Aaperaat — angut uppertoq

Aaperaat unnukkut allaaqqissoq tupermi silataaniippoq. Qilaap ulloriai qaammaarissut isigitillugit kinguaami ullorissatut amerlatigilerumaartut Guutip neriorsuutaa eqqarsaatigaa. (1 Mosesi 15:5) Aaperaamut ullorissat Jehovap neriorsuutaanik eqqaasitsissutaapput. Aamma uppernarsaataapput; Jehovami nunarsuarmik, avataarsuarujussuanik taakkunaniittunillu tamanik pinngortitsinissaminut pissaaneqarami, aamma Aaperaat Saralu qitornartaartissinnaassavai, ilaa? Aaperaat taama uppertigaaq.

UPPERNEQ SUUA? Biibili naapertorlugu “upperneq tassaavoq neriugisamik tatiginnilluinnarneq, takunngisamik qularuteqannginneq”. (Hebræerit 11:1) Inuup Guutimik upperinnittup taassuma neriorsuutaasa eqquunnissaat isiginiarnerusarpai, eqquunnissaat qularutiginngingaaramiuk eqquutereersutullusooq isigalugit.

UPPERNINI QANOQ ERSERSIPPAA? Aaperaap Guutip neriorsuutaanik upperinninnini iliuutsimigut ersersittarpaa. Jehova neriorsuisimavoq nuna alla Aaperaamut takutikkumallugu, Aaperaallu tamanna upperilluinnarlugu nuna inunngorfini qimappaa. Uppernikkut Kana’anikkut ingerlaarpoq qularutiginagu kinguaami nuna tamanna nunagilerumaaraat. Uppernikkullu Aaperaap naalalluni erni Iisaaq pilliutigiumavaa qularutiginagu pisariaqassappat Jehovap Iisaaq toqusunit makitikkumaaraa. — Hebræerit 11:8, 9, 17-19.

Aaperaap siunissaq eqqarsaatigineruaa, pereersut pinnagit. Nulianilu Urimi Kana’animinngarnit ilorrisimaarnerullutik inuusimasinnaapput, nunali “qimatartik” eqqarsaatigiuaannanngilaat. (Hebræerit 11:15) Kinguaatillu Guutimit qanoq pilluaqqusaajumaarnertik pingaartinneruaat. — Hebræerit 11:16.

Aaperaap uppernera tunngaveqarluarpa? Aap. Jehovap neriorsuutini tamaasa eqquutitippai. Aaperaat kinguaarpassuaqalerpoq; inuiaqatigiinnik Israelikkunnik taaguuteqalerumaartunik. Israelikkullu najugaqalerput Kana’animi, nunami Jehovap Aaperaamut neriorsuutigisaani. — Josva 11:23.

SUNIK ILINNIARFIGISINNAAVARPUT? Jehovap neriorsuutini eqquutitikkumaarai upperilluinnarsinnaavarput. Isumaqarsinnaavugut neriorsuutaasa ilaat ajornartuusut, tatigisinnaavarpulli ‘Guutimut ajornartoqanngitsoq’. — Matthæusi 19:26.

Aaperaamik oqaluttuamit aamma paasivarput pereersut pinnagit siunissami nuannaarutigisinnaasavut isiginiarnerussagivut. Tamanna angutip Jasonimik atillip ilikkarsimavaa. Nappaateqarnini pissutigalugu timaa tamarmi nukillaarsimasunngorsimavoq. “Nassuerutigisariaqarpara ilaannikkut pereersut eqqarsaatigisarakkit,” oqarpoq, imalu nangilluni: “Annikitsualuit maqaasinerpaavakka, soorlu nuliannik, Amandamik, pakkussisarnera.”

Taamaakkaluartoq Jasonip upperilluinnarpaa Jehovap eqquutitikkumaarai neriorsuutini — aamma uppertut aalajaatsullu peqqilluinnarlutik naassaanngitsumik inuujumaarnerannik nunarsuullu qanittukkut paratiisinngortinnissaanik.a (Tussiaat 37:10, 11, 29; Esaja 35:5, 6; Saqqummersitat 21:3, 4) “Imminut eqqaasittarpunga pitsaanerpaat suli pisassaralugit,” Jason oqarpoq, imalu nassuiaalluni: “Qanittukkut — uippakajaarneq, isumakuluutit, nikallunganeq imminullu pisuutinneq — tamarmik peerullutik atuuteqqinngisaannassapput.” Aaperaap upperneranik malinnilluassusia!

[Quppernerup ataani ilanngussaq]