Upperneq naammagittarnermik qinujuarnermillu nassataqarpoq
’Erinitsannaveeritsi, uummatisi nakussatsissigik, Naalakkap tikiuffissaa qanillimmat.’ — JÂKO 5:8.
1. Sooq Jâko 5:7, 8-mi allassimasut eqqarsaatigeqqissaartariaqarpavut?
JESUS KRISTUSIP ’tikiuffissaa’ sivisuumik utaqqisaasimasoq maanna piviusunngorsimavoq. (Matîuse 24:3-14) Guutimut Kristusimullu uppernerartut Jakobip oqaasiisa uku isumaliutiginissaannut aatsaat taama pissutissaqartigilersimapput: ’Qatanngutikka, erinitsannaveeritsi Naalakkap tikiuffissaa nalliutserlugu. Ata, naasorissaasup nunap inerititassai akissarsilluarnartut ilimagisarai; erinitsajuilluni piaartumillu kingoqqutsisumillu siallerfigitsiivai; ilississaaq erinitsannaveeritsi, uummatisi nakussatsissigik, Naalakkap tikiuffissaa qanillimmat.’ — Jâko 5:7, 8.
2. Jakobimit allaffigineqartut ajornartorsiutaasa ilaannik taasaqarit.
2 Jakobip allagaanik isumassarsiarititaasunik allagarsisut naammagittarnissartik pisariaqartissimavaat ajornartorsiutillu assigiinngitsut aaqqinniartariaqarlugit. Amerlasuut Guutimut uppernerartut pissuserisariaqagaannit allaanerusumik pissusilersortarput. Assersuutigalugu, uummatimikkut kissaatigisaasa ilaat iliuuseqarfigineqartariaqarput. Eqqissineq akaareqatigiinnerlu kristumiut taakkua akornanni atuutilerseqqinneqartariaqarput. Aammattaaq ’erinitsajuinnissaminnik’, imaluunniit naammagittarnissaminnik, qasujuillutillu qinusarnissaminnik unnersuunneqarnissartik pisariaqartippaat. Jakobip taakkununnga oqaasii sammeqqilaariartigik, tamannalu ilutigalugu isumaliutigalugu unnersuussutai uagut nammineq inuunitsinni qanoq ililluta atorsinnaanerlugit.
Kissaatit eqqunngitsut ajortunngornarput
3. Jakobip uppeqataasa akornanni suut akerleriissutaasimappat, tamatumalu sumik ilinniartippaatigut?
3 Taamanikkut kristumiuunerartut tamakkeratik eqqissinermik pigisaqarput. Ilaasa eqqunngitsunik kissaateqarnerat tamatumunnga pissutaavoq. (Jâko 4:1-3) Assortuiumatussuseq avissaartuutsitsivoq, ilaasalu qatanngutitik asanninngitsumik eqqartuuttarpaat. Taamatut pisoqarpoq pilerissutsiminnik naammassinnikkusussusiat timaanni sorsunnermik pilersitsimmat. Uaguttaaq ataqqisaarusussutsimik, pissaaneqarusussutsimik pigisaqarusussutsimillu timikkut kissaatinik akiugassaqarutta ikioqqulluta qinunissarput pisariaqartissinnaavarput ilagiinni eqqissineq akornusersorneqaqqunagu. (Rûmamiut 7:21-25; 1 Pîtruse 2:11) Ukiuni hundredelinni siullerni kristumiut akornanni piumatussuseq uumissuininnguullunilu toqutserusussusinnguussimavoq. Kissaatitik eqqunngitsut Guutip naammassiumanngimmagit anguniakkatik sorsuutigiuarsinnarpaat. Uagut assingusunik eqqunngitsunik kissaateqarutta qinnutigisavut pinavianngilavut, qinnutit taama ittut Guutip illernartuusup akineq ajormagit. — Upputit 3:44; 3 Juánase 9, 10.
4. Sooq ilaat Jakobip ’uersartunik’ taavai, tamannalu uagutsinnik qanoq attuisariaqarpa?
4 Silamiorpalussuseq, sinnganeq pingaarniarnerlu taamanikkut kristumiut ilaasa pissuserisimavaat. (Jâko 4:4-6) Ilaat ’uersartunik’, tassa arnanik allasiortunik, Jakobip taavai silarsuarmut ikinngutaammata taamaalillutillu anersaakkut allasiorlutik. (Hesekiel 16:15-19, 25-45) Uagut silamiutut isummertarnissarput, oqaluttarnissarput ileqqoqarnissarpullu kissaatiginngeqaarput, taamaakkuttami Guutimut akeraassagatta. Guutip oqaasiani paasitinneqarpugut ’sinnganeq’ ajoriartarnermut imaluunniit ’anersaamut’ inunnik ajortilinnik naalagaaffiginnittumut ilaasoq. (1 Moses 8:21; 4 Moses 16:1-3; tugsiaut 106:16, 17; Nalunaajaasup oqaasii 4:4) Paasigutsigu sinnganeq, pingaarniassuseq pissutsilluunniit ajortut allat akiugassaralugit, taava Guuti qinnuiginiartigu anersaamigut illernartukkut ikioqqulluta. Nukik, Guutip ajunngissusiagut pisassarinngisaraluatsigut pisagarput, ’sinnganermit’ anneruvoq. Makitassuseq Jehovap akerleraa, ajortilittulli ilioriaatsit akiorniarsarigutsigik ajunngissutsiminik pisassarinngisaraluatsinnik tunissavaatigut.
5. Guutip ajunngissusia pisassarinngisaraluarput misigisinnaassagutsigu piumasaqaatit suut naammassisariaqarpavut?
5 Guutip ajunngissusia pisassarinngisaraluarput, imaluunniit ’saammaannera’, qanoq ililluta pissarsiarisinnaavarput? (Jâko 4:7-10) Jehovap tunissutaa tamanna pissarsiarisinnaassagutsigu taassumunnga naalattariaqarpugut, tunissutai aaqqissuussaalu tamaasa ilassisariaqarlugit piumasaanullu naalatsigitittariaqarluta. (Rûmamiut 8:28) Aammattaaq Diaavulu assortortariaqarparput. Jehovap kisimi oqartussaassusia tapersersorluinnarutsigu Diaavulup ’qimassavaatigut’. Jesusip, silarsuarmi nukiit ajortut iluarsineqarsinnaanngitsumik uagutsinnik ajoqusiinissaannik pinaveersaartitsisup, ikiuinissaa naatsorsuutigisinnaavarput. Mannalu puiunngisaannassavarput: Qinuneq, naalanneq uppernerlu aqqutigalugit Guutimut qanillisarpugut taannalu uagutsinnut qanillisarpoq. — 2 Israelikkut 15:2.
6. Sooq Jakobip kristumiut ilaat ’ajortuliortunik’ taavai?
6 Sooq Jakobip Guutimut kiffaanerartut ’ajortuliortunik’ taavai? ’Sorsuuttarlutillu’ toqutseriaannartut uumissuimmata — kristumiunut pissusissaanngilluinnartumik. (Títuse 3:3) ’Assaat’ iliuutsinik ajortunik ulikkaarput taamaattumillu errortorneqartariaqarlutik. ’Uummatitittaaq’, pissutiginiakkat pilerfii, minguiartariaqarpaat. (Matîuse 15:18, 19) ’Ataasiunngitsumik isumaqaramik’ Guutimut ikinngutaanerup silarsuarmullu ikinngutaanerup akornanni nalornillutik ingerlapput. Maligassiuinerlunnerat ilinniutiginiartigu, eqqumajuartalu uppernerput tamakkunannga aserorneqaqqunagu. — Rûmamiut 7:18-20.
7. Sooq Jakobip ilaat ’qiaqqullugillu upeqquai’?
7 Jakobip allaffigisani peqquai ’upillutillu aliasullutillu qiassasut’. Aliasunnertik Guutip iluarisaatut ersersikkunikku allamik isumataarsimanerat takuneqarsinnaassaaq. (2 Korintumiut 7:10, 11) Ullumikkuttaaq inuit ilaat uppertuunerartarput, tamannali ilutigalugu silarsuarmut ikinngutaanissartik ujartorlugu. Taamatut ingerlalersimagutta anersaakkut sanngiissuserput aliasuutigisariaqarparput eqqunngitsorlu iluarsiniarlugu erniinnaq iliuuseqartariaqarluta. Pisariaqartumik allannguereerutta Guutimillu isumakkeerfigineqareerutta ilerasuutaarunnerput inuunermillu naassaanngitsumik neriuuterput nuannaarutigisinnaalissavavut. — Tussiaat 51:12-19; 1 Juánase 2:15-17.
Eqqartuuteqatigiinnata
8, 9. Sooq immitsinnut mamarlertassanngilagut eqqartuuttarnatalu?
8 Uppeqammik mamarliineq ajortuliorneruvoq. (Jâko 4:11, 12) Taamaakkaluartorli ilaat kristumioqatiminnik isornartorsiuiniartarput, immaqa imminut iluartuutinnerup kingunerisaanik imaluunniit allanik nikassaanermikkut imminnut qutsissiserusukkamik. (Tussiaat 50:20; Ussatit 3:29) Griikerit oqaasiat „mamarliivoq“-mik nutserneqartoq isumaqavippoq „akerleralugu oqaluppoq“, eqqarsaallu imarisaa tassaalluni akeqqersimaarneq pissutigalugu ingasaassisumik eqqunngitsumilluunniit unnerluussineq. Tamatuma assigiinnarpaa pissutissaqanngitsumik qatanngummik eqqartuussineq. Sooq mamarliinerup assigaa ’Guutip inatsisaanik unnerluussineq eqqartuussinerlu’? Assersuutigalugu, allakkanik ilisimasut farisiiarillu pillaqqillutik ’Guutip inassutaanik atorunnaarsitsisimapput’ namminnerlu maleruagassiatik naapertorlugit eqqartuussisarlutik. (Mákorse 7:1-13) Qatanngut Jehovap assuarinngisaa assuarigutsigu taava aamma ’Guutip inatsisaa eqqartuutissannginnerparput’ inatsisillu amigarnerarneratigut ajortuliorluta? Pissutissaqanngitsumillu qatanngut isornartorsiorutsigu asanninnerup inatsisaa malissimassanngilarput. — Rûmamiut 13:8-10.
9 Manna eqqaamaniartigu: ’Ataasiuvoq inatsisoq eqqartuussisorlu,’ tassa Jehova. Aamma ’Jehovap inatsisai innarluitsuupput’, amigaateqaratik. (Tussiaat 19:8; Jesaja 33:22) Guuti kisimiilluni annannissamut maleruagassiorsinnaassuseqarlunilu najoqqutassiorsinnaassuseqarpoq. (Lúkarse 12:5) Taamaattumik Jakob ima aperivoq: ’Illilli kinaagavit aappat eqqartuuppiuk?’ Uagut allat eqqartuuttussaanngilavut assuarisussaanagillu. (Matîuse 7:1-5; Rûmamiut 14:4, 10) Imminut iluartuutilluni allanik eqqartuusseqqajaasarneq akiorneqarsinnaavoq Guutip kisimi oqartussaassusiata kinaassusersiunngissusiatalu uagut naammalluinnanngissutsitsinnut naleqqiullugu isumaliutigeqqissaartarnerisigut.
Usorsitsaarluni imminut tatigineq nigoruk
10. Sooq ulluinnarni Jehova eqqarsaatigisariaqarparput?
10 Jehova taassumalu inatsisai eqqarsaatitsinniitittuartariaqarpavut. (Jâko 4:13-17) Imminunngooq tatigivallaartoq Guuti puiorlugu ima oqartarpoq: ’Ullumi aqaguluunniit aallassaagut ikunga illorpassuaqarfiliarluta, tassani ataatsimik ukiissalluta niueriarniarluta iluanaarniarlutalu.’ ’Pisuussutinik katersuigutta, Guutimili pisuujunata’ aqagu toqussagaluarutta Jehovamut kiffartornissamut periarfissaq maangaannartissavarput. (Lúkarse 12:16-21) Soorlu Jakob oqartoq uagut ullaakkut putsutut ’sivikitsumik ersersinnarluni aanngariartortutut’ ippugut. (1 Israelikkut 29:15) Aatsaat Jehovamut upperutta nuannaarnerup piviusup inuunerullu naassaanngitsup angunissaat neriuutigisinnaavarput.
11. Ima oqarneq: ’Jehovap peqquppatigut,’ qanoq paasisariaqarpa?
11 Makitalluni Guutip sumiginnarnissaanut taarsiullugu imatut oqartariaqarpugut: ’Jehovap peqquppatigut inuuguttalu, imaaliorluta imaaliorlutaluunniit piumaarpugut.’ Oqaatsit ’Jehovap peqquppatigut’ ersersippaat taassuma piumasaa naapertorlugu iliornissarput ilungersuutigigipput. Ilaquttat pilersorniarlugit niuernissaq, Guutip naalagaaffiata suliaa suliariartorlugu aallarnissaq ilaallu ilanngullugit, pisariaqarsinnaapput. Kisianni usorsitsaarnaveersaartarniarta. ’Usorsitsaarneq sunaluunniit taamaattoq ajortuuvoq’ Guutimik pinngitsuuisinnaannginnitsinnik sumiginnaanerugami. — Tussiaat 37:5; Ussatit 21:4; Jeremia 9:23, 24.
12. Jâko 4:17-imi allassimasut qanoq paasisariaqarpat?
12 Qularnanngitsumik imminut tatigivallaarneq usorsitsaarnerlu pillugit oqaatsini naggaserniarlugit Jakob ima oqarpoq: ’Taamaattumik ajunngitsuliorneq nalunagu ajunngitsuliunngitsup ajortulissutigaa.’ Kristumiut tamarmik maniguullutik Guutimik pinngitsuuisinnaannginnertik nassuerutigisariaqarpaat. Taamaaliunngitsoorneq ’ajortulineruvoq’. Taamatuttaaq ippoq pissutsini allani tamani Guutimut uppernerup uagutsinnut piumasaqaataanik sumiginnaaffiusuni. — Lúkarse 12:47, 48.
Pisuunut mianersoqqussutit
13. Pisuussutiminnik atornerluisut pillugit Jakob qanoq oqarpa?
13 Kristumiut siulliit ilaat pigisalerituallaalersimapput pisuunillu nuannaartorinnillutik, tamannalu pissutigalugu Jakob pisuut ilaat pillugit sakkortuunik oqaaseqarpoq. (Jâko 5:1-6) Silamiunngooq pisuussutiminnik atornerluisut iliuutsitik Guutip akippagit ’erloqinartut imminnut nalliukkumaartut pillugit qiallutillu upissapput’. Taamanikkut pisuussutit tassaanerusarput pigisat, soorlu atisat, karrit viinnilu. (Joel 2:19; Matîuse 11:8) Tamakkua asiusinnaapput oqussinnaallutillu; Jakobilli erseqqissagaa tassaavoq tamakkua naleqanngissusiat, asiujassusiat pinnagu. Guulti siilvilu manngertornersinnaanngikkaluarput, nalilinnilli taama ittunik katersuigutta manngertornersimasutulli naleqanngitsigissapput. ’Manngertorneq’ assersuutaavoq timikkut nalillit silatusaanngitsumut atorneqarnerannut. Taamaattumik tamatta eqqaamasariaqarparput pigisaminnik tunaarinnittut ’ulluni kingulliusuni’, Guutip kamannerminik taakkununnga tutsitsiffissaani, ’innermillusooq katersuisimasut’. Uagut ’ulluni kingulliusuni’ tamakkunani inuugatta oqaatsit taakku ingammik uagutsinnut pingaaruteqarput. — Daniel 12:4; Rûmamiut 2:5.
14. Pisuut qanoq iliorajuppat, tamatumunngalu atatillugu qanoq iliortariaqarpugut?
14 Pisuut inerittunik katersuisitatik uukapaasiarigajuppaat, immaqa aningaasarsinaveersaartinnerisigut, taamaaliornerallu naapertuilluartumik pillaatissinneqarnissaminik ’torlulavoq’. (Naleqqiuguk 1 Moses 4:9, 10.) Silamiut pisuut ’inuulluapilullutik’ inuusimapput. Nuannaarniutinik atuipilupput, uummatitik qaarsillaatissarsiorlugit killinneqarsinnaajunnaarsillugillu ulloq toqunneqarfissartik tikillugu. Taakku pillugit Jakob oqarpoq: ’Iluartoq pillagassaatillugulu toquppaat,’ nangillunilu: ’Akerartunngilaasi.’ Pisuut sukkulluunniit nakerisarsiorfigisussaanngilavut. Anersaakkut soqutigisat inuunitsinni salliutittariaqarpavut. — Matîuse 6:25-33.
Uppernerup naammagittartunngortippaatigut
15, 16. Sooq naammagittartuunissaq taama pingaartigaa?
15 Pisuut naqisimanninniarneri eqqartoreeramigit Jakobip kristumiut naqisimaneqartut kajumissaarpai ’erinitsajuinnissaannik’, imaluunniit naammagittarnissaannik. (Jâko 5:7, 8) Uppertut atugarliuutiminnik naammagittarlutik atuisut aalajaannertik pillugu akissarsisinneqassapput Kristusip ’tikiunnerani’, naqisimannitsitik eqqartuussummik eqqorneqarpata. (Matîuse 24:37-41) Taamanikkut kristumiut assiginiartussaasimavaat naasorissaasoq ukiakkut piaartumik siallernissaanik nakkalatserinissaminik periarfissiisumik, aammalu upernaakkut kingoqqutsisumik siallernissaanik naagasuartitsisussamik erinitsajuilluni utaqqisoq. (Joel 2:23) Uaguttaaq erinitsajuitsuusariaqarpugut uummativullu nakussatsillugit, ingammik ullumikkut Naalakkap Jesus Kristusip najuinerani!
16 Sooq naammagittartuusariaqarpugut? (Jâko 5:9-12) Uppeqatitsinnit kamaammertinneqaraangatta nikallunnginnissatsinnut naammagittassuseq iluaqutigisarparput. Ajortumik isumaqarluta nikallorfigeqatigiikkutta eqqartuussisumit Jesus Kristusimit ajortumut eqqartuunneqassaagut. (Juánase 5:22) Taassuma najuinera aallartereerpoq ’matullu killinganiilereerluni’. Taamaattumik qatanngutitta naammagittarfiginerisigut eqqissineq siuarsarniartigu, aammami taakkua amerlasuunik misilinneqartarput. Uppernerput nakussatsissavarput eqqaamagutsigu Guutip Job akissarsisissimagaa naammagittarluni misilinneqarnini atorsimammagit. (Job 42:10-17) Uppernermik naammagittarnermillu ersersitsisarutta misigissavarput ’Jehova nallittuillunilu isumassuinertoqisoq’. — Mika 7:18, 19.
17. Sooq Jakob uppernarsaaqqusinngila?
17 Naammagittanngikkutta tatineqarnitsinni oqarput kukkusumik atortoorsinnaavarput. Assersuutigalugu, tuaviupiluttumik uppernarsaasoorsinnaavugut. ’Uppernarsaaniaqinasi,’ isumaliutigeqqaarnagu uppernarsaanissaq Jakobip mianersoqqussutigaa. Oqaaserisallu pillugit uppernarsaateqartuarneq ilumoortuusaarnertut issinnaavoq. Naammappoq ilumoorutta angernerpullu angernermik naaggaarnerpullu naaggaarnermik isumaqartittarutsigik. (Matîuse 5:33-37) Soorunami eqqartuussinermi ilumoortumik oqalunnissamik uppernarsaateqarnissaq Jakobip inerteqqutiginngilaa.
Upperneq qinnutivullu
18. Pissutsini qanoq ittuni qinujuartariaqarpugut, qaqugukkullu ’unnersiutiginnissummik tussiartariaqarpugut’?
18 Oqarput paarissagutsigu, naammagittartuussagutta peqqinnartumillu Guutimut uppertuassagutta qinuneq inuunitsinni nuimasumik inissisimaffeqartariaqarpoq. (Jâko 5:13-20) Ingammik misilinneqarnitsinni qinujuartariaqarpugut. Iluarusukkaangatta ’unnersiutiginnissummik tussiarsinnaavugut’, soorlu Jesusip toquminik eqqaaniaasarneq pilersikkamiuk apustilinilu taamaaliorsimasut. (Mákorse 14:26) Immaqa ilaannikkut Guutimut ima qujamasuummertigisarpugut uummatitsigut unnersiutiginnissummik erinarsortarluta. (1 Korintumiut 14:15; Evfisumiut 5:19) Aammattaaq kristumiut ataatsimiinnerini erinarsorluni Jehovamik unnersiutiginninneq nuannillaaraaq!
19. Anersaakkut napparsimalerutta qanoq iliortariaqarpugut? Sooq taamaaliortariaqarpugut?
19 Anersaakkut napparsimagutta, immaqa eqqunngitsuliorsimanerup imaluunniit Jehovap nerriviani nerisarnermik sumiginnaasimanerup kingunerisaanik, erinarsornissarput kajumiginavianngilarput. Taamaappat maniguulluta utoqqaanertanut saaffiginnittariaqarpugut ’qinnussinnaaniassammatigut’. (Ussatit 15:29) Aammattaaq taakkua ’Jehovap aqqani uuliamik tanissavaatigut’. Oqaasii tuppallernartut Biibilimillu unnersuussutaat uuliatut ikimik nipaallisaasutut nikallunganermik annikillisitsissapput qularnermillu siooranermillu millisitsissallutik. Uagut nammineq uppissuseqarutta ’uppertup qinnutaata katsorsassavaatigut’. Utoqqaanertat paasilerunikku anersaakkut napparsimanerput unioqqutitsisimanermik annertuumik pissuteqartoq, sorpiaap eqqunngitsuliorneruneranik inussiarnersumik erseqqissaaffigissavaatigut, ikiorniarsaralutalu. (Tussiaat 141:5) Allamillu isumataarutta Guutip uagutsinnik qinnussisunut tusarnaarnissaa uagutsinnillu isumakkeerfiginninnissaa qularinngissinnaavarput.
20. Sooq ajortivut anngiiaatigisariaqarpavut immitsinnullu qinnuttarluta?
20 Ammasumik ’ajortitsinnik anngiiarfigeqatigiittarnitta’ ajortulioqattaarnissamit ingalassimatittariaqarpaatigut. Tamanna misiginneqatigiinnermik pilersitsisariaqarpoq, pissutsimik immitsinnut ’qinnuttarnissatsinnut’ killiisumik. Tamatuma iluaqutaanissaa qularinngissinnaavarput ’iluartummi qinnutaa’ — uppertup Guutillu assuarnaatsutut isigisaata qinnutaa — Jehovami naammassisaqartaqaaq. (1 Pîtruse 3:12) Pruffiiti Elias uagutsitulli sanngiissuteqarsimavoq, qinnutaali sunniuteqartarsimaqaat. Taassuma qinnutaa naapertorlugu ukiuni pingasuni affarmilu siallersimanngilaq. Siallernissaanillu qinnuteqarnera malillugu sialleqqittalersimavoq. — 1 Kunngit 17:1; 18:1, 42-45; Lúkarse 4:25.
21. Kristumioqatitsinnut ’sallusuissut saneqqullugu tammarsimasumut’ immaqa qanoq iliorsinnaavugut?
21 Ilagiinniittut ilaat ’sallusuissut saneqqullugu tammarsimappat’, ajoqersuut eqqortoq ileqqussallu eqqortut sanioqqullugit ingerlalersimalluni, qanoq iliorsinnaavugut? Biibilimit unnersuussineq, qinuneq allatigullu ikiuineq aqqutigalugit immaqa allamut saannissaanut eqqunngitsumillu iliorunnaarnissaanut ikiorsinnaavarput. Iluatsitsigutta Kristusip pilliutaa utertitsissutaasoq taassumunnga atuuttuaannassaaq anersaakkullu toqumit nungutitaanissamillu aniguissalluni. Unioqqutitsisup ikorneratigut ajortuliaasa ilarpassui matussavavut. Ajortuliortup ilungersortumik oqaanneqarnini malippagu, eqqunngitsuliortarnini unitsillugu, allamik isumataarluni isumakkeerfigineqarnissaminillu qinulluni, ajortuliaasa matuneqarnerannut suleqataasimanerput nuannaarutigisinnaassavarput. — Tussiaat 32:1, 2; Jûtarse 22, 23.
Allakkat tamatsinnut oqariartuuteqarput
22, 23. Jakobip allagai uagutsinnut qanoq sunniuteqartariaqarpat?
22 Ersarippoq Jakobip allagai tamatsinnut iluaqutaasumik oqariartuuteqartut. Takutinneqarpoq qanoq ililluta misilinneqarnerit nikallujuilluta atorsinnaagivut, kinaassusersiornermut mianersoqquneqarpugut eqqortumillu iliornissatsinnut kajumissisinneqarluta. Jakobip kajumissaarpaatigut oqarput paarissagipput, silamiut sunniinerat akiussagipput eqqissinerlu siuarsassagipput. Aammattaaq oqaasii naammagittartunngussutigisariaqarpavut qinujuarnissatsinnullu killitsissutigalugit.
23 Jakobip allagai ukiuni hundredelinni siullerni kristumiunut tanitanut allagaagaluarput, kisianni tamatta allakkani unnersuussutaasut iluaqutiginiartariaqarpavut uppernerput aalajangiusimaannaqqullugu. Upperneq, aalajangiusimannilluta suliartalimmik Guutimut kiffartornissatsinnik kajumissisitsisoq, Jakobip oqaasiisa nakussatsissinnaavaat. Allakkallu isumassarsiarititaasut taakkua ullumikkut Naalakkap Jesus Kristusip najuinerani uppernermik nukittuumik, Jehovamut nalunaajaasutut uagutsinnik naammagittartunngortitsisumik qinujuarnissatsinnillu ilinniartitsisumik, ineriartortitsipput. (wE 15/11 97)
Qanoq akissavit?
□ Sooq ukiuni hundredelinni siullerni kristumiut ilaat isummaminnik ileqquminnillu allannguinissaat pisariaqalersimava?
□ Jakobip pisuut qanoq mianersoqquai?
□ Sooq naammagittartariaqarpugut?
□ Sooq qinujuartariaqarpugut?
[Qupp. 20-mi suminngaanneernera]
Pictorial Archive (Near Eastern History) Est.
[Qupp. 25-mi assiliartaq]
Ukiuni hundredelinni siullerni kristumiut ilaasa uppeqatiminnut naammagittarnerunissartik pisariaqartissimavaat
[Qupp. 26-mi assiliartaq]
Kristumiut naammagittartuullutillu, asannittuullutillu qinujuartariaqarput