Bibelimik atuaqqissaaqatigisavit uummataa killittaruk
1 Ataatami piumasaanik iliornissi Jesusip „kajungerisaraa“, aammattaaq allat Jehovamik kiffartuussilernissaannik ikiuisinnaanini nuannaarutigisarsimavaa. (Tuss. 40:9; Mat. 9:37, 38; 11:28-30) Jesusilli tusagassamik tusarliinissaannaq naammaginngilaa. Allat oqaluussinermut peqataalernissaannik kajumissaassagutsigik atuaqqissaaqatigisavut uummataasigut killittariaqarpavut. Tamatumani atuakkamik atuaqatiginissaat akissutissaanillu akitittarnissaat naammanngilaq. Uummataasigut killikkumagutsigik piareersarnitsinni eqqarsaatigereertariaqarparput qanoq ililluta atuaqqissaakkaminnik paasinninnissaannik pingaartitsilernissaannillu ikiorsinnaanerlugit.
2 Jesusip inuit allat inuttut ataasiakkaatut soqutigisarpai. Paasinnittaasiat sumiginnarneq ajorpaa. Oqaluuserisat ajornakusoortut paasiuminarsarniarlugit assersuutinik atuisarpoq. (Mat. kap. 5-7) Ajornartorsiutit takkussinnasut siumut ilisimareertarpai siusinaarlunilu naleqquttunik siunnersuisarluni. (Mák. 9:33-37) Oqaluuserisani tusarnaartimi paasinngikkaangassuk naammagittarluni nassuiaattarpai sunalu pinerlugu assersuusiorluni paasitinniartarlugit. (Mat. 16:5-12) Jesusip itisuumik ilumoortumillu inunnik allanik soqutiginninnerata ima aperitissavaatigut: ’Uanga atuaqqissaaqatigineqartuuguma atuakkakka paasisinnaajumallugit kajumississutigisinnaajumallugillu qanoq ilinniartinneqassagaluarpunga?’ — Takuuk 1971 Yearbook, qupp. 246-7.
BIBELI INNERSUUSSUTIGISARUK
3 Aappariit aperineqaramik sooq nalunaajaaffigineqarnertik taama kajumitsigalutik qisuariarfigisimaneraat, akipput: „Bibelimimi allagami.“ Aap, Guutip oqaasia uummammik killiisinnaavoq. (Epr. 4:12) Taamaattumik Bibeli innersuussutigikulasaruk, immikkoortunilu innersuussutigineqartut quppertakkit. Atuaqqissaaqatigisat ikiortaruk paasitinniarlugu sooq iliuuseq aalajangersimasoq silatusaartuusoq sianiitsuliornerusorluunniit. Tunngaveqartumik eqqarsalersinniartaruk Guutip inatsisaanut naalannerput qanoq ililluni uagutsinnut iluaqutaanersoq. — Takuuk Vagttårnet 1. novemberi 1984-imeersoq, qupp. 15-16.
4 Oqaluussisartorpassuit paasisimavaat ’Ræsonnerebogi’ Bibelimik atuinissamut ikiuutaalluartuusoq. Assersuutigalugu, ’Paratiisilersaarummi’ qupperneq 124-mi, immikkoortoq 13, atuartillugu immaqa atuaqqissaaqatigineqartoq aperisinnaavoq sooq palasi oqartarnersoq meeqqat toqusartut Guutip qilammi ilagerusummagit. ’Ræsonnerebogimi’ qupperneq 79-imi, immikkoortumi „Sooq meeraaqqat toqusarpat?“-mi, paasissutissanik oqaloqatigiissutiginninnerup erseqqissarpaa ilaqutariinnik aaqqissuussaanerup ataavartinnissaanik Jehovap kissaataa. Tamatuma immaqa oqaloqatigineqartoq Jehovap inuiannik asanninneranik qularunnaarsissinnaavaa.
APERISARIT
5 Jesusip apeqqutit pitsaasut ikiortigalugit tusarnaartini tunngaveqartumik eqqarsalersittarsimavai. (Mat. 17:24-27) Ilinniartitap akissutai ikiortigalugit paasisinnaavarput suna ilikkarsimaneraa isumallu bibelerpalaanngitsut suut suli piginerai. Immaqa tupamik ajornartorsiuteqarpoq. ’Paratiisilersaarummi’ kapitali 27 atuaqqissaaqatigiissutigereersimavarsi aammalu paasissutissat Vågn op! 8. juli 1989-imeersumi, qupperneq 13-16-imiittut, sammereersimavasi, pujortartarunnaarnissallu pisariaqassusia paasereersimavaa. Ilumulli qularutigiunnaarluinnarsimanerpaa uerisimanermi minguttuup tamatuma taamaatittariaqarnera? Ima aperisinnaavat: „Illit nammineq qanoq isumaqarpit? Massakkorluinnaq taamaatissagaluaruit, ikinngutivillu ilaasa tamanna pillugu quiassuaatigissagaluarpatsit pujortartaannartinniarsaralutillu, taava qanoq iliussagaluarpit?“
6 Mianersoqqusinerli pissusissamisoorpoq. Apeqqutit taamaattut tupaallaatigisannik immaqaluunniit pakatsissutigisannik akineqarsinnaapput. Taava? Misigissutsinut attuumassuteqartoq eqqartorneqarpat ima oqaannarsinnaavutit: „Ajunngilaq, ingerlaqqiinnarta, kingorna uterfigeqqikkumaarparput.“ Imaluunniit oqarsinnaavutit: „Aap, eqqarsaatissiivoq, ilaa?“ (Juán. 16:12) Atuaqqissaaqatigisavit qanorpiaq isumaqarnera nalunnginnakku paasissutissat taassuma siumukarnissaminut ikiortigisinnaalluarnerusai ujarsinnaavatit. Soqutiginnittup uummataa killillugu qanoq iliuuseqalernissaa anguniartariaqarparput, Jehovalu qinnuigisaannarlugu taassuma anersaakkut ineriartornissaanik. — 1 Kor. 3:5-9.
7 Bibelimik atuaqqissaaqatiginnikkaangavit eqqaamajuaannaruk atuaqqissaarneqartut pillugit atuaqqissaaqatigisavit eqqarsalersinniarnernissaanut piffissap pisariaqartup atornissaa. Atuaqqissaaqatigisavit pisariaqartitaanut ilinniartitseriaatsit naleqqussartaruk. Jehova Guutimik, oqaasianik Bibelimik peqatigiissortaanillu uummatimigut asannilernissaanik ataqqinnilernissanillu ikioruk. Atuaqqissaaqatigisatta uummataasigut killinnerisigut Kristusimut ajoqersuganngornissaannik sapinngisarput tamaat ikiortigittoq. — ap. sul. 2:41-46.