Guuti kinaava?
APEQQUT tamanna qanoq akissaviuk? Inuit amerlanersaasa Guutip piunera upperaat, tunniusimaffigalugulu mianeraat. Inuppassuilli ilisarisimalluanngilaat. Illit Guuti upperigukku, apeqqutit uku qanoq akissagaluarpigit?
1. Guuti kinaassusiliviua?
2. Guuti ateqarpa?
3. Jiisusi Guutiua Ajugaqanngitsoq?
4. Guutip soqutigaanga?
5. Pallorfiginneriaatsit tamaasa Guutip akuerai?
Apeqqutit taakku allanut akeqqugukkit assigiinngitsorpassuarnik akissutisissagunarputit. Taamaattumik tupinnanngilaq Guuti pillugu oqaluttualiat isummallu assigiinngitsorpassuit piffissap ingerlanerani pilersimammata.
Sooq apeqqutinut akissutit pingaaruteqartut
Jiisusip Kristusip arnaq uppertoq puilasuliap eqqaani oqaloqatigigamiuk Guuti pillugu sallusuissutinik ilisimanninnissap pingaaruteqassusia erseqqissarpaa. Arnap taassuma Samariamiuusup Jiisusi pruffiitiusoq miserratiginngilaa. Isumakuluuteqarporli. Jiisusip upperisaa arnap upperisaanit allaaneruvoq. Tamatuminnga isumakuluutiginninnerarmat Jiisusip unneqqarilluni ima oqarfigaa: “Ilissi ilisimanngisarsi pallorfigaarsi.” (Johannesi 4:19-22) Erseqqippoq Jiisusi isumaqanngitsoq uppertut tamarmik Guuti ilisarisimalluavikkaat.
Jiisusi taamatut oqarmat, imaappa Guutimik ilisarisimannilertoqarsinnaanngitsoq? Naamik, Jiisusip nangilluni arnaq ima oqarfigaa: ‘Ilumoortumik pallorfiginnittut Ataataq pallorfigissavaat anersaakkut ilumoornikkullu. Ataatarmi taamaattunut pallorfigeqquvoq.’ (Johannesi 4:23) Illit Guutimik “anersaakkut ilumoornikkullu” pallorfiginnittut ilagaatsit?
Pingaaruteqartupilussuuvoq apeqqummut tamatumunnga akissummik illit ilisimanninnissat. Sooq? Qinnummi Jiisusip eqqorluartumik ilisimasaqartariaqarneq erseqqissarpaa ima oqarluni: “Inuunerlu naassaanngitsoq tassaavoq ilinnik, ilumut kisimi Guutiusumik aallartitannillu Jiisusi-Kristusimik, ilisimanninneq.” (Johannesi 17:3) Tassa Guuti pillugu sallusuissummik paasinninnissat siunissannut attuumassuteqarluinnarpoq!
Guuti pillugu sallusuissutip paasinissaa ajornanngila? Aap, ajornanngilaq! Sallusuissulli qanoq ilillutit paasisinnaaviuk? Jiisusi imminut pilluni ima oqarpoq: “Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.” (Johannesi 14:6) Aamma ima oqarpoq: “Ataataq kinaasoq Ernerup Ernerullu taassuminnga saqqummiiffigiumasaata kisimik nalunngilaat.” — Lukasi 10:22.
Guuti ilisarisimalerumallugu Jiisusip, Guutip ernerata, ajoqersuutai ilinniartariaqarpavut. Aap, Jiisusip ima neriorsorpaatigut: “Oqaasera aalajangiussimajuarussiuk ilumut ajoqersugarissavassi, sallusuissullu ilisimalissavarsi, sallusuissutsillu inussiaajunnaarsissavaasi.” — Johannesi 8:31, 32.
Taava apeqqutit tallimat eqqaaneqareersut Jiisusip qanoq akivai?
[Qupp. 4-mi assiliartaq]
Guuti ilisarisimarpianngisat pallorfigaajuk?