Jesus Kristus naalagaaffiup naalannassusiani tikiuppat
’Ukua maaniittut ilaasa inuup Erneranik naalagaalluni aggersumik takutinnatik toqu misigissanngilaat.’ — MATÎUSE 16:28.
1, 2. Ukiumi 32-mi u.n.k. piinsip ulluata kinguninnguagut sumik pisoqarpa, pisumilu tamatumani suna siunertaava?
UKIUMI 32-mi u.n.k. piinsip kinguninnguagut Jesus Kristusip apustiliisa ilaat pingasut puiunaatsumik takusaqarput. Tamanna Biibilimi isumassarsiarititaasumik ima oqaluttuarineqarpoq: ’Peter Jakobilu qatanngutaalu Johannes Jesusip ilaserai qaqqamut kingittumut asiaqatigalugit. Isigitillugillu allatut isikkoqalerpoq.’ — Matîuse 17:1, 2.
2 Allatut isikkoqalernermik takusaqarneq tamanna piffissami pingaartumi pivoq. Jesusip ajoqersukkani oqaluttuutereersimavai Jerusalemimi anniartitaallunilu toqutaasussaanerminik, oqaasiili taakkunannga paasiuminaatsinneqarput. (Matîuse 16:21-23) Jesusip apustiliisa pingasut takorruuisitaanertik tamanna Jesusip toqutaanissaanik ukiunillu artornartunik misilinneqarfiusunillu, ilagiit kristumiut suliassartik annertooq suliariitigalugu atugariumaagassaannik, piareersimaffiginninnissaminnut nakussatsissutigaat. Takorruugaq tamanna uagut ullumikkut arlaannik ilinniarfigisinnaavarput? Aap, tassuunakkummi siumut tikkuarneqartoq ullumikkut nalitsinnerpiaq pivoq.
3, 4. (a) Jesus allatut isikkoqalersitaanissani ullunik arfinilinnik sioqqullugu qanoq iliorpa? (b) Takorruukkami qanoq pisoqarpa?
3 Allatut isikkoqalernini tamanna ullunik arfinilinnik sioqqullugu Jesusip ajoqersukkani ima oqarfigisimavai: ’Inuup Ernera aggerumaarpoq Ataatami naalannassusia pigalugu inngilinilu ilagalugit; taavalu tamaasa immikkut akilissavai qanoq iliorneri naapertorlugit.’ Oqaatsit taakkua eqquuttussaasimapput ’silarsuup matuma naggatissaani’. Jesus ima nangippoq: ’Ilumut oqarfigaassi: ukua maaniittut ilaasa inuup Erneranik naalagaalluni aggersumik takutinnatik toqu misigissanngilaat.’ (Matîuse 16:27, 28; 24:3; 25:31-34, 41; Daniel 12:4) Oqaatsit kingulliit taakkua eqquunnerattut allatut isikkoqalerneq pivoq.
4 Apustilit pingasut sunarpiaruna takusimagaat? Pisut Lukasip ima oqaluttuarai: ’Qinutillugu kiinaata isikkua allanngorpoq, annoraavalu qaqortunngorpoq akisuttorsuanngorluni. Atalu, angutit marluk oqaloqatigaat, tassa Mosesillu Eliasillu; taakku takutipput naalannassuseqarlutik, naggasiinissaallu Jerusalemimi naammassisassaa oqaluuseraat. . . . Taamali oqalutsillugu nuiaq pinngorpoq ulillugillu; annilaarpullu nuiap iluanut pigamik. Nipilu nuiamit tutsiuppoq oqartoq: „Tassa Ernera qinigaq, taanna tusarsiuk.“’ — Lúkarse 9:29-31, 34, 35.
Upperneq nakussatsinneqarpoq
5. Takorruugaq apustilimut Peterimut qanoq sunniuteqarpa?
5 Apustilip Peterip siusinnerusukkut paasereersimavaa Jesus tassaasoq ’Kristus Guutip uumasup Ernera’. (Matîuse 16:16) Tamanna Jehovap qilammit oqaasiinit uppernarsaqqinneqarpoq, Jesusillu allanngorneranik takorruuisitaaneq qilanaartuutaavoq Kristusip inuiaat inaarutaasumik eqqartuutissallugit Naalagaaffiup pissaanerani naalannassusianilu tikiunnissaanut. Takorruuisitaanermit ukiut 30-t qaangiuttut Peter ima allappoq: ’Uagut Naalakkatta Jesus Kristusip pissaaneranik tikiunnissaanillu nalunaarfigigassi, oqaluttuapalaat eqqumiitsuliat malillugit pinngilagut, kisianni angingaarsusianik isiginnaartuutitaalluta pivugut, tassa Guutip Ataatap ataqqinartillugu naalannartimmagu, taassumunnga pimmat naalannangaartorsuarmit nipi imaattoq: „Tassa Ernera asanartoq nuannarisara.“ Nipilu tamanna qilammit pisoq uagut qaqqami illernartumi ilagigatsigu tusarparput.’ — 2 Pîtruse 1:16-18; 1 Pîtruse 4:17.
6. Takorruuisitaanerup kingorna qanoq pisoqartarpa?
6 Ullumikkuttaaq uagut uppernitsinnut apustilit takusimasaat nakussatsinnartuuvoq. Soorunami ukiup 32-p u.n.k. kingorna allanik pisorpassuaqarpoq. Aappaaguani Jesus toqutaavoq, toqusunillu makititaalluni qilaliarpoq Ataatamilu talerpiata tungaaniilerluni. (apustilit suliait 2:29-36) Ukiumi tamatumani piinsip ulluani ’Israel Guutip pigisaa’ nutaaq pilersinneqarpoq, oqaluussinerlu aallartinneqarpoq, siullermik Jerusalemimi kingornalu nunarsuarmi tamarmi. (Galâsiamiut 6:16; apustilit suliait 1:8) Ingerlaannangajak Jesusip ajoqersugai uppernermikkut misilinneqartalerput. Apustilit oqaluussiunnaarumannginnertik pillugu tigusaapput ingasattumillu unatarneqarlutik. Sivitsunngitsoq Stefanus inuartarineqarpoq. Taava Jakob, Jesusip allanngortitaaneranik takunnittuusimasoq, toqutaavoq. (apustilit suliait 5:17-40; 6:8–7:60; 12:1, 2) Peterili Johannesilu aniguipput sulilu ukiorpassuarni aalajaallutik Jehova kiffartuullugu. Ukiut hundredellit siulliit naalerneranni Johannes Jesusip qilammi naalannassusianut atatillugu takorruuisitaavoq tamakkualu pillugit allagaqarluni. — sarĸúmersitat 1:12-20; 14:14; 19:11-16.
7. (a) Takorruugaq qanga eqquulluni aallartippa? (b) Qanga Jesus iliuutsit naapertorlugit akissarsisitsiva?
7 1914-imi ’Naalakkap ulluata’ aallartinneranit Johannesip takorroorsimasaasa ilarpassui eqquussimapput. (sarĸúmersitat 1:10) Oqaatigineqareersutut Jesusip allatut isikkoqalersitaaneratigut siumut tikkuarneqarpoq taassuma ’Ataatami naalannassusia pigalugu aggernissaa’. Takorruugaq tamanna Guutip qilammi naalagaaffiata 1914-imi pilersinneqarnerani eqquutilerpoq. Jesus, ulloriaq qaasiut assigalugu, kunnginngortitatut nutaatut saqqummermat ullorlusooq nutaaq aallartippoq. (2 Pîtruse 1:19; sarĸúmersitat 11:15; 22:16) Taamaalinerani Jesus arlaannik qanoq iliorneri naapertorlugit akissarsisitsiva? Aap. Kunnginngornerata kinguninnguatigut kristumiut tanitat qilammut makitinneqartalernerannut ersarissunik takussutissaqarpoq. — 2 Timûtiuse 4:8; sarĸúmersitat 14:13.
8. Takorruukkap eqquunnera pisunik sunik naggaserneqassava?
8 Taava ungasinngitsukkut Jesus ’naalannassutsi atisimallugu inngilillu tamaasa ilagalugit tikiutissaaq’ inuiaat tamaasa eqqartuukkiartorlugit. (Matîuse 25:31) Taamanikkussamut naalannassutsi tupinnangaartoq tamaat saqqummersissavaa inuillu ’tamaasa immikkut’ qanoq iliorneri naapertoqqissaarlugit naapertuilluartumik iliuuseqarfigissallugit. Inuit savatut pissusillit Naalagaaffimmi inuuneq naassaanngitsoq imminnut pissamaartitaasoq kingornutissavaat, savaasatullu pissusillit peersitaassapput ’naassaanngitsumik pillagaassallutik’. Taamaalilluni Jesusip allatut isikkoqalersitaaneranik takorruukkap eqquunnera nuanningaartumik naammassineqassaaq! — Matîuse 25:34, 41, 46; Mákorse 8:38; 2 Tásalûníkamiut 1:6-10.
Jesus peqatigalugu naalannarsisitaasut
9. Naatsorsuutigissavarput takorruukkap eqquunnerani Mosesip Eliasillu Jesus ilagissagaat? Nassuiaruk.
9 Jesus allatut isikkoqalersitaanermini kisimiinngilaq. Moses Eliasilu ilagigai takuneqarpoq. (Matîuse 17:2, 3) Taakku piviusumik takuneqarpat? Naamik, tamarmimmi qangarsuarli toqoreersimapput makititaanissartillu ilivermi utaqqillugu. (Nalunaajaasup oqaasii 9:5, 10; Eprîarit 11:35) Taavami Jesus qilammiutut naalannassutsimini tikiuppat taakkua ilagissavaat? Naamik, Moses Eliasilu qilammi inuulernissamik neriugisap inunnut ammarneqarnera sioqqullugu inuusimapput, taamaammat ’iluartunut’ nunarsuarmi makititaasunut ilaassapput. (apustilit suliait 24:15) Takorruukkami ilaanerat assersuutaavoq. Sumut assersuutaava?
10, 11. Sutigut allatigut Moses Eliasilu kikkunnut assersuutaasimappat?
10 Allatiguttaaq Moses Eliasilu siulittuutaasumik assersuutitut atorneqartarsimapput. Inatsisit tunngavigalugit angerutsimi akunnermiliuttutut Moses Jesusimut, angerusisaamut akunnermiliuttumut, siumut assersuutaasimavoq. (5 Moses 18:18; Galâsiamiut 3:19; Eprîarit 8:6) Elias Johannesimut Kuisisumut, Messiasimik aqqutissiuisussamut, siumut assersuutaasimavoq. (Matîuse 17:11-13) Kiisalu sarĸúmersitat kapitaliisa 11-anni takuneqarsinnaavoq Moses Eliasilu tanitanut sinneruttunut naggatissap nalaani inuusunut siumut assersuutigineqartut. Tamanna qanoq ililluta nalunngilarput?
11 sarĸúmersitat 11:1-6 qupperiartigu. Versi 3-mi ima allassimavoq: ’Nalunaajaasortakkalu marluk tuniumaarpakka takorluukkersaarsinnaanngortillugit ullut tuusintillit marlunnillu hundredellit arfinilinnillu qulillit puussianik atisaqarlutik.’ Siulittuut tamanna sorsunnersuup siulliup nalaani kristumiunut tanitanut sinneruttunut eqquuppoq.a Sooruna nalunaajaasut marluk eqqaaneqartut? Tanitat sinneruttut Mosesip Eliasillu suliarisimasaannut assingusumik, anersaakkut ittumik, suliaqarmata. Versimi 5-imi 6-imilu nangilluni ima allassimavoq: ’Kialu ajoquserumasaraangagit inneq qarninit anisaraaq qinngarsortaat nungutillugit; kiami ajoquserumasaraangamigit taama toquttariaqararaaq. Taakku piginnaassuseqarput qilak matusinnaallugu ulluni takorluukkersaarfimminni siallersinnagu; piginnaassuseqarpullu ermit aanngortissinnaallugit nunalu patissinnaallugu perluutinik nalinginnarnik, qanoq ilisukkulluunniit piumasaraangamik.’ Tassani Elias Mosesilu aqqutigalugit tupinnartuliarineqarsimasut innersuussutigineqarput. — 4 Moses 16:31-34; 1 Kunngit 17:1; 2 Kunngit 1:9-12.
12. Jesusip allatut isikkoqalersitaanerani Moses Eliasilu kikkunnut assersuutaappat?
12 Taavami Jesusip allatut isikkoqalersitaanerani Moses Eliasilu kikkunnut siumut assersuutaappat? Lukasip oqaluttuaraa taakkua ’naalannassuseqarlutik’ Jesus ilagalugu takutissimasut. (Lúkarse 9:31) Nalunanngitsumik assersuutaapput kristumiunut Jesusip ’kingornusseqatissaatut’ anersaamik illernartumik taninneqarsimasunut taamaalillutillu taassuminnga ’naalannarseqatiginnittussatut’ nuanningaartumik neriugisaqalersunut. (Rûmamiut 8:17) Jesus inuit ’tamaasa immikkut qanoq iliorneri naapertorlugit akilissallugit’ Ataatami naalannassusiani tikiukkuni tanitanit makititaasimasunit ilagineqassaaq. — Matîuse 16:27.
Moses Eliasitullu nalunaajaasut
13. Moses Eliasilu tanitanut Jesusip kingornusseqatissaanut naalannarsisitaasunut siulittuutaasumik assersuutitut sukkut assingussuteqarpat?
13 Mosesip Eliasillu Jesusip kingornusseqatissaanut tanitaasunut siulittuutaasumik assersuutaanerannut maluginiarnartunik takussutissaqarpoq. Moses Eliasilu tamarmik Jehovap oqaaseqartitaatut ukiorpassuarni kiffartorsimapput. Tamarmik oqartussaasumit kamaanneqarsimapput. Tamarmik annikilliornerminni ilaqutariinnit Israelikkuunngitsunit ikiorneqarsimapput. Tamarmik sapiillutik kunnginut oqaluussisimapput pruffiitioqqusersunillu naapitsinerminni aalajaattuaannarsimallutik. Moses Eliasilu tamarmik Qaqqami Sinajimi (aamma Horebimik taaneqartartumi) Jehovap pissaaneranik takusaqarsimapput. Tamarmik Jordanip kangiatungaani kingoraartissaminnik toqqaasimapput. Kiisalu Mosesip Josuamik suleqateqarnerata nalaani Eliasillu Elisamik suleqateqarnerata nalaani amerlanerpaanik tupinnartuliortoqartarsimavoq, Jesusip nalaani tupinnartuliaasimasut eqqaassanngikkaanni.b
14. Tanitat qanoq ilillutik Mosesitut Eliasitullu Jehovap oqariartortitaatut kiffartorsimappat?
14 Tamakkua tamarmik ’Israelimik Guutip pigisaanik’ eqqaasinnginnerpaatigut? Aap, ilaana. Jesusip ajoqersukkani aalajaatsut ima oqarfigisimavai: ’Taamaattumik aallaritsi, inuiaqatigiillu tamaasa ajoqersuganngortissigik Ataatap Ernerullu anersaallu illernartup aqqanut kuillugit; ajoqersorsigillu ilissinnut peqqusakka tamaasa maleruaqqullugit. Atalu, ullut tamaasa najorpassi silarsuup naggatissaanut allaat.’ (Matîuse 28:19, 20) Oqaatsit taakku maleruarlugit kristumiut tanitat ukiumi 33-mi u.n.k. piinsip ulluaniit ulloq manna tikillugu Jehovap oqariartortitaatut kiffartortuarput. Mosesitut Eliasitullu naalakkersuisunit kamaanneqartarsimapput taakkununngalu nalunaajaasarsimallutik. Jesusip apustilini aqqaneq-marluk ima oqarfigisimavai: ’Naalagarsuarnullu kunnginullu pisikkumaarpaasi uanga pillunga taakkualu inuiaqatigiillu nalujunnaarutissaannik.’ (Matîuse 10:18) Oqaatsit taakkua ilagiit kristumiut oqaluttuarisaaneranni eqquuttuartarsimapput. — apustilit suliait 25:6, 11, 12, 24-27; 26:3.
15, 16. Illua’tungaani tanitat illua’tungaanilu Moses Eliasilu qanoq imminnut assigiissuteqarpat: (a) sapiillutik sallusuissummik illersuinermikkut? (b) Israelikkuunngitsunit ikiorneqarnermikkut?
15 Aammattaaq kristumiut tanitat Mosesitut Eliasitullu sapiitsigalutik sallusuissummut aalajaattuarsimapput upperisarsiornikkullu ilumuunngissuseq qulaartarsimallugu. Aamma Paulusip juuti pruffiitioqqusersoq Bar-Jesus avoqqaarisimavaa, aammalu periaaserissumik aalajaangersimasumilli Athenimiut guutiisa ilumuunngitsuunerat qulaarsimallugu. (apustilit suliait 13:6-12; 17:16, 22-31) Eqqaamajuttaaq nalitsinni tanitat sinneruttut sapiillutik kristumiuunerartut qulaartarsimagaat taakkununnga perluttut misinnartumik. — sarĸúmersitat 8:7-12.c
16 Moses Faraomit kamattumit qimaagami Israelikkuunngitsup, Reuelip, aamma Jetromik taaneqartartup, angerlarsimaffianut qimarnguissarsisimavoq. Kingusinnerusukkut Moses aaqqissuussaanermut tunngasutigut Reuelimit pitsaasumik siunnersorneqarpoq, Reuelillu ernera Hobab Israelikkut inoqajuitsukkoorneranni siulersueqataavoq.d (2 Moses 2:15-22; 18:5-27; 4 Moses 10:29) Taamatuttaaq ’Israelimut Guutip pigisaanut’ ilaasut inunnit taakkununnga ilaanngitsunit ikiorneqarsimappat? Aap, ’amerlangaartunit’ ’savanut allanut’ ilaasunit, naggatissap nalaani maani saqqummersunit, tapersersorneqarput. (sarĸúmersitat 7:9; Juánase 10:16; Jesaja 61:5) ’Savat’ taakkua isumassuisumik asannittumillu qatanngutiminik tanitaasunik tapersersuinissaat pillugu Jesus ima siulittuisimavoq: ’Kaattunga nerisippassinga; imerusuttunga immippassinga; tikeraasunga illusisippassinga; tamaqanngitsunga atisalerpassinga; napparsimasunga takusarpassinga; parnaarussivimmiittunga ornippassinga. . . . Ilumut oqarfigaassi: Ukua qatanngutima minninnguit ilaat sumik pigissi tamatuminnga uanga pivassinga.’ — Matîuse 25:35-40.
17. Eliasip Qaqqami Horebimi misigisimasaanut assingusumik tanitat qanoq misigisaqarsimappat?
17 ’Israel Guutip pigisaa’ Eliasip Qaqqami Horebimi misigisimasaanut assingusumik misigisaqarsimavortaaq.e Eliasip dronningimit Jesabelimit qimaanermini pisimaneratut tanitat sinneruttut ersillutik isumaqarsimagaluarput suliartik sorsunnersuup siulliup naanerani naammassissasoq. Taavalu Eliasitut misigaat Jehovap tikiunnera ’Guutimullu inoqutaanerartunik’ eqqartuussinera. (1 Pîtruse 4:17; Malaki 3:1-3) Kristumiuuneraqatigiit oqimaalutarneqarput oqippallaartutullu paasineqarlutik, tanitalli sinneruttut paasineqarput tassaasut „inussiaq aalajaallunilu silatooq“, taakkulu Jesusip nunarsuarmi pigisaanut tamanut paarsisunngortinneqarput. (Matîuse 24:45-47, NV) Horebimi Eliasip nipi sallaatsoq tusarpaa, tassaasoq Jehovap suliasseeqqilluni nipaa. Sorsunnersuup kingorna ukiuni ’sallaatsuni’ eqqissineqarfiusuni Jehovap kiffaasa tanitat aalajaatsut taassuma nipaa Biibilimit tusarpaallusooq. Taakkuattaaq paasivaat suli suliassaqarlutik naammassisariaqakkaminnik. — 1 Kunngit 19:4, 9-18; sarĸúmersitat 11:7-13.
18. Jehovap pissaaneqassusianut takussutissat tupinnangaartut qanoq ililluni ’Israel Guutip pigisaa’ aqqutigalugu pisimappat?
18 ’Israel Guutip pigisaa’ aqqutigalugu Jehovap pissaaneranut takussutissanik ersarissunik ersertoqarsimava? Jesusip toqunerata kingorna apustilii amerlasuunik tupinnartuliortarsimapput, kingornali tupinnartuliortarneq tamanna atorunnaariartuaarsimavoq. (1 Korintumiut 13:8-13) Taamaattumik ullumikkut tupinnartulianik takusaqarneq ajorpugut. Jesusili ajoqersukkaminut ima oqarsimavoq: ’Ilumut, ilumut oqarfigaassi: Suliat suliarisakka uannut uppertuttaaq suliariumaarpai; tamakkua angeqqingiluunniit suliariumaarpai.’ (Juánase 14:12) Tamanna siullermik eqquuppoq Jesusip ajoqersugai ukiuni hundredelinni siullerni Romamiut naalagaaffissuat tamakkerlugu nutaarsiassamik nuannersumik oqaluussissutiginnimmata. (Rûmamiut 10:18) Ullumikkut tanitat sinneruttut siulersugaannik ’inuit najugarisaanni tamarsuarmi inuiaqatigiit tamarmik nalujunnaarutissaannik’ nutaarsiassap nuannersup oqaluussissutigineqarnerani suliat suli annerusut naammassineqarsimapput. (Matîuse 24:14) Tamanna qanoq kinguneqarsimava? Jehovamut tunniulluinnarlutik kiffanngortut aalajaatsut oqaluttuarisaanermi aatsaat taama amerlatigisut 1900-kkunni makkunani katersorneqarsimapput. (sarĸúmersitat 5:9, 10; 7:9, 10) Jehovap pissaaneqangaassusianut takussutissaq ilumut tupinnartoq! — Jesaja 60:22.
Jesusip qatanngutai naalannarsisitaasut
19. Jesusip qatanngutai tanitat taanna peqatigalugu naalannassuseqartut qaqugu takuneqassappat?
19 Jesusip qatanngutaasa tanitaasut sinneri nunarsuarmi inuunertik naappat taanna peqatigilerlugu naalannarsisitaassapput. (Rûmamiut 2:6, 7; 1 Korintumiut 15:53; 1 Tásalûníkamiut 4:14, 17) Taamaalillutik Naalagaaffimmi qilammiittumi kunngiulerlutillu palasiulissapput toqusuitsut. Taava Jesus peqatigalugu inuit ’paarissavaat saviminiusumik ilitsersuuteqarlutik puuguttatullu marraasutut sequmisissallugit’. (sarĸúmersitat 2:27; 20:4-6; Tussiaat 110:2, 5, 6) Jesus ilagalugu issiavissaarsuarnut ingissapput ’Israelip naggueqatigiissortai aqqaneq-marluusut eqqartuutissallugit’. (Matîuse 19:28) Pisussat tamakku, ’Guutip qitornaasa saqqummersitaanissaannut’ ilaasut, pinngortitat erloqisut erinigiuarsimavaat. — Rûmamiut 8:19-21; 2 Tásalûníkamiut 1:6-8.
20. (a) Jesusip allatut isikkoqalersitaanera Peterip qanoq uppernermigut nakussatsissutigaa? (b) Jesusip allatut isikkoqalersitaasimanera ullumikkut kristumiunut qanoq ililluni nakussatsinnartuua?
20 ’Annikilliornartumi angisuumi’ Jesusip saqqummersitaanissaa Paulusip eqqartorpaa ima allakkami: ’Tikiutissaaq naalannarsissalluni iluartortamini tupinnarsissallunilu uppertuni tamani ullussami issumani.’ (Matîuse 24:21; 2 Tásalûníkamiut 1:10) Peter, Jakob, Johannes kristumiullu anersaamik illernartumik tanitaasut tamarmik taamaalillutik nuanningaartumik siunissaqarput. Jesusip qaqqami allatut isikkoqalersitaanera Peterip uppernermigut nakussatsissutigaa. Uaguttaaq tamanna pillugu atuarnerput uppernikkut nakussatsissutigeqaarput Jesusillu qanittukkut inuit ’tamaasa immikkut qanoq iliorneri naapertorlugit akilissallugit’ tikiunnissaanik qularinninnginnerulissutigalugu. Kristumiut tanitat aalajaatsut suli ullumikkut inuusut Jesus peqatigilerlugu naalannarsisitaanissaminnik qularunnaarsinneqarput. Aammattaaq ’savat allat’ uppernermikkut nakussatsinneqarput qularunnaarsinneqarlutillu pissutsit aaqqissuussaanerata guutiitsup matuma naggaserneqarnissaani Jesusip aniguisikkumaaraatik silarsuarmi nutaami nuanningaartumi inuusinnaaleqqullutik. (sarĸúmersitat 7:14) Naggatissaq tikillugu aalajaannissamut takorruugaq kajumississutaaqaaq! Soorlulu ilanngutassiami tulliuttumi sammissagipput, takorruugaq tamanna suli allarpassuarnik ilinniarfigisinnaavarput. (wE 15/5 97)
[Quppernerup ataani ilanngussat]
a Takukkit atuakkat „Lad dit navn blive helliget“, qupperneq 311-12, aamma Åbenbaringen — Det store klimaks er nær!, qupperneq 164-65, tamarmik Napasuliaq Alapernaarsuiffiup Peqatigiiffiata naqitigai.
b 2 Moses 2:15-22; 3:1-6; 5:2; 7:8-13; 8:18; 19:16-19; 5 Moses 31:23; 1 Kunngit 17:8-16; 18:21-40; 19:1, 2, 8-18; 2 Kunngit 2:1-14.
c Takuuk atuagaq Åbenbaringen — Det store klimaks er nær!, qupperneq 133-41.
d Takuuk atuagaq Napasuliaq Alapernaarsuiffiup Peqatigiiffiata naqitigaa, Du kan overleve Harmagedon og komme ind i Guds Nye Verden, qupperneq 281-83.
e Takuuk atuagaq „Lad dit navn blive helliget“, qupperneq 316-20.
Eqqaamavigit?
□ Jesusip allatut isikkoqalersitaanermini kikkut saqqummeqatigai?
□ Jesusip allatut isikkoqalersitaanera apustilit qanoq uppernermikkut nakussatsissutigaat?
□ Moses Eliasilu ’naalannassuseqarlutik’ Jesus peqatigalugu takuneqaramik kikkunnut assersuutaappat?
□ Pruffiitit marluk Moses Eliasilu aamma ’Israel Guutip pigisaa’ sukkut assigiissuteqarpat?
[Qupp. 10-mi assiliartaq]
Jesusip allatut isikkoqalersitaanera itsaq ullumikkullu kristumiunut uppernikkut nakussatsissutaasimavoq