneqarpa?
□ Babylon sumut assersuutaalersimava?
□ Ukiumi 537-mi u.n.s., ukiuni hundredelinni siullerni u.n.k. aamma 1919-imi aniguisitaanerit suut pisimappat?
□ Oqaaseq „upperisarsiorneq“ 1951-imi qanoq nutaamik paasineqarpa, aamma sooq aatsaat piffissami tamatumani?
[Qupp. 10-mi ungalusaq/assiliartaq]
Ajoqersuutit ilumuunngitsut Babylonimit pilerfeqartut:
□ Guutit ataasiullutillu pingasuusut
□ Tarneq toqusuitsoq
□ Anersaarsiorneq — „toqungasunik“ oqaloqatiginninneq
□ Guutisiornermi assilissanik atuineq
□ Anersaapiluit saammarsarniarlugit serraneq
□ Upperisarsiornikkut qullersaasut pissaaneqaqisut