’Sallusuissutip inussiaajunnaarsissavaasi’
’Sallusuissullu ilisarissavarsi, sallusuissutillu inussiaajunnaarsissavaasi.’ Jesus taama oqarsimavoq inunnut amerlasuunut naalaffimmi Jerusalemimiittumi ajoqersuitilluni. (Juánase 8:32) Jesusip apustiliisa ingerlaannaq paasivaat oqaluussissutigisaa tassaasoq sallusuissut. Takussutissanik annertuunik takunnissimapput ajoqersuisortik tassaasoq Guutimit pisoq.
ULLUMIKKUT ilaasa sallusuissut Jesusip eqqartugaa takujuminaatsippaat. Pruffiitip Esajasip nalaanisulli ullumikkuttaaq ’ajortunik ajunnginneraasoqarpoq ajunngitsunillu ajorneraasoqarluni, taartumik qaamasuutitsisoqarluni qaamasumillu taartuutitsisoqarluni, mamaatsumik tungusunnitsuutitsisoqarluni tungusunnitsumillu mamaatsuutitsisoqarluni’. (Jesaja 5:20) Isummat, ilisimaqqissaarniutit inooriaatsillu amerlasoorpassuit ullutsinni atuummata, amerlasuut misigipput suut tamarmik assigiinngitsumik isigineqarsinnaasut, taavalu aalajangersimasumik sallusuissuteqanngitsoq.
Jesus tusarnaartiminut oqarami sallusuissutip inussiaajunnaarsissagai, akipput: ’Abrahamip kinguaaraatigut, inussiaatigineqanngisaannarpugullu; soormi taava oqarpit: „Inussiaajunnaassaasi?“’ (Juánase 8:33) Misigisimapput kimilluunniit sumilluunniillu aniguisinneqartariaqaratik. Kisianni Jesusip nassuiaappai: ’Ilumut, ilumut oqarfigaassi: Ajortimik ileqqulik ajortip inussiaatigaa.’ (Juánase 8:34) Sallusuissut Jesusip eqqartugaa periarfissaqartitsivoq ajortimit aniguisinneqarnissamik. Jesus oqarpoq: ’Taamaattumik ernerup inussiaajunnaarsippasi inussiaajunnaarluassaasi.’ (Juánase 8:36) Sallusuissut inunnik inussiaajunnaarsitsisartoq tassaavoq Jesus Kristus, Guutip ernera, pillugu sallusuissut. Jesusip inuunerminik naammalluinnartumik pilliuteqarsimanera aatsaat upperigaanni ajortimit toqumillu aniguisitaasoqarsinnaavoq.
Piffissami allami Jesus oqarsimavoq: ’Sallusuissutsikkut iluarsakkit; oqaatsisit sallusuissutaapput.’ (Juánase 17:17) Guutip oqaasia, Biibilimi oqariartuut, sallusuissutaavoq inunnik upperisapalaanit eqqunngitsumillu upperisarsiornermit inussiaajunnaarsitsisinnaasoq. Biibili Jesus Kristus pillugu sallusuissummik imaqarpoq, inuillu tassunga upperinnilersissinnaavai ersarissumillu siunissamut neriuuteqalersillugit. Taamaattumik sallusuissut Guutip oqaasianeersoq ilinniarlugu pissarsinaqaaq.
Pingaaruteqarpa sallusuissut ilisimassallugu? Ullumikkut upperisarsiortut amerlasuut Biibilimik maleruaaneraasut, inuit isumaliuutersuutaannit ileqqutoqaannillu annertuumik sunnerneqarsimapput. Upperisarsiornikkut siuttuusut soqutigineruaat inunnit akuerineqarnissartik oqariartuutip eqqorluartup tusarliunnissaanit. Ilaat isumaqarput pallorfiginninneq qanoq ittorluunniit Guutip akuerigaa, taamaallaat ilumoortuugaanni naammattoq. Kisianni Jesus Kristus nassuiaasimavoq: ’Ullulli nalliukkumaarput, maannakkummi nalliussimapput, taava pallorfiginnittut ilumoortut Ataataq pallorfigissavaat anersaakkut ittumik ilumoortumillu; pallorfigisinimi taamaattut Ataatap piumavai.’ — Juánase 4:23.
Guutip iluarisaa naapertorlugu pallorfigerusukkutsigu sallusuissut ilisimasariaqarparput. Tamanna pingaaruteqarluinnarpoq, naassaanngitsumimmi pilluarnissatsinnut aalajangiisuuvoq. Taamaattumik immitsinnut aperisariaqarpugut: ’Guutip akuerisinnaasaanik pallorfigaara? Ilumoorlunga sallusuissut Guutip oqaasianeersoq ilinniarusuppara? Imaluunniit qunugaara misissueqqissaarneq qanoq takutitsiumaarnersoq’?