Guutisiorneq minguitsoq annannissamut pisariaqarpoq
’Guutisiorneq Guutip Ataatap minguitsuutitaa assuarinngisaalu tassa imaattoq: . . . silarsuarmit mingutsinnaveersaarluni.’ — JÂKO 1:27.
1. Oqaaseq upperisarsiorneq qanoq nassuiarneqarsimava, taamaattumillu upperisarsiornerup sorliup ilumoortuuneranik sorliullu ilumuunngitsuuneranik kina aalajangiisussaviua?
UPPERISARSIORNEQ tassaanerarneqarsimavoq „periaaseq inuup inunnit pissaaneqarnerusumut qilammi nunamilu tamarmi pinngortitsisutut naalakkatullu isigineqartumut uppernerminik ataqqinninnerminillu ersersitsissutaa“. Taamaattumik kina upperisarsiornerup sorliup ilumoortuuneranik sorliullu ilumuunngitsuuneranik aalajangiisussaviusimassava? Soorunami tassaasimassaaq upperfigisaq pallorfigisarlu, Pinngortitsisoq. Jehovap oqaatsimini ersarissumik takutippaa upperisarsiorneq sorleq ilumoortuusoq sorliillu ilumuunngitsuusut.
Oqaaseq „upperisarsiorneq“ Bibelimi
2. Oqaaseq griikerisooq „pallorfiginneriaaseq“-mik imaluunniit „upperisarsiorneq“-mik nutserneqartartoq oqaatsinik ujarlerfissiani qanoq nassuiarneqarpa, oqaaserlu tamanna pallorfiginneriaatsinut qanoq ittunut tunngava?
2 Oqaaseq griikerisooq „pallorfiginninneq“-mik imaluunniit „upperisarsiorneq“-mik nutserneqartartoq tassaavoq thrēskeiʹa. A Greek-English Lexicon of the New Testament-imi oqaaseq taanna tassaanerarneqarsimavoq „Guutimik pallorfiginninneq, upperisarsiorneq, ingammik upperisarsiorluni pallorfiginninnikkut imaluunniit upperisarsiorluni ileqqulersuutitigut ersertartoq“. Theological Dictionary of the New Testament-imi nangilluni ima allassimasoqarpoq: „Oqaatsit nagguiinik allanngoriartarnerannillu ilisimatusaatitigut isumaqatigiinnginneqarpoq; . . . Ullumikkut paasiniaaqqissaartartut isumaqarput oqaaseq taanna oqaatsimut therap-imut (’kiffartorneq’) atassuteqartoq. . . . Isumaa assigiinngitsunut aggulunneqarsinnaavoq. Isumaa pitsaanerusoq tassaavoq ’upperisarsiornikkut ilungersorneq’ . . . ’Guutimik pallorfiginninneq’, ’upperisarsiorneq’. . . . Aammali pitsaannginnerusumik isumaqarpoq, tassa ’upperisarsiorneq ajorsisimasoq’, ’pallorfiginninneq ilumuunngitsoq’.“ Taamaattumik thrēskeiʹa „upperisarsiorneq“-mik imaluunniit „pallorfiginninneq“-mik, ajunngitsuugaluarpat ajortuugaluarpalluunniit, nutserneqarsinnaavoq.
3. Oqaaseq „pallorfiginneriaaseq“-mik nutserneqartartoq apustili Paulusip qanoq atorsimavaa, Kulorsamiut 2:18-imilu nutsigaq qanoq oqaatigineqarsinnaava?
3 Oqaaseq taanna Kristumiut Allagaataat Griikerisuut-ni taamaallaat sisamariarluni atorneqarpoq. Apustili Paulusip upperisarsiornermut ilumuunngitsumut tunngatillugu marloriarluni oqaaseq taanna atorsimavaa. Taassuma kristumiunngunngikkallarami inuunini apustilit suliáinik agdlagkat 26:5 naapertorlugu ima allaatigaa: ’Siornagummi ilisimavaannga aallaqqaataanit nalunaajaajumassagaluarunik farisiiariullunga inuusimasunga immikkoorniaqatigiit Guutimut kiffartuussinitsigut [’upperisarsiornitsigut’, Phillips] peqqissaarnerusut ilagalugit.’ Kolossamiunullu allakkamini ima mianersoqqusisimavoq: ’Ajugaasup pisassaanik arsaarnaveerlisi perusunnerminnit nikanarniartut inngilinik guutisiorfiginnittut.’ (Kulorsamiut 2:18) Taamanikkut Frygiami inngilinik pallorfiginninneq nalinginnaasorujussuusimannguatsiarpoq, tamannali upperisarsiorneruvoq ilumuunngitsoq.a Tuluttut nutsikkat ilaanni allassimaffimmi tassani oqaaseq thrēskeiʹa „upperisarsiorneq“-mik nutserneqarsimavoq, amerlanernili „pallorfiginninneq“-mik nutserneqarsimavoq. Nutsikkani qallunaatuuni amerlanerni oqaaseq „inngilisiorneq“ atorneqarpoq. Ny Verden-nutsikkami oqaaseq thrēskeiʹa „pallorfiginninneq“-mik aamma „pallorfiginneriaaseq“-mik nutserneqarsimavoq, nutsikkalli tuluttuup atuaqqissaarutip ilanngussaani ersersinneqarpoq bibelini latinerisuunngortitani oqaaseq tamanna qaqugukkut „upperisarsiorneq“-mik nutserneqartartoq.
’Guutitta minguitsuutitaa assuarinngisaalu’
4, 5. (a) Jakob naapertorlugu kia upperisarsiornermut isiginnittaasia pingaarnerpaava? (b) Inuup pallorfiginninnera suup ’sussaanngitsunngortittarpaa’, oqaaserlu ’sussaanngitsumik’ nutserneqarsimasoq qanoq isumaqarpa?
4 Oqaaseq thrēskeiʹa allakkani ajoqersukkap Jakobip, ukiuni hundredelinni siullerni ilagiit kristumiut siulersuisoqatigiivinut ilaasortaasup, allagarisimasaani marloriarluni aamma nassaassaavoq. Ima allassimavoq: ’Kinaluunniit guutisiortuusoraluni [’upperisarsiortuusoraluni’, Phillips] isumaqaruni oqqilu naalakkersornagu, uummannili salloqittarlugu, taassuma guutisiornera [’upperisarsiornera’, Phillips] sussaanngilaq. Guutisiorneq [’upperisarsiorneq’, Phillips] Guutip Ataatap minguitsuutitaa assuarinngisaalu tassa imaattoq: iliarsuit uillarnerillu naalliunneranni takusartarlugit, silarsuarmit mingutsinnaveersaarluni.’ — Jâko 1:26, 27.
5 Guutimit iluarisaanissarput silarsuassamilu nutaami neriorsuutigisaani aniguilluta inuulernissarput kissaatigigutsigu upperisarsiornermut taassumatut isiginnittaaseqartariaqarpugut. (2 Pîtruse 3:13) Jakobip ersersippaa naak inuk upperisarsiortutut imminut isigigaluarluni immaqa pallorfiginneriaasia asuliinnaasinnaasoq, ’sussaanngitsuusoq’. Oqaaseq griikerisooq tassani ’sussaanngitsumik’ nutserneqarsimasoq isumaqarportaaq „imaqanngitsoq, suussuseqanngitsoq, kinguneqanngitsoq, iluaqutaanngitsoq, pissaaneqanngitsoq, ilumoortuunngitsoq“. Kristumiuuneraraluarluni oqqaminik paarsinngitsup imaluunniit Guutip nersornaatissaanut kristumioqatiminullu ineriartornartumik oqqaminik atuinngitsup upperisarsiornera taamaassinnaavoq. Taamaappat ’uummatini salloqittarpaa guutisiornerlu Guutip Ataatap minguitsuutitaa assuarinngisaalu’ aallunnagu. Aalajangiisuusoq tassaavoq Jehovap tamatumunnga isiginninnera.
6. (a) Jâkup agdlagai-ni suut pingaarnerutitaappat? (b) Pallorfiginnittunut ilumoortunut piumasarisaq suna Jakobip erseqqissarpaa, ullumikkullu Siulersuisoqatigiiusut tamatumunnga atatillugu qanoq unnersuussuteqarpat?
6 Jehovap pallorfiginninnermut ilumoortumut atatillugu piumasarisai tamakkernagit Jakobip taagorpai. Piumasarisat allakkamini pingaarnerutitanut — upperneq suliakkut ersertariaqartoq Satanillu silarsuaanik ikinnguteqarnissaq pinngitsoortariaqartoq — naapertuuttut marluk kisiisa erseqqissarpai. Siulleq tassaavoq ’iliarsunnik uillarnernillu naalliunneranni takusaasarnissaq’. Tamatuma kristumiutut asanninneq ilumoortoq nassataraa. Jehovap iliarsuit uillarnerillu asannittumik isumassortuaannarsimavai. (5 Moses 10:17, 18; Malakia 3:5) Ukiuni hundredelinni siullerni siulersuisoqatigiit isumagisassaasa pingaarnerit ilagisimavaat uillarnernik kristumiuusunik ikiuisarneq. (apustilit suliait 6:1-6) Qanoq ililluni uillarnerit piitsut utoqqalilersut, ukiut ingerlaneranni aalajaattuarsimasut ikiortigisinnaasaminnillu ilaqutaqanngitsut, asannittumik ikiorneqartarnissaannik apustili Paulus annikitsualuttai tamaasa ilanngullugit unnersuussisimavoq. (1 Timûtiuse 5:3-16) Ukiuni nutaanerusuni makkunanissaaq Jehovap Nalunaajaasuisa Siulersuisoqatigiivi ’piitsunik isumassuinermut’ atatillugu immikkut ittumik unnersuussuteqarsimapput. Tamatumunnga tunngatillugu ima allassimasoqarpoq: „Uppeqatinik aalajaatsunik ilumoortunillu atortussatigut ikiorneqarnissaminnik atorfissaqartitsisunik isumassuineq pallorfiginninnermut ilumoortumut ilaavoq.“ (Takuuk atuagaq Organiseret til at fuldføre vor tjeneste, qupperneq 118-120.) Utoqqaanertaqatigiit imaluunniit kristumiut ataasiakkaat tamakkununnga tunngasutigut sumiginnaagunik, ’guutisiornerup Guutitta Ataatap minguitsuutitaata assuarinngisaatalu’ immikkoortortaa pingaartoq puiorsimassavaat.
’Silarsuarmit mingutsinneqanngitsoq’
7, 8. (a) Upperisamut ilumoortumut piumasarisaq suna alla Jakobip eqqaavaa? (b) Upperisarsiornikkut qullersat piumasarisamik tamatuminnga eqqortitsippat? (c) Jehovap nalunaajaasui qanoq oqaatigineqarsinnaappat?
7 Pallorfiginninnermut ilumoortumut piumasarisap Jakobip eqqartugaata aappaa tassaavoq ’silarsuarmit mingutsinnaveersaarnissaq’. Jesus ima oqarsimavoq: ’Naalagaaffiga silamit matumannga pinngilaq’; taamaattumillu taassuma ajoqersugai ’silamiut ilagissanngilaat’. (Juánase 15:19; 18:36) Silarsuup matuma upperisarsiornerini qullersaasut palasillu pillugit taama oqartoqarsinnaava? Taakkua Naalagaaffiit Peqatigiit-nik tapersersuisuupput. Upperisarsiornikkut pisortaasut ilarpassuisa paavip 1986-imi oktoberimi Assisimi Italiamiittumi FN-ip ’eqqissinermut ukiorititaata’ iluatsilluarnissaanik qinoqatigiissuteqarnissamut qaaqqusissutaa ilassisimavaat. Suliniutaalli iluatsinngillat. Ukiumi tamatumani ukiunilu tulliuttuni sorsunnerni inuit millionilippassuit toqutaasimapput. Upperisarsiornikkut qullersat politikkikkut partiimut naalakkersuisuusumut qujanarniarfiginnittarput, tamannalu ilutigalugu illuatungiliuttorisaannut politikkikkut peqqusersuumik isumaqatigiissuteqarfiginnittarlutik, taamaalillutik naalakkersuisut sorliugaluarpataluunniit ikinngutigalugit ’asasarlugit’. — Jâko 4:4.
8 Jehovap nalunaajaasui kristumiutut politikkimut silarsuarmilu matumani akerleriissutaasunut akuliukkumanngitsutut ilisimaneqarput. Nunami sumiikkaluarunilluunniit taama aalajangiusimannipput, tamannalu aviisini ilanngutassiatigut oqaluttuarisaanermillu allakkatigut silarsuarmi tamarmeersutigut ersertarpoq. Taakku kisimik ’silarsuarmit mingutsinnaveersaartuupput guutisiornerlu Guutip Ataatap minguitsuutitaa assuarinngisaalu’ aallullugu. — Jâko 1:27.
Upperisarsiornerup ilumoortup ilisarnaatai allat
9. Upperisamut ilumoortumut piumasarisat pingajuat suua, sooq?
9 Upperisarsiorneq tassaasimappat ’inunnit pissaaneqarnerusumut qilammi nunamilu tamarmi pinngortitsisutut naalakkatullu isigineqartumut ataqqinninneq’, taava upperisarsiorneq ilumoortoq inummik Guutimut ilumoortutuamut, Jehovamut, pallorfiginnilersitsisuusariaqassaaq. Guutimik pissaanerminik, ataqqinaamminik naassaanngitsuussutsiminillu ataasiullunilu pingasuussutsimi eqqumiitsumi avitseqateqartumik ajoqersuummik Guutimik nalusuneersumik siuarsaassanngilaq, taamaalillunilu inuit Guutimik paasinnittaasiannik mingutsitsissanani. (5 Moses 6:4; 1 Korintumiut 8:6) Aammattaaq Guutip aqqa asseqanngitsoq, Jehova, ilisimaneqalersillugulu nersorneqalersittariaqarpaa, aap, ilumoortumik upperisallit peqatigiiffittut Guutip aqqanik atuisittariaqarpai. (Tussiaat 83:18; apustilit suliait 15:14) Tamanna eqqarsaatigalugu upperisamik tamatuminnga aallussisut Kristus Jesusip maligassiaanik malinnittariaqarput. (Juánase 17:6) Ullumikkut Jehovap nalunaajaasuisa kristumiuusut avataanniittut allat piumasarisaq tamanna maleruarnerpaat?
10. Upperisarsiornerup inuit Guutip silarsuassaanut nutaamut siulersorsinnaassappagit suut pisariaqarpat, sooq?
10 Apustili Peter Jesus Kristus pillugu ima oqarsimavoq: ’Allamik annaffissaqanngilaq, atermimmi allamik annassutissatsinnik qilaap ataani inunni tunniussaasoqanngilaq.’ (apustilit suliait 4:8-12) Taamaattumik upperisarsiorneq ilumoortoq tamanna, Guutip silarsuassaani nutaami inuunermut aniguisitsisinnaasoq, Kristusimut pilliutillu utertitsissutaasup nalinganut uppilersitsisuusariaqarpoq. (Juánase 3:16, 36; 17:3; Evfisumiut 1:7) Tamatumalu saniatigut pallorfiginnittut ilumoortut Kristusimut, Jehovap kunngitut naalakkersuisuutitaatut palasiunertullu tanitaatut, naalannissaannik ikiortariaqarpai. — Tussiaat 2:6-8; Filípimiut 2:9-11; Eprîarit 4:14, 15.
11. Upperisarsiorneq ilumoortoq sumik tunngaveqartariaqarpa, tamatumunngalu atatillugu Jehovap Nalunaajaasui qanoq inissisimappat?
11 Guutisiorneq minguitsoq Guutip ilumoortutuap piumasaanik saqqummersitaasumik tunngaveqartariaqarpoq, ileqqunik isumaliutersuutinillu inuit pilersitaannik pinnani. Bibeli pigisimanngitsuugutsigu Jehova siunertaalu nuanningaartut, imaluunniit Jesus utertitsissutitullu pilliutaa, ilisimasaqarfiginavianngikkaluarpavut. Jehovap Nalunaajaasuisa inuit allat Bibelimut aalajaatsumik uppissuseqaleriartuaarnissaannut ikiortarpaat. Ulluinnarni inooriaatsimikkut ersersippaat apustili Paulusip oqaasii uku isumaqatigalugit: ’Allakkat tamarmik Guutip anersaarneranik ilallit atortussaapputtaaq ajoqersuutaallutik inerteqqutaallutillu iluarsiartuutaallutillu iluarnermullu perorsaataallutik, inuk Guutip pigisaa inerilluaqqullugu tamanut piginnaanngorsagaaqqullugu.’ — 2 Timûtiuse 3:16, 17.
Upperisarsiorneq ilumoortoq — inooriaaseq
12. Inuup pallorfiginninnera ilumoortuussappat uppernerup saniatigut aamma suut pisariaqarpat, upperisarsiornerlu ilumoortoq qanoq ililluni inooriaasiua?
12 Jesus ima oqarsimavoq: ’Guuti anersaajuvoq, taassuminngalu pallorfiginnittut anersaakkut ittumik ilumoortumillu pallorfigissavaat.’ (Juánase 4:24) Taamaattumik upperisarsiorneq imaluunniit pallorfiginninneq ilumoortoq tassaanngilaq ileqqulersuuteqarnikkut Guutimut tunniusimaneq. Pallorfiginninneq minguitsoq anersaakkut ittuuvoq uppernermillu tunngaveqarluni. (Eprîarit 11:6) Uppernerli sulianik ilaqartariaqarpoq. (Jâko 2:17) Upperisaq ilumoortoq nuannaartorisaasunut alutorisaasunulluunniit maleruutiinnartuunngilaq. Ileqqussatigut oqaatsitigullu Bibelip najoqqutassiai naapertorlugit ingerlanneqarpoq. (1 Korintumiut 6:9, 10; Evfisumiut 5:3-5) Upperisarsiornermik ilumoortumik aallussisut inuunerminni, ilaqutariittut, suliffimminni, atuarfimminni sunngiffimminnilu Guutip anersaavata inerititaanik inerititaqarnissartik ilumoorlutik suliniutigisarpaat. (Galâsiamiut 5:22, 23) Jehovap Nalunaajaasuisa Paulusip unnersuussutaa eqqaamaniartuaannarpaat: ’Taamaattumik nerigaangassiluunniit imeraangassiluunniit sugaangassiluunniit Guuti naalannarseqqullugu pisartaannaritsi.’ (1 Korintumiut 10:31) Uppernerat qalliinnakkut pinngilaq; inooriaaseraat.
13. Pallorfiginninnermut ilumoortumut suut ilaappat, soorlu oqartoqarsinnaava Jehovap nalunaajaasui upperisarsiortuusut?
13 Pallorfiginninneq ilumoortoq soorunami anersaakkut suliniarnernik ilaqarpoq: qinunikkut nammineq Guutimut attaveqarneq, ilaqutariittut qinoqatigiittarneq, Guutip oqaasianik atuagassianillu Bibelilersaarutaasunik akuttoqatigiimmik atuaqqissaartarneq kiisalu kristumiut ataatsimiinnerinut najuuttarneq. Ataatsimiinnerit taamaattut erinarsuutinik Jehovamik unnersiutiginnissutaasunik qinnummillu aallarnerneqarlutillu naggaserneqartarput. (Matîuse 26:30; Evfisumiut 5:19) Oqalugiaatit naqitikkallu tamanit pissarsiarineqarsinnaasut atorlugit apeqqutit-akissutillu ikiortigalugit oqaluuserisat anersaakkut ineriartornartut sammineqartarput. Ataatsimiinnerit tamakku rigssalini immikkut pinnersagaanngitsuni ingerlanneqarajupput, inini upperisarsiornermut tunngasuinnarnut atorneqartartuni: akuttoqatigiissumik ataatsimiittarnernut, katititsinernut ilisinernullu. Jehovap Nalunaajaasuisa rigssalitik ataatsimeersuartarfitillu Jehovamik pallorfiginninnermut atortussaasutut ataqqisaraat. Kristumiuuneraqatigiit oqaluffiisa qassimiuaarnernut katerisimaarnernullu allanut atorneqartarnerattut rigssalit atorneqarneq ajorput.
14. Epriiarisut oqaluttut oqaaseq pallorfiginninneq sumut atassuteqartissimavaat, ullumikkullu Jehovap nalunaajaasuisa suliaq suna tusaamasaassutigaat?
14 Siusinnerusukkut eqqaavarput oqaaseq griikerisooq „pallorfiginneriaaseq“-mik imaluunniit „upperisarsiorneq“-mik nutserneqartartoq oqaatsinik ilisimatuut oqaluummut „kiffartorneq“-mut atassuteqarneraraat. Soqutiginarpoq oqaatsip tamatuma hebriiarisuua, ‛avōdhahʹ, aammattaaq nutserneqartarmat „kiffartorneq“-mik imaluunniit „pallorfiginninneq“-mik. (Naleqqiuguk NV-nutsikkami atuaqqissaarummi Mosesimik allakkat aappaat 3:12-imut 10:26-mullu ilanngussat.) Pallorfiginninneq hebriiarinut tassaasimavoq kiffartorneq. Ullumikkuttaaq pallorfiginnittunut ilumoortunut taamaappoq. Pallorfiginninnerup ilumoortup ilisarnaataasa ilagaat taamatut pallorfiginnittut tamarmik kiffartoqataanerat, ’tusagassaq nuannersoq nunarsuarmi inuit najugarisaanni tamarmi inuiaat tamarmik nalujunnaarutissaannik’ oqaluussissutigalugu. (Matîuse 24:14; apustilit suliait 1:8; 5:42) Silarsuarmi upperisarsiortut sorliit Guutip naalagaaffianik inuiaat neriuutissatuaattut oqaluussissutiginnittutut ilisimaneqarpat?
Nukik pitsaasoq ataasiussuseqalersitsisoq
15. Upperisarsiornerup ilumoortup suna ilisarnaatigaa?
15 Upperisarsiorneq ilumuunngitsoq avissaartuutsitsisarpoq. Uumissuinermut aammillu kuisinermut pisuusarsimavoq sulilu pisuusarluni. Upperisarsiornerli ilumoortoq ataasiussuseqalersitsisarpoq. Jesus ima oqarsimavoq: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Asanninneq Jehovap Nalunaajaasuinik ataasiussuseqartitsisoq inuiaassutsikkut, inuttut atugarisatigut, anigaasatigut ammillu qalipaataatigut assigiinngissutip, inuiannik avataaniittunik avissaartuutsisisup, akerlerluinnaraa. Jehovap Nalunaajaasuisa ’ataaseq aalajangerfigaat tarneqatigiillutik tusagassamut nuannersumut uppernikkut assorooqatigiillutik’. — Filípimiut 1:27.
16. (a) „Tusagassaq nuannersoq“ suna Jehovap nalunaajaasuisa oqaluussissutigaat? (b) Siulittuutit suut Jehovap innuttaanut eqquuppat, tamannalu pilluaqqussutinik sunik kinguneqarsimava?
16 Ungasinngitsukkut Guutip piumasaminik allanngujuitsumik naammassinninnissaanik „tusagassaq nuannersoq“ taakku oqaluussissutigaat. Piumasaa piumaarpoq, ’qilammisut nunamissaaq’. (Matîuse 6:10) Jehovap aqqa naalannartoq illernartinneqassaaq, nunarsuarlu paratiisinngussaaq, tassanilu pallorfiginnittut ilumoortut naassaanngitsumik inuusinnaassapput. (Tussiaat 37:29) Bibelimi siulittuutip eqquunneratut inuit millionilikkuutaat Jehovap nalunaajaasuinik naapeqateqartartut ima oqartarput: „Ingerlaqatigissavassi tusaratsigu Guutip najoraasi.“ (Sakarja 8:23) Jehovap innuttani pilluaqquai. Ilumut ’minnersaat inuiassuanngorsimapput’, silarsuaq tamakkerlugu ilagiinngorsimallutik sutigut tamatigut — eqqarsariaatsimikkut, suliamikkut, pallorfiginninnermikkut — ataasiussuseqartut. (Jesaja 60:22) Upperisarsiornerup ilumuunngitsup iluani tamanna anguneqanngisaannarsimavoq.
Upperisarsiornerup ilumoortup ajugaanissa
17. Babylon Angisooq suneqartussaava, qanorlu tamanna pissava?
17 Upperisarsiornerup ilumuunngitsup silarsuarmi tamarmi naalagaaffissuata, assersuutikkut „Babylon Angisooq“-mik taaneqartup, suujunnaarsitaanissaa Guutip oqaasiani siulittuutigineqarsimavoq. Aammattaaq nunap ’kunngii’, imaluunniit politikkikkut pissaanilittai, nersutip qaasuttup nassuisut Bibelimi eqqartorneqarput. Oqaatigineqarpoq pissaanillit taakku Guutip uummammiulerumaarai peqatigiiffimmik arnatut atortittartutut ittumik Satan Diaavulumullu atasumik suujunnaarsitsilluinnarusussuseqalersillugit. — Takuuk sarĸúmersitat 17:1, 2, 5, 6, 12, 13, 15-18.b
18. Babylon Angisuup suujunnaarsinneqarnissaanut Bibeli naapertorlugu suna pissutaava, qangalu upperisarsiorneq ilumuunngitsoq sammivimmut annilaarnartumut tamatumunnga aallarsimava?
18 Sooq Babylon Angisuup suujunnaarsitaanissaq pisassaraa? Bibelimi akissut imaappoq: ’Taassumani pruffiitit iluartullu aavi nunamilu toqutaasut tamarmik aavi nanineqarput.’ (sarĸúmersitat 18:24) Juutit upperisarsiornikkut pisortaannik Babylon Angisuumut atalersimasunik Jesusip avoqqaarlerneratigut erserpoq Babylon tunngavilerneqanngikkallarmalli upperisarsiorneq ilumuunngitsoq aammik kuisisalersimasoq. Ima oqarpoq: ’Taatuuku pulateriaarsuit, pulateriaarsuit piaraat, qanoq ilillusi [Gehennamut, NV] pisitaanissaq ingalassavisiuk? . . . Ilissinnut peqqullugit iluartut aavi nunamut kuisat tamaasa, Abelip iluartup aavanit.’ (Matîuse 23:33-35) Aap, upperisarsiorneq ilumuunngitsoq Edenimi pikitsitsinermi aallartissimavoq, aammillu kuisisarnerminut amiilaarnartumut pinngitsoorani akisussaatinneqassaaq.
19, 20. (a) Babylon Angisuumut eqqartuussut naammassineqareerpat pallorfiginnittut ilumoortut sussappat? (b) Taava susoqassava, pallorfiginnittullu ilumoortut tamarmik qanoq siunissaqassappat?
19 Babylon Angisooq suujunnaarsinneqareerpat pallorfiginnittut ilumoortut nunamiittut qilammi erinarsortunut erinarsoqataassapput: ’[Jehova unnersiutigisaali, NV] . . . uersartorsuaq uersarnermigut nunamik aseruisoq eqqartuukkamiuk, kiffamilu aavi assaanit apeqqutigigamigit. . . . Pujualu majortuassaaq naassaanngitsumik.’ — sarĸúmersitat 19:1-3.
20 Tamanna pereerpat Satanip peqatigiissortaasa takussaasut sinneri suujunnaarsinneqassapput. (sarĸúmersitat 19:17-21) Taava Satan, upperisarsiornermik ilumuunngitsumik tunngaviliisoq, inngilipiluilu itinersuarmut iginneqassapput, Jehovap pallorfiginnittaanik ilumoortunik malersuisinnaajunnaarsillugit. (sarĸúmersitat 20:1-3) Taamaalilluni upperisarsiorneq ilumoortoq upperisarsiornermut ilumuunngitsumut ajugaassaaq. Taava angutit arnallu aalajaatsut, Guutip Babylon Angisuumit aneqqusineranut ullumikkut naalattut, aniguinissaminnut Guutillu silarsuassaanut nutaamut isernissaminnut periarfissaqalissapput. Tamaanilu guutisiorneq ilumoortoq aallullugulu Jehova naassaanngitsussamut pallorfigisinnaassavaat. (wD 1/12 91)
[Quppernerup ataani ilanngussat]
a Vagttårnet-imi, 15. juli 1985, qupp. 12, 13-imi nassuiarneqarpoq inngilinik pallorfiginninneq Kulorsamiut 2:18-imi eqqartorneqartoq sunik ilaqartoq.
b Siulittuummik tamatuminnga nassuiaat sukumiisoq nassaassaavoq atuakkami Åbenbaringen — Det store klimaks er nær!-imi, kapitali 33-36-mi, Vagttårnip Peqatigiiffiata naqitigaani.
Apeqqutit uteqqiissutissat
□ Kia upperisarsiornermut isiginninnera pingaarnerpaava, sooq?
□ Pallorfiginnittunut ilumoortunut piumasarisat marluk suut Jakobip eqqaavai?
□ Pallorfiginninnermut minguitsumut suut allat aamma piumasarisaappat?
□ „Tusagassaq nuannersoq“ suna Jehovap nalunaajaasuisa oqaluussissutigaat?
□ Pallorfiginninneq ilumoortoq qanoq ililluni pallorfiginninnermut ilumuunngitsumut ajugaassava?
[Qupp. 16-mi assiliartaq]
Upperisarsiornikkut pisortat Assisimi Italiamiittumi, oktoberi 1986-imi katersuuttut