Nakkutilliisut siuttuusut — Atuakkamik atuaqqissaarnermi aqutsisut
1 Atuakkamik atuaqqissaarnermi aqutsisutut sulineq utoqqaanertamut ilagiinniluunniit kiffartortumut immikkut pisinnaatitaaffiuvoq. Tamanna ilutigalugu atuaqqissaaqatigiit anersaakkut pisariaqartitaannik isumaginninneq akisussaaffiuvoq annertooq. Atuakkamik atuaqqissaarnermi aqutsisup suliassai pingasunngorlugit avinneqarsinnaapput.
2 Ilinniartitsilluarneq: Sapaatit-akunneri tamaasa atuaqqissaassutissamik atuaqqissaaqatigiinnut sammisaqartitsinissamut piareersaqqissaarneq pisariaqartarpoq. Aqutsisup atuaqqissaaqataasut ataasiakkaat sammineqartumik paasisaqarnissaat anguniartarpaa. Oqaaseqarujussuarnissaminut taarsiullugu pisariaqaraangat saniatigut apeqquteqartarpoq sammineqartumi pingaarnerit saqqummersinniarlugit. Tamaasa peqataatinniaatigalugit atuaqqissaarnermik soqutiginartuutitsiniarneq ilikkagaqarnartuutitsiniarnerlu unamminiarnartuuvoq. Anguniagarisarpaa allat anersaakkut ineriartortinnissaat, sammineqartup nalinganik atoriaannaasumik erseqqissaanissani kiisalu sammineqartup tusarnaartunik isumakkut uummatikkullu killiinissaa. — 1 Tás. 2:13.
3 Paarsisutut sulineq: Atuakkamik atuaqqissaarnermi aqutsisup assigaa „anorersuarmut oqquiffik sialussuarmullu oqqiffik“. (Jes. 32:2) Atuaqqissaaqataasartunik tamanik isumassuilluartarpoq nikallungasunullu anersaakkut ikiuinissani eqqumaffigisarlugu. — Hes. 34:15, 16; 1 Tás. 2:7, 8.
4 Oqaluussinermik aallussilluartoq: Atuakkamik atuaqqissaarnermut aqutsisup atuaqqissaaqataasartut tamarmik oqaluussinermut tamakkiisumik peqaataasinnaaqqullugit katersuunnissat nalunngeqatiginnissuseqarluarluni pilersaarusiorniartarpai. Oqaluussinermi siuttuusarpoq, aalajangersimasumik, eqiasuitsumik angorniortumillu kiffartornermigut atuaqqissaaqataasartunik kajumissisitsisarami. (Kul. 4:17; 2 Tás. 3:9) Atuaqqissaaqataasartunik ataasiakkaanik tamanik oqaluussiartoqateqartarnissani isumagisarpaa. Oqaluussisartutut ilinniartitsisutullu pikkorissarumagutta atuakkamik atuaqqissaarnermi aqutsisup ikiorsinnaavaatigut. — 1 Tim. 4:16; 2 Tim. 4:5.
5 Inuit tunissutaasut uagutsinnik anersaakkut ikiuinissaminnut asannittumillu annertoqqusersuinissaminnut piareersimasut taakkua pilluaqqussutaapput annertuut. (1 Tás. 5:14) Qanortoq atuakkamik atuaqqissaarnermut peqataajuaannarnitsigut aalajaallutalu oqaluussinermi suliniuteqartuarnitsigut Jehovap aaqqissuussaanik pitsaasumik tamatuminnga pingaartitsinerput ersersittartigu. — Epr. 10:25.