Isuma qujamasuttoq ineriartortiguk

NEW YORKIMI nakorsap Mariap inuunera peqqamik annaappaa. Marialli 50-inik ukiullip nakorsaq qujaffiginaguluunniit akiligassani akilinngilai. Tamanna qujasuissutsimut assersuutissaalluarpoq.

Biibilimi oqaluttuarineqarpoq ilaanni Jesus nunaannarmi illoqarfeeqqamut iseriartortilluni angutit qulit nappaammik amiilaarnartumik nappaatillit, pupissut, naapissimagai. Taakkua nipituumik ima suaartarfigisimavaat: ’Jesusiaa, ajoqersuisoq, naakkigitigut!’ Jesusillu peqqusimavai: ’Palasinut takutikkiartoritsi.’ Pupissut taamaaliorput, ingerlatillutillu peqqissiartulernertik takusinnaalerlugulu malugisinnaalerpaat.

Pupissuusimasut ilaat qulingiluat takkuteqqinngillat. Ataasiinnarli, Samariamiu, uterpoq Jesus ujarlugu. Pupissuusimasup taassuma Guuti naalannartippaa, Jesusilu naapikkamiuk isigaasa saannut pallorpoq qutsavigalugulu. Tamanna pillugu Jesus ima aperivoq: ’Pupeeruttut quliunnginnerpat? Naammi taakku arfineq-sisamat? Guuti naalannarsisissallugu allanik utertoqanngila, una takornartaq kisimi uterpa?’ — Lúkarse 17:11-19.

Ilinniagassaq pingaartoq apeqqummi matumaniippoq: ’Naammi taakku arfineq-sisamat?’ Pupissuusimasut qulingiluat taakku Mariatut annertuumik kukkuluttuuteqarput — qujamasunnermik ersersitsinngillat. Qujasuissuseq taama ittoq ullumikkut silarsuarmi nalinnginnaaqaaq. Tamanna sumik pissuteqarpa?

Qujasuissutsimut pissutaasoq tunngaviusoq

Qujasuissuseq namminissarsiussutsimik pissuteqavippoq. Siuaasavut siulliit, Adam Evalu, assersuutigeriartigik. Jehovap taakku pinngortippai nammineq pissutsimi assinginik pissusilerlugit pilluarnissaannullu pisariaqartunik tamanik isumassorlugit. Ilaatigut angerlarsimaffilerpai paratiiserpalaartumik pitsaalluinnartunillu avatangiisilimmik, kiisalu siunertaqarluartumik nalerisimaarnartumillu suliassillugit. (1 Moses 1:26-29; 2:16, 17) Namminissarsiussusertilli Satanip eqeersarmagu aappariittut naalanngitsuliorput Jehovallu tukkussusianut asissuisumik qisuariarlutik. — 1 Moses 3:1-5; sarĸúmersitat 12:9.

Eqqarsaatigikkittaaq itsaq Israelikkut, Guutip immikkut pigisassamisut qinersimasai. Ukiumi 1513-imi u.n.s. nisanip 14-iani Israelikkut angajoqqaajusut qujamasussimassaqaat. Unnuamimi pingaarutilimmi tamatumani Guutip inngiliata ’Egyptenimi angajulliliat tamaasa toqorarpai’, Israelikkulli illui eqqortumik nalunaaqutserneqarsimasut qaangiinnarlugit. (2 Moses 12:12, 21-24, 30) Immamilu Aappalaartumi Faraop sakkutuuinit aniguisinneqareeramik uummatimikkut qujamasungaarlutik ’Mosesip Israelikkullu Jehova tussiarfigisimavaat’. — 2 Moses 14:19-28; 15:1-21.

Egyptenimilli aallarnerminnit sapaatit-akunnialuinnanngui qaangiuttut ’Israelikkut tamarmik naammagittaalliulerput oqalorujulerlutillu’. Tassa sivitsorianngitsoq naammagittaalliuleriikatapput. Egyptenimi, nunami inussiaaffimminni, ’igat neqiliuutit killingini issiasarsimanertik naammatsillutillu nerisarsimanertik’ ujariagilerpaat. (2 Moses 16:1-3) Tassa nalunanngitsumik namminissarsiussutsip qujamasunnermik iniariartortitsinissaraluarput ersersitsinissaraluarpullu akornusersinnaavaa.

Inuit tamarmik Adamimut naammalluinnanngitsumut kinguaajunertik pissutigalugu namminissarsioriartarneq qujasueriartarnerlu inunnguuseraat. (Rûmamiut 5:12) Qujasuissuseq tamanna aamma ullumikkut silarsuarmi inuit anersaavannut namminissarsiorpaluttumut ilaavoq. Silaannartut najuussukkatsitut anersaaq tamanna sumi tamaaniippoq, uagutsinnillu sunniisarluni. (Evfisumiut 2:1, 2) Taamaattumik isuma qujamasuppaluttoq ineriartortinniartariaqarparput. Qanoq ililluta taamaaliorniarsinnaavugut?

Isumalioqqissaarnissaq pisariaqarpoq

Oqaatsinik ujarlerfissiami Webster’s Third New International Dictionary-mi qujamasunneq nassuiarneqarluni tassaanerarneqarpoq „qujamasuuteqarneq: ajunngitsuliortumut akisilluni misigissutsit iluarinnittut, kissalaartut inussiarnersullu“. Misigissuseq tuuinnarlugu ikinneqarsinnaananilu qaminneqarsinnaanngilaq; inuup ilorpiaanit pilersarpoq. Qujamasunneq pissuserissaarniutaannaanngilaq, uummammit pisuuvoq.

Isuma qujamasuppaluttoq qanoq ililluta uummatitsigut pissuserilersinnaavarput? Biibilimi oqaatigineqarpoq misigissutsitta ilarpassui eqqarsaatitsinneersuusartut. (Evfisumiut 4:22-24) Qujamasussinnaaneq ilinniarsinnaajumallugu inussiarnerneq uagutsinnut ersersinneqartoq pingaartitsilluta isumaliutigeqqissaartariaqarparput. Tamatumunnga naapertuuttumik dr. Wayne W. Dyer, tarnikkut nappaatinik suliaqartoq, ima oqarpoq: „Misigissutsit pilersut tamavimmik eqqarsaatinik aallaaveqarput.“

Assersuutigalugu pinngortitarsuaq avatangiiserput pillugu qujamasunneq taasinnaavarput. Unnukkut qilak ulloriarpassualik allaaqqissoq isiginnaaraangakku qanoq misigisarpit? Kunngi Davidip tupigusungaarnini ima oqaasertalersimavaa: „Takugaangakkit qilak pigisat, assappit pinngortitaat, qaammat ullorissallu tassani ivertitatit — taava inuk suummat eqqaasarpiuk? Inuup qitornaa suummat isumagisarpiuk?“ Unnuup nipaannerani qilak ulloriarpassualik Davidimut ’oqalussimavoq’, taannalu ima allassimavoq: „Qilaap oqaluttuaraa Guutip naalannassusia, isuisimasup nalunaarutigaa assaasa piliaat.“ Sooruna qilak ulloriarpassualik Davidip taama maluginiartigisimagaa? Nammineq ima akivoq: „Naammassisatit tamaasa eqqarsaatigaakka, isumaliutigeqqissaarlugillu assappit suliaat.“ — Tussiaat 8:4, 5; 19:2; 143:5.

Aammattaaq Davidip ernerata, Salomonip, pinngortitarsuup tupinnartuisa isumaliutigeqqissaartarnissaata naleqassusia nalusimanngilaa. Assersuutigalugu, nunap inerititaqarnissaanut siallup pingaaruteqassusia pillugu taanna ima allassimavoq: „Kuuit tamarmik immamut kuuttuaraluarput imarli annerulersissinnaanagu. Kuuit kuuffitik taakkuusut kuuffigiuarpaat.“ (Nalunaajaasup oqaasii 1:7) Aap, siallup kuuillu nuna masatsereeraangassuk kaaviiaarneq ingerlaqqittarpoq; imeq aalanngortarpoq silaannarmullu qangattarluni nuianngortarluni. Nunarsuarmitaava qanoq isikkoqassagaluarpa kaaviiaarneq tamanna saliiuarnermik imermillu atoqqiiuarnermik nassatalik pisanngitsuuppat? Tamakku eqqarsaatigerusaaraangamigit Salomon qujamasuttarsimassaqaaq.

Inuup qujamasuttup aamma ilaquttani, ikinngutini ilisarisimasanilu pingaartittarpai. Asanninneq taakkua imminut ersersitaat malugisarpaa qujamasuutigisarlugulu.

Qujamasunnerit oqaatigisaruk

Oqaasinnguaq „qujanaq“ oqaatigiuminartorujussuuvoq, ulluinnarnilu taamatut oqarnissamut periarfissarpassuaqartarpoq. Qujaneq piviusoq nutaannguallannarlunilu uummatikkut nuannaajallannartuuvoq. Assersuutigalugu, matumik mappiussisumut imaluunniit katatamik tunniussisumut qujaneq isumalerujussuuvoq. Pisiniartitsisumut, saqisumut allakkanilluunniit aatsisartumut qujanikkut inuuneq oqilisinneqarsinnaavoq.

Assiliaaqqamik qujassummik allagaqarneq inussiarnisaarfigineqarsimanermut qujaniariaasiusinnaavoq pisariillunilu pitsaasoq. Assiliaaqqat pisiarineqarsinnaasut ilarpassui oqaasertaqartarput qujaniarnermik kusanartumik ersersitsisunik. Isumatusaarnerussannginnerpali aamma nammineq oqaatsinik oqaasertalerlugu qujamasunneq ersersikkaanni? Inuit ilaat assiliaaqqamik oqaasertaleriikkamik pinnatik namminneq allagaqarumanerusarput. — Ussatit 25:11.

Qujamasuffiginerpaasassavut tassaapput ilaquttavut qaniginerusavut. Nuliaalluartoq pillugu Biibilimi ima allassimavoq: „Uiata nersualaartarpaa.“ (Ussatit 31:28) Uiusoq nuliaminut qujamasunnerminik ilumoorluni ersersitsisaraangat angerlarsimaffimmi eqqissinermut nalerisimaarnermullu siuarsaataasannginnerpa? Uiusorlu nuliaminut pingaartitsisumut tikilluaqqusisumullu angerlaraangami nuannaartannginnerpa? Ullumikkut aappariittut inuuneq annertuumik tatineqarpoq, uisakajaarnerlu ulaperujunnerlu pissutigalugit puffaqqajaanarsinnaasarluni. Inuk qujamasuttumik isumalik isumassuisuuvoq, isumakkeerfiginnikkajuttuulluni allallu kukkunerinik uninngaviginninniartuunani.

Aammattaaq inuusuttut ilissi, angajoqqaassinnut qujamasunnermik ersersitsisarnissarsi eqqumaffigisariaqarparsi. Soorunami angajoqqaat kukkujuitsuunngillat, ilissinnulli iliuuserisimasaat pillugit qujasuitsumik iliornissamut pissutissaqanngilaq. Asanninneq isumassuinerlu inunngornissinniilli angajoqqaassi ersersittarsimasaat nalilerujussuuvoq. Tamatumalu saniatigut Guuti pillugu ilinniartissimappasi qujamasunnissamut suli pissutissaqarneruvusi.

Tussiaat 127:3-mi allassimavoq: „Ernerit tassaapput [Jehovap] tunissutai.“ Taamaattumik angajoqqaat meeqqatik suunngitsut pillugit oqqateqatigiuaannarnagit taakkuninnga nersualaarinninnissaminnut periarfissarsiortuartariaqarput. (Evfisumiut 6:4) Aap, angajoqqaat meeqqanik nakkutigisaminnik qujamasuttumik isumaqalernissaannik ikiuinissartik immikkut pisinnaatitaaffigaat annertooq! — Naleqqiuguk Ussatit 29:21.

Guutimut qujamasunneq

Jehova Guuti tassaavoq ’tunissutinik tamanik ajunngitsunik tunniussanillu tamanik naammalluartunik’ tunisisoq. (Jâko 1:17) Inuuneq tunissutaavoq immikkorluinnaq ittoq, pigisavummi tamarmik imaluunniit iliuuserilersaakkavut tamarmik naleerutissagaluarput inuunerput annaagaluarutsigu. Biibilimi kajumissaarneqarpugut eqqaamaqqullugu Jehova tassaammat „inuunerup puilaffia“. (Tussiaat 36:6, 8, 10; apustilit suliait 17:28) Guutimut qujamasuttunngorsinnaajumalluta uagutsinnut tunniussai tamaasa, timikkut anersaakkullu uagutsinnik uumatitsisut, isumaliutigeqqissaartariaqarpavut. (Tussiaat 1:1-3; 77:12, 13) Taamatut uummatikkut qujamasuttuunerup killissavaatigut pingaartitsinitsinnik oqaatsikkut iliuutsitsigullu ersersitsisarnissatsinnut.

Guutimut qujamasunnitsinnik nalunaatsumik ersersitsissutigisinnaasarput tassaavoq qinnut. Qanortoq Daviditut oqarnissatsinnut killinneqartutut misigisa: „Angingaarput naammassisatit, [Jehova] Guutiga, angeqaat tupinnartuliatit pillutalu pilersaarutitit, ilinnut naleqqiunneqartoqarsinnaanngilaq! Oqaluttuaralugillu tusartikkusukkaluarpakka, amerlavallaaramilli taagorneqarsinnaanngillat.“ — Tussiaat 40:6.

Davidip aamma aalajangiusimasimavaa Guutimut qujamasunnermi ersersinnissaa allanut oqaatigisarneratigut. Ima oqarsimavoq: „[Jehova], qutsavigissavakkit uummatikkut iluunngarlunga, tusarliullugit tupinnartuliatit tamaasa.“ (Tussiaat 9:2) Qujamasunnitsinnik Guutimut ersersitsiniutigisinnaasatsinni pitsaanerpaajugunartoq tassaavoq taassuminnga allanut oqaluttuarinninneq sallusuissummillu taassuma oqaasianiittumik oqaluussissutiginninneq. Taamaaliortarnerpullu aamma inuunermi allatigut qujamasuttuunissatsinnut iluaqutigissavarput.

Jehova oqarpoq: „Qujaniutinik pilliisup ataqqivaanga, aqqutikkut ajunngitsukkut ingerlasumut annaassinissara takutissavara.“ Qanortoq nuannaarneq Taassumunnga qujamasunnermik qamannga pisumik ersersitsinikkut pilersartoq misigisaruk. — Tussiaat 50:23; 100:2. (wE 15/2 98)

[Qupp. 7-imi assiliartaq]

Inuuneq Guutimit tunissutaavoq

Qujassutit ilinninngaanneersoorpalaartiguk