Ilagiit atuakkamik atuaqqissaaqatigiittarnerat ilinniartitsinermut siuarsaataavoq
1 Ilagiit atuakkamik atuaqqissaaqatigiittarnerat Jehovap peqatigiissortaasa ilinniartitsineranni pingaaruteqartorujussuuvoq. Atuaqqissaaqatigiit siammarlugit agguataarneqarsimapput, taamaalilluni kikkunnit tamanit peqataaffigineqarnissaat ajornannginnerulerluni. Immaqa soqutiginnittut peqataanissaminnik qaaqquneqarnertik akueriumanerusarpaat najukkaminnut ungasinngitsumi atuaqqissaaqatigiinneq ingerlanneqartarpat.
2 Atuaqqissaaqatigiinni ataasiakkaani oqaluussisartut sapinngisamik amerlavallaannginnissaat ilagiit isumaginiartarpaat. Taamaalilluni atuaqqissaarnermik aqutsisoq oqaluussisartunik ataasiakkaanik inuttut ikiuinissaminut periarfissagissaarnerusarpoq. Ilavut ilikkajapput ilaalli ilikkajanatik. Naak piareersarsimagaluarlutik paasiuminaatsitaqartoqarpat atuaqqissaarnermik aqutsisup ataatsimiinneq naappat sukumiisumik nassuiaassinnaavai. Kiisalu atuaqqissaaqatigiinni ikittunnguakkuutaani amerlanerusoriarluni akinissamut allassimaffinnillu atuaanissamut periarfissaqarluartarpoq. Aalajangersimasumik akisarnikkut atuaqqissaarnermut peqataasarpit? Nammineq oqaatsinnik akiniartarpit? Akiumatussutsit ilinnut allanullu iluaqutaasinnaavoq. Piareersarninni paasinnissinnaassutsit atorlugu paasiniartaruk atuaqqissaakkanni aalajangersimasut qanoq ilillutit nammineq inuttut atorsinnaanerlugit. — Epr. 5:14.
3 Atuaqqissaarnermik aqutsisup ilinniartitseriaasiisa maluginiaqqissaartarnerisigut soqutiginarnerusumik paasisaqarnanerusumillu Biibilimik atuaqqissaaqateqartarnissat ilinniarsinnaavat. Immikkoortut qatanngummit angummit piginnaassuseqarluartumit atuarneqareeraangata apeqqutit sammineqartarput. Aqutsisup kikkut tamaasa peqataanissaannik kajumissaartarpai. Piffissaq naapertorlugu akeqattaareeraangata allassimaffinnut ilanngunneqarsimasunut atatillugu apeqquteqartarpoq, paasinarsisillugu uagutsinnut ullumikkut inuusunut qanoq pingaaruteqarnerat. (Naleqqiuguk Nehemja 8:8.) Immaqa ilaannikkut nammineq naatsunnguamik oqaaseqartarpoq imaluunniit ikiuutissamik apeqquteqartarluni pingaarnersaat erseqqissarniarlugit. Assersuutit ikiortigalugit immaqa paasisinnaanerulertarparput sammisavut qanoq nammineq inuunitsinnut attuumassuteqartut.
4 Sumiiffiit ilaanni ilagiit atuakkamik atuaqqissaaqatigiinnerannut najuuttartut ikittuararsuupput. Illit aalajangersimasumik aggertarpit? Taamaanngippat pingaartorujussuarmik arajutsisaqarputit. Atuakkamik atuaqqissaaqatigiittarnermik aaqqissuussaq Jehovap uagutsinnik isumassuineranut ilaavoq. (1 Pîtr. 5:7) Jehovap kissaatigaa siuneqassutsikkut ilisimassutsikkullu siumukassasugut anersaakkut nukittuunngorniassagatta. Satanilli akerlianik kissaatigaa anersaakkut siumukarnaveersaartinnissarput. Taassuma sanngiillisikkumavaatigut Jehovamut taassumalu peqatigiissortaanut tamakkiisumik atorneqarsinnaaqqunata. Tamanna pitsaaliniaruk! Atuakkamilli atuaqqissaaqatigiit asannittut ’assuarnaatsutut katisimasarnerat’ kajumississutigalugu Jehova unnersiutigiuaannaruk. — Naleqqiuguk Tussiaat 111:1.
5 Angerlarsimaffimmi atuakkamik atuaqqissaaqatigiiffiusartumi katersuunnerit amerlanertigut ingerlanneqartarput, piffissani oqaluussisartut iluarinerusaanni. Sapaatip-akunnerata qeqqaniusinnaavoq, naanerani imaluunniit unnukkut. Atuakkamik atuaqqissaaqatigiinnermut aqutsisartup oqaluussiffissaqarnissaq isumagisarpaa, najuutinngitsuussagaluarunilu aqutsisoqarnissaq isumagisarlugu. Katersuunnerit minuttinit 10-15-init sivisunerusariaqangillat. Ullormut allassimaffik oqaluussinermut attuumassuteqarpat atuakkamik atuaqqissaaqatigiinermik aqutsisartup naatsunnguamik oqaloqatigiissutigitissinnaavaa qanorlu ililluni oqaluussinermi atorneqarsinnaanersoq marlussunnik saqqummiussisitsilluni. Aamma qaammammut neqeroorut qanoq saqqummiuneqarsinnaasoq naatsumik takutissinnaavaa.
6 Atuakkamik atuaqqissaarnermik aqutsisartup atuaqqissaaqataasartunik tamanik suleqatiginninnissani ilungersuutigisariaqarpaa, aammalu naleqquttumik kajumissaarisarlunilu ilinniartitsisarluni — Naleqqiuguk Mákorse 3:14; Lúkarse 8:1. (kmD 9406: Menighedsbogstudiet . . .)