Eqqortumik upperisarsiorneq nanisimaviuk?
’Guutisiorneq Guutip Ataatap minguitsuutitaa assuarinngisaalu tassa imaattoq.’ — JÂKO 1:27.
1, 2. (a) Inuppassuit isumaat malillugu suut upperisarsiornerup eqqortuussusianut aalajangiisuuppat? (b) Suna eqqarsaatigisariaqarparput paasissagutsigu upperisarsiorneq aalajangersimasoq eqqortuusoq?
ULLUMIKKUT inuppassuit upperisarsiorneq soqutigivallaanngilaat. Immaqa ilaannikkut naalagiartarput, ikittuinnaalli aalajangersimasumik taamaaliortarput. Inuit amerlanersaat isumaqanngillat upperisarsiornerit allat tamarmik eqqunngitsuusut namminnerlu upperisarsiornertik eqqortuusoq. Isumaqaannartarput upperisarsiornertik imminnut naleqquttuusoq.
2 Tamanna eqqarsaatigalugu apeqqut qulaaniittoq, ’Eqqortumik upperisarsiorneq nanisimaviuk?’ ima paasisariaqaannarnerpa: Upperisarsiorneq illit nammineq iluarisat nanisimaviuk? Suut imaluunniit kikkut illit iluarinninnut aalajangiisuuppat? Ilaquttatit? Ilagisartakkatit? Misigissutsitit? Guutip tamatumunnga isumaqarnera eqqarsaatigisimaviuk?
Qanoq ililluta nalunngissinnaavarput Guuti qanoq isumaqarnersoq?
3. (a) Guutip isiginnittaasia paasiumagutsigu suna pisariaqartipparput? (b) Biibili ilumut Guutiminngaaneersoq oqarutta imminut qanoq aperisariaqarpugut?
3 Guuti nammineq qanoq eqqarsaateqarnersoq paasissagutsigu taassumannga saqqummersitsivigineqarnissaq pisariaqarpoq. Biibili tassaavoq atuakkat Guutimit isumassarsiarititaanerartut pisoqaanersaat. (2 Timûtiuse 3:16, 17) Ilumoorlunili oqartoqarsinnaava atuagaq tamanna, atuakkat allat tamaasa assiginagit, Guutip inuiannut tamanut tusarliussaanik imaqartoq? Illit tamanna qanoq akissaviuk, aamma sooq taama akissavit? Angajoqqaatit taama isumaqarmata? Ikinngutitit taama isumaqarmata? Uppernarsaatissat nammineq misissorsimavigit? Maannakkut taamaaliorsinnaavutit, uppernarsaatit immikkut ittut sisamat assigiinngitsut maanna eqqartorneqartussat misissorlugit.
4. Sumiluunniit pissarsiarineqarsinnaanera eqqarsaatigalugu suup takutippaa Biibili atuakkat allat assiginagit Guutimeersuusoq?
4 Sumiluunniit pissarsiarineqarsinnaavoq: Inuiannut tamanut tusarliussaq Guutimit pisoq soorunami kialuunniit pissarsiarisinnaasariaqarpaa. Biibili taamaappa? Manna eqqarsaatigeriaruk: Biibili, tamarmi ilaannaaluunniit, maannakkut oqaatsinut 2000-init amerlanerusunut nutserneqarsimavoq. Amerikami Biibilinik Naqiterisitsisarfik naapertorlugu ukiut qulit matuma siorna Biibili oqaatsinut ima amerlatigisunut naqiterneqarsimavoq nunarsuup inuisa 98 procentiinit atuarneqarsinnaalersimalluni. Soorlu Guinness Rekordbog-imi allanneqarsimasoq Biibili tassaavoq „silarsuarmi tamarmi atuakkat siammarsimanerpaartaat“. Tamannarpiarlu ilimagissavarput tusarliussaq Guutimeersoq inunnut oqaasilinnut tamanut inuiaqatigiinnillu tamaneersunut oqariartuut pineqarpat. (Naleqqiuguk sarĸúmersitat 14:6.) Silarsuarmi allamik taama siammarsimatigisoqanngilaq.
5. Sooq Biibilip oqaluttuarisaanermik tunngaveqarnera pingaaruteqarpa?
5 Oqaluttuarisaanermik tunngaveqarpoq: Biibilimi oqaluttuarineqartut misissoqqissaaraanni aamma paasinarsissaaq Biibili atuakkanit illernartutut isigineqartunit allanit allaanerulluinnartoq. Biibili pisimasuinnik imaqarpoq, oqaluttualiaannarnik uppernarsarneqarsinnaanngitsunik imaqarnani. Eqqartuussissuserisoq Irwin Linton uppernarsaatinik misissueqqissaarnermik sungiussimalluartoq ima allassimavoq: „Oqaluttualiani, oqaluttualiani upperniutitalinni ilisimannittullu nalunaajaataanni eqqunngitsuni pisut eqqartorneqartut sumiugaluarnersoq ungasissumi qangarpiaagaluarnersorlu pisutut eqqartorneqaqqissaartarput, . . . Biibilimili pisimasut eqqartorneqartut piffii sumiiffiilu oqaluttuareqqissaarneqartarput.“ (Assersuutigalugu takukkit 1 Kunngit 14:25; Jesaja 36:1; Lúkarse 3:1, 2.) Inunnut pissutsinit piviusunit qimaaniarnatik sallusuissummulli qimaaniartunut paasisaq tamanna pingaartorujussuuvoq.
6. (a) Biibili qanoq ililluni inuunerup ajornartorsiutaanut iluaqutaasinnaava? (b) Ajornartorsiutinik aaqqiiniarneq eqqarsaatigalugu Biibili sutigut pingasutigut iluaqutaava?
6 Atoriaannaavoq: Biibilimik misissueqqissaartut paasigasuartarpaat inatsisit najoqqutassiallu inuit iluanaarniapiluffiginiarlugit allanneqarsimanngitsut. Akerlianik najoqqutassiat tamakku maleruaraanni inooriaatsimut iluaqutaasorujussuarmik kinguneqartarput. (Jesaja 48:17, 18) Aliasuttut tassani tuppallersaatissaq piviusoq, isumaliutersuutit imaqanngitsut pinnagit, nanisinnaavaat. Inuit inuunermi artornartut piviusut iliuuseqarfiginissaannut ikiorneqartarput. Qanoq ililluni? (1) Biibilimi ajornartorsiutit aaqqinneqarnissaannik pitsaasunik unnersuussuteqarpoq, (2) nassuiarneqarpoq ullumikkut qanoq Guutip kiffani asannittumik tapersersorai, taavalu (3) siunissaq nuanningaartoq Guutip kiffaminut siunertarisaa tassani saqqummersinneqarmat taassuma neriorsuutai tatigissallugit pissutissaqarluarput.
7. (a) Allassimaffiit quppernerup immikkoortup tamatuma ataaniittut atorlugit nassuiaruk Biibili inuit ullumikkut apeqqutigisartagaasa ilaannut qanoq akissutissaqartoq. (b) Nassuiaruk qanoq unnersuussutit Biibilimeersut pissutsini artornartuni ikiuutaasinnaasut.
7 Naak inuit allanit oqartussaaffigineqarusunngitsut namminissarsiortumillu inooriaasillit unnersuussutit Biibilimeersut iluarinngikkaluaraat, inuppassuit paasisimavaat taakkua inooriaasiat piviusumik pilluarnartuunngitsoq. (Galâsiamiut 6:7, 8) Naartuersinneq, avinneq angutillu anguteqamminnik arnallu arnaqamminnik atoqateqartarnerat pillugit apeqqutissat Biibilimi ammasumik akineqarput. Unnersuussutit tamakku ikiaroornartunik imigassanillu atornerluinissamut aakkullu kanngunartuliornikkulluunniit AIDS-imik tunillanneqarnissamut illersuutaasarput. Ilaqutariittut inuuneq pilluarnartoq qanoq anguneqarsinnaasoq tassani allaatigineqarpoq. Akissutissat Biibilimeersut ikiortigalugit inuit inuunermi pissutsit artornarnerpaat, soorlu qanigisanit ajattorneqarneq, sualuttumik nappaateqarneq asasamillu toqusoorneq, nikallujuillutik atorsinnaavaat. Biibilimi ikiorneqarpugut paasitilluta inuunerput peqqissimissutissaniunngitsoq siunertaqarluartumilli imaqarlualissappat suut pingaartittariaqarivut.a
8, 9. (a) Siulittuutit ilaat suna pingaartillugu Biibilip isumassarsiarititaaneranut uppernarsaatitut isigaajuk? (b) Siulittuutit Biibilimiittut suminngaaneersimassappat?
8 Siulittuutit: Biibili immikkut ittuuvoq siunissami pisussat tassani siulittuutigineqarmata, allaat annikitsualuttaat ilanngullugit. Itsaq illoqarfiusimasup Tyrusip aserorneqarnera, Babylonip pissaaneerukkiartornera, Jerusalemip qarmaqqineqarnera, Medo-Persiap Grækenlandillu pissaaneqaleriartornerat pissaaneerukkiartornerallu Jesus Kristusillu inuunerani pisimasorpassuit siumut eqqartorneqarput. Aamma ukiuni hundredelinni makkunani silarsuarmi pissutsit ineriartorsimanerat pingaaruteqarnerallu Biibilimi siulittuutigineqarput. Takutippaa ajornartorsiutit naalakkersuisut aaqqissinnaanngisaat qanoq ilillutik aaqqinneqarumaartut, takutippaalu Naalagaq kina inunnut piviusumik eqqissinissamik isumannaassusissamillu pilersitsiumaartoq.b — Jesaja 9:6, 7; 11:1-5, 9; 53:4-6.
9 Soqutiginarpoq Biibilimi siunissamik eqqortumik siulittuisinnaaneq Guutiussutsimik takutitsinertut eqqartorneqarmat. (Jesaja 41:1–46:13) Taamaaliorsinnaasoq taamaaliortitsisinnaasorlu tassaanngilaq guutiliaq uumassuseqanngitsoq. Tassaanngilaq inuk upperluartoq. Tassaavoq Guuti ilumoortoq, atuagarlu siulittuutinik taamaattunik imalik oqaaseraa. — 1 Tásalûníkamiut 2:13.
Biibilimik atuisut tamarmik ilumoornerpat?
10, 11. Jesusip oqarneratut, naak palasip Biibili atortaraluaraa, upperisarsiornera suup naleerutissavaa?
10 Silatusaarnerussava — aamma Biibili naapertorlugu eqqortuua — isumaqassalluni upperisarsiortut tamarmik Biibilimik atuinerartut eqqortumik upperisarsiortuusut? Biibilimik tigumiartut issuaasullu tamarmik eqqortumik upperisarsiorpat?
11 Palasit ilarpassui Biibiliuteqaraluarlutik upperisarsiorneq imminnut ataqqinartinnissaminnut atortarpaat. Sallusuissutsit minguitsut ileqqulersuutinik inuillu isumaliutersuutaannik akoornerisigut kimikillisittarpaat. Guutisiorneq taamattoq Guutip iluaraa? Ukiuni hundredelinni siullerni Jerusalemimi upperisarsiornikkut pisortaasut taamattorluinnaq iliorsimasut pillugit Jesusip naleqqulluartumik Guutip Esajasimut oqaaserisimasaa atorpaa, ima oqarluni: ’Inuit ukua qarluminnik ataqqisarpaannga, uummataasali ungasippaannga; asuliinnaq kiffartuuttaraannga, ajoqersuutit inuinnaat inatsisigisaat ajoqersuutigisaramikkik.’ (Matîuse 15:8, 9; 23:5-10) Aap, upperisarsiorneq taama ittoq eqqortuunngivippoq.
12, 13. (a) Upperisarsioqatigiit iliuusiisa qanoq takutissinnaavaat eqqortumik upperisaqarnersut imaluunniit naami? (b) Inunnik Guutip iluarinngisaanik ilagisartagaqarutta, taassuma pallorfiginninnerput qanoq isigissavaa? (2 Israelikkut 19:2)
12 Taavami upperisarsiornerup aalajangersimasup ajoqersuutaasa kingunerisaannik ilaasortaasut inuunerminni ajortunngorsimasunik inerititaqarpata? Qaqqami oqaluutsimini Jesus ima mianersoqqusivoq: ’Pruffiitioqqusersunut misissoritsi . . . Inerititaannit ilisarissavasi. . . . Taama orpik ajunngitsoq nungullugit ajunngitsunik inerititaqartarpoq, orpilli ajortoq ajortunik inerititaqartarpoq.’ (Matîuse 7:15-17) Ilumoorpoq inuit ataasiakkaat eqqunngitsuliorsinnaammata oqaaqqissaarneqarnissaminnillu pisariaqartitsillutik. Allaavorli ilagiinnut ilaasortaasut, allaallu palasit, kanngunartuliortarlutillu allasiortarpata, nakuusertarlutik, imerajuttuullutik, piumatuujullutik, sallusarlutik, anersaalerisarlutik guutipilussiortarlutilluunniit, taamaattorli oqaaqqissaarneqaratik ilagiinnut ilaasortaajuaannarsinnaatitaallutik. Biibilimi ersarissumik allassimavoq taamaaliortut ilagiinnit ilaasortaajunnaarsitaasariaqartut; Guutip naalagaaffianut isersinnaanngornavianngillat. (Galâsiamiut 5:19-21) Pallorfiginninnerat Guutip iluarinngilaa, uagullu pallorfiginninnerput iluarissanngilaa akuerinngisaminik ilagisartagaqartarutta. — 1 Korintumiut 5:11-13; 6:9, 10; sarĸúmersitat 21:8.
13 Ersarippoq Biibilimut uppertuunerartut tamakkeratik eqqortumik upperisarsiorneq Biibilimi allaaserineqartoq maleruaraat. Taavami Biibili naapertorlugu eqqortumik upperisarsiorneq sunik ilisarnaateqassava?
Eqqortumik upperisarsiornerup ilisarnaatai
14. (a) Eqqortumik upperisarsiornerup ajoqersuutai sumik tunngaveqartariaqarpat? (b) Tamanna eqqarsaatigalugu Guuti inuullu tarnaa pillugit kristumiuuneraqatigiit ajoqersuutaat qanoq nalilerneqartariaqarpat?
14 Ajoqersuutai Allakkanik isumassarsiarititaasunik tunngaveqarluinnartariaqarput. „Allakkat illernartut tamarmik Guutip sunniineratigut isumassarsiarititaapput iluaqutaallutik ajoqersuutaallutillu inerteqqutaallutik, iluarsiartuutaallutik.“ (2 Timûtiuse 3:16, NV) Biibilimili sumi Guutip ataasiullunilu pingasuussusia kristumiuuneraqatigiit ajoqersuutigisaat eqqartorneqarpa? Palaseqatigiillu inuup tarnaanik toqusuitsumik timip toqunerata kingorna inooqqittartumik ajoqersuutigisaat Biibilimi sumi eqqartorneqarpa? Palasi aperisimaviuk ajoqersuutit tamakku nammineq biibiliutinni sumi allanneqarsimanersut takuteqqullutit? The New Encyclopædia Britannica-mi manna allassimavoq: „Oqaatsit Guuti ataasiullunilu pingasuusoq ajoqersuulluunniit tamanna Testamentitaami eqqartorneqanngillat.“ New Catholic Encyclopedia-milu manna miserratigineqanngilaq: „Ilagiinni ajoqersuisuunerit eqqarsaammik isummamilluunniit taama ittumik eqqartugaqarsimanngivipput.“ Upperisarsiornermillu ilisimatuut miserratiginngilaat tarneq toqunermi timimit avissaartartoq pillugu eqqarsaat grækeritoqqat isumaliutersuutaannit tigusaasimasoq. Kisianni eqqortumik upperisarsiornerup sallusuissut Biibilimeersoq inuit isumaliutaannit tunullinngortikkumanngilaa. — 1 Moses 2:7; 5 Moses 6:4; Hesekiel 18:4; Juánase 14:28.
15. (a) Biibili naapertorlugu kina kisimi pallorfigineqartussaava? (b) Eqqortumik pallorfiginnittut qanoq ilillutik Jehovamut qanillisutut misigisarpat?
15 Eqqortumik upperisarsiornermi Guuti ilumoortutuaq, Jehova, kisimi pallorfigineqarpoq. (5 Moses 4:35; Juánase 17:3) Mosesimik allakkat tallimaat 5:9 issuarlugu Jesus oqarsimavoq: ’Jehova Guutit pallorfigissavat kiffartuullugulu taanna kisiat.’ (Matîuse 4:10) Taamaattumik Jesusip Ataatami aqqa ajoqersukkaminut nalunaarsimavaa. (Juánase 17:26) Illit upperisavit Jehovamik pallorfiginninnissannik ilinniartissimavaatit? Guuti taama atilik ilisimaviuk — siunertai, iliuusii, pissusii ilikkarlugit — tatiginnillutit qanilliartorsinnaaqqullugu? Upperisat eqqortuusimappat angersinnaassaatit. — Lúkarse 10:22; 1 Juánase 5:14.
16. Eqqortumik upperisarsiortunut Jesus Kristusimut upperneq qanoq pingaaruteqartigaa?
16 Pallorfiginninnerup Guutip iluarisaata ilaa pingaartoq tassaavoq erneranut, Jesus Kristusimut, upperneq. (Juánase 3:36; apustilit suliait 4:12) Ima paasisariaqaannanngilaq upperisariaqaripput taanna inuusimasoq imaluunniit inuttut immikkut ittuusimasoq. Aamma ima paasisariaqarpoq Jesusip inuttut naammalluinnartutut inuunerminik pilliuteqarnerata naleqassusia aammalu ullumikkut qilammi kunngitut inissisimaffeqarnera pingaartillugit akuerisariaqarivut. (Tussiaat 2:6-8; Juánase 3:16; sarĸúmersitat 12:10) Eqqortumik upperisarsiortut ilagisarukkit nalussanngilat taakkua ullut tamaasa ilungersorlutik Jesus naalakkaat, maligassiaa malinniarlugu suliassarlu taassuma ajoqersukkaminut peqqussutigisimasaa peqataaffigalugu. (Matîuse 28:19, 20; Juánase 15:14; 1 Pîtruse 2:21) Upperisarsioqatitit taamaaliorneq ajorpata allamik ujarlertariaqarputit.
17. Eqqortumik upperisarsiortut sooq silarsuarmit mingutsinnaveersaartarpat, qanorlu ilillutik?
17 Eqqortumik upperisarsiorneq naalakkersuinermut imaluunniit silarsuarmi saqitsaannernut akuliusimannginnami tamakkunannga mingutsitaanngilaq. (Jâko 1:27) Sooq akuliusimanngila? Jesus malinnitsini pillugit ima oqarsimammat: ’Silarsuup inuisa ilaginngilaat, soorlu uangattaaq silarsuup inuisa ilaginngikkaannga.’ (Juánase 17:16) Jesus naalakkersuinermut akuliusimasimanngilaq, ajoqersukkanilu mianersoqqusimallugit sakkunik nunap piinik atueqqunagit. (Matîuse 26:52) Guutip oqaasianik ilassinnittut ’sakkunik atuinissamut sungiusarunnaassapput’. (Jesaja 2:2-4) Upperisarsioqatigiit illit ilagisartakkatit taamaanngippata taakkununnga ilaajunnaarnissannut piffissanngorpoq. — Jâko 4:4; sarĸúmersitat 18:4, 5.
18. (a) Juánase 13:35 naapertorlugu eqqortumik upperisarsiornerup ingammik suna ilasarnaatigaa? (b) Qanoq ilillutit alla ikiorsinnaaviuk paaseqqullugu kikkut Juánase 13:35 maleruarneraat?
18 Eqqortumik upperisarsiornikkut asanninneq namminissarsiunngitsoq ajoqersuutigineqarlunilu iliuuserineqartarpoq. (Juánase 13:35; 1 Juánase 3:10-12) Asanninneq tamanna oqaluussissutissaannaanngilaq. Inuit naggueqatigiinnit tamaneersut, innuttaaqatigiinni inissisimaffinnit tamaneersut, oqaasilinnit tamaneersut inuiaqatigiinnillu tamaneersut tassuuna piviusumik qatanngutigiilersarput. (sarĸúmersitat 7:9, 10) Asanninnerup tamatuma kristumiut ilumoortut silarsuarmiunit avatangiisaannit allaanerulluinnartippai. Misilissimanngikkukku Jehovap nalunaajaasuisa rigssalianni ataatsimiinnernut ataatsimeersuarnernullu najuunniarna. Rigssaliliorlutik suleqatigiikkaangata maluginiariakkit. Maluginiakkit qanoq utoqqasaanut (uillarnernullu) inuusuttunullu (aamma iliarsunnut) qanoq iliorfiginnittartut. (Jâko 1:27) Malugisatit upperisarsioqatigiinni allani takusimasannut naleqqiutikkit. Imminut apereriarit, ’Kikkut eqqortumik upperisarsiorpat?’
19. (a) Eqqortumik upperisarsiortunit suna inuiaat ajornartorsiutaannut aaqqiissutissatut pingaartinneqarpa? (b) Eqqortumik upperisarsiortut suliassaq suna aalluttariaqarpaat?
19 Eqqortumik upperisarsiortuni Guutip naalagaaffia inuiaat ajornartorsiutaannut aaqqiissutissatuatut pingaartinneqarpoq. (Daniel 2:44; 7:13, 14; 2 Pîtruse 3:13; sarĸúmersitat 21:4, 5) Upperisarsioqatigiit kristumiuunerartut ilaat taamaaliorpat? Qanga kingullermik tusarsimaviuk palasip nassuiaraa Guutip naalagaaffia sunaanersoq sunillu naammassisaqarumaartoq? Upperisarsioqatigiit illit ilaaffigisavit kajumissaarnerpaatsit inuit allat Guutip naalagaaffia pillugu oqaluussiffigeqqullugit, taamaappallu uppeqatitit tamarmik taamaaliortarnerpat? Jesus taama nalunaajaasimavoq; ajoqersugaalu siulliit taamaaliortarsimapputtaaq. Illittaaq suliassaq tamanna peqataaffigisinnaavat. Ullumikkut nunarsuarmi tamarmi suliarineqartut pingaarnerpaartaraat. — Matîuse 24:14.
20. Eqqortumik upperisarsiorneq naniinnarnagu aamma qanoq iliortariaqarpugut?
20 Naak upperisarsioqatigiit tuusintilippassuugaluartut Biibili ikiortigalugu erniinnaq paasisinnaavarput kikkut ilumoornersut. Eqqortumilli upperisarsiornerup naninissaannaa naammanngilaq. Aamma maleruartariaqarparput. Qanoq ililluta taamaaliorsinnaasugut ilanngutassiami tulliuttumi itinerusumik misissussavarput. (wD 1/6 94)
[Quppernerup ataani ilanngussat]
a Naartuersinneq: apustilit suliait 17:28; Tussiaat 139:1, 16; 2 Moses 21:22, 23. Avinneq: Matîuse 19:8, 9; Rûmamiut 7:2, 3. Angutit anguteqamminnik arnallu arnaqamminnik atoqateqartarnerat: Rûmamiut 1:24-27; 1 Korintumiut 6:9-11. Ikiaroornartunik imigassanillu atornerluineq: 2 Korintumiut 7:1; Lúkarse 10:25-27; Ussatit 23:20, 21; Galâsiamiut 5:19-21. Aammik atornerluineq kanngunartuliornerlu: apustilit suliait 15:28, 29; Ussatit 5:15-23; Jeremia 5:7-9. Ilaqutariittut inuuneq: Evfisumiut 5:22–6:4; Kulorsamiut 3:18-21. Ajattugaaneq: Tussiaat 27:10; Malaki 2:13-16; Rûmamiut 8:35-39. Nappaateqarneq: sarĸúmersitat 21:4, 5; 22:1, 2; Títuse 1:2; Tussiaat 23:1-4. Toqusoqarneq: Jesaja 25:8; apustilit suliait 24:15. Suut pingaarnerunersut: Matîuse 6:19-34; Lúkarse 12:16-21; 1 Timûtiuse 6:6-12.
b Siulittuutinik tamakkuninnga eqquutitinneqarsimanerannillu assersuutit misissorusukkukkit atuakkami Bibelen — Guds ord eller menneskers?-mi quppernerit 17-61; aamma Lad os ræsonnere ud fra Skrifterne-mi quppernerit 49-51, 127-34, 331-38 takukkit. Atuakkat tamarmik (kalaallisuunngortitaanngitsut) Napasuliaq Alapernaarsuiffiup Peqatigiiffianit naqiterneqarput.
Qanoq akissavit?
□ Eqqortumik upperisarsiorneq nanissagutsigu kia isumaa pingaarnerpaava?
□ Uppernarsaatit sisamat suut takutippaat Biibili Guutip oqaaserigaa?
□ Sooq upperisarsioqatigiit Biibilimik atuisut tamakkeratik Guutimit iluarisaappat?
□ Eqqortumik upperisarsiornerup ilisarnaataasa ilaat arfinillit taasinnaavigit?
[Qupp. 10-mi ungalusaq]
Jehovap Nalunaajaasui . . .
◆ Biibilimik tunngaveqartunik ajoqersuuteqarput.
◆ Guutimik ilumoortutuamik Jehovamik pallorfiginnipput.
◆ Jesus Kristusimut uppernerminnut naapertuuttumik inooriaaseqarput.
◆ naalakkersuinermut imaluunniit silarsuarmi saqitsaannernut akuliunneq ajorput.
◆ ulluinnarni asanninnermik namminissarsiunngitsumik ersersitsiniartarput.
◆ Guutip naalagaaffianik inuiaat ajornartorsiutaannut aaqqiissutissatuatut isiginnipput.
[Qupp. 9-mi assiliartaq]
BIIBILI — sooq oqarsinnaavugut Guutip inuiannut tamanut tusarliussaanik imaqartoq?