Kristumiussutsip nalaani teokratiimik siulersorneqarneq

’Iluarisani immini siunnersuutigisani missiliorlugu; ullut naammatsiffissaanni inoqutigiissoqartitsiumalluni qilammiittullu nunamiittullu tamaasa Kristusimi ataasinngortikkumallugit.’ — EVFISUMIUT 1:9, 10.

1, 2. (a) Qanoq ililluni ’qilammiittut’ ukioq 33 u.n.k. aallarnerfigalugu ataasinngortinneqarsimappat? (b) Kristumiut tanitat qanoq ilillutik 1914-imiilli isummamik Mosesip Eliasillu ersersissimasaannut assingusumik ersersitsisimappat?

’QILAMMIITTUNIK nunamiittunillu’ ataasinngortitsiniarneq tamanna ukiumi 33-mi u.n.k. ’Israel Guutip pigisaa’ pilersinneqarmat aallartippoq. (Galâsiamiut 6:16; Jesaja 43:10; 1 Pîtruse 2:9, 10) Ukiut hundredellit siulliit kingorna kristumiut ilumoortut (’naatsiiassarissunik’ Jesusip taasai) ’naatsiiassapilunnit’ Satanip siaruartigaanit ipitinneqarmata katersuineq tamanna unippoq. Naggatissalli qanillilernerani ’Israel Guutip pigisaa’ ilumoortoq saqqummeqqippoq 1919-imilu Jesusip pigisaanut tamanut paarsisunngortinneqarluni.a — Matîuse 13:24-30, 36-43; 24:45-47; Daniel 12:4.

² Sorsunnersuup siulliup nalaani kristumiut tanitat Mosesip Eliasillu iliorsimanerattut tupinnartunik naammassisaqartarput.b (sarĸúmersitat 11:5, 6) 1919-imiilli Eliasitut sapiissuseqarlutik nutaarsiassaq nuannersoq silarsuarmi akeqqersimaartumi oqaluussissutigisimavaat. (Matîuse 24:9-14) 1922-miillu Jehovap inuiannut eqqartuussutai nalunaarutigisarsimavaat, soorlu Moses aqqutigalugu perluit Guutip Egyptenitoqqamut nalliutiteqattaarsimagai. (sarĸúmersitat 15:1; 16:2-17) Ullumikkut kristumiut tanitat sinneri inuiaat nutaat, Jehovap nalunaajaasuisa, aallaavigaat.

Siulersuisoqatigiit

3. Suup takutippaa ilagiit kristumiut siulliit aaqqissuussaalluarsimasut?

³ Jesusip ajoqersugai tanitaasut aallaqqaataaniilli aaqqissuussaasumik sulipput. Ajoqersukkat amerliartortillugit ilagiinnik pilersitsiortorneqarpoq utoqqaanertanillu toqqaasoqartalerluni. (Títuse 1:5) Ukiup 33-p u.n.k. kingorna apustilit aqqaneq-marluk siulersuisoqatigiittut qitiusutut oqartussaassulittut sulipput. Tassunga ilaasortaasut oqaluussineq qunusuillutik siulersorpaat. (apustilit suliait 4:33, 35, 37; 5:18, 29) Pisariaqartitsisunut inuussutissanik agguaassineq aaqqissuuppaat, Samariamilu soqutiginnittut isumassorumallugit Peter Johannesilu aallartillugit. (apustilit suliait 6:1-6; 8:6-8, 14-17) Barnabasip Paulus apustilinukaappaa taakkununnga uppernarsarniarlugu qinuginnittuusimasoq taanna maanna Jesusimut ajoqersuganngorsimasoq. (apustilit suliait 9:27; Galâsiamiut 1:18, 19) Peterilu Korneliusimut taassumalu inoqutaanut oqaluussereerami Jerusalemimut uterpoq apustilillu qatanngutillu allat Judæamiut oqaluttuullugit qanoq ililluni anersaap illernartup tamatumani Guutip piumasaa ersersissimagaa. — apustilit suliait 11:1-18.

4. Qanoq ililluni Peter toqunniarneqarsimagaluarpa, qanorlu ililluni aniguisinneqarsimava?

⁴ Taava siulersuisoqatigiit peqqarniitsumik qinugineqalerput. Peter parnaarussaavoq, inngilillu akuliunnerinnaatigut inuunera annaanneqarluni. (apustilit suliait 12:3-11) Tamatumunnga atatillugu aatsaat siullermeerluta tusarparput apustilinut aqqaneq-marlunnut ilaasortaanngitsumik Jerusalemimi nuimasumik inissisimaffeqartoqalersoq. Peter parnaarussivimmit aniguisinneqarami Johannes Markusip anaanaata illuani katersuussimasut ima oqarfigai: ’Jakobimut [Jesusip affarmik qatanngutaanut] qatanngutitsinnullu tamanna oqaatigisiuk.’ — apustilit suliait 12:17.

5. Siulersuisoqatigiit katitigaanerat Jakobip toqutaanerata kingorna qanoq allanngortinneqarpa?

⁵ Judas Iskariot, apustili killuussisoq, imminormat, ’kiffartuutaa’ Jesusip kiffartornerani suleqataasimasumut taassumalu toquneranik makititaaneranillu takunnissimasumut tunniunneqarsimavoq. Kingusinnerusukkulli Jakob, Johannesip qatanngutaa, toqutaammat allamik aqqaneq-marlunnut ilannguttoqaqqinngilaq. (apustilit suliait 1:20-26; 12:1, 2) Siulersuisoqatigiilli Biibilimi eqqaaneqaqqinneranni erserpoq annertusisinneqarsimasut. Israelikkuunngitsut Mosesip inatsisaanik maleruaassanersut maleruaassannginnersulluunniit assortuussutigineqalermat ’apustilinut utoqqaanernullu Jerusalemimiittunut’ aalajangigassanngortinneqarsimavoq. (apustilit suliait 15:2, 6, 20, 22, 23; 16:4) Sooruna ’utoqqaanerit’ siulersuisoqatigiinnut ilaalersimagunartut? Biibilimi tamanna oqaatigineqanngilaq, nalunanngitsumilli tamanna iluaqutissartaqarpoq. Jakobip toqutaanerata Peterillu parnaarussaanerata paasinarsisissimavaat apustilit immaqa ullut arlaanni parnaarussaajumaartut imaluunniit toqutaajumaartut. Pissutsit taama ittut atuutilissagaluarpata utoqqaanertat piginnaassuseqartut siulersuisoqatigiit suleriaasiannik ilisimasaqareerpata nakkutilliinerup torersumik ingerlaannarsinnaanissaa qulakkeerneqassaaq.

6. Siulersuisoqatigiit aallaqqaammulli ilaasortaat Jerusalemimiikkunnaareeraluartut qanoq ilillutik illoqarfimmi tassani suliuarsinnarpat?

⁶ Ukiup 56-ip u.n.k. missaani Paulus Jerusalemimut pigami Jakobimut pulaarpoq nalunaaruteqariartorluni, Biibilimilu allassimavoq ’utoqqaanerit tamarmik’ ornigussimasut. (apustilit suliait 21:18) Sooruna katersuunnermi tassani apustilit eqqaaneqanngitsut? Aamma tamanna Biibilimi oqaatigineqanngilaq. Oqaluttuarisaanermilli allattartup Eusebiosip kingorna allagai naapertussagaanni ukiup 66-ip u.n.k. siornagut „apustilit sinneruttut pinerliinianit toqutsiniartunit navianartorsiortitaajuaramik Judæamit qimaasimapput. Oqariartuutertilli ajoqersuutiginiarlugu nunanut angalapput Kristusimit pissaaneqartitaallutik“. (Eusebs Kirkehistorie, atuagaq III, kapitali V, immikkoortoq 2) Eusebiosip allagai allakkanut isumassarsiarititaasunut ilaanngikkaluarput, taakkununngali naapertuupput. Assersuutigalugu, ukiumi 62-imi Peter Babylonimiippoq — Jerusalemimit ungaseqisumi. (1 Pîtruse 5:13) Ersaripporli ukiumi 56-imi, qularnanngitsumik ukioq 66 tikillugu, Jerusalemimi siulersuisoqatigeeqarsimasoq.

Ukiuni nutaanerusuni siulersuineq

7. Ullumikkut siulersuisoqatigiit ukiunilu hundredelinni siullerni siulersuisoqatigiit katitigaaneri qanoq annertuumik assigiinngissuteqarpat?

⁷ Ukiumit 33-mit Jerusalemimi annikilliornartorsuaqarnera tikillugu siulersuisoqatigiit kristumiunik juutiinnarnik ilaasortaqarsimagunarput. Ukiumi 56-imi Paulusip Jerusalemimut tikeraarnermini paasivaa kristumiut juutiusut ilarpassui ’Naalakkamut Jesus Kristusimut uppissuseqaraluartik’ taamaattoq suli Mosesip ’inatsisaanik ilungersuutiginnittuusut’.c (Jakob 2:1; apustilit suliait 21:20-25) Qularnanngitsumik juutit taakkua juutiunngitsunik siulersuisoqatigiinnut ilaasoqarnissaa takorlooruminaatsissimavaat. Ukiunili nutaanerusuni siulersuisoqatigiit katitigaanerat allannguuteqaqqissimavoq. Ullumikkut siulersuioqatigiit kristumiunik tanitanik juutiunngitsuinnarnik ilaasortaqarput, taakkualu nakkutilliinerat Jehovap pilluaqqungaarsimavaa. — Evfisumiut 2:11-15.

8, 9. Ukiuni nutaanerusuni Siulersuisoqatigiinnut atatillugu qanoq ineriartorneqarsimava?

⁸ Watch Tower Bible and Tract Society of Pennsylvaniap 1884-imi pilersinneqarneranit 1972 tikillugu Peqatigiiffimmi tassani siulittaasoq Jehovap peqatigiissortaasa iluanni annertuumik oqartussaassuseqarsimavoq, Siulersuisoqatigiilli Napasuliaq Alapernaarsuiffiup Peqatigiiffiata siulersuisuinut ilaallutik. Ukiuni tamakkunani Guutip innuttaasa pilluaqqusaanerisa takutippaat aaqqissuussaq tamanna Jehovap akuerigaa. Siulersuisoqatigiinnut ilaasortat 1972-ip 1975-illu akornanni 18-inut amerlineqarput. Aaqqissuussineq ukiuni hundredelinni siullerni aaqqissuussamut assingunerulerpoq siulersuisoqatigiit amerlineqartut taakkua, ilaat Watch Tower Bible and Tract Society of Pennsylvania-mi siulersuisunut ilaasut, annertunerusumik akisussaaffeqartitaalermata.

⁹ 1975-ip kingorna taakkua 18-iusut ilarpaaluisa nunarsuarmi inuunertik naareersimavaat. Silarsuarmut ajugaasimapput qilammilu ’Jesus issiavissaarsuani issiaqatigilersimallugu’. (sarĸúmersitat 3:21) Tamanna allallu pissutigalugit maanna Siulersuisoqatigiinnut ilaasortaasut quliinnanngorsimapput, ilaat ataaseq 1994-imi ilaalersimalluni. Amerlanersaat utoqqarsuupput, qatanngutilli tanitat taakku akisussaaffimminnik naammassinninniarnerminni ikiorneqarluartarput. Kikkunnit ikiorneqartaramik? Guutip innuttaasa akornanni ukiuni nutaanerusuni ineriartorsimaneq qimerloorutsigu tamanna akissutissarsissavarput.

’Israel Guutip pigisaa’ ikiorneqarpoq

10. Ulluni kingullerni makkunani tanitat Jehovamut kiffartornerannut kikkut ilaaqqussimappat, tamannalu qanoq siulittuutigineqarsimava?

¹⁰ 1884-imi ’Israelimut Guutip pigisaanut’ ilaasut tamangajammik kristumiuupput tanitat. Kingornali katersat allat saqqummeriartuaalerput, 1935-milu paasineqarpoq katersat taakku tassaasut ’amerlangaartut’ sarĸúmersitat kapitaliisa 7-ianni eqqartorneqartut. Taakku nunarsuarmi inuunissamik neriugisaqaramik tassaapput ’nunamiittut’ Jehovap ’Kristusimi ataasinngortissamaagai’. (Evfisumiut 1:10) Tassaapput ’savat allat’ Jesusip savaatinik assersuusiamini eqqartugai. (Juánase 10:16) 1935-mit ’savat allat’ Jehovap peqatigiissortaanut ussagalersimapput, assigalugit ’nuissat ingerlaartut, tuit timmillutik iniminnut iseriartortut’. (Jesaja 60:8) ’Amerlangaartunut’ ilaasut amerliartuinnarnerat tanitallu ilarpassuisa nunarsuarmi inuujunnaarrannerat pissutigalugu ’savanut allanut’ ilaasut piginnaassuseqartut kristumiutut suliassanut annertunerujartortunut akisussaaffeqartitaalersimapput. Sunut?

11. Immikkut pisinnaatitaaffiit kristumiut tanitat kisimik tigummisimasaralui suut ’savat allat’ ilaannut tunniunneqarsimappat?

¹¹ Jehovap naalannangaarsusianik kikkunnut tamanut nalunaarutiginninnissaq ’inuiaqatigiit illernartut’ Guutip pigisaasa immikkut pisussaaffigiuarsimavaat. Tamanna naalaffimmi kiffartornertut Paulusip taasimavaa, ’palaseqatigiillu kunngiusussat’ oqaluussillutillu ajoqersuinissaannik Jesusip peqqussuteqarfigisimavai. (2 Moses 19:5, 6; 1 Pîtruse 2:4, 9; Matîuse 24:14; 28:19, 20; Eprîarit 13:15, 16) Watch Tower-imi 1. aggusti 1932-moortumi (Vagttaarnet-imi 1. oktobari 1932-imoortumi) Jonadabimut assersuunneqartuttaaq kajumissaarneqarput suliami tamatumani suleqataaqqullugit, naak tamanna sioqqullugu ’savat allat’ taakkua ilarpassui taamaaliulereersimagaluartut. Ullumikkut oqaluussineq tamangajammi ’savanit allanit’ ingerlanneqarpoq, taamaaliornerallu ’Guutip naalaffiutaani ullukkullu unnuakkullu taassumunnga kiffartornerannut’ takussutissaavoq pingaartoq. (sarĸúmersitat 7:15) Jehovap innuttaasa oqaluttuarisaaneranni nutaanerusumi aallaqqaataani ilagiinni utoqqaanertat tassaanerusarput kristumiut tanitat — nakkutilliisut Biibilimi ’ullorissatut’ Jesus Kristusip talerpiata tungaaniittutut eqqaaneqartut. (sarĸúmersitat 1:16, 20) Kisianni Watch Tower-imi 1. maaji 1937-moortumi (Vagttaarnet-imi 15. aggusti 1937-moortumi) nalunaarutigineqarpoq ’savanut allanut’ ilaasut piginnaassuseqartut nakkutilliisunngorsinnaasut. Ilagiinni tanitaqaraluarpalluunniit ’savanut allanut’ ilaasut atorneqarsinnaapput tanitat akisussaaffik nammassinnaanngippassuk. Ullumikkut ilagiinni utoqqaanertat tamangajammik ’savanut allanut’ ilaasuupput.

12. Biibilimi assersuutissat suut takutippaat qatanngutit ’savanut allanut’ ilaasut piginnaassuseqartut Guutip peqatigiissortaani akisussaaffinnik annertuunik tigusisinnaasut?

¹² Akisussaaffiit annertuut savanut allanut tunniutissallugit kukkunerunngila? Aap, kukkunerunngilaq, oqaluttuarisaanermimi tamatumunnga assersuutissaqarpoq. Israelitoqqami allamiut juutinut ilannguttut (nunasisut) ilaat nuimasumik inissisimaffeqartitaasimapput. (2 Samuel 23:37, 38; Jeremia 38:7-9) Babylonimi tigusaaqqanerup kingorna netinimit (naalaffimmi kiffartortut Israelikkuunngitsut) piginnaassusillit naalaffimmi kiffartuutinik siornatigut Levikkunniinnaq tigummineqartarsimagaluartunik immikkut pisinnaatitaaffiusunik tunineqarsimapput. (Esra 8:15-20; Nehemja 7:60) Aammattaaq Mosesip, Jesusip allatut isikkoqalersitaanerani aamma takuneqartup, Jetrop Midjanikkuusup siunnersuutai pitsaasut akuerisimavai, kingusinnerusukkullu Jetrop ernera Hobab qinnuigisimallugu Israelikkut inoqajuitsumi angalaneranni siulersueqataaqqullugu. — 2 Moses 18:5, 17-24; 4 Moses 10:29.

13. Tanitat maniguullutik qatanngutinut ’savanut allanut’ ilaasunut piginnaassuseqartunut akisussaaffinnik agguaassinermikkut kia pissusia iluarinartoq malissimavaat?

¹³ Ukiut 40-t inoqajuitsumiinnerup naalernerani Moses, nalunnginnamiuk nunamut neriorsuutigisaasumut isernaviarnani, Jehovamut qinuvoq kingoraartissaminik toqqaaqqullugu. (4 Moses 27:15-17) Taava Jehovap Moses nalunaarfigaa Josua inuit tamarmik saavanni tamatumunnga piginnaateqqullugu, Mosesilu taamaaliorpoq naak suli timikkut nukissaqarluaraluarluni Israelimilu kiffartornini suli taamaatilinngikkaluarlugu. (5 Moses 3:28; 34:5-7, 9) Taamatuttaaq maniguussuseqarlutik kristumiut tanitat angutinik ’savanut allanut’ ilaasunik piginnaassuseqartunik annerusumik immikkut pisinnaatitaaffeqartitsilereersimapput.

14. Siulittuutit suut tikkuarpaat ’savat allat’ Guutip peqatigiissortaasa iluanni akisussaaffeqarnerujartuinnassasut?

¹⁴ Guutip peqatigiissortaasa iluanni ’savat allat’ akisussaaffeqarnerulernerat aamma siulittuutigineqareersimavoq. Zakariasip siulittuutigisimavaa filisterit Israelikkuunngitsut ’Judakkut siulersortaattut issasut’. (Saggariap agdlagai 9:6, 7) Tassa Zakarias oqarniarpoq Israelikkunnut akeraasimagaluartut pallorfiginninnermik ilumoortumik aallussilerumaartut nunamilu neriorsuutigisaasumi eqqarleriissortat ilaannut siulersortitut iliumaarlutik. ’Israelilu Guutip pigisaa’ Jehovap ima oqarfigisimavaa: „Savaatisi takornartat paarissavaat, nunani allamiut sulisorissavasi narsaatini naatsiivinnilu viinnequtilinni. Ilissili taaneqartassaasi [Jehovap] palasiinik, Guutitta kiffaanik atserneqassaasi.“ (Jesaja 61:5, 6) „Takornartat“ aamma „nunani allamiut“ tassaapput ’savat allat’. Taakkua akisussaaffinnik tunineqarsimapput, tanitat sinneri nunarsuarmi maani ikiliartuinnartillugit piviusumillu oqaatigalugu Jehovap issiavissaarsuata ataqqinangaartup eqqaani ’Jehovap palasinngortitaatut’ aamma ’Guutip kiffaatut’ kiffartulerneranni annertunerujartuinnartumik pisussaaffeqaleqqullugit. — 1 Korintumiut 15:50-57; sarĸúmersitat 4:4, 9-11; 5:9, 10.

’Kingulissavut’

15. Kristumiut kikkut naggatissap nalaani maani utoqqaliartuinnarpat, kikkullu tassaappat ’kinguaariit tulliuttut’?

¹⁵ ’Savat allat’ annerusunik akisussaaffeqalernissaannut ilinniartinnissaat tanitat sinneruttut ilungersuutigisimavaat. Tussiaat 71:18-imi ima allassimasoqarpoq: „Taava qimaqinanga, Guuti, utoqqanngoruma qeersuunngorumalu, oqaluttuarisinnaaqqullugu talit pissarsuaq kingulissatsinnut tamanut.“ Versi taanna pillugu Watch Tower-imi, 15. decembari 1948-moortumi (Vagttaarnet-imi 15. februaari 1949-moortumi), allassimavoq kristumiut tanitat ilagiivi ilumut utoqqarsuanngorsimasut. Nangilluni allassimavoq sinneruttut nuannaarlutik ’Biibilimi siulittuutit qaammarsaaneratigut siumut isigisut takullugillu eqqarleriit nutaat, kinguaariit tulliuttut’. Kikkorpiaanuku tassani pineqartut? Vagttaarnet-imi ima allassimavoq: „Taakkua Jesusip ’savaatimisut allatut’ taasimavai.“ ’Kinguaariinnik tulliuttunik’ taaneqartut tassaapput nunarsuarmi aaqqissuussaanerup nutaap Naalagaaffimmit qilammiittumit aqunneqartup ataani inuusussat.

16. Pilluaqqusaanerit suut ’kinguaariit tulliuttut’ qilanaareqaat?

¹⁶ Biibilimi erseqqissumik oqaatigineqanngilaq qaqugu kristumiut tanitat tamarmik ’kingulissatik’ qimakkumaaraat Jesus Kristus peqatigalugu naalannarsisitaajartorlutik. Tanitalli taakkua qularinngilaat tamatuma pinissaa qanillisoq. ’Naggatissaq’ pillugu Jesusip siulittuutaani pingaaqisumi pisussatut siulittuutigineqartut 1914-miilli pisaqattaalersimapput, tamatumalu takutippaa silarsuup matuma suujunnaarsinneqarnissaa qanillisoq. (Daniel 12:4; Matîuse 24:3-14; Mákorse 13:4-20; Lúkarse 21:7-24) Ungasinngitsukkut Jehovap pilersissavaa silarsuaq nutaaq, ’Naalagaaffik [tamatuma nunarsuarmi aqutsinera] silarsuup tunngavileqqaarneranit taakkununnga piareersimasoq’, ’kinguaariit tulliuttut’ kingornussassaat. (Matîuse 25:34) Taakkua Paratiisip pilerseqqinneqarnissaa toqusimasullu millionilikkuutaat makititaajortornissaat qilanaarisorujussuuaat. (sarĸúmersitat 20:13) Toqusimasut makitinneqarpata tanitanik maani nunarsuarmiittoqassava? 1925-mi Watchtower-imi 1. maajimoortumi ima allassimasoqarpoq: „Guutip qanoq iliornissaa qanorlu iliunnginnissaa eqqoriaannarsinnaanngilarput. . . . [Kisianni] pissutissaqarpugut isumaqassalluta Ilagiinnut ilaasortaasut [kristumiut tanitat] naalannarsisitaajumaartut itsaq inuusimasut qinngaqqunnanngitsut [nalunaajaasut aalajaatsut kristumiussuseq sioqqullugu inuusimasut] makitinneqarnissaat sioqqullugu.“ Nunarsuarmi toqusunit makititsiortorneqalerpat tanitat ilaannik najuuttoqassanersoq pillugu Vagttårnet-imi, 1. septembari 1989-imoortumi, ima allassimavoq: „Pinngitsoorani taamaattariaqanngilaq.“d

17. Immikkut pisinnaatitaaffiit tupinnangaartut suut tanitat ataatsimoorlutik kunnginngortitaq Jesus Kristus peqatigalugu peqataaffigilissavaat?

¹⁷ Soorunami kristumiut tanitat ataasiakkaat eqqarsaatigalugit qanoq pisoqassanersoq naluarput. Jesusilli allatut isikkoqalersitaanerani Mosesip Eliasillu saqqummersinneqarnerata takutippaa Jesus inuit ’tamaasa immikkut qanoq iliorneri naapertorlugit akilissallugit eqqartuussiartulerpat’ kristumiut tanitat makititaasimasut ilagiumaaraat. Eqqaamavarputtaaq Jesus neriorsuisimasoq kristumiut tanitat ’ajugaasut’ ilagiumaaraanni Harmagedonimi ’saviusumik ilitsersuuteqarluni inuiaqatigiit paarilerunigit’. Jesus naalannassutsimini tikiuppat taakkuattaaq issiaqatigissavaat ’Israelip naggueqatigiissortai aqqaneq-marluusut eqqartuullugit’. Jesus peqatigalugu ’Satan isikkamik ataanni aserorterasuassavaat’. — Matîuse 16:27–17:9; 19:28; sarĸúmersitat 2:26, 27; 16:14, 16; Rûmamiut 16:20; 1 Moses 3:15; Tussiaat 2:9; 2 Tásalûníkamiut 1:9, 10.

18. (a) ’Qilammiittut Kristusimi ataasinngortinnissaat’ eqqarsaatigalugu pissutsit qanoq isikkoqarpat? (b) ’Nunamiittut Kristusimi ataasinngortinnissaat’ eqqarsaatigalugu pissutsit qanoq isikkoqarpat?

¹⁸ Pissutsinik aaqqissuusseriaatsini naapertorlugu Jehova suliuarpoq ’tamaasa Kristusimi ataasinngortinniarlugit’. ’Qilammiittut’ eqqarsaatigalugit siunertaa naammassingajalerpoq. Ungasinngitsukkut Jesusip 144.000-it tamaasa ’savaaqqap katernaaffissaanut’ ataatsimooqatigilissavai. Taamaattumik qatanngutit inersimalluartut ’savanut allanut’ ilaasut amerliartuinnartut, qatanngutit ukiorpassuarni aalajaallutik kiffartorsimasut ’nunamiittunullu’ ilaasut, qatanngutiminnut tanitaasunut ikiuutaaqqullugit annertunerujartuinnartunik akisussaaffeqartinneqalersimapput. Piffissami pissanganaqisumi inuuvugut, Jehovallu siunertaata naammassineqariartuaarnera isigalugu nuanneqaaq. (Evfisumiut 1:9, 10; 3:10-12; sarĸúmersitat 14:1; 19:7, 9) ’Savat allat’ qatanngutiminnik tanitaasunik tapersersuinertik nuannaarutigeqaat. Katersat taakkua marluk ’savaatitut ataatsitut paarsisup ataatsip’ ataani kiffartoqatigiipput, kunngimut Jesus Kristusimut naalatsigitillutik nunarsuarmi qilammilu kisimi naalagaasup, Jehova Guutip, ataqqinaatissaanut! — Juánase 10:16; Filípimiut 2:9-11. (wE 15/5 97)

[Quppernerup ataani ilanngussat]

Nassuiarsinnaaviuk?

□ Ukiuni hundredelinni siullerni Guutip innuttai qanoq ilillutik ineriartuaarsimappat?

□ Ukiuni nutaanerusuni Siulersuisoqatigiinni qanoq allanngorneqarsimava?

□ Allassimaffiit suut takutippaat Jehovap peqatigiissortaani akisussaaffinnik ’savanut allanut’ tunioraaneq pissusissamisoortuusoq?

□ ’Qilammiittut’ aamma ’nunamiittut’ qanoq ilillutik Messiasimi ataasinngortinneqarsimappat?

[Qupp. 16-imi assiliartaq]

Siulersuisoqatigiit aallaqqaammulli ilaasortaat Jerusalemimiikkunnaaraluartut illoqarfimmi tassani siulersuisoqatigeeqartuarsinnarsimavoq

[Qupp. 18-imi assiliartaq]

Kristumiut tanitat inersimalluartut Jehovap innuttaanut iluaqutaalluarsimapput

C. T. Russell 1884-1916

J. F. Rutherford 1916-42

N. H. Knorr 1942-77

F. W. Franz 1977-92

M. G. Henschel 1992-