Jiisusip sumik ilinniartikkaatigut

Allanik qanoq pinnittarnissaq pillugu

Sooq inussiarnersuussaagut?

Inuit ilinnut inussiarniikkaluartut inussiarnerpit? Jiisusi ilaarusukkutsigu uumissortitsinnulluunniit inussiarnersuussaagut. Jiisusi ima oqarpoq: “Ilissinnik asannittut kisiisa asagussigit sukkut taava qutsavigisariaqassanerpisi? Ajortuliortummi aamma asannitsitik asasarpaat. . . . Akeqqasili asasigit . . ., Qutsinnerussaartullu qitornarilissavaasi, taannami qujasuitsunut ajortunullu ajunngitsuliortuuvoq.” — Lukasi 6:32-36; 10:25-37.

Allat sooq isumakkeerfigissavavut?

Kukkugaangatta Guutimit isumakkeerfigineqarusuttarpugut. Isumakkeerfigeqqulluta Guuti qinnuigisassagipput Jiisusip ilinniartippaatigut. (Matthæusi 6:12) Jiisusip aamma eqqaavaa allanik qanoq isumakkeerfiginnikkumatiginerput naapertorlugu taamaallaat Guutip isumakkeerfigissagaatigut. Ima oqarpoq: “[Inuit] unioqqutitsinerinik isumakkeerfigigussigit, taava Ataatassi qilammiittup aamma ilissi isumakkeerfigissavaasi. Inuilli isumakkeerfiginngikkussigit, taava aamma Ataatassi unioqqutitsinissinnik isumakkeerfigissanngilaasi.” — Matthæusi 6:14, 15.

Ilaqutariit qanoq pillualersinnaappat?

Jiisusi katinngisaannarpoq, taamaakkaluartorli qanoq ilaqutariittut pilluartoqalersinnaaneranik ilinniarfigisinnaavarput. Taassuma oqaatsimigut iliuutsimigullu maligassiorpaatigut. Immikkoortut tulliuttut pingasut eqqarsaatigikkit:

1. Angutip nuliani nammineq timimisut asasariaqarpaa. Jiisusi uiusunut maligassaavoq. Ajoqersukkani ima oqarfigai: “Inassummik nutaamik tunivassi: Asaqatigiissaasi.” Qanoq asaqatigiitsigissappat? Ima oqarpoq: “Soorlu uanga asagissi.” (Johannesi 13:34) Biibilimi takutinneqarpoq uiusut najoqqutassiaq taanna qanoq maleruarsinnaagaat: “Angutit, nuliasi asassavasi soorlu Kristusip ilagiit asagai imminullu tunniulluni taakku pillugit . . . Taamatut aamma uiusut nuliatik asassavaat namminneq timimittut. Nuliaminik asannittoq imminik asavoq. Inuummi timini uumissunngisaannarpaa, kisianni inuussutissittarpaa paaqqisarlugulu soorlu Kristusip ilagiit taama pisarai.” — Efesosimiut 5:25, 28, 29.

2. Aappariit imminnut ilumoorfigeqatigiittussaapput. Aappariinnerup avataatigut kinguaassiuutitigut atoqateqarneq Guutimut ajortuliorneruvoq ilaqutariinnillu aseruisarluni. Jiisusi ima oqarpoq: “Atuarsimanngilisiuk . . . ‘Tamanna pillugu angutip ataatani anaananilu qimassavai nulianilu attavigalugu, taakkulu marluk uininngussapput ataaseq’? Taamaattumik marluujunnaarlutik uiniulissapput ataaseq. Guutimmi ataqatigiilersitai inuup avissaartissanngilai. . . . Oqarfigaassimi: Kinguaassiuutitigut inuunerlunnerunngitsumik peqquteqarluni avittoq allamillu nuliartoq allasiorpoq.” — Matthæusi 19:4-9.

3. Meeqqat angajoqqaaminnut naalattussaapput. Jiisusi naammalluinnartuugaluarluni angajoqqaanilu naammalluinnanngitsuugaluartut meeraagallarami naalappai. Jiisusi aqqaneq marlunnik ukioqarami Biibilimi ima allaatigineqarpoq: “[Nazaretimut angajoqqaani] angerlaqatigai naalallugillu.” — Lukasi 2:51; Efesosimiut 6:1-3.

Sooq najoqqutassiat taakku malillugit iliussaagut?

Ajoqersukkaminut ilinniartitsissutigisani pillugit Jiisusi ima oqarpoq: “Tamanna ilisimagussiuk taava pilluassaasi taamaaliorussi.” (Johannesi 13:17) Allanik qanoq pinnittarnissatsinnik Jiisusip siunnersuutai malillugit iliortariaqarpugut kristumiuuniarluta ilumoortut. Ima oqarpoq: “Asaqatigiikkussi tamatumuuna tamarmik paasissavaat ajoqersugarigissi.” — Johannesi 13:35. (wp08 08/01-E)

Paasissutissat amerlanerusut atuarneqarsinnaapput kapitali 14-imi atuakkami Biibilimi sorpiaat ajoqersuutigineqarpat?-mia

[Quppernerup ataani ilanngussaq]

[Qupp. 26, 27-mi assiliartaq]

Jiisusip ernermik tammaraluartumik kingornussaminik atulussinnaasumik assersuusiaanit paasivarput inussiarnersuunerup isumakkeerfiginninnerullu pingaaruteqassusiat. — Lukasi 15:11-32

[Qupp. 27-mi assiliartaq]

Aappariit imminnut ilumoorfigeqatigiittussaapput