Mianersorit allat ajortumik isummersussannginnakkit
TV-kkut oqaluussisartup nuimasup oqaluussisartoqanni allasiorsimanera pillugu sakkortuumik avoqqaaraa. Ukiorli ataaseq qaangiutinngitsorluunniit nammineq atortittartumik ilaqartoq naammattoorneqarpoq.
Naalagaaffik pissaanilik illua’tungeriinnik sorsuuttunik eqqissisaajartorniarluni aallartitsivoq. Tamanna ilutigalugu naalagaaffik taannarpiaq isertortumik aallartitsivoq naalagaaffinnut allanut sakkussianik dollarinik millionilikkuutaanik nalilinnik tuniniaasitsiartorluni.
Ilumoortuusaarneq taama ingasatsigilersimammat tupigusuutigineqarsinnaanerpa pasinnikkajussutsip tatiginninneq inangersimammagu? Inuit ilarpassuisa allanik ajortumik isummersuineq ileqquliutiinnarsimavaat.
Uagut kristumiutut uppeqatitsinnut attaveqarnitsinni taamatut ileqqoqarnaveersaartariaqarpugut. Jesus Kristus akeqqatta akornanniitilluta pulateriaarsuttut mianersortuunissatsinnik oqaaqqissaarigaluarluni oqanngilaq ajoqersukkaminik ilumoortunik pasinnikkajuttuussasugut. (Matîuse 10:16, NV) Allanik ajortumik isummersuineq sukkut navianaateqarami? Ingammik sutigut mianersortariaqarpugut taamatut ileqqoqaqqunata? Kristumioqatitsinnut attaveqarnerput erlinnangaartoq qanoq ililluta sernissorsinnaavarput?
Ilinniutissaq itsaq pisimasoq
Pissutissaqarani allanik ajortumik isummersuinerup assigaa taakkuninnga eqqartuussineq. Assigiinnarpaa oqarutta allat oqaasii iliuusiiluunniit arlaannik ajortumik siunertaqartut. Amerlasuutigulli ajornartorsiutivik tassaasarpoq pissutsinik paatsuuineq, soorlu Biibilimi Josvamik allakkat kapitaliisa 22-anni ersertoq.
Israelikkut nunamik neriorsuutigisaasumik tiguaareeramik naggueqatigiit nunamik agguagarsiassaat agguaappaat. Tamatuma kingorna Rubenikkut, Gadikkut Mannassekkullu affaat Jordanip kuussuata eqqaani pilliiviliorput „angingaarami allaat ungasissumiit takussaasumik“. Naggueqatigiit allat kukkullutik isummerput Jehovamik tunussisimagamik taamaaliortut. Isumaqarput naggueqatigiit pingasut taakku tupermut naapeqatigiittarfimmut pallorfiginnittarfiusumut Silomiittumut orniguttarnissaminnut taarsiullugu pilliiverujussuarmi tassani pilliisalissasut. Naggueqatigiit pasinnittut sorsunnissamut erniinnaq piareersalerput. — Josva 22:10-12.
Qujanartumilli tamanna ilutigalugu Pinehasimit siulersorneqartunik aallartitsipput. Ilumuunngitsutut, pikitsitsiniartutut Jehovamillu tunussisutut pasillerneqarnertik tusaramikku naggueqatigiit pingasut nassuiaapput sooq pilliiverujussuarmik tamatuminnga nappaasimallutik. Pilliiviunavianngilarooq, tassaassalluniligooq Israelip naggueqatigiissortaasa isumaqatigiillutik Jehovamik pallorfiginninnerannut ’nalunaaqutassaq’. (Josva 22:26, 27) Aallartitat uterput iluarusullutik, paasigamikku qatanngutitik ajortumik iliornialinngitsut. Taamaalilluni innuttaasut imminnut sorsuunnissaraluat aammillu kuisinissaraluat pinngitsoortinneqarpoq.
Allanik ajortumik isummersuipallannaveersaartarnissatsinnut tamanna ilinniutissaalluarpoq! Amerlasuutigut qarsupittumik naliliineq eqqortuusorinarsinnaasarpoq, paasiniaalluaraannili allarluinnaasarluni. Kristumiup inuunerani sorpassuartigut taamaappoq.
Utoqqaanertanik isiginninnerput
Utoqqaanertat ’Guutip ilagiissaanik paarsinermik’ akisussaaffimminnik naammassinninniarnerminni ilaannikkooriarlutik ilagiinnut ilaasortaasut ilaannik unnersuussisariaqalertarput. (apustilit suliait 20:28) Assersuutigalugu, qanoq qisuariartarpugut pitsaanngitsunik ilagisartagaqarneq imaluunniit nukappiaqqat niviarsiaqqanut niviarsiaqqallu nukappiaqqanut kukkusumik pissuseqartarnerat eqqarsaatigalugu meeqqavut pillugit utoqqaanertamit ilungersortumik oqaanniarneqaraangatta? Ingerlaannaq ajortumik isummersulertarnerparput, imminullu oqarfigaluta: ’Taassuma ilaquttavut nuannarilinngisaannarpai’. Misigissutsit taama ittut akueriinnarutsigik kingorna peqqissimilissaagut. Meeqqatta anersaakkut peqqissusiat navianartorsiorsimasinnaavoq, Biibililu tunngavigalugu iluaqutissaasumik unnersuunneqarnerput qujamasuutigisariaqarparput. — Ussatit 12:15.
Ilagiinni utoqqaanertamit unnersuunneqaraangatta isummersornaveersaartariaqarparput. Taamaaliornissaraluamut taarsiullugu imminut aperisarniarta unnersuussutaa Biibilimik tunngaveqartoq qanoq iluaqutigisinnaanerlugu. Apustili Paulus ima allassimavoq: ’Perorsaammik pineqarneq atortillugu nuannertarinngilaq, qiimanaatsuullunili; kingornali eqqissinartumik iluarnissamik tassuuna sungiusagaasut pissaannik kingunissaqararaaq.’ (Eprîarit 12:11) Taamaattumik utoqqaanertat siunnersuutaat qujamasuutigisarniartigik, pissutsillu piviusorsiortumik isumaliutigisarlugit. Eqqaamaniartigu utoqqaanertat unnersuussinissartik ajornakusoortissinnaammassuk, soorlu uagut unnersuunneqarnitta akuerinissaa ajornakusoortissinnaagipput.
Angajoqqaanut misigissutsit
Meeqqat inuusuttullu ilaasa angajoqqaaminnit killilerneqaraangamik angajoqqaatik eqqunngitsumik isummersorniartarpaat. Immaqa ima oqartarput: ’Sooruna angajoqqaakka taama killilersuitigisut? Immaqaana inuunermik nuannaarutiginneqqunngikkaannga.’ Taamatut kukkusumik isummernissamut taarsiullugu meeqqat pissutsit piviusorsiortumik isiginiartariaqarpaat.
Angajoqqaat ukiorpassuarni meeqqaminnik isumassuisimapput. Taamaaliornerminni timip piisigut allatigullu annertuumik pilliuteqarsimapput. Taava pissutissaqarnerpa isumaqassalluni maannakkut meeqqamik inuusuttuaranngornerminni pilluaallutik inuunissaat kissaatigigaat? Pitsaanerussannginnerpa isumaqassalluni meeqqatik asagamikkik sernissorusullugillu isumassorusukkaat? Asanninnertaaq tamannarpiaq meeqqamik inuunerminni unamminiarnartunik naapitassaqalerneranni killilersuinerannut pissutaasimassannginnerpa? Angajoqqaanik isumaginnilluartunik ajortumik isummersuineq asanninngitsuliornerullunilu qujasuinnerulluinnarpoq! — Evfisumiut 6:1-3.
Kristumioqatitsinnik isiginninnerput
Inuppassuit paasiniaaqqaanngivillutik inoqatiminnik eqqartuussiniapallattarput naqissusiiniapallattarlutillu. Taavami uagut taamaakkutta inunnullu aalajangersimasunut pasinnikkajuttuulluta? Taamaappat taava silarsuarmi ileqquusumit sunnertissimassannginnerpugut?
Oqarta anersaakkut qatanngutitta ilaat kusanartumik angerlarsimaffittaarlunilu biilitaarsimasoq. Taava ingerlaannaq isummissanerpugut pigisaleritoorsuusoq Guutillu naalagaaffiata soqutigisaanik inuunermini salliutitsinngitsoq? Immaqa kristumiut ilaat tamakkuninnga pisinissaminnut akissaqarput, tamatumali assigiinnanngilaa ajortumik siunertaqartut ’Guutillu naalagaaffia salliutinngikkaat’. Imaassinnaavormi anersaakkut suliassanik ulapputeqartuusut timikkullu pigisatik Guutip naalagaaffiata soqutigisaasa siuarsarnissaannut tukkorlutik malunnaarsaartumik atoraat. — Matîuse 6:1-4, 33.
Ukiuni hundredelinni siullerni ilagiinni kristumiuni pisooqarlunilu piitsoqarsimavoq. (apustilit suliait 17:34; 1 Timûtiuse 2:3, 4; 6:17; Jâko 2:5) Guutip inuit aningaasatigut inissisimanerat tunngavigalugu nalilerneq ajorpai, uaguttaaq taamaaliortariaqanngilagut. Qatanngutivut misiligarneqartartut aalajaatsut ’kajumigisartillu maliinnarnagu’ iliuuseqartartut asasariaqarpavut. — 1 Timûtiuse 5:21.
Silarsuarmi matumani Satanip pissaaneqarfigisaani paqumisunneq pasinnikkajussuserlu amerlaqisunik ’kiinarpaqarput’. Assersuutigalugu, angut tunuliaqutarisani piinnarlugu peqqarniitsutut imaluunniit pigisalerituutut naqissuserneqarsinnaasarpoq. Uagulli kristumiutut taamaaliornaveersaartariaqarpugut. Jehovap peqatigiissortaani ilumoortuusaarneq pasinnikkajussuserlu inissaqanngillat. Kristumiut ilumoortut tamarmik Jehova Guutitut, naapertuilluarlunilu nakerisarsiunngitsutut, ittariaqarpugut. — 2 Israelikkut 19:7; apustilit suliait 10:34, 35.
Asanninneq iliuuseqassutaali
Biibilimi allassimavoq kikkut ’tamarmik ajortuliortut Guutimilu nersornaammik ajorsarlutik’. (Rûmamiut 3:23) Taamaattumik uppeqativut uagutsitulli ilungersorlutik Jehovamut iluarinartumik kiffartorniartutut isigisariaqarpavut. Pasinnikkajussuseq misigissutsillu nuanniitsut qatanngutitsinnut angummut arnamulluunniit attaveqarnitsinnut sunniuteqartissimagutsigik Guutimut qinusariaqarpugut isummap taama ittup akiornissaanut ikioqqulluta, Satanimut pisariteqqunata. (Matîuse 6:13) Satanip Eva uppilersissimavaa Jehova ajortumik siunertaqartoq, Evamik soqutiginninngitsoq kiffaanngissutsimillu piviusumik pillualersitsisussamik erliguukkaa. (1 Moses 3:1-5) Qatanngutivut ajortumik isummersortarutsigik Satan tapersersussavarput. — 2 Korintumiut 2:11; 1 Pîtruse 5:8.
Paasigutsigu qatanngutivut ajortumik isummersoqqajaasarlugit, Jesus Kristusip maligassiaa eqqarsaatigeqqissaartariaqarparput. Taanna Guutimut ernerugaluarluni naammalluinnartoq, ajoqersukkani ajortumik isummersorneq ajorpai. Akerlianilli ajunngitsortai isiginiartarpai. Ajoqersukkat kina arlartik annersaanersoq assortuussugimmassuk ajortumik isummersunngilai apustilinillu nutaanik aqqaneq-marlunnik taarsernagit. (Mákorse 9:34, 35) Apustilit naammalluinnartuunnginnamik juutiussutsimit tunussisimasumit pingaarniarfiullunilu nuimassutsimik nalilersuiffiusumit annerusumik minnerusumilluunniit sunnerneqarsimasinnaapput. Jesusip nalunngilaa ajoqersukkaminik iliuuseqartitsisoq tassarpiaasoq Jehovamik asanninneq. Asanninnermik taama ittumik ersersitsinertik Jesusimullu ataannarnertik pillugu akissarsisinneqangaarput. — Lúkarse 22:28-30.
Uppeqativut aalajaatsut pasiniakujuinnavikkutsigik assigiinnassavaa ajortunik isaruaqarluta isigigivut. Kukkulluinnartumik isikkoqassapput. Taamaattumik asanninnerup isaruaanik isarusserluta isiginiartigik. Kristumioqatitta aalajaatsut uagutsinnik asanninnerannut takussutissarpassuaqarpoq, uagullu taakkua asannittumik isumassortariaqarpavut. (1 Korintumiut 13:4-8) Taamaattumik asanninnermik ersersitsivigisariaqarpavut allallu ajortumik isummersunnginnissaannut mianersortariaqarluta. (wE 15/5 97)
[Qupp. 21-mi assiliartaq]
Allat aalajaallutik Guutimut kiffartortut qanoq isigaagit?
[Qupp. 22-mi assiliartaq]
Tatiginninneq ataqqinninnerlu pissutigalugit Jehovap nalunaajaasui ilaqutariissuupput pilluartut